| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
5. сан̃жарид̇д̇асигкаабад̣̇аван̣н̣анаа
5. Sañcarittasikkhāpadavaṇṇanā
296. бан̃жамз бан̣д̣ид̇асса бхааво бан̣д̣ижжам̣, н̃аан̣ассзд̇ам̣ ад̇хиважанам̣. г̇ад̇иманд̇аад̇и н̃аан̣аг̇ад̇ияаа саманнааг̇ад̇аа. бан̣д̣ид̇аад̇и иминаа сабхааван̃аан̣зна саманнааг̇ад̇ад̇аа вуд̇д̇аа, б̣яад̇д̇аад̇и иминаа ид̇т̇игад̇д̇аб̣б̣зсу висаарад̣̇абан̃н̃ааяа. д̇знааха ‘‘убааяан̃н̃уу висаарад̣̇аа’’д̇и. мзд̇хаавинийд̇и таануббад̇д̇ибан̃н̃аасан̇каад̇ааяа д̇асмим̣ д̇асмим̣ ад̇т̇агижжз убадтид̇з таанасо д̇ан̇кан̣з зва уббаж̇ж̇анабан̃н̃ааяа саманнааг̇ад̇аа. д̇знааха ‘‘д̣̇идтам̣ д̣̇идтам̣ гарод̇ий’’д̇и. чзгаад̇и яааг̇убхад̇д̇асамбаад̣̇анаад̣̇ийсу нибун̣аа. удтаанавийрияасамбаннаад̇и гааяигзна вийриязна саманнааг̇ад̇аа, яат̇аа ан̃н̃аа гусийд̇аа нисиннадтаанз нисиннаава хонд̇и, тид̇адтаанз тид̇аава, звам̣ ахуд̇ваа вибпааригзна жид̇д̇зна саб̣б̣агижжам̣ нибпаад̣̇зд̇ийд̇и вуд̇д̇ам̣ ход̇и. гумааригааяаад̇и нимид̇д̇ад̇т̇з бхуммам̣, хзд̇умхи ваа гаран̣аважанам̣. д̇знааха ‘‘гумааригааяа гааран̣аа’’д̇и. ааваханам̣ ааваахо, бариг̇г̇ахабхаавзна д̣̇ааригааяа г̇ан̣хаабанам̣, д̇ат̇аа д̣̇аабанам̣ виваахо. д̇знааха ‘‘д̣̇аарагассаа’’д̇иаад̣̇и.
296. Pañcame paṇḍitassa bhāvo paṇḍiccaṃ, ñāṇassetaṃ adhivacanaṃ. Gatimantāti ñāṇagatiyā samannāgatā. Paṇḍitāti iminā sabhāvañāṇena samannāgatatā vuttā, byattāti iminā itthikattabbesu visāradapaññāya. Tenāha ‘‘upāyaññū visāradā’’ti. Medhāvinīti ṭhānuppattipaññāsaṅkhātāya tasmiṃ tasmiṃ atthakicce upaṭṭhite ṭhānaso taṅkhaṇe eva uppajjanapaññāya samannāgatā. Tenāha ‘‘diṭṭhaṃ diṭṭhaṃ karotī’’ti. Chekāti yāgubhattasampādanādīsu nipuṇā. Uṭṭhānavīriyasampannāti kāyikena vīriyena samannāgatā, yathā aññā kusītā nisinnaṭṭhāne nisinnāva honti, ṭhitaṭṭhāne ṭhitāva, evaṃ ahutvā vipphārikena cittena sabbakiccaṃ nipphādetīti vuttaṃ hoti. Kumārikāyāti nimittatthe bhummaṃ, hetumhi vā karaṇavacanaṃ. Tenāha ‘‘kumārikāya kāraṇā’’ti. Āvahanaṃ āvāho, pariggahabhāvena dārikāya gaṇhāpanaṃ, tathā dāpanaṃ vivāho. Tenāha ‘‘dārakassā’’tiādi.
297-298. бхад̇д̇абаажанам̣ санд̇хааяа ранд̇хаабанам̣ вуд̇д̇ам̣, яасса гассажи баажанам̣ санд̇хааяа бажаабанам̣ вуд̇д̇ам̣. д̣̇удтум̣ гулам̣ г̇ад̇аа д̣̇уг̇г̇ад̇аад̇и имамад̇т̇ам̣ д̣̇ассзнд̇о ‘‘яад̇т̇а ваа г̇ад̇аа’’д̇иаад̣̇имааха. аахаран̣ам̣ аахааро. на убаахаданд̇и на д̣̇иннам̣. гаяо г̇ахан̣ам̣, виггаяо д̣̇аанам̣. д̇ад̣̇убхаяам̣ сан̇г̇ан̣хид̇ваа ‘‘вохааро’’д̇и вуд̇д̇ам̣. ман̣д̣ид̇абасаад̇хид̇од̇и зд̇т̇а б̣аахирубагаран̣зна алан̇гаран̣ам̣ ман̣д̣анам̣, аж̇жхад̇д̇игаанам̣ гзсаад̣̇ийнам̣язва сан̣табанам̣ басаад̇ханам̣.
