| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
৭. সত্তমৰগ্গো
7. Sattamavaggo
(৬৩) ১. সঙ্গহিতকথা
(63) 1. Saṅgahitakathā
৪৭১. নত্থি কেচি ধম্মা কেহিচি ধম্মেহি সঙ্গহিতাতি 1? আমন্তা। ননু অত্থি কেচি ধম্মা কেহিচি ধম্মেহি গণনং গচ্ছন্তি উদ্দেসং গচ্ছন্তি পরিযাপন্নাতি? আমন্তা। হঞ্চি অত্থি কেচি ধম্মা কেহিচি ধম্মেহি গণনং গচ্ছন্তি উদ্দেসং গচ্ছন্তি পরিযাপন্না, নো চ ৰত রে ৰত্তব্বে – ‘‘নত্থি কেচি ধম্মা কেহিচি ধম্মেহি সঙ্গহিতা’’তি।
471. Natthi keci dhammā kehici dhammehi saṅgahitāti 2? Āmantā. Nanu atthi keci dhammā kehici dhammehi gaṇanaṃ gacchanti uddesaṃ gacchanti pariyāpannāti? Āmantā. Hañci atthi keci dhammā kehici dhammehi gaṇanaṃ gacchanti uddesaṃ gacchanti pariyāpannā, no ca vata re vattabbe – ‘‘natthi keci dhammā kehici dhammehi saṅgahitā’’ti.
চক্খাযতনং কতমক্খন্ধগণনং 3 গচ্ছতীতি? রূপক্খন্ধগণনং গচ্ছতীতি। হঞ্চি চক্খাযতনং রূপক্খন্ধগণনং গচ্ছতি, তেন ৰত রে ৰত্তব্বে – ‘‘চক্খাযতনং রূপক্খন্ধেন সঙ্গহিত’’ন্তি। সোতাযতনং…পে॰… ঘানাযতনং…পে॰… জিৰ্হাযতনং…পে॰… কাযাযতনং কতমক্খন্ধগণনং গচ্ছতীতি? রূপক্খন্ধগণনং গচ্ছতীতি। হঞ্চি কাযাযতনং রূপক্খন্ধগণনং গচ্ছতি, তেন ৰত রে ৰত্তব্বে – ‘‘কাযাযতনং রূপক্খন্ধেন সঙ্গহিত’’ন্তি।
Cakkhāyatanaṃ katamakkhandhagaṇanaṃ 4 gacchatīti? Rūpakkhandhagaṇanaṃ gacchatīti. Hañci cakkhāyatanaṃ rūpakkhandhagaṇanaṃ gacchati, tena vata re vattabbe – ‘‘cakkhāyatanaṃ rūpakkhandhena saṅgahita’’nti. Sotāyatanaṃ…pe… ghānāyatanaṃ…pe… jivhāyatanaṃ…pe… kāyāyatanaṃ katamakkhandhagaṇanaṃ gacchatīti? Rūpakkhandhagaṇanaṃ gacchatīti. Hañci kāyāyatanaṃ rūpakkhandhagaṇanaṃ gacchati, tena vata re vattabbe – ‘‘kāyāyatanaṃ rūpakkhandhena saṅgahita’’nti.
রূপাযতনং…পে॰… সদ্দাযতনং…পে॰… গন্ধাযতনং…পে॰… রসাযতনং…পে॰… ফোট্ঠব্বাযতনং কতমক্খন্ধগণনং গচ্ছতীতি? রূপক্খন্ধগণনং গচ্ছতীতি। হঞ্চি ফোট্ঠব্বাযতনং রূপক্খন্ধগণনং গচ্ছতি, তেন ৰত রে ৰত্তব্বে – ‘‘ফোট্ঠব্বাযতনং রূপক্খন্ধেন সঙ্গহিত’’ন্তি।
Rūpāyatanaṃ…pe… saddāyatanaṃ…pe… gandhāyatanaṃ…pe… rasāyatanaṃ…pe… phoṭṭhabbāyatanaṃ katamakkhandhagaṇanaṃ gacchatīti? Rūpakkhandhagaṇanaṃ gacchatīti. Hañci phoṭṭhabbāyatanaṃ rūpakkhandhagaṇanaṃ gacchati, tena vata re vattabbe – ‘‘phoṭṭhabbāyatanaṃ rūpakkhandhena saṅgahita’’nti.
