| Library / Tipiṭaka / তিপিটক • Tipiṭaka / পেতৰত্থু-অট্ঠকথা • Petavatthu-aṭṭhakathā |
২. সাণৰাসিত্থেরপেতৰত্থুৰণ্ণনা
2. Sāṇavāsittherapetavatthuvaṇṇanā
কুণ্ডিনাগরিযো থেরোতি ইদং সত্থরি ৰেল়ুৰনে ৰিহরন্তে আযস্মতো সাণৰাসিত্থেরস্স ঞাতিপেতে আরব্ভ ৰুত্তং। অতীতে কির বারাণসিযং কিতৰস্স নাম রঞ্ঞো পুত্তো উয্যানকীল়ং কীল়িত্ৰা নিৰত্তন্তো সুনেত্তং নাম পচ্চেকবুদ্ধং পিণ্ডায চরিত্ৰা নগরতো নিক্খমন্তং দিস্ৰা ইস্সরিযমদমত্তো হুত্ৰা ‘‘কথঞ্হি নাম ময্হং অঞ্জলিং অকত্ৰা অযং মুণ্ডকো গচ্ছতী’’তি পদুট্ঠচিত্তো হত্থিক্খন্ধতো ওতরিত্ৰা ‘‘কচ্চি তে পিণ্ডপাতো লদ্ধো’’তি আলপন্তো হত্থতো পত্তং গহেত্ৰা পথৰিযং পাতেত্ৰা ভিন্দি। অথ নং সব্বত্থ তাদিভাৰপ্পত্তিযা নিব্বিকারং করুণাৰিপ্ফারসোমনস্সনিপাতপসন্নচিত্তমেৰ ওলোকেন্তং অট্ঠানাঘাতেন দূসিতচিত্তো ‘‘কিং মং কিতৰস্স রঞ্ঞো পুত্তং ন জানাসি, ত্ৰং ওলোকযন্তো ময্হং কিং করিস্সসী’’তি ৰত্ৰা অৰহসন্তো পক্কামি। পক্কন্তমত্তস্সেৰ চস্স নরকগ্গিদাহপটিভাগো বলৰসরীরদাহো উপ্পজ্জি। সো তেন মহাসন্তাপেনাভিভূতকাযো অতিবাল়্হং দুক্খৰেদনাভিতুন্নো কালং কত্ৰা অৰীচীমহানিরযে নিব্বত্তি।
Kuṇḍināgariyo theroti idaṃ satthari veḷuvane viharante āyasmato sāṇavāsittherassa ñātipete ārabbha vuttaṃ. Atīte kira bārāṇasiyaṃ kitavassa nāma rañño putto uyyānakīḷaṃ kīḷitvā nivattanto sunettaṃ nāma paccekabuddhaṃ piṇḍāya caritvā nagarato nikkhamantaṃ disvā issariyamadamatto hutvā ‘‘kathañhi nāma mayhaṃ añjaliṃ akatvā ayaṃ muṇḍako gacchatī’’ti paduṭṭhacitto hatthikkhandhato otaritvā ‘‘kacci te piṇḍapāto laddho’’ti ālapanto hatthato pattaṃ gahetvā pathaviyaṃ pātetvā bhindi. Atha naṃ sabbattha tādibhāvappattiyā nibbikāraṃ karuṇāvipphārasomanassanipātapasannacittameva olokentaṃ aṭṭhānāghātena dūsitacitto ‘‘kiṃ maṃ kitavassa rañño puttaṃ na jānāsi, tvaṃ olokayanto mayhaṃ kiṃ karissasī’’ti vatvā avahasanto pakkāmi. Pakkantamattasseva cassa narakaggidāhapaṭibhāgo balavasarīradāho uppajji. So tena mahāsantāpenābhibhūtakāyo atibāḷhaṃ dukkhavedanābhitunno kālaṃ katvā avīcīmahāniraye nibbatti.
সো তত্থ দক্খিণপস্সেন ৰামপস্সেন উত্তানো অৰকুজ্জোতি বহূহি পকারেহি পরিৰত্তিত্ৰা চতুরাসীতি ৰস্সসহস্সানি পচ্চিত্ৰা ততো চুতো পেতেসু অপিরিমিতকালং খুপ্পিপাসাদিদুক্খং অনুভৰিত্ৰা ততো চুতো ইমস্মিং বুদ্ধুপ্পাদে কুণ্ডিনগরস্স সমীপে কেৰট্টগামে নিব্বত্তি। তস্স জাতিস্সরঞাণং উপ্পজ্জি, তেন সো পুব্বে অত্তনা অনুভূতপুব্বং দুক্খং অনুস্সরন্তো ৰযপ্পত্তোপি পাপভযেন ঞাতকেহিপি সদ্ধিং মচ্ছবন্ধনত্থং ন গচ্ছতি। তেসু গচ্ছন্তেসু মচ্ছে ঘাতেতুং অনিচ্ছন্তো নিলীযতি, গতো চ জালং ভিন্দতি, জীৰন্তে ৰা মচ্ছে গহেত্ৰা উদকে ৰিস্সজ্জেতি, তস্স তং কিরিযং অরোচন্তা ঞাতকা গেহতো তং নীহরিংসু। একো পনস্স ভাতা সিনেহবদ্ধহদযো অহোসি।
So tattha dakkhiṇapassena vāmapassena uttāno avakujjoti bahūhi pakārehi parivattitvā caturāsīti vassasahassāni paccitvā tato cuto petesu apirimitakālaṃ khuppipāsādidukkhaṃ anubhavitvā tato cuto imasmiṃ buddhuppāde kuṇḍinagarassa samīpe kevaṭṭagāme nibbatti. Tassa jātissarañāṇaṃ uppajji, tena so pubbe attanā anubhūtapubbaṃ dukkhaṃ anussaranto vayappattopi pāpabhayena ñātakehipi saddhiṃ macchabandhanatthaṃ na gacchati. Tesu gacchantesu macche ghātetuṃ anicchanto nilīyati, gato ca jālaṃ bhindati, jīvante vā macche gahetvā udake vissajjeti, tassa taṃ kiriyaṃ arocantā ñātakā gehato taṃ nīhariṃsu. Eko panassa bhātā sinehabaddhahadayo ahosi.