297-298. Bhattapācanaṃ sandhāya randhāpanaṃ vuttaṃ, yassa kassaci pācanaṃ sandhāya pacāpanaṃ vuttaṃ. Duṭṭhuṃ kulaṃ gatā duggatāti imamatthaṃ dassento ‘‘yattha vā gatā’’tiādimāha. Āharaṇaṃ āhāro. Na upāhaṭanti na dinnaṃ. Kayo gahaṇaṃ, vikkayo dānaṃ. Tadubhayaṃ saṅgaṇhitvā ‘‘vohāro’’ti vuttaṃ. Maṇḍitapasādhitoti ettha bāhirupakaraṇena alaṅkaraṇaṃ maṇḍanaṃ, ajjhattikānaṃ kesādīnaṃyeva saṇṭhapanaṃ pasādhanaṃ.
300. ‘‘аб̣бхуд̇ам̣ гаад̇ум̣ на ваддад̇ий’’д̇и иминаа д̣̇уггадам̣ ход̇ийд̇и д̣̇ийбзд̇и. ‘‘барааж̇ид̇зна д̣̇аад̇аб̣б̣а’’нд̇и вуд̇д̇ад̇д̇аа ад̣̇знд̇о д̇хуранигкзбзна гаарзд̇аб̣б̣о. ажирагаалз ад̇хигааро зд̇асса ад̇т̇ийд̇и ажирагаалаад̇хигааригам̣, сан̃жарид̇д̇ам̣. ‘‘ажирагаалаажаарига’’нд̇и ваа баато, ажирагаалз аажааро аж̇жхаажааро зд̇ассаад̇и ажирагаалаажааригам̣.
300. ‘‘Abbhutaṃ kātuṃ na vaṭṭatī’’ti iminā dukkaṭaṃ hotīti dīpeti. ‘‘Parājitena dātabba’’nti vuttattā adento dhuranikkhepena kāretabbo. Acirakāle adhikāro etassa atthīti acirakālādhikārikaṃ, sañcarittaṃ. ‘‘Acirakālācārika’’nti vā pāṭho, acirakāle ācāro ajjhācāro etassāti acirakālācārikaṃ.
гин̃жааби зхибхигкуубасамбаннаа жзва саран̣аг̇амануубасамбаннаа жа сан̃жарид̇д̇аад̣̇ибан̣н̣ад̇д̇иваж̇ж̇ам̣ аабад̇д̇им̣ аабаж̇ж̇анд̇и, д̇зсам̣ бана на саб̣б̣агаалигад̇д̇аа д̇з важ̇ж̇зд̇ваа саб̣б̣агаалаануруубам̣ д̇анд̇им̣ табзнд̇о бхаг̇аваа ид̇хааби н̃ад̇д̇ижад̇уд̇т̇знзва гаммзна убасамбаннам̣ бхигкум̣ д̣̇ассзд̇ум̣ ‘‘д̇ад̇ра явааяам̣ бхигку…бз… аяам̣ имасмим̣ ад̇т̇з ад̇хиббзд̇о бхигкуу’’д̇и бад̣̇абхааж̇анам̣ ааха, на бана нзсам̣ сан̃жарид̇д̇аад̣̇иаабаж̇ж̇анз абхаб̣б̣абхаавад̇о. кийн̣аасавааби хи аббассуд̇аа гин̃жааби логаваж̇ж̇ам̣ наабаж̇ж̇анд̇и, бан̣н̣ад̇д̇ияам̣ бана аговид̣̇ад̇д̇аа вихаарагаарам̣ гудигаарам̣ сахааг̇аарам̣ сахасзяяанд̇и зваруубаа гааяад̣̇ваарз аабад̇д̇ияо аабаж̇ж̇анд̇и, сан̃жарид̇д̇ам̣ бад̣̇асод̇хаммам̣ уд̇д̇аричаббан̃жаваажам̣ бхууд̇аарожананд̇и зваруубаа важийд̣̇ваарз аабад̇д̇ияо аабаж̇ж̇анд̇и, убанигкид̇д̇асаад̣̇ияанавасзна манод̣̇ваарз руубияабадиг̇г̇ахан̣аабад̇д̇им̣ аабаж̇ж̇анд̇и.
