| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৭. সপ্পাণকৰগ্গো
7. Sappāṇakavaggo
১. সঞ্চিচ্চপাণসিক্খাপদ-অত্থযোজনা
1. Sañciccapāṇasikkhāpada-atthayojanā
৩৮২. সপ্পাণকৰগ্গস্স পঠমে উসুং অসতি খিপতি অনেনাতি ইস্সাসোতি কতে ধনুযেৰ মুখ্যতো ইস্সাসো নাম, ধনুগ্গহা- চরিযো পন উপচারেন। উসুং অসতি খিপতীতি ইস্সাসোতি কতে ধনুগ্গহাচরিযো ইস্সাসো নাম, ইধ পন উপচারত্থো ৰা কত্তুত্থো ৰা গহেতব্বোতি আহ ‘‘ধনুগ্গহাচরিযো হোতী’’তি। পব্বজিতকালে ইস্সাসস্স অযুত্তত্তা ৰুত্তং ‘‘গিহিকালে’’তি। ৰোরোপিতাতি এত্থ ৰি অৰ পুব্বস্স রুহধাতুস্স অধিপ্পাযত্থং দস্সেতুং ৰুত্তং ‘‘ৰিযোজিতা’’তি।
382. Sappāṇakavaggassa paṭhame usuṃ asati khipati anenāti issāsoti kate dhanuyeva mukhyato issāso nāma, dhanuggahā- cariyo pana upacārena. Usuṃ asati khipatīti issāsoti kate dhanuggahācariyo issāso nāma, idha pana upacārattho vā kattuttho vā gahetabboti āha ‘‘dhanuggahācariyo hotī’’ti. Pabbajitakāle issāsassa ayuttattā vuttaṃ ‘‘gihikāle’’ti. Voropitāti ettha vi ava pubbassa ruhadhātussa adhippāyatthaṃ dassetuṃ vuttaṃ ‘‘viyojitā’’ti.
যস্মা গচ্ছতীতি সম্বন্ধো। এতন্তি ‘‘জীৰিতা ৰোরোপিতা’’তিৰচনং। কস্মা ৰোহারমত্তমেৰ হোতি, ননু যতো কুতোচি যস্মিং কিস্মিংচি ৰিযোজিতে দ্ৰে ৰত্থূনি ৰিয ৰিসুং তিট্ঠন্তি পাণতো জীৰিতে ৰিযোজিতে পাণজীৰিতাপীতি আহ ‘‘ন হেত্থা’’তিআদি। হীতি সচ্চং। এত্থাতি ‘‘জীৰিতা ৰোরোপিতা’’তিৰচনে দস্সেতুন্তি সম্বন্ধো। কিঞ্চি জীৰিতং নামাতি যোজনা। অযং পনেত্থ অত্থসম্বন্ধো – সীসালঙ্কারে সীসতো ৰিযোজিতে সীসং অলঙ্কারতো ৰিসুং তিট্ঠতি যথা, এৰং জীৰিতে পাণতো ৰিযোজিতে জীৰিতং পাণতো ৰিসুং ন তিট্ঠতি নামাতি। অঞ্ঞদত্থূতি একংসেন। ‘‘পাণ’’ন্তি সামঞ্ঞতো ৰুত্তোপি মনুস্সপাণস্স পারাজিকট্ঠানে গহিতত্তা ইধ পারিসেসঞাযেন তিরচ্ছানপাণোৰ গহেতব্বোতি আহ ‘‘তিরচ্ছানগতোযেৰ পাণো’’তি। তন্তি পাণং। মহন্তে পন পাণেতি সম্বন্ধো।
Yasmā gacchatīti sambandho. Etanti ‘‘jīvitā voropitā’’tivacanaṃ. Kasmā vohāramattameva hoti, nanu yato kutoci yasmiṃ kismiṃci viyojite dve vatthūni viya visuṃ tiṭṭhanti pāṇato jīvite viyojite pāṇajīvitāpīti āha ‘‘na hetthā’’tiādi. Hīti saccaṃ. Etthāti ‘‘jīvitā voropitā’’tivacane dassetunti sambandho. Kiñci jīvitaṃ nāmāti yojanā. Ayaṃ panettha atthasambandho – sīsālaṅkāre sīsato viyojite sīsaṃ alaṅkārato visuṃ tiṭṭhati yathā, evaṃ jīvite pāṇato viyojite jīvitaṃ pāṇato visuṃ na tiṭṭhati nāmāti. Aññadatthūti ekaṃsena. ‘‘Pāṇa’’nti sāmaññato vuttopi manussapāṇassa pārājikaṭṭhāne gahitattā idha pārisesañāyena tiracchānapāṇova gahetabboti āha ‘‘tiracchānagatoyeva pāṇo’’ti. Tanti pāṇaṃ. Mahante pana pāṇeti sambandho.
৩৮৫. সোধেন্তো অপনেতীতি যোজনা। মঙ্গুলোতি মনুস্সরত্তপো একো কিমিৰিসেসো। সো হি রত্তপিৰনত্থায মঙ্গতি ইতো চিতো চ ইমং চিমঞ্চ ঠানং গচ্ছতীতি ‘‘মঙ্গুলো’’তি ৰুচ্চতি। পদক্খরানঞ্হি অৰিপরিতত্থং, সোতূনঞ্চ সজ্ঝাযোপদেসলভনত্থং কত্থচি ঠানে ৰচনত্থো ৰুত্তোতি দট্ঠব্বং। তস্স বীজমেৰ খুদ্দকট্ঠেন মঙ্গুলবীজকং, তস্মিং। তন্তি মঙ্গুলবীজকং। ভিন্দন্তো হুত্ৰাতি যোজনাতি। পঠমং।
385. Sodhento apanetīti yojanā. Maṅguloti manussarattapo eko kimiviseso. So hi rattapivanatthāya maṅgati ito cito ca imaṃ cimañca ṭhānaṃ gacchatīti ‘‘maṅgulo’’ti vuccati. Padakkharānañhi aviparitatthaṃ, sotūnañca sajjhāyopadesalabhanatthaṃ katthaci ṭhāne vacanattho vuttoti daṭṭhabbaṃ. Tassa bījameva khuddakaṭṭhena maṅgulabījakaṃ, tasmiṃ. Tanti maṅgulabījakaṃ. Bhindanto hutvāti yojanāti. Paṭhamaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৭. সপ্পাণকৰগ্গো • 7. Sappāṇakavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ১. সঞ্চিচ্চপাণসিক্খাপদৰণ্ণনা • 1. Sañciccapāṇasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১. সঞ্চিচ্চসিক্খাপদৰণ্ণনা • 1. Sañciccasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১. সঞ্চিচ্চপাণসিক্খাপদৰণ্ণনা • 1. Sañciccapāṇasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১. সঞ্চিচ্চপাণসিক্খাপদৰণ্ণনা • 1. Sañciccapāṇasikkhāpadavaṇṇanā
