| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၇. သတ္တမဝဂ္ဂော
7. Sattamavaggo
၁. သင္ဂဟိတကထာဝဏ္ဏနာ
1. Saṅgahitakathāvaṇṇanā
၄၇၁-၄၇၂. ဣဒာနိ သင္ဂဟိတကထာ နာမ ဟောတိ။ တတ္ထ ယသ္မာ ဒာမာဒီဟိ ဗလိဗဒ္ဒာဒယော ဝိယ ကေစိ ဓမ္မာ ကေဟိစိ ဓမ္မေဟိ သင္ဂဟိတာ နာမ နတ္ထိ, တသ္မာ ‘‘နတ္ထိ ကေစိ ဓမ္မာ ကေဟိစိ ဓမ္မေဟိ သင္ဂဟိတာ, ဧဝံ သန္တေ ဧကဝိဓေန ရူပသင္ဂဟောတိအာဒိ နိရတ္ထက’’န္တိ ယေသံ လဒ္ဓိ, သေယ္ယထာပိ ရာဇဂိရိကာနဉ္စေဝ သိဒ္ဓတ္ထိကာနဉ္စ; တေ သန္ဓာယ အညေနတ္ထေန သင္ဂဟဘာဝံ ဒသ္သေတုံ ပုစ္ဆာ သကဝာဒိသ္သ, အတ္တနော လဒ္ဓိဝသေန ပဋိညာ ဣတရသ္သ။ ဣဒာနိ ယေနတ္ထေန သင္ဂဟော လဗ္ဘတိ, တံ ဒသ္သေတုံ နနု အတ္ထိ ကေစိ ဓမ္မာတိအာဒိ အာရဒ္ဓံ။ တံ သဗ္ဗံ ဟေဋ္ဌာ ဝုတ္တနယတ္တာ ဥတ္တာနတ္ထမေဝ။ ယာ ပနေသာ ပရဝာဒိနာ လဒ္ဓိပတိဋ္ဌာပနတ္ထံ ယထာ ဒာမေန ဝာတိအာဒိကာ ဥပမာ အာဟဋာ, သကဝာဒိနာ တံ အနဘိနန္ဒိတ္ဝာ အပ္ပဋိက္ကောသိတ္ဝာ ‘‘ဟဉ္စိ ဒာမေန ဝာ’’တိ တသ္သ လဒ္ဓိ ဘိန္နာတိ ဝေဒိတဗ္ဗာ။ အယဉ္ဟေတ္ထ အတ္ထော – ယဒိ တေ ဒာမာဒီဟိ ဗလိဗဒ္ဒာဒယော သင္ဂဟိတာ နာမ, အတ္ထိ ကေစိ ဓမ္မာ ကေဟိစိ ဓမ္မေဟိ သင္ဂဟိတာတိ။
471-472. Idāni saṅgahitakathā nāma hoti. Tattha yasmā dāmādīhi balibaddādayo viya keci dhammā kehici dhammehi saṅgahitā nāma natthi, tasmā ‘‘natthi keci dhammā kehici dhammehi saṅgahitā, evaṃ sante ekavidhena rūpasaṅgahotiādi niratthaka’’nti yesaṃ laddhi, seyyathāpi rājagirikānañceva siddhatthikānañca; te sandhāya aññenatthena saṅgahabhāvaṃ dassetuṃ pucchā sakavādissa, attano laddhivasena paṭiññā itarassa. Idāni yenatthena saṅgaho labbhati, taṃ dassetuṃ nanu atthi keci dhammātiādi āraddhaṃ. Taṃ sabbaṃ heṭṭhā vuttanayattā uttānatthameva. Yā panesā paravādinā laddhipatiṭṭhāpanatthaṃ yathā dāmena vātiādikā upamā āhaṭā, sakavādinā taṃ anabhinanditvā appaṭikkositvā ‘‘hañci dāmena vā’’ti tassa laddhi bhinnāti veditabbā. Ayañhettha attho – yadi te dāmādīhi balibaddādayo saṅgahitā nāma, atthi keci dhammā kehici dhammehi saṅgahitāti.
သင္ဂဟိတကထာဝဏ္ဏနာ။
Saṅgahitakathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၆၃) ၁. သင္ဂဟိတကထာ • (63) 1. Saṅgahitakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၁. သင္ဂဟိတကထာဝဏ္ဏနာ • 1. Saṅgahitakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၁. သင္ဂဟိတကထာဝဏ္ဏနာ • 1. Saṅgahitakathāvaṇṇanā