তেন চ সমযেন আযস্মা আনন্দো কুণ্ডিনগরং উপনিস্সায সাণপব্বতে ৰিহরতি। অথ সো কেৰট্টপুত্তো ঞাতকেহি পরিচ্চত্তো হুত্ৰা ইতো চিতো চ পরিব্ভমন্তো তং পদেসং পত্তো ভোজনৰেলায থেরস্স সন্তিকং উপসঙ্কমি। থেরো তং পুচ্ছিত্ৰা ভোজনেন অত্থিকভাৰং ঞত্ৰা তস্স ভত্তং দত্ৰা কতভত্তকিচ্চো সব্বং তং পৰত্তিং ঞত্ৰা ধম্মকথায পসন্নমানসং ঞত্ৰা ‘‘পব্বজিস্সসি, আৰুসো’’তি? ‘‘আম, ভন্তে, পব্বজিস্সামী’’তি। থেরো তং পব্বাজেত্ৰা তেন সদ্ধিং ভগৰতো সন্তিকং অগমাসি। অথ নং সত্থা আহ – ‘‘আনন্দ, ইমং সামণেরং অনুকম্পেয্যাসী’’তি। সো চ অকতকুসলত্তা অপ্পলাভো অহোসি। অথ নং সত্থা অনুগ্গণ্হন্তো ভিক্খূনং পরিভোগত্থায পানীযঘটানং পরিপূরণে নিযোজেসি। তং দিস্ৰা উপাসকা তস্স বহূনি নিচ্চভত্তানি পট্ঠপেসুং।
Tena ca samayena āyasmā ānando kuṇḍinagaraṃ upanissāya sāṇapabbate viharati. Atha so kevaṭṭaputto ñātakehi pariccatto hutvā ito cito ca paribbhamanto taṃ padesaṃ patto bhojanavelāya therassa santikaṃ upasaṅkami. Thero taṃ pucchitvā bhojanena atthikabhāvaṃ ñatvā tassa bhattaṃ datvā katabhattakicco sabbaṃ taṃ pavattiṃ ñatvā dhammakathāya pasannamānasaṃ ñatvā ‘‘pabbajissasi, āvuso’’ti? ‘‘Āma, bhante, pabbajissāmī’’ti. Thero taṃ pabbājetvā tena saddhiṃ bhagavato santikaṃ agamāsi. Atha naṃ satthā āha – ‘‘ānanda, imaṃ sāmaṇeraṃ anukampeyyāsī’’ti. So ca akatakusalattā appalābho ahosi. Atha naṃ satthā anuggaṇhanto bhikkhūnaṃ paribhogatthāya pānīyaghaṭānaṃ paripūraṇe niyojesi. Taṃ disvā upāsakā tassa bahūni niccabhattāni paṭṭhapesuṃ.
সো অপরেন সমযেন লদ্ধূপসম্পদো অরহত্তং পত্ৰা থেরো হুত্ৰা দ্ৰাদসহি ভিক্খূহি সদ্ধিং সাণপব্বতে ৰসি। তস্স পন ঞাতকা পঞ্চসতমত্তা অনুপচিতকুসলকম্মা উপচিতমচ্ছেরাদিপাপধম্মা কালং কত্ৰা পেতেসু নিব্বত্তিংসু। তস্স পন মাতাপিতরো ‘‘এস অম্হেহি পুব্বে গেহতো নিক্কড্ঢিতো’’তি সারজ্জমানা তং অনুপসঙ্কমিত্ৰা তস্মিং বদ্ধসিনেহং ভাতিকং পেসেসুং। সো থেরস্স গামং পিণ্ডায পৰিট্ঠসমযে দক্খিণজাণুমণ্ডলং পথৰিযং পতিট্ঠাপেত্ৰা কতঞ্জলী অত্তানং দস্সেত্ৰা ‘‘মাতা পিতা চ তে, ভন্তে’’তিআদিগাথা অৰোচ। কুণ্ডিনাগরিযো থেরোতিআদযো পন আদিতো পঞ্চ গাথা তাসং সম্বন্ধদস্সনত্থং ধম্মসঙ্গাহকেহি ঠপিতা।
So aparena samayena laddhūpasampado arahattaṃ patvā thero hutvā dvādasahi bhikkhūhi saddhiṃ sāṇapabbate vasi. Tassa pana ñātakā pañcasatamattā anupacitakusalakammā upacitamaccherādipāpadhammā kālaṃ katvā petesu nibbattiṃsu. Tassa pana mātāpitaro ‘‘esa amhehi pubbe gehato nikkaḍḍhito’’ti sārajjamānā taṃ anupasaṅkamitvā tasmiṃ baddhasinehaṃ bhātikaṃ pesesuṃ. So therassa gāmaṃ piṇḍāya paviṭṭhasamaye dakkhiṇajāṇumaṇḍalaṃ pathaviyaṃ patiṭṭhāpetvā katañjalī attānaṃ dassetvā ‘‘mātā pitā ca te, bhante’’tiādigāthā avoca. Kuṇḍināgariyo therotiādayo pana ādito pañca gāthā tāsaṃ sambandhadassanatthaṃ dhammasaṅgāhakehi ṭhapitā.
