| Library / Tipiṭaka / တိပိဋက • Tipiṭaka / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā |
၇. သပ္ပာဏကဝဂ္ဂော
7. Sappāṇakavaggo
၁. သဉ္စိစ္စပာဏသိက္ခာပဒဝဏ္ဏနာ
1. Sañciccapāṇasikkhāpadavaṇṇanā
၃၈၂. သပ္ပာဏကဝဂ္ဂသ္သ ပဌမသိက္ခာပဒေ – ဣသ္သာသော ဟောတီတိ ဂိဟိကာလေ ဓနုဂ္ဂဟာစရိယော ဟောတိ။ ဇီဝိတာ ဝောရောပိတာတိ ဇီဝိတာ ဝိယောဇိတာ။
382. Sappāṇakavaggassa paṭhamasikkhāpade – issāso hotīti gihikāle dhanuggahācariyo hoti. Jīvitā voropitāti jīvitā viyojitā.
သိက္ခာပဒေပိ ဝောရောပေယ္ယာတိ ဝိယောဇေယ္ယ။ ယသ္မာ ပန ဝောဟာရမတ္တမေဝေတံ; န ဟေတ္ထ ကိဉ္စိ ဝိယောဇိတေ သီသာလင္ကာရေ သီသံ ဝိယ ဇီဝိတာ ဝောရောပိတေ ပာဏေပိ ဇီဝိတံ နာမ ဝိသုံ တိဋ္ဌတိ, အညဒတ္ထု အန္တရဓာနမေဝ ဂစ္ဆတိ, တသ္မာ တမတ္ထံ ဒသ္သေတုံ ပဒဘာဇနေ ‘‘ဇီဝိတိန္ဒ္ရိယံ ဥပစ္ဆိန္ဒတီ’’တိအာဒိ ဝုတ္တံ။ ဣမသ္မိဉ္စ သိက္ခာပဒေ တိရစ္ဆာနဂတောယေဝ ‘‘ပာဏော’’တိ ဝေဒိတဗ္ဗော။ တံ ခုဒ္ဒကမ္ပိ မဟန္တမ္ပိ မာရေန္တသ္သ အာပတ္တိနာနာကရဏံ နတ္ထိ။ မဟန္တေ ပန ဥပက္ကမမဟန္တတ္တာ အကုသလမဟတ္တံ ဟောတိ။ ပာဏေ ပာဏသညီတိ အန္တမသော မဉ္စပီဌံ သောဓေန္တော မင္ဂုလဗီဇကေပိ ပာဏသညီ နိက္ကာရုဏိကတာယ တံ ဘိန္ဒန္တော အပနေတိ, ပာစိတ္တိယံ။ တသ္မာ ဧဝရူပေသု ဌာနေသု ကာရုညံ ဥပဋ္ဌပေတ္ဝာ အပ္ပမတ္တေန ဝတ္တံ ကာတဗ္ဗံ။ သေသံ မနုသ္သဝိဂ္ဂဟေ ဝုတ္တနယေနေဝ ဝေဒိတဗ္ဗံ သဒ္ဓိံ သမုဋ္ဌာနာဒီဟီတိ။
Sikkhāpadepi voropeyyāti viyojeyya. Yasmā pana vohāramattamevetaṃ; na hettha kiñci viyojite sīsālaṅkāre sīsaṃ viya jīvitā voropite pāṇepi jīvitaṃ nāma visuṃ tiṭṭhati, aññadatthu antaradhānameva gacchati, tasmā tamatthaṃ dassetuṃ padabhājane ‘‘jīvitindriyaṃ upacchindatī’’tiādi vuttaṃ. Imasmiñca sikkhāpade tiracchānagatoyeva ‘‘pāṇo’’ti veditabbo. Taṃ khuddakampi mahantampi mārentassa āpattinānākaraṇaṃ natthi. Mahante pana upakkamamahantattā akusalamahattaṃ hoti. Pāṇe pāṇasaññīti antamaso mañcapīṭhaṃ sodhento maṅgulabījakepi pāṇasaññī nikkāruṇikatāya taṃ bhindanto apaneti, pācittiyaṃ. Tasmā evarūpesu ṭhānesu kāruññaṃ upaṭṭhapetvā appamattena vattaṃ kātabbaṃ. Sesaṃ manussaviggahe vuttanayeneva veditabbaṃ saddhiṃ samuṭṭhānādīhīti.
သဉ္စိစ္စပာဏသိက္ခာပဒံ ပဌမံ။
Sañciccapāṇasikkhāpadaṃ paṭhamaṃ.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၇. သပ္ပာဏကဝဂ္ဂော • 7. Sappāṇakavaggo
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၁. သဉ္စိစ္စသိက္ခာပဒဝဏ္ဏနာ • 1. Sañciccasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၁. သဉ္စိစ္စပာဏသိက္ခာပဒဝဏ္ဏနာ • 1. Sañciccapāṇasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၁. သဉ္စိစ္စပာဏသိက္ခာပဒဝဏ္ဏနာ • 1. Sañciccapāṇasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁. သဉ္စိစ္စပာဏသိက္ခာပဒ-အတ္ထယောဇနာ • 1. Sañciccapāṇasikkhāpada-atthayojanā
