| Library / Tipiṭaka / तिपिटक • Tipiṭaka / परिवार-अट्ठकथा • Parivāra-aṭṭhakathā |
सञ्चरित्तसमुट्ठानवण्णना
Sañcarittasamuṭṭhānavaṇṇanā
२६०. सञ्चरी कुटि विहारोति सञ्चरित्तं सञ्ञाचिकाय कुटिकरणं महल्लकविहारकरणञ्च। धोवनञ्च पटिग्गहोति अञ्ञातिकाय भिक्खुनिया पुराणचीवरधोवापनञ्च चीवरपटिग्गहणञ्च। विञ्ञत्तुत्तरि अभिहट्ठुन्ति अञ्ञातकं गहपतिं चीवरविञ्ञापनं ततुत्तरिसादियनसिक्खापदञ्च। उभिन्नं दूतकेन चाति ‘‘चीवरचेतापन्नं उपक्खटं होती’’ति आगतसिक्खापदद्वयञ्च दूतेन चीवरचेतापन्नपहितसिक्खापदञ्च।
260.Sañcarīkuṭi vihāroti sañcarittaṃ saññācikāya kuṭikaraṇaṃ mahallakavihārakaraṇañca. Dhovanañca paṭiggahoti aññātikāya bhikkhuniyā purāṇacīvaradhovāpanañca cīvarapaṭiggahaṇañca. Viññattuttari abhihaṭṭhunti aññātakaṃ gahapatiṃ cīvaraviññāpanaṃ tatuttarisādiyanasikkhāpadañca. Ubhinnaṃ dūtakena cāti ‘‘cīvaracetāpannaṃ upakkhaṭaṃ hotī’’ti āgatasikkhāpadadvayañca dūtena cīvaracetāpannapahitasikkhāpadañca.
कोसिया सुद्धद्वेभागा, छब्बस्सानि निसीदनन्ति ‘‘कोसियमिस्सकं सन्थत’’न्तिआदीनि पञ्च सिक्खापदानि। रिञ्चन्ति रूपिका चेवाति विभङ्गे ‘‘रिञ्चन्ति उद्देस’’न्ति आगतं एळकलोमधोवापनं रूपियप्पटिग्गहणसिक्खापदञ्च। उभो नानप्पकारकाति रूपियसंवोहारकयविक्कयसिक्खापदद्वयं।
Kosiyā suddhadvebhāgā, chabbassāni nisīdananti ‘‘kosiyamissakaṃ santhata’’ntiādīni pañca sikkhāpadāni. Riñcanti rūpikā cevāti vibhaṅge ‘‘riñcanti uddesa’’nti āgataṃ eḷakalomadhovāpanaṃ rūpiyappaṭiggahaṇasikkhāpadañca. Ubho nānappakārakāti rūpiyasaṃvohārakayavikkayasikkhāpadadvayaṃ.
ऊनबन्धनवस्सिकाति ऊनपञ्चबन्धनपत्तसिक्खापदञ्च वस्सिकसाटिकसिक्खापदञ्च। सुत्तं विकप्पनेन चाति सुत्तं विञ्ञापेत्वा चीवरवायापनञ्च तन्तवाये उपसङ्कमित्वा चीवरे विकप्पापज्जनञ्च। द्वारदानसिब्बानि चाति याव द्वारकोसा अग्गळट्ठपनाय, ‘‘अञ्ञातिकाय भिक्खुनिया चीवरं ददेय्य, चीवरं सिब्बेय्या’’ति वुत्तसिक्खापदत्तयं। पूवपच्चयजोति चाति पूवेहि वा मन्थेहि वा अभिहट्ठुं पवारणासिक्खापदं चातुमासपच्चयप्पवारणाजोतिसमादहनसिक्खापदानि च।
Ūnabandhanavassikāti ūnapañcabandhanapattasikkhāpadañca vassikasāṭikasikkhāpadañca. Suttaṃ vikappanena cāti suttaṃ viññāpetvā cīvaravāyāpanañca tantavāye upasaṅkamitvā cīvare vikappāpajjanañca. Dvāradānasibbāni cāti yāva dvārakosā aggaḷaṭṭhapanāya, ‘‘aññātikāya bhikkhuniyā cīvaraṃ dadeyya, cīvaraṃ sibbeyyā’’ti vuttasikkhāpadattayaṃ. Pūvapaccayajoti cāti pūvehi vā manthehi vā abhihaṭṭhuṃ pavāraṇāsikkhāpadaṃ cātumāsapaccayappavāraṇājotisamādahanasikkhāpadāni ca.
रतनं सूचि मञ्चो च, तूलं निसीदनकण्डु च, वस्सिका च सुगतेनाति रतनसिक्खापदञ्चेव सूचिघरसिक्खापदादीनि च सत्त सिक्खापदानि। विञ्ञत्ति अञ्ञं चेतापना, द्वे सङ्घिका महाजनिका, द्वे पुग्गललहुका गरूति ‘‘या पन भिक्खुनी अञ्ञं विञ्ञापेत्वा अञ्ञं विञ्ञापेय्या’’तिआदीनि नव सिक्खापदानि। द्वे विघासा साटिका चाति ‘‘उच्चारं वा पस्सावं वा सङ्कारं वा विघासं वा तिरोकुट्टे वा तिरोपाकारे वा छड्डेय्य वा छड्डापेय्य वा, हरिते छड्डेय्य वा छड्डापेय्य वा’’ति एवं वुत्तानि द्वे विघाससिक्खापदानि च उदकसाटिकासिक्खापदञ्च। समणचीवरेन चाति ‘‘समणचीवरं ददेय्या’’ति इदमेतं सन्धाय वुत्तं।
Ratanaṃsūci mañco ca, tūlaṃ nisīdanakaṇḍu ca, vassikā ca sugatenāti ratanasikkhāpadañceva sūcigharasikkhāpadādīni ca satta sikkhāpadāni. Viññatti aññaṃ cetāpanā, dve saṅghikā mahājanikā, dve puggalalahukā garūti ‘‘yā pana bhikkhunī aññaṃ viññāpetvā aññaṃ viññāpeyyā’’tiādīni nava sikkhāpadāni. Dve vighāsā sāṭikā cāti ‘‘uccāraṃ vā passāvaṃ vā saṅkāraṃ vā vighāsaṃ vā tirokuṭṭe vā tiropākāre vā chaḍḍeyya vā chaḍḍāpeyya vā, harite chaḍḍeyya vā chaḍḍāpeyya vā’’ti evaṃ vuttāni dve vighāsasikkhāpadāni ca udakasāṭikāsikkhāpadañca. Samaṇacīvarena cāti ‘‘samaṇacīvaraṃ dadeyyā’’ti idametaṃ sandhāya vuttaṃ.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / परिवारपाळि • Parivārapāḷi / ३. सञ्चरित्तसमुट्ठानं • 3. Sañcarittasamuṭṭhānaṃ
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / समुट्ठानसीसवण्णना • Samuṭṭhānasīsavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / सञ्चरित्तसमुट्ठानवण्णना • Sañcarittasamuṭṭhānavaṇṇanā