৪০৮.
408.
‘‘কুণ্ডিনাগরিযো থেরো, সাণৰাসিনিৰাসিকো।
‘‘Kuṇḍināgariyo thero, sāṇavāsinivāsiko;
পোট্ঠপাদোতি নামেন, সমণো ভাৰিতিন্দ্রিযো॥
Poṭṭhapādoti nāmena, samaṇo bhāvitindriyo.
৪০৯.
409.
‘‘তস্স মাতা পিতা ভাতা, দুগ্গতা যমলোকিকা।
‘‘Tassa mātā pitā bhātā, duggatā yamalokikā;
পাপকম্মং করিত্ৰান, পেতলোকং ইতো গতা॥
Pāpakammaṃ karitvāna, petalokaṃ ito gatā.
৪১০.
410.
‘‘তে দুগ্গতা সূচিকট্টা, কিলন্তা নগ্গিনো কিসা।
‘‘Te duggatā sūcikaṭṭā, kilantā naggino kisā;
উত্তসন্তা মহত্তাসা, ন দস্সেন্তি কুরূরিনো॥
Uttasantā mahattāsā, na dassenti kurūrino.
৪১১.
411.
‘‘তস্স ভাতা ৰিতরিত্ৰা, নগ্গো একপথেককো।
‘‘Tassa bhātā vitaritvā, naggo ekapathekako;
চতুকুণ্ডিকো ভৰিত্ৰান, থেরস্স দস্সযীতুমং॥
Catukuṇḍiko bhavitvāna, therassa dassayītumaṃ.
৪১২.
412.
‘‘থেরো চামনসিকত্ৰা, তুণ্হীভূতো অতিক্কমি।
‘‘Thero cāmanasikatvā, tuṇhībhūto atikkami;
সো চ ৰিঞ্ঞাপযী থেরং, ‘ভাতা পেতগতো অহং’॥
So ca viññāpayī theraṃ, ‘bhātā petagato ahaṃ’.
৪১৩.
413.
‘‘মাতা পিতা চ তে ভন্তে, দুগ্গতা যমলোকিকা।
‘‘Mātā pitā ca te bhante, duggatā yamalokikā;
পাপকম্মং করিত্ৰান, পেতলোকং ইতো গতা॥
Pāpakammaṃ karitvāna, petalokaṃ ito gatā.
৪১৪.
414.
‘‘তেন দুগ্গতা সূচিকট্টা, কিলন্তা নগ্গিনো কিসা।
‘‘Tena duggatā sūcikaṭṭā, kilantā naggino kisā;
উত্তসন্তা মহত্তাসা, ন দস্সেন্তি কুরূরিনো॥
Uttasantā mahattāsā, na dassenti kurūrino.
৪১৫.
415.
‘‘অনুকম্পস্সু কারুণিকো, দত্ৰা অন্ৰাদিসাহি নো।
‘‘Anukampassu kāruṇiko, datvā anvādisāhi no;
তৰ দিন্নেন দানেন, যাপেস্সন্তি কুরূরিনো’’তি॥
Tava dinnena dānena, yāpessanti kurūrino’’ti.
৪০৮-৯. তত্থ কুণ্ডিনাগরিযো থেরোতি এৰংনামকে নগরে জাতসংৰড্ঢত্থেরো, ‘‘কুণ্ডিকনগরো থেরো’’তিপি পাঠো, সো এৰত্থো। সাণৰাসিনিৰাসিকোতি সাণপব্বতৰাসী। পোট্ঠপাদোতি নামেনাতি নামেন পোট্ঠপাদো নাম। সমণোতি সমিতপাপো। ভাৰিতিন্দ্রিযোতি অরিযমগ্গভাৰনায ভাৰিতসদ্ধাদিইন্দ্রিযো, অরহাতি অত্থো। তস্সাতি তস্স সাণৰাসিত্থেরস্স। দুগ্গতাতি দুগ্গতিগতা।
408-9. Tattha kuṇḍināgariyo theroti evaṃnāmake nagare jātasaṃvaḍḍhatthero, ‘‘kuṇḍikanagaro thero’’tipi pāṭho, so evattho. Sāṇavāsinivāsikoti sāṇapabbatavāsī. Poṭṭhapādoti nāmenāti nāmena poṭṭhapādo nāma. Samaṇoti samitapāpo. Bhāvitindriyoti ariyamaggabhāvanāya bhāvitasaddhādiindriyo, arahāti attho. Tassāti tassa sāṇavāsittherassa. Duggatāti duggatigatā.