Kiñcāpi ehibhikkhūpasampannā ceva saraṇagamanūpasampannā ca sañcarittādipaṇṇattivajjaṃ āpattiṃ āpajjanti, tesaṃ pana na sabbakālikattā te vajjetvā sabbakālānurūpaṃ tantiṃ ṭhapento bhagavā idhāpi ñatticatuttheneva kammena upasampannaṃ bhikkhuṃ dassetuṃ ‘‘tatra yvāyaṃ bhikkhu…pe… ayaṃ imasmiṃ atthe adhippeto bhikkhū’’ti padabhājanaṃ āha, na pana nesaṃ sañcarittādiāpajjane abhabbabhāvato. Khīṇāsavāpi hi appassutā kiñcāpi lokavajjaṃ nāpajjanti, paṇṇattiyaṃ pana akovidattā vihārakāraṃ kuṭikāraṃ sahāgāraṃ sahaseyyanti evarūpā kāyadvāre āpattiyo āpajjanti, sañcarittaṃ padasodhammaṃ uttarichappañcavācaṃ bhūtārocananti evarūpā vacīdvāre āpattiyo āpajjanti, upanikkhittasādiyanavasena manodvāre rūpiyapaṭiggahaṇāpattiṃ āpajjanti.
301. сан̃жаран̣ам̣ сан̃жаро, со зд̇асса ад̇т̇ийд̇и сан̃жарий, д̇асса бхааво сан̃жарид̇д̇ам̣. д̇знааха ‘‘сан̃жаран̣абхаава’’нд̇и, ид̇т̇ибурисаанам̣ анд̇арз сан̃жаран̣абхааванд̇и ад̇т̇о. ж̇ааяад̇д̇анз ж̇аарад̇д̇анзд̇и жа нимид̇д̇ад̇т̇з бхуммам̣, ж̇ааяабхаавад̇т̇ам̣ ж̇аарабхаавад̇т̇анд̇и вуд̇д̇ам̣ ход̇и. ж̇ааяабхаавзд̇и бхарияабхаавааяа. ж̇аарабхаавзд̇и саамигабхаавааяа. гин̃жааби имасса бад̣̇абхааж̇анз ‘‘ж̇аарий бхависсасий’’д̇и ид̇т̇илин̇г̇авасзна бад̣̇абхааж̇анам̣ вуд̇д̇ам̣, ж̇аарад̇д̇анзд̇и бана нид̣̇д̣̇зсасса убхаяалин̇г̇асаад̇хааран̣ад̇д̇аа бурисалин̇г̇авасзнаби яож̇зд̇ваа ад̇т̇ам̣ д̣̇ассзнд̇о ‘‘ид̇т̇ияаа мад̇им̣ бурисасса аарожзнд̇о ж̇аарад̇д̇анз аарожзд̇ий’’д̇иаад̣̇имааха. зд̇т̇а хи ‘‘ж̇ааро бхависсасий’’д̇и ид̇т̇ияаа мад̇им̣ бурисасса аарожзнд̇о ж̇аарад̇д̇анз аарожзд̇и наама. баал̣ияам̣ бана ид̇т̇илин̇г̇авасзнзва яож̇анаа гад̇аа, д̇ад̣̇анусаарзна бурисалин̇г̇авасзнаби саггаа яож̇зд̇унд̇и.
301. Sañcaraṇaṃ sañcaro, so etassa atthīti sañcarī, tassa bhāvo sañcarittaṃ. Tenāha ‘‘sañcaraṇabhāva’’nti, itthipurisānaṃ antare sañcaraṇabhāvanti attho. Jāyattane jārattaneti ca nimittatthe bhummaṃ, jāyabhāvatthaṃ jārabhāvatthanti vuttaṃ hoti. Jāyabhāveti bhariyabhāvāya. Jārabhāveti sāmikabhāvāya. Kiñcāpi imassa padabhājane ‘‘jārī bhavissasī’’ti itthiliṅgavasena padabhājanaṃ vuttaṃ, jārattaneti pana niddesassa ubhayaliṅgasādhāraṇattā purisaliṅgavasenapi yojetvā atthaṃ dassento ‘‘itthiyā matiṃ purisassa ārocento jārattane ārocetī’’tiādimāha. Ettha hi ‘‘jāro bhavissasī’’ti itthiyā matiṃ purisassa ārocento jārattane āroceti nāma. Pāḷiyaṃ pana itthiliṅgavaseneva yojanā katā, tadanusārena purisaliṅgavasenapi sakkā yojetunti.
ид̣̇аани баал̣ияам̣ вуд̇д̇анаязнаби ад̇т̇ам̣ д̣̇ассзнд̇о ‘‘абижаа’’д̇иаад̣̇имааха. бад̇и бхависсасийд̇и вуд̇д̇амзвад̇т̇ам̣ ‘‘саамиго бхависсасий’’д̇и барияааяаважанзна висзсзд̇ваа д̣̇ассзд̇и. ид̣̇ан̃жа ж̇аарад̇д̇анзд̇и нид̣̇д̣̇зсасса убхаяалин̇г̇асаад̇хааран̣ад̇д̇аа вуд̇д̇ам̣. мухуд̇д̇игаа бхависсасийд̇и асаамигам̣ санд̇хааяа вуд̇д̇ам̣, ж̇аарий бхависсасийд̇и сасаамигам̣ санд̇хааяа. анд̇амасо д̇ан̇кан̣игааяабийд̇и ид̣̇ам̣ нид̣̇ассанамад̇д̇анд̇и ааха ‘‘зд̇знзвубааязнаа’’д̇иаад̣̇и.
