| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৭. সত্তমৰগ্গো
7. Sattamavaggo
১. সঙ্গহিতকথাৰণ্ণনা
1. Saṅgahitakathāvaṇṇanā
৪৭১-৪৭২. ইদানি সঙ্গহিতকথা নাম হোতি। তত্থ যস্মা দামাদীহি বলিবদ্দাদযো ৰিয কেচি ধম্মা কেহিচি ধম্মেহি সঙ্গহিতা নাম নত্থি, তস্মা ‘‘নত্থি কেচি ধম্মা কেহিচি ধম্মেহি সঙ্গহিতা, এৰং সন্তে একৰিধেন রূপসঙ্গহোতিআদি নিরত্থক’’ন্তি যেসং লদ্ধি, সেয্যথাপি রাজগিরিকানঞ্চেৰ সিদ্ধত্থিকানঞ্চ; তে সন্ধায অঞ্ঞেনত্থেন সঙ্গহভাৰং দস্সেতুং পুচ্ছা সকৰাদিস্স, অত্তনো লদ্ধিৰসেন পটিঞ্ঞা ইতরস্স। ইদানি যেনত্থেন সঙ্গহো লব্ভতি, তং দস্সেতুং ননু অত্থি কেচি ধম্মাতিআদি আরদ্ধং। তং সব্বং হেট্ঠা ৰুত্তনযত্তা উত্তানত্থমেৰ। যা পনেসা পরৰাদিনা লদ্ধিপতিট্ঠাপনত্থং যথা দামেন ৰাতিআদিকা উপমা আহটা, সকৰাদিনা তং অনভিনন্দিত্ৰা অপ্পটিক্কোসিত্ৰা ‘‘হঞ্চি দামেন ৰা’’তি তস্স লদ্ধি ভিন্নাতি ৰেদিতব্বা। অযঞ্হেত্থ অত্থো – যদি তে দামাদীহি বলিবদ্দাদযো সঙ্গহিতা নাম, অত্থি কেচি ধম্মা কেহিচি ধম্মেহি সঙ্গহিতাতি।
471-472. Idāni saṅgahitakathā nāma hoti. Tattha yasmā dāmādīhi balibaddādayo viya keci dhammā kehici dhammehi saṅgahitā nāma natthi, tasmā ‘‘natthi keci dhammā kehici dhammehi saṅgahitā, evaṃ sante ekavidhena rūpasaṅgahotiādi niratthaka’’nti yesaṃ laddhi, seyyathāpi rājagirikānañceva siddhatthikānañca; te sandhāya aññenatthena saṅgahabhāvaṃ dassetuṃ pucchā sakavādissa, attano laddhivasena paṭiññā itarassa. Idāni yenatthena saṅgaho labbhati, taṃ dassetuṃ nanu atthi keci dhammātiādi āraddhaṃ. Taṃ sabbaṃ heṭṭhā vuttanayattā uttānatthameva. Yā panesā paravādinā laddhipatiṭṭhāpanatthaṃ yathā dāmena vātiādikā upamā āhaṭā, sakavādinā taṃ anabhinanditvā appaṭikkositvā ‘‘hañci dāmena vā’’ti tassa laddhi bhinnāti veditabbā. Ayañhettha attho – yadi te dāmādīhi balibaddādayo saṅgahitā nāma, atthi keci dhammā kehici dhammehi saṅgahitāti.
সঙ্গহিতকথাৰণ্ণনা।
Saṅgahitakathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (৬৩) ১. সঙ্গহিতকথা • (63) 1. Saṅgahitakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১. সঙ্গহিতকথাৰণ্ণনা • 1. Saṅgahitakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১. সঙ্গহিতকথাৰণ্ণনা • 1. Saṅgahitakathāvaṇṇanā
