| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
7. සත්‌තමවග්‌ගො
7. Sattamavaggo
1. සඞ්‌ගහිතකථාවණ්‌ණනා
1. Saṅgahitakathāvaṇṇanā
471-472. ඉදානි සඞ්‌ගහිතකථා නාම හොති. තත්‌ථ යස්‌මා දාමාදීහි බලිබද්‌දාදයො විය කෙචි ධම්‌මා කෙහිචි ධම්‌මෙහි සඞ්‌ගහිතා නාම නත්‌ථි, තස්‌මා ‘‘නත්‌ථි කෙචි ධම්‌මා කෙහිචි ධම්‌මෙහි සඞ්‌ගහිතා, එවං සන්‌තෙ එකවිධෙන රූපසඞ්‌ගහොතිආදි නිරත්‌ථක’’න්‌ති යෙසං ලද්‌ධි, සෙය්‍යථාපි රාජගිරිකානඤ්‌චෙව සිද්‌ධත්‌ථිකානඤ්‌ච; තෙ සන්‌ධාය අඤ්‌ඤෙනත්‌ථෙන සඞ්‌ගහභාවං දස්‌සෙතුං පුච්‌ඡා සකවාදිස්‌ස, අත්‌තනො ලද්‌ධිවසෙන පටිඤ්‌ඤා ඉතරස්‌ස. ඉදානි යෙනත්‌ථෙන සඞ්‌ගහො ලබ්‌භති, තං දස්‌සෙතුං නනු අත්‌ථි කෙචි ධම්‌මාතිආදි ආරද්‌ධං. තං සබ්‌බං හෙට්‌ඨා වුත්‌තනයත්‌තා උත්‌තානත්‌ථමෙව. යා පනෙසා පරවාදිනා ලද්‌ධිපතිට්‌ඨාපනත්‌ථං යථා දාමෙන වාතිආදිකා උපමා ආහටා, සකවාදිනා තං අනභිනන්‌දිත්‌වා අප්‌පටික්‌කොසිත්‌වා ‘‘හඤ්‌චි දාමෙන වා’’ති තස්‌ස ලද්‌ධි භින්‌නාති වෙදිතබ්‌බා. අයඤ්‌හෙත්‌ථ අත්‌ථො – යදි තෙ දාමාදීහි බලිබද්‌දාදයො සඞ්‌ගහිතා නාම, අත්‌ථි කෙචි ධම්‌මා කෙහිචි ධම්‌මෙහි සඞ්‌ගහිතාති.
471-472. Idāni saṅgahitakathā nāma hoti. Tattha yasmā dāmādīhi balibaddādayo viya keci dhammā kehici dhammehi saṅgahitā nāma natthi, tasmā ‘‘natthi keci dhammā kehici dhammehi saṅgahitā, evaṃ sante ekavidhena rūpasaṅgahotiādi niratthaka’’nti yesaṃ laddhi, seyyathāpi rājagirikānañceva siddhatthikānañca; te sandhāya aññenatthena saṅgahabhāvaṃ dassetuṃ pucchā sakavādissa, attano laddhivasena paṭiññā itarassa. Idāni yenatthena saṅgaho labbhati, taṃ dassetuṃ nanu atthi keci dhammātiādi āraddhaṃ. Taṃ sabbaṃ heṭṭhā vuttanayattā uttānatthameva. Yā panesā paravādinā laddhipatiṭṭhāpanatthaṃ yathā dāmena vātiādikā upamā āhaṭā, sakavādinā taṃ anabhinanditvā appaṭikkositvā ‘‘hañci dāmena vā’’ti tassa laddhi bhinnāti veditabbā. Ayañhettha attho – yadi te dāmādīhi balibaddādayo saṅgahitā nāma, atthi keci dhammā kehici dhammehi saṅgahitāti.
සඞ්‌ගහිතකථාවණ්‌ණනා.
Saṅgahitakathāvaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (63) 1. සඞ්‌ගහිතකථා • (63) 1. Saṅgahitakathā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 1. සඞ්‌ගහිතකථාවණ්‌ණනා • 1. Saṅgahitakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 1. සඞ්‌ගහිතකථාවණ්‌ණනා • 1. Saṅgahitakathāvaṇṇanā