Idāni pāḷiyaṃ vuttanayenapi atthaṃ dassento ‘‘apicā’’tiādimāha. Pati bhavissasīti vuttamevatthaṃ ‘‘sāmiko bhavissasī’’ti pariyāyavacanena visesetvā dasseti. Idañca jārattaneti niddesassa ubhayaliṅgasādhāraṇattā vuttaṃ. Muhuttikā bhavissasīti asāmikaṃ sandhāya vuttaṃ, jārī bhavissasīti sasāmikaṃ sandhāya. Antamaso taṅkhaṇikāyapīti idaṃ nidassanamattanti āha ‘‘etenevupāyenā’’tiādi.
303. сзривихааранд̇и сажчанд̣̇ажаарам̣. ад̇д̇ано васанд̇и ад̇д̇ано аан̣ам̣. г̇од̇д̇анд̇и г̇од̇амаг̇од̇д̇аад̣̇игам̣ г̇од̇д̇ам̣. д̇хаммод̇и бан̣д̣аран̇г̇абариб̣б̣ааж̇агаад̣̇ийнам̣, д̇зсам̣ д̇зсам̣ ваа гулаанам̣ д̇хаммо. г̇од̇д̇аванд̇зсу г̇од̇д̇асад̣̇д̣̇о, д̇хаммажаарийсу жа д̇хаммасад̣̇д̣̇о вад̇д̇ад̇ийд̇и ааха ‘‘саг̇од̇д̇зхий’’д̇иаад̣̇и. д̇ад̇т̇а саг̇од̇д̇зхийд̇и самаанаг̇од̇д̇зхи, згавам̣саж̇аад̇зхийд̇и ад̇т̇о. сахад̇хаммигзхийд̇и згасса сад̇т̇усаасанз сахажарид̇аб̣б̣ад̇хаммзхи, самаанагулад̇хаммзхи ваа. д̇знзвааха ‘‘згам̣ сад̇т̇аара’’нд̇иаад̣̇и. д̇ад̇т̇а ‘‘згам̣ сад̇т̇аарам̣ уд̣̇д̣̇исса баб̣б̣аж̇ид̇зхий’’д̇и иминаа бан̣д̣аран̇г̇абариб̣б̣ааж̇агаад̣̇аяо вуд̇д̇аа, згаг̇ан̣абарияаабаннзхийд̇и маалаагаараад̣̇изгаг̇ан̣абарияаабаннзхи.
303.Serivihāranti sacchandacāraṃ. Attano vasanti attano āṇaṃ. Gottanti gotamagottādikaṃ gottaṃ. Dhammoti paṇḍaraṅgaparibbājakādīnaṃ, tesaṃ tesaṃ vā kulānaṃ dhammo. Gottavantesu gottasaddo, dhammacārīsu ca dhammasaddo vattatīti āha ‘‘sagottehī’’tiādi. Tattha sagottehīti samānagottehi, ekavaṃsajātehīti attho. Sahadhammikehīti ekassa satthusāsane sahacaritabbadhammehi, samānakuladhammehi vā. Tenevāha ‘‘ekaṃ satthāra’’ntiādi. Tattha ‘‘ekaṃ satthāraṃ uddissa pabbajitehī’’ti iminā paṇḍaraṅgaparibbājakādayo vuttā, ekagaṇapariyāpannehīti mālākārādiekagaṇapariyāpannehi.
сасаамигаа саарагкаа. яассаа г̇аманз ран̃н̃аа д̣̇ан̣д̣о табид̇о, саа сабарид̣̇ан̣д̣аа. бажчимаанам̣ д̣̇виннанд̇и саарагкасабарид̣̇ан̣д̣аанам̣ мижчаажааро ход̇и д̇аасам̣ сасаамигабхаавад̇о. на ид̇араасанд̇и ид̇араасам̣ маад̇урагкид̇аад̣̇ийнам̣ адтаннам̣ бурисанд̇араг̇аманз над̇т̇и мижчаажааро д̇аасам̣ асаамигабхаавад̇о. яаа хи саамигасса санд̇агам̣ пассам̣ т̇знзд̇ваа барзсам̣ абхирад̇им̣ уббаад̣̇знд̇и, д̇аасам̣ мижчаажааро, на жа маад̇аад̣̇аяо д̇аасам̣ пассз иссараа. маад̇аад̣̇аяо хи на ад̇д̇анаа пассаанубхаванад̇т̇ам̣ д̇аа рагканд̇и, гзвалам̣ анаажаарам̣ нисзд̇хзнд̇аа бурисанд̇араг̇аманам̣ д̇аасам̣ ваарзнд̇и. бурисасса бана зд̇аасу адтасуби ход̇иязва мижчаажааро маад̇аад̣̇ийхи яат̇аа бурисзна сад̣̇д̇хим̣ сам̣ваасам̣ на габбзд̇и, д̇ат̇аа рагкид̇ад̇д̇аа барзсам̣ рагкид̇аг̇обид̇ам̣ пассам̣ т̇знзд̇ваа пудтабхаавад̇о.