৪১০. সূচিকট্টাতি পূতিনা লূখগত্তা অট্টকা, সূচিকাতি লদ্ধনামায খুপ্পিপাসায অট্টা পীল়িতা। ‘‘সূচিকণ্ঠা’’তি কেচি পঠন্তি, সূচিছিদ্দসদিসমুখদ্ৰারাতি অত্থো। কিলন্তাতি কিলন্তকাযচিত্তা। নগ্গিনোতি নগ্গরূপা নিচ্চোল়া। কিসাতি অট্ঠিত্তচমত্তসরীরতায কিসদেহা। উত্তসন্তাতি ‘‘অযং সমণো অম্হাকং পুত্তো’’তি ওত্তপ্পেন উত্রাসং আপজ্জন্তা । মহত্তাসাতি অত্তনা পুব্বে কতকম্মং পটিচ্চ সঞ্জাতমহাভযা। ন দস্সেন্তীতি অত্তানং ন দস্সেন্তি, সম্মুখীভাৰং ন গচ্ছন্তি। কুরূরিনোতি দারুণকম্মন্তা।
410.Sūcikaṭṭāti pūtinā lūkhagattā aṭṭakā, sūcikāti laddhanāmāya khuppipāsāya aṭṭā pīḷitā. ‘‘Sūcikaṇṭhā’’ti keci paṭhanti, sūcichiddasadisamukhadvārāti attho. Kilantāti kilantakāyacittā. Nagginoti naggarūpā niccoḷā. Kisāti aṭṭhittacamattasarīratāya kisadehā. Uttasantāti ‘‘ayaṃ samaṇo amhākaṃ putto’’ti ottappena utrāsaṃ āpajjantā . Mahattāsāti attanā pubbe katakammaṃ paṭicca sañjātamahābhayā. Na dassentīti attānaṃ na dassenti, sammukhībhāvaṃ na gacchanti. Kurūrinoti dāruṇakammantā.
৪১১. তস্স ভাতাতি সাণৰাসিত্থেরস্স ভাতা। ৰিতরিত্ৰাতি ৰিতিণ্ণো হুত্ৰা, ওত্তপ্পসন্তাসভযাতি অত্থো। ৰিতুরিত্ৰাতি ৰা পাঠো, তুরিতো হুত্ৰা, তরমানরূপো হুত্ৰাতি ৰুত্তং হোতি। একপথেতি একপদিকমগ্গে। এককোতি একিকো অদুতিযো। চতুকুণ্ডিকো ভৰিত্ৰানাতি চতূহি অঙ্গেহি কুণ্ডেতি অত্তভাৰং পৰত্তেতীতি চতুকুণ্ডিকো, দ্ৰীহি জাণূহি দ্ৰীহি হত্থেহি গচ্ছন্তো তিট্ঠন্তো চ, এৰংভূতো হুত্ৰাতি অত্থো। সো হি এৰং পুরতো কোপীনপটিচ্ছাদনা হোতীতি তথা অকাসি। থেরস্স দস্সযীতুমন্তি থেরস্স অত্তানং উদ্দিসযি দস্সেসি।
411.Tassa bhātāti sāṇavāsittherassa bhātā. Vitaritvāti vitiṇṇo hutvā, ottappasantāsabhayāti attho. Vituritvāti vā pāṭho, turito hutvā, taramānarūpo hutvāti vuttaṃ hoti. Ekapatheti ekapadikamagge. Ekakoti ekiko adutiyo. Catukuṇḍiko bhavitvānāti catūhi aṅgehi kuṇḍeti attabhāvaṃ pavattetīti catukuṇḍiko, dvīhi jāṇūhi dvīhi hatthehi gacchanto tiṭṭhanto ca, evaṃbhūto hutvāti attho. So hi evaṃ purato kopīnapaṭicchādanā hotīti tathā akāsi. Therassa dassayītumanti therassa attānaṃ uddisayi dassesi.
৪১২. অমনসিকত্ৰাতি ‘‘অযং নাম এসো’’তি এৰং মনসি অকরিত্ৰা অনাৰজ্জেত্ৰা। সো চাতি সো পেতো। ভাতা পেতগতো অহন্তি ‘‘অহং অতীতত্তভাৰে ভাতা, ইদানি পেতভূতো ইধাগতো’’তি ৰত্ৰা ৰিঞ্ঞাপযি থেরন্তি যোজনা।
412.Amanasikatvāti ‘‘ayaṃ nāma eso’’ti evaṃ manasi akaritvā anāvajjetvā. So cāti so peto. Bhātā petagato ahanti ‘‘ahaṃ atītattabhāve bhātā, idāni petabhūto idhāgato’’ti vatvā viññāpayi theranti yojanā.
৪১৩-৫. যথা পন ৰিঞ্ঞাপযি, তং দস্সেতুং ‘‘মাতা পিতা চা’’তিআদিনা তিস্সো গাথা ৰুত্তা। তত্থ মাতা পিতা চ তেতি তৰ মাতা চ পিতা চ। অনুকম্পস্সূতি অনুগ্গণ্হ অনুদযং করোহি। অন্ৰাদিসাহীতি আদিস। নোতি অম্হাকং। তৰ দিন্নেনাতি তযা দিন্নেন।
413-5. Yathā pana viññāpayi, taṃ dassetuṃ ‘‘mātā pitā cā’’tiādinā tisso gāthā vuttā. Tattha mātā pitā ca teti tava mātā ca pitā ca. Anukampassūti anuggaṇha anudayaṃ karohi. Anvādisāhīti ādisa. Noti amhākaṃ. Tava dinnenāti tayā dinnena.
তং সুত্ৰা থেরো যথা পটিপজ্জি, তং দস্সেতুং –
Taṃ sutvā thero yathā paṭipajji, taṃ dassetuṃ –
৪১৬.
416.
‘‘থেরো চরিত্ৰা পিণ্ডায, ভিক্খূ অঞ্ঞে চ দ্ৰাদস।
‘‘Thero caritvā piṇḍāya, bhikkhū aññe ca dvādasa;
একজ্ঝং সন্নিপতিংসু, ভত্তৰিস্সগ্গকারণা॥
Ekajjhaṃ sannipatiṃsu, bhattavissaggakāraṇā.
