| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) |
༧-༨. སཉྩེཏནིཀསུཏྟདྭཡཝཎྞནཱ
7-8. Sañcetanikasuttadvayavaṇṇanā
༢༡༧-༢༡༨. སཏྟམེ སཉྩེཏནིཀཱནནྟི ཙེཏེཏྭཱ པཀཔྤེཏྭཱ ཀཏཱནཾ། ཨུཔཙིཏཱནནྟི ཙིཏཱནཾ ཝཌྜྷིཏཱནཾ། ཨཔྤཊིསཾཝེདིཏྭཱཏི ཏེསཾ ཀམྨཱནཾ ཝིཔཱཀཾ ཨཝེདིཡིཏྭཱ། བྱནྟཱིབྷཱཝནྟི ཝིགཏནྟབྷཱཝཾ ཏེསཾ ཀམྨཱནཾ པརིཙྪེདཔརིཝཊུམཏཱཀརཎཾ། ཏཉྩ ཁོ དིཊྛེཝ དྷམྨེཏི ཏཉྩ ཁོ ཝིཔཱཀཾ དིཊྛདྷམྨཝེདནཱིཡཾ དིཊྛེཝ དྷམྨེ། ཨུཔཔཛྫནྟི ཨུཔཔཛྫཝེདནཱིཡཾ ཨནནྟརེ ཨཏྟབྷཱཝེ། ཨཔརེ ཝཱ པརིཡཱཡེཏི ཨཔརཔརིཡཱཡཝེདནཱིཡཾ པན སཾསཱརཔྤཝཏྟེ སཏི སཧསྶིམེཔི ཨཏྟབྷཱཝེཏི། ཨིམིནཱ ཨིདཾ དསྶེཏི ‘‘སཾསཱརཔྤཝཏྟེ པཊིལདྡྷཝིཔཱཀཱརཧཀམྨེ ན ཝིཛྫཏི སོ ཛགཏིཔྤདེསོ, ཡཏྠ ཋིཏོ མུཙྩེཡྻ པཱཔཀམྨཱ’’ཏི། ཏིཝིདྷཱཏི ཏིཔྤཀཱརཱ། ཀཱཡཀམྨནྟསནྡོསབྱཱཔཏྟཱིཏི ཀཱཡཀམྨནྟསངྑཱཏཱ ཝིཔཏྟི། ཨིམིནཱ ནཡེན སབྦཔདཱནི ཝེདིཏབྦཱནི། ཨཊྛམེ ཨཔཎྞཀོ མཎཱིཏི སམནྟཏོ ཙཏུརསྶོ པཱསཀོ།
217-218. Sattame sañcetanikānanti cetetvā pakappetvā katānaṃ. Upacitānanti citānaṃ vaḍḍhitānaṃ. Appaṭisaṃveditvāti tesaṃ kammānaṃ vipākaṃ avediyitvā. Byantībhāvanti vigatantabhāvaṃ tesaṃ kammānaṃ paricchedaparivaṭumatākaraṇaṃ. Tañca kho diṭṭheva dhammeti tañca kho vipākaṃ diṭṭhadhammavedanīyaṃ diṭṭheva dhamme. Upapajjanti upapajjavedanīyaṃ anantare attabhāve. Apare vā pariyāyeti aparapariyāyavedanīyaṃ pana saṃsārappavatte sati sahassimepi attabhāveti. Iminā idaṃ dasseti ‘‘saṃsārappavatte paṭiladdhavipākārahakamme na vijjati so jagatippadeso, yattha ṭhito mucceyya pāpakammā’’ti. Tividhāti tippakārā. Kāyakammantasandosabyāpattīti kāyakammantasaṅkhātā vipatti. Iminā nayena sabbapadāni veditabbāni. Aṭṭhame apaṇṇako maṇīti samantato caturasso pāsako.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya
༧. པཋམསཉྩེཏནིཀསུཏྟཾ • 7. Paṭhamasañcetanikasuttaṃ
༨. དུཏིཡསཉྩེཏནིཀསུཏྟཾ • 8. Dutiyasañcetanikasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༥༣༦. པཋམནིརཡསགྒསུཏྟཱདིཝཎྞནཱ • 1-536. Paṭhamanirayasaggasuttādivaṇṇanā