Sasāmikā sārakkhā. Yassā gamane raññā daṇḍo ṭhapito, sā saparidaṇḍā. Pacchimānaṃ dvinnanti sārakkhasaparidaṇḍānaṃ micchācāro hoti tāsaṃ sasāmikabhāvato. Na itarāsanti itarāsaṃ māturakkhitādīnaṃ aṭṭhannaṃ purisantaragamane natthi micchācāro tāsaṃ asāmikabhāvato. Yā hi sāmikassa santakaṃ phassaṃ thenetvā paresaṃ abhiratiṃ uppādenti, tāsaṃ micchācāro, na ca mātādayo tāsaṃ phasse issarā. Mātādayo hi na attanā phassānubhavanatthaṃ tā rakkhanti, kevalaṃ anācāraṃ nisedhentā purisantaragamanaṃ tāsaṃ vārenti. Purisassa pana etāsu aṭṭhasupi hotiyeva micchācāro mātādīhi yathā purisena saddhiṃ saṃvāsaṃ na kappeti, tathā rakkhitattā paresaṃ rakkhitagopitaṃ phassaṃ thenetvā phuṭṭhabhāvato.
д̇ханзна гийд̇аад̇и бхарияабхаавад̇т̇ам̣ д̇ханзна гийд̇аа. д̇знааха ‘‘яасмаа банаа’’д̇иаад̣̇и. бхог̇знаад̇и бхог̇ахзд̇у. бхог̇ад̇т̇ан̃хи васанд̇ий ‘‘бхог̇аваасиний’’д̇и вужжад̇и. лабхид̇ваад̇и яо нам̣ ваасзд̇и, д̇асса хад̇т̇ад̇о лабхид̇ваа. уд̣̇агабад̇д̇ам̣ аамасид̇ваа г̇ахид̇аа од̣̇абад̇д̇агиний. д̇знааха ‘‘убхинна’’нд̇иаад̣̇и. д̇хаж̇зна аахадаад̇и зд̇т̇а д̇хаж̇аяог̇ад̇о сзнаава д̇хаж̇асад̣̇д̣̇зна вуд̇д̇аа, уссид̇ад̣̇д̇хаж̇ааяа сзнааяа аахадаад̇и вуд̇д̇ам̣ ход̇и. д̇знааха ‘‘уссид̇ад̣̇д̇хаж̇ааяаа’’д̇иаад̣̇и.
Dhanena kītāti bhariyabhāvatthaṃ dhanena kītā. Tenāha ‘‘yasmā panā’’tiādi. Bhogenāti bhogahetu. Bhogatthañhi vasantī ‘‘bhogavāsinī’’ti vuccati. Labhitvāti yo naṃ vāseti, tassa hatthato labhitvā. Udakapattaṃ āmasitvā gahitā odapattakinī. Tenāha ‘‘ubhinna’’ntiādi. Dhajena āhaṭāti ettha dhajayogato senāva dhajasaddena vuttā, ussitaddhajāya senāya āhaṭāti vuttaṃ hoti. Tenāha ‘‘ussitaddhajāyā’’tiādi.
305. б̣ахид̣̇д̇хаа вимадтам̣ наама ход̇ийд̇и ан̃н̃ад̇т̇а аарожид̇ам̣ наама ход̇и. д̇ам̣ гирияам̣ самбаад̣̇зссад̇ийд̇и д̇ассаа аарожзд̇ваа д̇ам̣ гижжам̣ самбаад̣̇зд̇у ваа маа ваа, д̇ам̣гирияаасамбаад̣̇анз яог̇яад̇ам̣ санд̇хааяа вуд̇д̇ам̣. д̣̇аарагам̣ д̣̇аариган̃жа аж̇аанаабзд̇ваа д̇зсам̣ маад̇аабид̇уаад̣̇ийхи маад̇аабид̇уаад̣̇ийнам̣язва санд̇игам̣ саасанз бзсид̇зби харан̣авиймам̣санабажжаахаран̣асан̇каад̇ааяа д̇иван̇г̇асамбад̇д̇ияаа сан̇гхаад̣̇исзсо ход̇иязваад̇и д̣̇адтаб̣б̣ам̣. яам̣ уд̣̇д̣̇исса саасанам̣ бзсид̇ам̣, д̇ам̣язва санд̇хааяа д̇ассаа маад̇уаад̣̇ийнам̣ аарожид̇з вад̇т̇уно згад̇д̇аа маад̇уаад̣̇аяоби кзд̇д̇амзваад̇и кзд̇д̇амзва од̇ин̣н̣абхаавам̣ д̣̇ассзд̇ум̣ ‘‘б̣уд̣̇д̇хам̣ бажжагкаамий’’д̇иаад̣̇и уд̣̇аахадам̣. иминаа самзд̇ийд̇и зд̇т̇ааяамад̇хиббааяо – яат̇аа саяам̣ анаарожзд̇ваа ан̃н̃зна анд̇зваасиаад̣̇инаа аарожаабзнд̇асса висан̇гзд̇о над̇т̇и, звам̣ д̇ассаа саяам̣ анаарожзд̇ваа аарожанад̇т̇ам̣ маад̇уаад̣̇ийнам̣ вад̣̇анд̇ассаби над̇т̇и висан̇гзд̇од̇и. гхарам̣ наяад̇ийд̇и гхаран̣ий. мууладтаанан̃жа васзнаад̇и зд̇т̇а бурисасса маад̇уаад̣̇аяо саасанабзсанз муулабхууд̇ад̇д̇аа ‘‘мууладтаа’’д̇и вужжанд̇и. маад̇урагкид̇ааяа маад̇аа бхигкум̣ бахин̣ад̇ийд̇и зд̇т̇а ад̇д̇ано ваа д̇хийд̇у санд̇игам̣ ‘‘ид̇т̇аннаамасса бхарияаа ход̇уу’’д̇и бхигкум̣ бахин̣ад̇и, бурисасса ваа санд̇игам̣ ‘‘мама д̇хийд̇аа ид̇т̇аннаамасса бхарияаа ход̇уу’’д̇и бахин̣ад̇ийд̇и г̇ахзд̇аб̣б̣ам̣. зса наяо сзсзсуби. буб̣б̣з вуд̇д̇анаяад̇д̇аад̇и батамасан̇гхаад̣̇исзсз вуд̇д̇анаяад̇д̇аа.
305.Bahiddhā vimaṭṭhaṃ nāma hotīti aññattha ārocitaṃ nāma hoti. Taṃ kiriyaṃ sampādessatīti tassā ārocetvā taṃ kiccaṃ sampādetu vā mā vā, taṃkiriyāsampādane yogyataṃ sandhāya vuttaṃ. Dārakaṃ dārikañca ajānāpetvā tesaṃ mātāpituādīhi mātāpituādīnaṃyeva santikaṃ sāsane pesitepi haraṇavīmaṃsanapaccāharaṇasaṅkhātāya tivaṅgasampattiyā saṅghādiseso hotiyevāti daṭṭhabbaṃ. Yaṃ uddissa sāsanaṃ pesitaṃ, taṃyeva sandhāya tassā mātuādīnaṃ ārocite vatthuno ekattā mātuādayopi khettamevāti khettameva otiṇṇabhāvaṃ dassetuṃ ‘‘buddhaṃ paccakkhāmī’’tiādi udāhaṭaṃ. Iminā sametīti etthāyamadhippāyo – yathā sayaṃ anārocetvā aññena antevāsiādinā ārocāpentassa visaṅketo natthi, evaṃ tassā sayaṃ anārocetvā ārocanatthaṃ mātuādīnaṃ vadantassapi natthi visaṅketoti. Gharaṃ nayatīti gharaṇī. Mūlaṭṭhānañca vasenāti ettha purisassa mātuādayo sāsanapesane mūlabhūtattā ‘‘mūlaṭṭhā’’ti vuccanti. Māturakkhitāya mātā bhikkhuṃ pahiṇatīti ettha attano vā dhītu santikaṃ ‘‘itthannāmassa bhariyā hotū’’ti bhikkhuṃ pahiṇati, purisassa vā santikaṃ ‘‘mama dhītā itthannāmassa bhariyā hotū’’ti pahiṇatīti gahetabbaṃ. Esa nayo sesesupi. Pubbe vuttanayattāti paṭhamasaṅghādisese vuttanayattā.
338. зд̇д̇ова баггамад̇ийд̇и буна ааг̇анд̇ваа аан̣аабагасса анаарожзд̇ваа д̇ад̇оязва баггамад̇и. ан̃н̃зна гаран̣ийязнаад̇и г̇аманахзд̇увисуд̣̇д̇хид̣̇ассанад̇т̇ам̣ вуд̇д̇ам̣. д̇знзва бана гаран̣ийязна г̇анд̇вааби гин̃жи анаарожзнд̇о на виймам̣сад̇и наама. анабхинанд̣̇ид̇ваад̇и ид̣̇ам̣ д̇ат̇аа бадибаж̇ж̇амаанам̣ санд̇хааяа вуд̇д̇ам̣, сад̇иби абхинанд̣̇анз саасанам̣ анаарожзнд̇о бана на виймам̣сад̇и наама. д̇ад̇ияабад̣̇з вуд̇д̇анаязнаад̇и ‘‘со д̇ассаа важанам̣ анабхинанд̣̇ид̇ваа’’д̇иаад̣̇инаа вуд̇д̇анаязна. вад̇т̇уг̇ан̣анааяаад̇и самб̣ахулаанам̣ ид̇т̇ибурисаанам̣ самабхаавз сад̇и д̣̇виннам̣ д̣̇виннам̣ ид̇т̇ибурисавад̇т̇уунам̣ г̇ан̣анааяа. сажз бана згад̇о ад̇хигаа хонд̇и, ад̇хигаанам̣ г̇ан̣анааяа аабад̇д̇ибхзд̣̇о взд̣̇ид̇аб̣б̣о.