৪১৭.
417.
‘‘থেরো সব্বেৰ তে আহ, যথালদ্ধং দদাথ মে।
‘‘Thero sabbeva te āha, yathāladdhaṃ dadātha me;
সঙ্ঘভত্তং করিস্সামি, অনুকম্পায ঞাতিনং॥
Saṅghabhattaṃ karissāmi, anukampāya ñātinaṃ.
৪১৮.
418.
‘‘নিয্যাদযিংসু থেরস্স, থেরো সঙ্ঘং নিমন্তযি।
‘‘Niyyādayiṃsu therassa, thero saṅghaṃ nimantayi;
দত্ৰা অন্ৰাদিসি থেরো, মাতু পিতু চ ভাতুনো।
Datvā anvādisi thero, mātu pitu ca bhātuno;
‘ইদং মে ঞাতীনং হোতু, সুখিতা হোন্তু ঞাতযো’॥
‘Idaṃ me ñātīnaṃ hotu, sukhitā hontu ñātayo’.
৪১৯.
419.
‘‘সমনন্তরানুদ্দিট্ঠে, ভোজনং উদপজ্জথ।
‘‘Samanantarānuddiṭṭhe, bhojanaṃ udapajjatha;
সুচিং পণীতং সম্পন্নং, অনেকরসব্যঞ্জনং॥
Suciṃ paṇītaṃ sampannaṃ, anekarasabyañjanaṃ.
৪২০.
420.
‘‘ততো উদ্দস্সযী ভাতা, ৰণ্ণৰা বলৰা সুখী।
‘‘Tato uddassayī bhātā, vaṇṇavā balavā sukhī;
পহূতং ভোজনং ভন্তে, পস্স নগ্গাম্হসে মযং।
Pahūtaṃ bhojanaṃ bhante, passa naggāmhase mayaṃ;
তথা ভন্তে পরক্কম, যথা ৰত্থং লভামসে॥
Tathā bhante parakkama, yathā vatthaṃ labhāmase.
৪২১.
421.
‘‘থেরো সঙ্কারকূটম্হা, উচ্চিনিত্ৰান নন্তকে।
‘‘Thero saṅkārakūṭamhā, uccinitvāna nantake;
পিলোতিকং পটং কত্ৰা, সঙ্ঘে চাতুদ্দিসে অদা॥
Pilotikaṃ paṭaṃ katvā, saṅghe cātuddise adā.
৪২২.
422.
‘‘দত্ৰা অন্ৰাদিসী থেরো, মাতু পিতু চ ভাতুনো।
‘‘Datvā anvādisī thero, mātu pitu ca bhātuno;
‘ইদং মে ঞাতীনং হোতু, সুখিতা হোন্তু ঞাতযো’॥
‘Idaṃ me ñātīnaṃ hotu, sukhitā hontu ñātayo’.
৪২৩.
423.
‘‘সমনন্তরানুদ্দিট্ঠে, ৰত্থানি উদপজ্জিসুং।
‘‘Samanantarānuddiṭṭhe, vatthāni udapajjisuṃ;
ততো সুৰত্থৰসনো, থেরস্স দস্সযীতুমং॥
Tato suvatthavasano, therassa dassayītumaṃ.
৪২৪.
424.
‘‘যাৰতা নন্দরাজস্স, ৰিজিতস্মিং পটিচ্ছদা।
‘‘Yāvatā nandarājassa, vijitasmiṃ paṭicchadā;
ততো বহুতরা ভন্তে, ৰত্থানচ্ছাদনানি নো॥
Tato bahutarā bhante, vatthānacchādanāni no.
৪২৫.
425.
‘‘কোসেয্যকম্বলীযানি, খোমকপ্পাসিকানি চ।
‘‘Koseyyakambalīyāni, khomakappāsikāni ca;
ৰিপুলা চ মহগ্ঘা চ, তেপাকাসেৰলম্বরে॥
Vipulā ca mahagghā ca, tepākāsevalambare.
৪২৬.
426.
‘‘তে মযং পরিদহাম, যং যঞ্হি মনসো পিযং।
‘‘Te mayaṃ paridahāma, yaṃ yañhi manaso piyaṃ;
তথা ভন্তে পরক্কম, যথা গেহং লভামসে॥
Tathā bhante parakkama, yathā gehaṃ labhāmase.
৪২৭.
427.
‘‘থেরো পণ্ণকুটিং কত্ৰা, সঙ্ঘে চাতুদ্দিসে অদা।
‘‘Thero paṇṇakuṭiṃ katvā, saṅghe cātuddise adā;
দত্ৰা চ অন্ৰাদিসী থেরো, মাতু পিতু চ ভাতুনো।
Datvā ca anvādisī thero, mātu pitu ca bhātuno;
‘ইদং মে ঞাতীনং হোতু, সুখিতা হোন্তু ঞাতযো’॥
‘Idaṃ me ñātīnaṃ hotu, sukhitā hontu ñātayo’.
৪২৮.
428.
‘‘সমনন্তরানুদ্দিট্ঠে, ঘরানি উদপজ্জিসুং।
‘‘Samanantarānuddiṭṭhe, gharāni udapajjisuṃ;
কূটাগারনিৰেসনা, ৰিভত্তা ভাগসো মিতা॥
Kūṭāgāranivesanā, vibhattā bhāgaso mitā.
৪২৯.
429.
