| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
5. ஸஞ்சரித்தஸிக்கா²பத³வண்ணனா
5. Sañcarittasikkhāpadavaṇṇanā
அலங்வசனீயாதி ந வசனீயா, நிவாரணே அலங்-ஸத்³தோ³, ந அலங்வசனீயா நாலங்வசனீயா. ‘‘படிக்³க³ண்ஹாதி வீமங்ஸதி பச்சாஹரதி, ஆபத்தி ஸங்கா⁴தி³ஸேஸஸ்ஸா’’தி (பாரா॰ 305) வுத்தத்தா யஸ்ஸ ஏகந்தேன ஸங்கா⁴தி³ஸேஸோ ஹோதி, தஸ்ஸ படிக்³க³ண்ஹனவீமங்ஸனபயோகா³ ஏதே து³க்கடது²ல்லச்சயா நத்தீ²தி வத³ந்தீதி லிகி²தங். கிஞ்சாபி எத்த² ‘‘இத்தீ² நாம மனுஸ்ஸித்தீ², ந யக்கீ² ந பேதீ ந திரச்சா²னக³தா. புரிஸோ நாம மனுஸ்ஸபுரிஸோ, ந யக்கோ² ந பேதோ ந திரச்சா²னக³தோ’’தி பாளி நத்தி², ததா²பி காயஸங்ஸக்³கா³தீ³ஸு ‘‘மாதுகா³மோ நாம மனுஸ்ஸித்தீ²’’தி (பாரா॰ 285) இத்தி²வவத்தா²னஸ்ஸ கதத்தா இதா⁴பி மனுஸ்ஸித்தீ² ஏவாதி பஞ்ஞாயதி. மேது²னபுப்³ப³பா⁴க³ஸாமஞ்ஞதோ இத்தி²வவத்தா²னேன புரிஸவவத்தா²னங் கதமேவ ஹோதி. தேனேவாஹ ‘‘யேஸு ஸஞ்சரித்தங் ஸமாபஜ்ஜதி, தேஸங் மனுஸ்ஸஜாதிகதா’’தி (கங்கா²॰ அட்ட²॰ ஸஞ்சரித்தஸிக்கா²பத³வண்ணனா). காயஸங்ஸக்³கா³தீ³ஸு ச பண்ட³கயக்கி²பேதியோ து²ல்லச்சயவத்து²காவ வுத்தா, ததா² இதா⁴பி, பண்ட³கஸபா⁴வத்தா மனுஸ்ஸஉப⁴தொப்³யஞ்ஜனகோ ச து²ல்லச்சயவத்து²கோவ ஹோதி. ஸேஸா மனுஸ்ஸபுரிஸஅமனுஸ்ஸபண்ட³கஉப⁴தொப்³யஞ்ஜனகதிரச்சா²னக³தபுரிஸாத³யோ து³க்கடவத்து²காவ மிச்சா²சாரத³ஸ்ஸனஸபா⁴வதோதி வேதி³தப்³ப³ங்.
Alaṃvacanīyāti na vacanīyā, nivāraṇe alaṃ-saddo, na alaṃvacanīyā nālaṃvacanīyā. ‘‘Paṭiggaṇhāti vīmaṃsati paccāharati, āpatti saṅghādisesassā’’ti (pārā. 305) vuttattā yassa ekantena saṅghādiseso hoti, tassa paṭiggaṇhanavīmaṃsanapayogā ete dukkaṭathullaccayā natthīti vadantīti likhitaṃ. Kiñcāpi ettha ‘‘itthī nāma manussitthī, na yakkhī na petī na tiracchānagatā. Puriso nāma manussapuriso, na yakkho na peto na tiracchānagato’’ti pāḷi natthi, tathāpi kāyasaṃsaggādīsu ‘‘mātugāmo nāma manussitthī’’ti (pārā. 285) itthivavatthānassa katattā idhāpi manussitthī evāti paññāyati. Methunapubbabhāgasāmaññato itthivavatthānena purisavavatthānaṃ katameva hoti. Tenevāha ‘‘yesu sañcarittaṃ samāpajjati, tesaṃ manussajātikatā’’ti (kaṅkhā. aṭṭha. sañcarittasikkhāpadavaṇṇanā). Kāyasaṃsaggādīsu ca paṇḍakayakkhipetiyo thullaccayavatthukāva vuttā, tathā idhāpi, paṇḍakasabhāvattā manussaubhatobyañjanako ca thullaccayavatthukova hoti. Sesā manussapurisaamanussapaṇḍakaubhatobyañjanakatiracchānagatapurisādayo dukkaṭavatthukāva micchācāradassanasabhāvatoti veditabbaṃ.
ஸஞ்சரித்தஸிக்கா²பத³வண்ணனா நிட்டி²தா.
Sañcarittasikkhāpadavaṇṇanā niṭṭhitā.