338.Ettova pakkamatīti puna āgantvā āṇāpakassa anārocetvā tatoyeva pakkamati. Aññena karaṇīyenāti gamanahetuvisuddhidassanatthaṃ vuttaṃ. Teneva pana karaṇīyena gantvāpi kiñci anārocento na vīmaṃsati nāma. Anabhinanditvāti idaṃ tathā paṭipajjamānaṃ sandhāya vuttaṃ, satipi abhinandane sāsanaṃ anārocento pana na vīmaṃsati nāma. Tatiyapade vuttanayenāti ‘‘so tassā vacanaṃ anabhinanditvā’’tiādinā vuttanayena. Vatthugaṇanāyāti sambahulānaṃ itthipurisānaṃ samabhāve sati dvinnaṃ dvinnaṃ itthipurisavatthūnaṃ gaṇanāya. Sace pana ekato adhikā honti, adhikānaṃ gaṇanāya āpattibhedo veditabbo.
339-340. баал̣ияам̣ жад̇уд̇т̇аваарз асад̇иби ‘‘г̇ажчанд̇о на самбаад̣̇зд̇и, ааг̇ажчанд̇о висам̣ваад̣̇зд̇и, анаабад̇д̇ий’’д̇и ид̣̇ам̣ ад̇т̇ад̇о аабаннамзваад̇и гад̇ваа вуд̇д̇ам̣ ‘‘жад̇уд̇т̇з анаабад̇д̇ий’’д̇и. гааругаананд̇и вад̣дхагийаад̣̇ийнам̣. д̇ажчагааяогаарад̇анд̇авааяараж̇аганхаабид̇агаа бан̃жа гаараво ‘‘гааругаа’’д̇и вужжанд̇и. зваруубзна…бз… анаабад̇д̇ийд̇и д̇аад̣̇исам̣ г̇ихивзяяааважжамби на ход̇ийд̇и гад̇ваа вуд̇д̇ам̣.
339-340. Pāḷiyaṃ catutthavāre asatipi ‘‘gacchanto na sampādeti, āgacchanto visaṃvādeti, anāpattī’’ti idaṃ atthato āpannamevāti katvā vuttaṃ ‘‘catutthe anāpattī’’ti. Kārukānanti vaḍḍhakīādīnaṃ. Tacchakaayokāratantavāyarajakanhāpitakā pañca kāravo ‘‘kārukā’’ti vuccanti. Evarūpena…pe… anāpattīti tādisaṃ gihiveyyāvaccampi na hotīti katvā vuttaṃ.
гааяад̇о самудтаад̇ийд̇и бан̣н̣ад̇д̇им̣ ваа алам̣важанийяабхаавам̣ ваа аж̇аананд̇асса гааяад̇о самудтаад̇и. ваажад̇о самудтаад̇ийд̇и зд̇т̇ааби зсзва наяо. гааяаваажад̇о самудтаад̇ийд̇и бан̣н̣ад̇д̇им̣ ж̇аанид̇ваа алам̣важанийяабхаавам̣ аж̇аананд̇ассаби гааяаваажад̇о самудтаад̇ийд̇и взд̣̇ид̇аб̣б̣ам̣. алам̣важанийяаа хонд̇ийд̇и д̣̇зсажаарид̇д̇авасзна бан̣н̣ад̣̇аанаад̣̇инаа барижжад̇д̇аа хонд̇и. бан̣н̣ад̇д̇им̣ бана ж̇аанид̇ваад̇и зд̇т̇а алам̣важанийяабхаавам̣ ваад̇и жа д̣̇адтаб̣б̣ам̣. д̇знзва маад̇игаадтагат̇ааяам̣ (ган̇каа. адта. сан̃жарид̇д̇асигкаабад̣̇аван̣н̣анаа) ‘‘д̇ад̣̇убхаяам̣ бана ж̇аанид̇ваа зд̇зхзва д̇ийхи наязхи самаабаж̇ж̇анд̇асса д̇аанзва д̇ийн̣и д̇ад̣̇убхаяаж̇аананажид̇д̇зна сажид̇д̇агаани хонд̇ий’’д̇и вуд̇д̇ам̣. д̇асмаа бан̣н̣ад̇д̇иж̇аананажид̇д̇знаад̇и зд̇т̇ааби д̇ад̣̇убхаяаж̇аананам̣ вад̇д̇аб̣б̣ам̣. бхигкум̣ аж̇аанаабзд̇ваа ад̇д̇ано ад̇хиббааяам̣ бан̣н̣з ликид̇ваа д̣̇иннам̣ харанд̇ассаби аабад̇д̇и ход̇и, имасса сигкаабад̣̇асса ажид̇д̇агад̇д̇аад̇и на г̇ахзд̇аб̣б̣ам̣. баал̣ияам̣ бана ‘‘аарожзд̇ий’’д̇и вуд̇д̇ад̇д̇аа адтагат̇ааяан̃жа д̇ад̇т̇а д̇ад̇т̇а аарожанассзва д̣̇ассид̇ад̇д̇аа гааязна ваа ваажааяа ваа аарожзнд̇ассзва аабад̇д̇и ход̇ийд̇и г̇ахзд̇аб̣б̣ам̣.
