| Library / Tipiṭaka / తిపిటక • Tipiṭaka / మహావిభఙ్గ-అట్ఠకథా • Mahāvibhaṅga-aṭṭhakathā |
౭. సప్పాణకవగ్గో
7. Sappāṇakavaggo
౧. సఞ్చిచ్చపాణసిక్ఖాపదవణ్ణనా
1. Sañciccapāṇasikkhāpadavaṇṇanā
౩౮౨. సప్పాణకవగ్గస్స పఠమసిక్ఖాపదే – ఇస్సాసో హోతీతి గిహికాలే ధనుగ్గహాచరియో హోతి. జీవితా వోరోపితాతి జీవితా వియోజితా.
382. Sappāṇakavaggassa paṭhamasikkhāpade – issāso hotīti gihikāle dhanuggahācariyo hoti. Jīvitā voropitāti jīvitā viyojitā.
సిక్ఖాపదేపి వోరోపేయ్యాతి వియోజేయ్య. యస్మా పన వోహారమత్తమేవేతం; న హేత్థ కిఞ్చి వియోజితే సీసాలఙ్కారే సీసం వియ జీవితా వోరోపితే పాణేపి జీవితం నామ విసుం తిట్ఠతి, అఞ్ఞదత్థు అన్తరధానమేవ గచ్ఛతి, తస్మా తమత్థం దస్సేతుం పదభాజనే ‘‘జీవితిన్ద్రియం ఉపచ్ఛిన్దతీ’’తిఆది వుత్తం. ఇమస్మిఞ్చ సిక్ఖాపదే తిరచ్ఛానగతోయేవ ‘‘పాణో’’తి వేదితబ్బో. తం ఖుద్దకమ్పి మహన్తమ్పి మారేన్తస్స ఆపత్తినానాకరణం నత్థి. మహన్తే పన ఉపక్కమమహన్తత్తా అకుసలమహత్తం హోతి. పాణే పాణసఞ్ఞీతి అన్తమసో మఞ్చపీఠం సోధేన్తో మఙ్గులబీజకేపి పాణసఞ్ఞీ నిక్కారుణికతాయ తం భిన్దన్తో అపనేతి, పాచిత్తియం. తస్మా ఏవరూపేసు ఠానేసు కారుఞ్ఞం ఉపట్ఠపేత్వా అప్పమత్తేన వత్తం కాతబ్బం. సేసం మనుస్సవిగ్గహే వుత్తనయేనేవ వేదితబ్బం సద్ధిం సముట్ఠానాదీహీతి.
Sikkhāpadepi voropeyyāti viyojeyya. Yasmā pana vohāramattamevetaṃ; na hettha kiñci viyojite sīsālaṅkāre sīsaṃ viya jīvitā voropite pāṇepi jīvitaṃ nāma visuṃ tiṭṭhati, aññadatthu antaradhānameva gacchati, tasmā tamatthaṃ dassetuṃ padabhājane ‘‘jīvitindriyaṃ upacchindatī’’tiādi vuttaṃ. Imasmiñca sikkhāpade tiracchānagatoyeva ‘‘pāṇo’’ti veditabbo. Taṃ khuddakampi mahantampi mārentassa āpattinānākaraṇaṃ natthi. Mahante pana upakkamamahantattā akusalamahattaṃ hoti. Pāṇe pāṇasaññīti antamaso mañcapīṭhaṃ sodhento maṅgulabījakepi pāṇasaññī nikkāruṇikatāya taṃ bhindanto apaneti, pācittiyaṃ. Tasmā evarūpesu ṭhānesu kāruññaṃ upaṭṭhapetvā appamattena vattaṃ kātabbaṃ. Sesaṃ manussaviggahe vuttanayeneva veditabbaṃ saddhiṃ samuṭṭhānādīhīti.
సఞ్చిచ్చపాణసిక్ఖాపదం పఠమం.
Sañciccapāṇasikkhāpadaṃ paṭhamaṃ.
Related texts:
తిపిటక (మూల) • Tipiṭaka (Mūla) / వినయపిటక • Vinayapiṭaka / మహావిభఙ్గ • Mahāvibhaṅga / ౭. సప్పాణకవగ్గో • 7. Sappāṇakavaggo
టీకా • Tīkā / వినయపిటక (టీకా) • Vinayapiṭaka (ṭīkā) / సారత్థదీపనీ-టీకా • Sāratthadīpanī-ṭīkā / ౧. సఞ్చిచ్చసిక్ఖాపదవణ్ణనా • 1. Sañciccasikkhāpadavaṇṇanā
టీకా • Tīkā / వినయపిటక (టీకా) • Vinayapiṭaka (ṭīkā) / వజిరబుద్ధి-టీకా • Vajirabuddhi-ṭīkā / ౧. సఞ్చిచ్చపాణసిక్ఖాపదవణ్ణనా • 1. Sañciccapāṇasikkhāpadavaṇṇanā
టీకా • Tīkā / వినయపిటక (టీకా) • Vinayapiṭaka (ṭīkā) / విమతివినోదనీ-టీకా • Vimativinodanī-ṭīkā / ౧. సఞ్చిచ్చపాణసిక్ఖాపదవణ్ణనా • 1. Sañciccapāṇasikkhāpadavaṇṇanā
టీకా • Tīkā / వినయపిటక (టీకా) • Vinayapiṭaka (ṭīkā) / పాచిత్యాదియోజనాపాళి • Pācityādiyojanāpāḷi / ౧. సఞ్చిచ్చపాణసిక్ఖాపద-అత్థయోజనా • 1. Sañciccapāṇasikkhāpada-atthayojanā
