| Library / Tipiṭaka / তিপিটক • Tipiṭaka / উদানপাল়ি • Udānapāḷi |
৮. সঙ্গামজিসুত্তং
8. Saṅgāmajisuttaṃ
৮. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন আযস্মা সঙ্গামজি সাৰত্থিং অনুপ্পত্তো হোতি ভগৰন্তং দস্সনায। অস্সোসি খো আযস্মতো সঙ্গামজিস্স পুরাণদুতিযিকা – ‘‘অয্যো কির সঙ্গামজি সাৰত্থিং অনুপ্পত্তো’’তি। সা দারকং আদায জেতৰনং অগমাসি।
8. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā saṅgāmaji sāvatthiṃ anuppatto hoti bhagavantaṃ dassanāya. Assosi kho āyasmato saṅgāmajissa purāṇadutiyikā – ‘‘ayyo kira saṅgāmaji sāvatthiṃ anuppatto’’ti. Sā dārakaṃ ādāya jetavanaṃ agamāsi.
তেন খো পন সমযেন আযস্মা সঙ্গামজি অঞ্ঞতরস্মিং রুক্খমূলে দিৰাৰিহারং নিসিন্নো হোতি। অথ খো আযস্মতো সঙ্গামজিস্স পুরাণদুতিযিকা যেনাযস্মা সঙ্গামজি তেনুপসঙ্কমি; উপসঙ্কমিত্ৰা আযস্মন্তং সঙ্গামজিং এতদৰোচ – ‘‘খুদ্দপুত্তঞ্হি 1, সমণ, পোস ম’’ন্তি। এৰং ৰুত্তে, আযস্মা সঙ্গামজি তুণ্হী অহোসি।
Tena kho pana samayena āyasmā saṅgāmaji aññatarasmiṃ rukkhamūle divāvihāraṃ nisinno hoti. Atha kho āyasmato saṅgāmajissa purāṇadutiyikā yenāyasmā saṅgāmaji tenupasaṅkami; upasaṅkamitvā āyasmantaṃ saṅgāmajiṃ etadavoca – ‘‘khuddaputtañhi 2, samaṇa, posa ma’’nti. Evaṃ vutte, āyasmā saṅgāmaji tuṇhī ahosi.
দুতিযম্পি খো আযস্মতো সঙ্গামজিস্স পুরাণদুতিযিকা আযস্মন্তং সঙ্গামজিং এতদৰোচ – ‘‘খুদ্দপুত্তঞ্হি, সমণ, পোস ম’’ন্তি। দুতিযম্পি খো আযস্মা সঙ্গামজি তুণ্হী অহোসি।
Dutiyampi kho āyasmato saṅgāmajissa purāṇadutiyikā āyasmantaṃ saṅgāmajiṃ etadavoca – ‘‘khuddaputtañhi, samaṇa, posa ma’’nti. Dutiyampi kho āyasmā saṅgāmaji tuṇhī ahosi.
ততিযম্পি খো আযস্মতো সঙ্গামজিস্স পুরাণদুতিযিকা আযস্মন্তং সঙ্গামজিং এতদৰোচ – ‘‘খুদ্দপুত্তঞ্হি, সমণ, পোস ম’’ন্তি। ততিযম্পি খো আযস্মা সঙ্গামজি তুণ্হী অহোসি।
Tatiyampi kho āyasmato saṅgāmajissa purāṇadutiyikā āyasmantaṃ saṅgāmajiṃ etadavoca – ‘‘khuddaputtañhi, samaṇa, posa ma’’nti. Tatiyampi kho āyasmā saṅgāmaji tuṇhī ahosi.
অথ খো আযস্মা সঙ্গামজি তং দারকং নেৰ ওলোকেসি নাপি আলপি। অথ খো আযস্মতো সঙ্গামজিস্স পুরাণদুতিযিকা অৰিদূরং 7 গন্ত্ৰা অপলোকেন্তী অদ্দস আযস্মন্তং সঙ্গামজিং তং দারকং নেৰ ওলোকেন্তং নাপি আলপন্তং, দিস্ৰানস্সা এতদহোসি – ‘‘ন চাযং সমণো পুত্তেনপি অত্থিকো’’তি। ততো পটিনিৰত্তিত্ৰা দারকং আদায পক্কামি। অদ্দসা খো ভগৰা দিব্বেন চক্খুনা ৰিসুদ্ধেন অতিক্কন্তমানুসকেন আযস্মতো সঙ্গামজিস্স পুরাণদুতিযিকায এৰরূপং ৰিপ্পকারং।
Atha kho āyasmā saṅgāmaji taṃ dārakaṃ neva olokesi nāpi ālapi. Atha kho āyasmato saṅgāmajissa purāṇadutiyikā avidūraṃ 8 gantvā apalokentī addasa āyasmantaṃ saṅgāmajiṃ taṃ dārakaṃ neva olokentaṃ nāpi ālapantaṃ, disvānassā etadahosi – ‘‘na cāyaṃ samaṇo puttenapi atthiko’’ti. Tato paṭinivattitvā dārakaṃ ādāya pakkāmi. Addasā kho bhagavā dibbena cakkhunā visuddhena atikkantamānusakena āyasmato saṅgāmajissa purāṇadutiyikāya evarūpaṃ vippakāraṃ.
অথ খো ভগৰা এতমত্থং ৰিদিত্ৰা তাযং ৰেলাযং ইমং উদানং উদানেসি –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘আযন্তিং নাভিনন্দতি, পক্কমন্তিং ন সোচতি।
‘‘Āyantiṃ nābhinandati, pakkamantiṃ na socati;
সঙ্গা সঙ্গামজিং মুত্তং, তমহং ব্রূমি ব্রাহ্মণ’’ন্তি॥ অট্ঠমং।
Saṅgā saṅgāmajiṃ muttaṃ, tamahaṃ brūmi brāhmaṇa’’nti. aṭṭhamaṃ;
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / উদান-অট্ঠকথা • Udāna-aṭṭhakathā / ৮. সঙ্গামজিসুত্তৰণ্ণনা • 8. Saṅgāmajisuttavaṇṇanā