সুখা ৰেদনা কতমক্খন্ধগণনং গচ্ছতীতি? ৰেদনাক্খন্ধগণনং গচ্ছতীতি। হঞ্চি সুখা ৰেদনা ৰেদনাক্খন্ধগণনং গচ্ছতি, তেন ৰত রে ৰত্তব্বে – ‘‘সুখা ৰেদনা ৰেদনাক্খন্ধেন সঙ্গহিতা’’তি। দুক্খা ৰেদনা…পে॰… অদুক্খমসুখা ৰেদনা কতমক্খন্ধগণনং গচ্ছতীতি? ৰেদনাক্খন্ধগণনং গচ্ছতীতি। হঞ্চি অদুক্খমসুখা ৰেদনা ৰেদনাক্খন্ধগণনং গচ্ছতি, তেন ৰত রে ৰত্তব্বে – ‘‘অদুক্খমসুখা ৰেদনা ৰেদনাক্খন্ধেন সঙ্গহিতা’’তি।
Sukhā vedanā katamakkhandhagaṇanaṃ gacchatīti? Vedanākkhandhagaṇanaṃ gacchatīti. Hañci sukhā vedanā vedanākkhandhagaṇanaṃ gacchati, tena vata re vattabbe – ‘‘sukhā vedanā vedanākkhandhena saṅgahitā’’ti. Dukkhā vedanā…pe… adukkhamasukhā vedanā katamakkhandhagaṇanaṃ gacchatīti? Vedanākkhandhagaṇanaṃ gacchatīti. Hañci adukkhamasukhā vedanā vedanākkhandhagaṇanaṃ gacchati, tena vata re vattabbe – ‘‘adukkhamasukhā vedanā vedanākkhandhena saṅgahitā’’ti.
চক্খুসম্ফস্সজা সঞ্ঞা কতমক্খন্ধগণনং গচ্ছতীতি? সঞ্ঞাক্খন্ধগণনং গচ্ছতীতি। হঞ্চি চক্খুসম্ফস্সজা সঞ্ঞা সঞ্ঞাক্খন্ধগণনং গচ্ছতি, তেন ৰত রে ৰত্তব্বে – ‘‘চক্খুসম্ফস্সজা সঞ্ঞা সঞ্ঞাক্খন্ধেন সঙ্গহিতা’’তি। সোতসম্ফস্সজা সঞ্ঞা…পে॰… মনোসম্ফস্সজা সঞ্ঞা কতমক্খন্ধগণনং গচ্ছতীতি? সঞ্ঞাক্খন্ধগণনং গচ্ছতীতি। হঞ্চি মনোসম্ফস্সজা সঞ্ঞা সঞ্ঞাক্খন্ধগণনং গচ্ছতি, তেন ৰত রে ৰত্তব্বে – ‘‘মনোসম্ফস্সজা সঞ্ঞা সঞ্ঞাক্খন্ধেন সঙ্গহিতা’’তি।
Cakkhusamphassajā saññā katamakkhandhagaṇanaṃ gacchatīti? Saññākkhandhagaṇanaṃ gacchatīti. Hañci cakkhusamphassajā saññā saññākkhandhagaṇanaṃ gacchati, tena vata re vattabbe – ‘‘cakkhusamphassajā saññā saññākkhandhena saṅgahitā’’ti. Sotasamphassajā saññā…pe… manosamphassajā saññā katamakkhandhagaṇanaṃ gacchatīti? Saññākkhandhagaṇanaṃ gacchatīti. Hañci manosamphassajā saññā saññākkhandhagaṇanaṃ gacchati, tena vata re vattabbe – ‘‘manosamphassajā saññā saññākkhandhena saṅgahitā’’ti.
