| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5-6. ஸங்கா³ரவஸுத்தாதி³வண்ணனா
5-6. Saṅgāravasuttādivaṇṇanā
117-118. பஞ்சமே ஓரிமங் தீரந்தி லோகியங் ஓரிமதீரங். பாரிமங் தீரந்தி லோகுத்தரங் பாரிமதீரங். பாரகா³மினோதி நிப்³பா³னகா³மினோ. தீரமேவானுதா⁴வதீதி ஸக்காயதி³ட்டி²தீரங்யேவ அனுதா⁴வதி. த⁴ம்மே த⁴ம்மானுவத்தினோதி ஸம்மா அக்கா²தே நவவிதே⁴ லோகுத்தரத⁴ம்மே அனுத⁴ம்மவத்தினோ, தஸ்ஸ த⁴ம்மஸ்ஸானுச்ச²விகாய ஸஹஸீலாய புப்³ப³பா⁴க³படிபத்தியா பவத்தமானா. மச்சுதெ⁴ய்யங் ஸுது³த்தரந்தி மச்சுனோ டா²னபூ⁴தங் தேபூ⁴மகவட்டங் ஸுது³த்தரங் தரித்வா. பாரமெஸ்ஸந்தீதி நிப்³பா³னங் பாபுணிஸ்ஸந்தி.
117-118. Pañcame orimaṃ tīranti lokiyaṃ orimatīraṃ. Pārimaṃ tīranti lokuttaraṃ pārimatīraṃ. Pāragāminoti nibbānagāmino. Tīramevānudhāvatīti sakkāyadiṭṭhitīraṃyeva anudhāvati. Dhammedhammānuvattinoti sammā akkhāte navavidhe lokuttaradhamme anudhammavattino, tassa dhammassānucchavikāya sahasīlāya pubbabhāgapaṭipattiyā pavattamānā. Maccudheyyaṃsuduttaranti maccuno ṭhānabhūtaṃ tebhūmakavaṭṭaṃ suduttaraṃ taritvā. Pāramessantīti nibbānaṃ pāpuṇissanti.
ஓகா அனோகமாக³ம்மாதி வட்டதோ விவட்டங் ஆக³ம்ம. விவேகே யத்த² தூ³ரமந்தி யஸ்மிங் காயசித்தஉபதி⁴விவேகே து³ரபி⁴ரமங், தத்ராபி⁴ரதிமிச்செ²ய்ய. ஹித்வா காமேதி து³விதே⁴பி காமே பஹாய. அகிஞ்சனோதி நிப்பலிபோ³தோ⁴. ஆதா³னபடினிஸ்ஸகே³தி க³ஹணபடினிஸ்ஸக்³க³ஸங்கா²தே நிப்³பா³னே. அனுபாதா³ய யே ரதாதி சதூஹி உபாதா³னேஹி கிஞ்சிபி அனுபாதி³யித்வா யே அபி⁴ரதா. பரினிப்³பு³தாதி தே அபச்சயபரினிப்³பா³னேன பரினிப்³பு³தா நாமாதி வேதி³தப்³பா³. ச²ட்ட²ங் பி⁴க்கூ²னங் தே³ஸிதங்.
Okā anokamāgammāti vaṭṭato vivaṭṭaṃ āgamma. Viveke yattha dūramanti yasmiṃ kāyacittaupadhiviveke durabhiramaṃ, tatrābhiratimiccheyya. Hitvā kāmeti duvidhepi kāme pahāya. Akiñcanoti nippalibodho. Ādānapaṭinissageti gahaṇapaṭinissaggasaṅkhāte nibbāne. Anupādāya ye ratāti catūhi upādānehi kiñcipi anupādiyitvā ye abhiratā. Parinibbutāti te apaccayaparinibbānena parinibbutā nāmāti veditabbā. Chaṭṭhaṃ bhikkhūnaṃ desitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
5. ஸங்கா³ரவஸுத்தங் • 5. Saṅgāravasuttaṃ
6. ஓரிமதீரஸுத்தங் • 6. Orimatīrasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5-42. ஸங்கா³ரவஸுத்தாதி³வண்ணனா • 5-42. Saṅgāravasuttādivaṇṇanā