‘‘ন মনুস্সেসু ঈদিসা, যাদিসা নো ঘরা ইধ।
‘‘Na manussesu īdisā, yādisā no gharā idha;
অপি দিব্বেসু যাদিসা, তাদিসা নো ঘরা ইধ॥
Api dibbesu yādisā, tādisā no gharā idha.
৪৩০.
430.
‘‘দদ্দল্লমানা আভেন্তি, সমন্তা চতুরো দিসা।
‘‘Daddallamānā ābhenti, samantā caturo disā;
তথা ভন্তে পরক্কম, যথা পানীযং লভামসে॥
Tathā bhante parakkama, yathā pānīyaṃ labhāmase.
৪৩১.
431.
‘‘থেরো করণং পূরেত্ৰা, সঙ্ঘে চাতুদ্দিসে অদা।
‘‘Thero karaṇaṃ pūretvā, saṅghe cātuddise adā;
দত্ৰা অন্ৰাদিসী থেরো, মাতু পিতু চ ভাতুনো।
Datvā anvādisī thero, mātu pitu ca bhātuno;
‘ইদং মে ঞাতীনং হোতু, সুখিতা হোন্তু ঞাতযো’॥
‘Idaṃ me ñātīnaṃ hotu, sukhitā hontu ñātayo’.
৪৩২.
432.
‘‘সমনন্তরানুদ্দিট্ঠে, পানীযং উদপজ্জথ।
‘‘Samanantarānuddiṭṭhe, pānīyaṃ udapajjatha;
গম্ভীরা চতুরস্সা চ, পোক্খরঞ্ঞো সুনিম্মিতা॥
Gambhīrā caturassā ca, pokkharañño sunimmitā.
৪৩৩.
433.
‘‘সীতোদিকা সুপ্পতিত্থা, সীতা অপ্পটিগন্ধিযা।
‘‘Sītodikā suppatitthā, sītā appaṭigandhiyā;
পদুমুপ্পলসঞ্ছন্না, ৰারিকিঞ্জক্খপূরিতা॥
Padumuppalasañchannā, vārikiñjakkhapūritā.
৪৩৪.
434.
‘‘তত্থ ন্হত্ৰা পিৰিত্ৰা চ, থেরস্স পটিদস্সযুং।
‘‘Tattha nhatvā pivitvā ca, therassa paṭidassayuṃ;
পহূতং পানীযং ভন্তে, পাদা দুক্খা ফলন্তি নো॥
Pahūtaṃ pānīyaṃ bhante, pādā dukkhā phalanti no.
৪৩৫.
435.
‘‘আহিণ্ডমানা খঞ্জাম, সক্খরে কুসকণ্টকে।
‘‘Āhiṇḍamānā khañjāma, sakkhare kusakaṇṭake;
তথা ভন্তে পরক্কম, যথা যানং লভামসে॥
Tathā bhante parakkama, yathā yānaṃ labhāmase.
৪৩৬.
436.
‘‘থেরো সিপাটিকং লদ্ধা, সঙ্ঘে চাতুদ্দিসে অদা।
‘‘Thero sipāṭikaṃ laddhā, saṅghe cātuddise adā;
দত্ৰা অন্ৰাদিসী থেরো, মাতু পিতু চ ভাতুনো।
Datvā anvādisī thero, mātu pitu ca bhātuno;
‘ইদং মে ঞাতীনং হোতু, সুখিতা হোন্তু ঞাতযো’॥
‘Idaṃ me ñātīnaṃ hotu, sukhitā hontu ñātayo’.
৪৩৭.
437.
‘‘সমনন্তরানুদ্দিট্ঠে , পেতা রথেন মাগমুং।
‘‘Samanantarānuddiṭṭhe , petā rathena māgamuṃ;
অনুকম্পিতম্হ ভদন্তে, ভত্তেনচ্ছাদনেন চ॥
Anukampitamha bhadante, bhattenacchādanena ca.
৪৩৮.
438.
‘‘ঘরেন পানীযদানেন, যানদানেন চূভযং।
‘‘Gharena pānīyadānena, yānadānena cūbhayaṃ;
মুনিং কারুণিকং লোকে, ভন্তে ৰন্দিতুমাগতা’’তি॥ – গাথাযো আহংসু।
Muniṃ kāruṇikaṃ loke, bhante vanditumāgatā’’ti. – gāthāyo āhaṃsu;
৪১৬-৭. তত্থ থেরো চরিত্ৰা পিণ্ডাযাতি থেরো পিণ্ডাপাতচারিকায চরিত্ৰা। ভিক্খূ অঞ্ঞে চ দ্ৰাদসাতি থেরেন সহ ৰসন্তা অঞ্ঞে চ দ্ৰাদস ভিক্খূ একজ্ঝং একতো সন্নিপতিংসু। কস্মাতি চে? ভত্তৰিস্সগ্গকারণাতি ভত্তকিচ্চকারণা ভুঞ্জননিমিত্তং। তেতি তে ভিক্খূ। যথালদ্ধন্তি যং যং লদ্ধং। দদাথাতি দেথ।
416-7. Tattha thero caritvā piṇḍāyāti thero piṇḍāpātacārikāya caritvā. Bhikkhū aññe ca dvādasāti therena saha vasantā aññe ca dvādasa bhikkhū ekajjhaṃ ekato sannipatiṃsu. Kasmāti ce? Bhattavissaggakāraṇāti bhattakiccakāraṇā bhuñjananimittaṃ. Teti te bhikkhū. Yathāladdhanti yaṃ yaṃ laddhaṃ. Dadāthāti detha.