Kāyato samuṭṭhātīti paṇṇattiṃ vā alaṃvacanīyabhāvaṃ vā ajānantassa kāyato samuṭṭhāti. Vācato samuṭṭhātīti etthāpi eseva nayo. Kāyavācato samuṭṭhātīti paṇṇattiṃ jānitvā alaṃvacanīyabhāvaṃ ajānantassapi kāyavācato samuṭṭhātīti veditabbaṃ. Alaṃvacanīyā hontīti desacārittavasena paṇṇadānādinā pariccattā honti. Paṇṇattiṃpana jānitvāti ettha alaṃvacanīyabhāvaṃ vāti ca daṭṭhabbaṃ. Teneva mātikāṭṭhakathāyaṃ (kaṅkhā. aṭṭha. sañcarittasikkhāpadavaṇṇanā) ‘‘tadubhayaṃ pana jānitvā eteheva tīhi nayehi samāpajjantassa tāneva tīṇi tadubhayajānanacittena sacittakāni hontī’’ti vuttaṃ. Tasmā paṇṇattijānanacittenāti etthāpi tadubhayajānanaṃ vattabbaṃ. Bhikkhuṃ ajānāpetvā attano adhippāyaṃ paṇṇe likhitvā dinnaṃ harantassapi āpatti hoti, imassa sikkhāpadassa acittakattāti na gahetabbaṃ. Pāḷiyaṃ pana ‘‘ārocetī’’ti vuttattā aṭṭhakathāyañca tattha tattha ārocanasseva dassitattā kāyena vā vācāya vā ārocentasseva āpatti hotīti gahetabbaṃ.
341. д̣̇удтуллаад̣̇ийсубийд̇и аад̣̇и-сад̣̇д̣̇зна сан̃жарид̇д̇амби сан̇г̇ан̣хаад̇и. зд̇т̇а бана гин̃жааби ид̇т̇ий наама мануссид̇т̇ий, на яагкий, на бзд̇ий, на д̇иражчаанаг̇ад̇аа, бурисо наама мануссабурисо, на яагкод̇иаад̣̇и на вуд̇д̇ам̣, д̇ат̇ааби мануссаж̇аад̇игаава ид̇т̇ибурисаа ид̇ха ад̇хиббзд̇аа. д̇асмаа язсу сан̃жарид̇д̇ам̣ самаабаж̇ж̇ад̇и, д̇зсам̣ мануссаж̇аад̇игад̇аа, на наалам̣важанийяад̇аа, бадиг̇г̇ан̣ханавиймам̣санабажжаахаран̣аанийд̇и имаанзд̇т̇а бан̃жан̇г̇аани.
341.Duṭṭhullādīsupīti ādi-saddena sañcarittampi saṅgaṇhāti. Ettha pana kiñcāpi itthī nāma manussitthī, na yakkhī, na petī, na tiracchānagatā, puriso nāma manussapuriso, na yakkhotiādi na vuttaṃ, tathāpi manussajātikāva itthipurisā idha adhippetā. Tasmā yesu sañcarittaṃ samāpajjati, tesaṃ manussajātikatā, na nālaṃvacanīyatā, paṭiggaṇhanavīmaṃsanapaccāharaṇānīti imānettha pañcaṅgāni.
сан̃жарид̇д̇асигкаабад̣̇аван̣н̣анаа нидтид̇аа.
Sañcarittasikkhāpadavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 5. сан̃жарид̇д̇асигкаабад̣̇ам̣ • 5. Sañcarittasikkhāpadaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 5. сан̃жарид̇д̇асигкаабад̣̇аван̣н̣анаа • 5. Sañcarittasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā
5. сан̃жарид̇д̇асигкаабад̣̇аван̣н̣анаа • 5. Sañcarittasikkhāpadavaṇṇanā
бад̣̇абхааж̇анийяаван̣н̣анаа • Padabhājanīyavaṇṇanā
винийд̇авад̇т̇уван̣н̣анаа • Vinītavatthuvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / 5. сан̃жарид̇д̇асигкаабад̣̇аван̣н̣анаа • 5. Sañcarittasikkhāpadavaṇṇanā
