| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
২. দুতিযৰগ্গো
2. Dutiyavaggo
১. সনঙ্কুমারসুত্তং
1. Sanaṅkumārasuttaṃ
১৮২. এৰং মে সুতং – একং সমযং ভগৰা রাজগহে ৰিহরতি সপ্পিনীতীরে। অথ খো ব্রহ্মা সনঙ্কুমারো অভিক্কন্তায রত্তিযা অভিক্কন্তৰণ্ণো কেৰলকপ্পং সপ্পিনীতীরং ওভাসেত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি। একমন্তং ঠিতো খো ব্রহ্মা সনঙ্কুমারো ভগৰতো সন্তিকে ইমং গাথং অভাসি –
182. Evaṃ me sutaṃ – ekaṃ samayaṃ bhagavā rājagahe viharati sappinītīre. Atha kho brahmā sanaṅkumāro abhikkantāya rattiyā abhikkantavaṇṇo kevalakappaṃ sappinītīraṃ obhāsetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhito kho brahmā sanaṅkumāro bhagavato santike imaṃ gāthaṃ abhāsi –
‘‘খত্তিযো সেট্ঠো জনেতস্মিং, যে গোত্তপটিসারিনো।
‘‘Khattiyo seṭṭho janetasmiṃ, ye gottapaṭisārino;
ৰিজ্জাচরণসম্পন্নো, সো সেট্ঠো দেৰমানুসে’’তি॥
Vijjācaraṇasampanno, so seṭṭho devamānuse’’ti.
ইদমৰোচ ব্রহ্মা সনঙ্কুমারো। সমনুঞ্ঞো সত্থা অহোসি। অথ খো ব্রহ্মা সনঙ্কুমারো ‘‘সমনুঞ্ঞো মে সত্থা’’তি ভগৰন্তং অভিৰাদেত্ৰা পদক্খিণং কত্ৰা তত্থেৰন্তরধাযীতি।
Idamavoca brahmā sanaṅkumāro. Samanuñño satthā ahosi. Atha kho brahmā sanaṅkumāro ‘‘samanuñño me satthā’’ti bhagavantaṃ abhivādetvā padakkhiṇaṃ katvā tatthevantaradhāyīti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. সনঙ্কুমারসুত্তৰণ্ণনা • 1. Sanaṅkumārasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. সনঙ্কুমারসুত্তৰণ্ণনা • 1. Sanaṅkumārasuttavaṇṇanā