৪১৮. নিয্যাদযিংসূতি অদংসু। সঙ্ঘং নিমন্তযীতি তে এৰ দ্ৰাদস ভিক্খূ সঙ্ঘুদ্দেসৰসেন তং ভত্তং দাতুং নিমন্তেসি। অন্ৰাদিসীতি আদিসি। তত্থ যেসং অন্ৰাদিসি, তে দস্সেতুং ‘‘মাতু পিতু চ ভাতুনো, ইদং মে ঞাতীনং হোতু, সুখিতা হোন্তু ঞাতযো’’তি ৰুত্তং।
418.Niyyādayiṃsūti adaṃsu. Saṅghaṃ nimantayīti te eva dvādasa bhikkhū saṅghuddesavasena taṃ bhattaṃ dātuṃ nimantesi. Anvādisīti ādisi. Tattha yesaṃ anvādisi, te dassetuṃ ‘‘mātu pitu ca bhātuno, idaṃ me ñātīnaṃ hotu, sukhitā hontu ñātayo’’ti vuttaṃ.
৪১৯. সমনন্তরানুদ্দিট্ঠেতি উদ্দিট্ঠসমনন্তরমেৰ। ভোজনং উদপজ্জথাতি তেসং পেতানং ভোজনং উপ্পজ্জি। কীদিসন্তি আহ ‘‘সুচি’’ন্তিআদি। তত্থ অনেকরসব্যঞ্জনন্তি নানারসেহি ব্যঞ্জনেহি যুত্তং, অথ ৰা অনেকরসং অনেকব্যঞ্জনঞ্চ। ততোতি ভোজনলাভতো পচ্ছা।
419.Samanantarānuddiṭṭheti uddiṭṭhasamanantarameva. Bhojanaṃ udapajjathāti tesaṃ petānaṃ bhojanaṃ uppajji. Kīdisanti āha ‘‘suci’’ntiādi. Tattha anekarasabyañjananti nānārasehi byañjanehi yuttaṃ, atha vā anekarasaṃ anekabyañjanañca. Tatoti bhojanalābhato pacchā.
৪২০. উদ্দস্সযী ভাতাতি ভাতিকভূতো পেতো থেরস্স অত্তানং দস্সেসি। ৰণ্ণৰা বলৰা সুখীতি তেন ভোজনলাভেন তাৰদেৰ রূপসম্পন্নো বলসম্পন্নো সুখিতোৰ হুত্ৰা। পহূতং ভোজনং, ভন্তেতি, ভন্তে, তৰ দানানুভাৰেন পহূতং অনপ্পকং ভোজনং অম্হেহি লদ্ধং। পস্স নগ্গাম্হসেতি ওলোকেহি, নগ্গিকা পন অম্হ, তস্মা তথা, ভন্তে, পরক্কম পযোগং করোহি। যথা ৰত্থং লভামসেতি যেন পকারেন যাদিসেন পযোগেন সব্বেৰ মযং ৰত্থানি লভেয্যাম, তথা ৰাযমথাতি অত্থো।
420.Uddassayī bhātāti bhātikabhūto peto therassa attānaṃ dassesi. Vaṇṇavā balavā sukhīti tena bhojanalābhena tāvadeva rūpasampanno balasampanno sukhitova hutvā. Pahūtaṃ bhojanaṃ, bhanteti, bhante, tava dānānubhāvena pahūtaṃ anappakaṃ bhojanaṃ amhehi laddhaṃ. Passa naggāmhaseti olokehi, naggikā pana amha, tasmā tathā, bhante, parakkama payogaṃ karohi. Yathā vatthaṃ labhāmaseti yena pakārena yādisena payogena sabbeva mayaṃ vatthāni labheyyāma, tathā vāyamathāti attho.
৪২১. সঙ্কারকূটম্হাতি তত্থ তত্থ সঙ্কারট্ঠানতো। উচ্চিনিত্ৰানাতি গৰেসনৰসেন গহেত্ৰা। নন্তকেতি ছিন্নপরিযন্তে ছড্ডিতদুস্সখণ্ডে । তে পন যস্মা খণ্ডভূতা পিলোতিকা নাম হোন্তি, তাহি চ থেরো চীৰরং কত্ৰা সঙ্ঘস্স অদাসি, তস্মা আহ ‘‘পিলোতিকং পটং কত্ৰা, সঙ্ঘে চাতুদ্দিসে অদা’’তি। তত্থ সঙ্ঘে চাতুদ্দিসে অদাতি চতূহিপি দিসাহি আগতভিক্খুসঙ্ঘস্স অদাসি। সম্পদানত্থে হি ইদং ভুম্মৰচনং।
421.Saṅkārakūṭamhāti tattha tattha saṅkāraṭṭhānato. Uccinitvānāti gavesanavasena gahetvā. Nantaketi chinnapariyante chaḍḍitadussakhaṇḍe . Te pana yasmā khaṇḍabhūtā pilotikā nāma honti, tāhi ca thero cīvaraṃ katvā saṅghassa adāsi, tasmā āha ‘‘pilotikaṃ paṭaṃ katvā, saṅghe cātuddise adā’’ti. Tattha saṅghe cātuddise adāti catūhipi disāhi āgatabhikkhusaṅghassa adāsi. Sampadānatthe hi idaṃ bhummavacanaṃ.
৪২৩-৪. সুৰত্থৰসনোতি সুন্দরৰত্থৰসনো। থেরস্স দস্সযীতুমন্তি থেরস্স অত্তানং দস্সযি দস্সেসি, পাকটো অহোসি। পটিচ্ছাদযতি এত্থাতি পটিচ্ছদা।
423-4.Suvatthavasanoti sundaravatthavasano. Therassa dassayītumanti therassa attānaṃ dassayi dassesi, pākaṭo ahosi. Paṭicchādayati etthāti paṭicchadā.