চক্খুসম্ফস্সজা চেতনা…পে॰… মনোসম্ফস্সজা চেতনা কতমক্খন্ধগণনং গচ্ছতীতি? সঙ্খারক্খন্ধগণনং গচ্ছতীতি। হঞ্চি মনোসম্ফস্সজা চেতনা সঙ্খারক্খন্ধগণনং গচ্ছতি, তেন ৰত রে ৰত্তব্বে – ‘‘মনোসম্ফস্সজা চেতনা সঙ্খারক্খন্ধেন সঙ্গহিতা’’তি।
Cakkhusamphassajā cetanā…pe… manosamphassajā cetanā katamakkhandhagaṇanaṃ gacchatīti? Saṅkhārakkhandhagaṇanaṃ gacchatīti. Hañci manosamphassajā cetanā saṅkhārakkhandhagaṇanaṃ gacchati, tena vata re vattabbe – ‘‘manosamphassajā cetanā saṅkhārakkhandhena saṅgahitā’’ti.
চক্খুৰিঞ্ঞাণং …পে॰… মনোৰিঞ্ঞাণং কতমক্খন্ধগণনং গচ্ছতীতি ? ৰিঞ্ঞাণক্খন্ধগণনং গচ্ছতীতি। হঞ্চি মনোৰিঞ্ঞাণং ৰিঞ্ঞাণক্খন্ধগণনং গচ্ছতি, তেন ৰত রে ৰত্তব্বে – ‘‘মনোৰিঞ্ঞাণং ৰিঞ্ঞাণক্খন্ধেন সঙ্গহিত’’ন্তি।
Cakkhuviññāṇaṃ …pe… manoviññāṇaṃ katamakkhandhagaṇanaṃ gacchatīti ? Viññāṇakkhandhagaṇanaṃ gacchatīti. Hañci manoviññāṇaṃ viññāṇakkhandhagaṇanaṃ gacchati, tena vata re vattabbe – ‘‘manoviññāṇaṃ viññāṇakkhandhena saṅgahita’’nti.
৪৭২. যথা দামেন ৰা যোত্তেন ৰা দ্ৰে বলিবদ্দা সঙ্গহিতা, সিক্কায পিণ্ডপাতো সঙ্গহিতো, সা গদ্দুলেন সঙ্গহিতো; এৰমেৰ তে ধম্মা তেহি ধম্মেহি সঙ্গহিতাতি 5? হঞ্চি দামেন ৰা যোত্তেন ৰা দ্ৰে বলীবদ্দা সঙ্গহিতা, সিক্কায পিণ্ডপাতো সঙ্গহিতো, সা গদ্দুলেন সঙ্গহিতো, তেন ৰত রে ৰত্তব্বে – ‘‘অত্থি কেচি ধম্মা কেহিচি ধম্মেহি সঙ্গহিতা’’তি 6।
472. Yathā dāmena vā yottena vā dve balibaddā saṅgahitā, sikkāya piṇḍapāto saṅgahito, sā gaddulena saṅgahito; evameva te dhammā tehi dhammehi saṅgahitāti 7? Hañci dāmena vā yottena vā dve balībaddā saṅgahitā, sikkāya piṇḍapāto saṅgahito, sā gaddulena saṅgahito, tena vata re vattabbe – ‘‘atthi keci dhammā kehici dhammehi saṅgahitā’’ti 8.
সঙ্গহিতকথা নিট্ঠিতা।
Saṅgahitakathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ১. সঙ্গহিতকথাৰণ্ণনা • 1. Saṅgahitakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১. সঙ্গহিতকথাৰণ্ণনা • 1. Saṅgahitakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১. সঙ্গহিতকথাৰণ্ণনা • 1. Saṅgahitakathāvaṇṇanā
