| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๕-๖. สงฺคารวสุตฺตาทิวณฺณนา
5-6. Saṅgāravasuttādivaṇṇanā
๑๑๗-๑๑๘. ปญฺจเม โอริมํ ตีรนฺติ โลกิยํ โอริมตีรํฯ ปาริมํ ตีรนฺติ โลกุตฺตรํ ปาริมตีรํฯ ปารคามิโนติ นิพฺพานคามิโนฯ ตีรเมวานุธาวตีติ สกฺกายทิฎฺฐิตีรํเยว อนุธาวติฯ ธเมฺม ธมฺมานุวตฺติโนติ สมฺมา อกฺขาเต นววิเธ โลกุตฺตรธเมฺม อนุธมฺมวตฺติโน, ตสฺส ธมฺมสฺสานุจฺฉวิกาย สหสีลาย ปุพฺพภาคปฎิปตฺติยา ปวตฺตมานาฯ มจฺจุเธยฺยํ สุทุตฺตรนฺติ มจฺจุโน ฐานภูตํ เตภูมกวฎฺฎํ สุทุตฺตรํ ตริตฺวาฯ ปารเมสฺสนฺตีติ นิพฺพานํ ปาปุณิสฺสนฺติฯ
117-118. Pañcame orimaṃ tīranti lokiyaṃ orimatīraṃ. Pārimaṃ tīranti lokuttaraṃ pārimatīraṃ. Pāragāminoti nibbānagāmino. Tīramevānudhāvatīti sakkāyadiṭṭhitīraṃyeva anudhāvati. Dhammedhammānuvattinoti sammā akkhāte navavidhe lokuttaradhamme anudhammavattino, tassa dhammassānucchavikāya sahasīlāya pubbabhāgapaṭipattiyā pavattamānā. Maccudheyyaṃsuduttaranti maccuno ṭhānabhūtaṃ tebhūmakavaṭṭaṃ suduttaraṃ taritvā. Pāramessantīti nibbānaṃ pāpuṇissanti.
โอกา อโนกมาคมฺมาติ วฎฺฎโต วิวฎฺฎํ อาคมฺมฯ วิเวเก ยตฺถ ทูรมนฺติ ยสฺมิํ กายจิตฺตอุปธิวิเวเก ทุรภิรมํ, ตตฺราภิรติมิเจฺฉยฺยฯ หิตฺวา กาเมติ ทุวิเธปิ กาเม ปหายฯ อกิญฺจโนติ นิปฺปลิโพโธฯ อาทานปฎินิสฺสเคติ คหณปฎินิสฺสคฺคสงฺขาเต นิพฺพาเนฯ อนุปาทาย เย รตาติ จตูหิ อุปาทาเนหิ กิญฺจิปิ อนุปาทิยิตฺวา เย อภิรตาฯ ปรินิพฺพุตาติ เต อปจฺจยปรินิพฺพาเนน ปรินิพฺพุตา นามาติ เวทิตพฺพาฯ ฉฎฺฐํ ภิกฺขูนํ เทสิตํฯ
Okā anokamāgammāti vaṭṭato vivaṭṭaṃ āgamma. Viveke yattha dūramanti yasmiṃ kāyacittaupadhiviveke durabhiramaṃ, tatrābhiratimiccheyya. Hitvā kāmeti duvidhepi kāme pahāya. Akiñcanoti nippalibodho. Ādānapaṭinissageti gahaṇapaṭinissaggasaṅkhāte nibbāne. Anupādāya ye ratāti catūhi upādānehi kiñcipi anupādiyitvā ye abhiratā. Parinibbutāti te apaccayaparinibbānena parinibbutā nāmāti veditabbā. Chaṭṭhaṃ bhikkhūnaṃ desitaṃ.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya
๕. สงฺคารวสุตฺตํ • 5. Saṅgāravasuttaṃ
๖. โอริมตีรสุตฺตํ • 6. Orimatīrasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๕-๔๒. สงฺคารวสุตฺตาทิวณฺณนา • 5-42. Saṅgāravasuttādivaṇṇanā