৪২৮-৯. কূটাগারনিৰেসনাতি কূটাগারভূতা তদঞ্ঞনিৰেসনসঙ্খাতা চ ঘরা। লিঙ্গৰিপল্লাসৰসেন হেতং ৰুত্তং। ৰিভত্তাতি সমচতুরস্সআযতৰট্টসণ্ঠানাদিৰসেন ৰিভত্তা। ভাগসো মিতাতি ভাগেন পরিচ্ছিন্না। নোতি অম্হাকং। ইধাতি ইমস্মিং পেতলোকে। অপি দিব্বেসূতি অপীতি নিপাতমত্তং, দেৰলোকেসূতি অত্থো।
428-9.Kūṭāgāranivesanāti kūṭāgārabhūtā tadaññanivesanasaṅkhātā ca gharā. Liṅgavipallāsavasena hetaṃ vuttaṃ. Vibhattāti samacaturassaāyatavaṭṭasaṇṭhānādivasena vibhattā. Bhāgaso mitāti bhāgena paricchinnā. Noti amhākaṃ. Idhāti imasmiṃ petaloke. Api dibbesūti apīti nipātamattaṃ, devalokesūti attho.
৪৩১. করণন্তি ধমকরণং। পূরেত্ৰাতি উদকস্স পূরেত্ৰা। ৰারিকিঞ্জক্খপূরিতাতি তত্থ তত্থ ৰারিমত্থকে পদুমুপ্পলাদীনং কেসরভারেহি সঞ্ছাদিতৰসেন পূরিতা। ফলন্তীতি পুপ্ফন্তি, পণ্হিকপরিযন্তাদীসু ৰিদালেন্তীতি অত্থো।
431.Karaṇanti dhamakaraṇaṃ. Pūretvāti udakassa pūretvā. Vārikiñjakkhapūritāti tattha tattha vārimatthake padumuppalādīnaṃ kesarabhārehi sañchāditavasena pūritā. Phalantīti pupphanti, paṇhikapariyantādīsu vidālentīti attho.
৪৩৫-৬. আহিণ্ডমানাতি ৰিচরমানা। খঞ্জামাতি খঞ্জনৰসেন গচ্ছাম। সক্খরে কুসকণ্টকেতি সক্খরৰতি কুসকণ্টকৰতি চ ভূমিভাগে, সক্খরে কুসকণ্টকে চ অক্কমন্তাতি অত্থো। যানন্তি রথৰয্হাদিকং যংকিঞ্চি যানং। সিপাটিকন্তি একপটলউপাহনং।
435-6.Āhiṇḍamānāti vicaramānā. Khañjāmāti khañjanavasena gacchāma. Sakkhare kusakaṇṭaketi sakkharavati kusakaṇṭakavati ca bhūmibhāge, sakkhare kusakaṇṭake ca akkamantāti attho. Yānanti rathavayhādikaṃ yaṃkiñci yānaṃ. Sipāṭikanti ekapaṭalaupāhanaṃ.
৪৩৭-৮. রথেন মাগমুন্তি মকারো পদসন্ধিকরো, রথেন আগমংসু। উভযন্তি উভযেন দানেন, যানদানেন চেৰ ভত্তাদিচতুপচ্চযদানেন চ। পানীযদানেন হেত্থ ভেসজ্জদানম্পি সঙ্গহিতং। সেসং হেট্ঠা ৰুত্তনযত্তা উত্তানমেৰাতি।
437-8.Rathena māgamunti makāro padasandhikaro, rathena āgamaṃsu. Ubhayanti ubhayena dānena, yānadānena ceva bhattādicatupaccayadānena ca. Pānīyadānena hettha bhesajjadānampi saṅgahitaṃ. Sesaṃ heṭṭhā vuttanayattā uttānamevāti.
থেরো তং পৰত্তিং ভগৰতো আরোচেসি। ভগৰা তমত্থং অট্ঠুপ্পত্তিং কত্ৰা ‘‘যথা ইমে এতরহি, এৰং ত্ৰম্পি ইতো অনন্তরাতীতে অত্তভাৰে পেতো হুত্ৰা মহাদুক্খং অনুভৰী’’তি ৰত্ৰা থেরেন যাচিতো সুত্তপেতৰত্থুং কথেত্ৰা সম্পত্তপরিসায ধম্মং দেসেসি। তং সুত্ৰা মহাজনো সঞ্জাতসংৰেগো দানসীলাদিপুঞ্ঞকম্মনিরতো অহোসীতি।
Thero taṃ pavattiṃ bhagavato ārocesi. Bhagavā tamatthaṃ aṭṭhuppattiṃ katvā ‘‘yathā ime etarahi, evaṃ tvampi ito anantarātīte attabhāve peto hutvā mahādukkhaṃ anubhavī’’ti vatvā therena yācito suttapetavatthuṃ kathetvā sampattaparisāya dhammaṃ desesi. Taṃ sutvā mahājano sañjātasaṃvego dānasīlādipuññakammanirato ahosīti.
সাণৰাসিত্থেরপেতৰত্থুৰণ্ণনা নিট্ঠিতা।
Sāṇavāsittherapetavatthuvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পেতৰত্থুপাল়ি • Petavatthupāḷi / ২. সাণৰাসীথেরপেতৰত্থু • 2. Sāṇavāsītherapetavatthu
