| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
৪. সঙ্গহৰারো
4. Saṅgahavāro
২৫২. কাযসংসগ্গং সাদিযনপচ্চযা আপত্তিযো সত্তন্নং আপত্তিক্খন্ধানং কতিহি আপত্তিক্খন্ধেহি সঙ্গহিতা? কাযসংসগ্গং সাদিযনপচ্চযা আপত্তিযো সত্তন্নং আপত্তিক্খন্ধানং পঞ্চহি আপত্তিক্খন্ধেহি সঙ্গহিতা – সিযা পারাজিকাপত্তিক্খন্ধেন, সিযা সঙ্ঘাদিসেসাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা দুক্কটাপত্তিক্খন্ধেন…পে॰…।
252. Kāyasaṃsaggaṃ sādiyanapaccayā āpattiyo sattannaṃ āpattikkhandhānaṃ katihi āpattikkhandhehi saṅgahitā? Kāyasaṃsaggaṃ sādiyanapaccayā āpattiyo sattannaṃ āpattikkhandhānaṃ pañcahi āpattikkhandhehi saṅgahitā – siyā pārājikāpattikkhandhena, siyā saṅghādisesāpattikkhandhena, siyā thullaccayāpattikkhandhena, siyā pācittiyāpattikkhandhena, siyā dukkaṭāpattikkhandhena…pe….
দধিং ৰিঞ্ঞাপেত্ৰা ভুঞ্জনপচ্চযা আপত্তিযো সত্তন্নং আপত্তিক্খন্ধানং কতিহি আপত্তিক্খন্ধেহি সঙ্গহিতা? দধিং ৰিঞ্ঞাপেত্ৰা ভুঞ্জনপচ্চযা আপত্তিযো সত্তন্নং আপত্তিক্খন্ধানং দ্ৰীহি আপত্তিক্খন্ধেহি সঙ্গহিতা – সিযা পাটিদেসনীযাপত্তিক্খন্ধেন, সিযা দুক্কটাপত্তিক্খন্ধেন।
Dadhiṃ viññāpetvā bhuñjanapaccayā āpattiyo sattannaṃ āpattikkhandhānaṃ katihi āpattikkhandhehi saṅgahitā? Dadhiṃ viññāpetvā bhuñjanapaccayā āpattiyo sattannaṃ āpattikkhandhānaṃ dvīhi āpattikkhandhehi saṅgahitā – siyā pāṭidesanīyāpattikkhandhena, siyā dukkaṭāpattikkhandhena.
সঙ্গহৰারো নিট্ঠিতো চতুত্থো।
Saṅgahavāro niṭṭhito catuttho.
