| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৫. সঙ্গারৰসুত্তং
5. Saṅgāravasuttaṃ
২৩৬. সাৰত্থিনিদানং । অথ খো সঙ্গারৰো ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো সঙ্গারৰো ব্রাহ্মণো ভগৰন্তং এতদৰোচ –
236. Sāvatthinidānaṃ . Atha kho saṅgāravo brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho saṅgāravo brāhmaṇo bhagavantaṃ etadavoca –
‘‘কো নু খো, ভো গোতম, হেতু, কো পচ্চযো যেনেকদা দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা? কো পন, ভো গোতম, হেতু, কো পচ্চযো যেনেকদা দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা’’তি?
‘‘Ko nu kho, bho gotama, hetu, ko paccayo yenekadā dīgharattaṃ sajjhāyakatāpi mantā nappaṭibhanti, pageva asajjhāyakatā? Ko pana, bho gotama, hetu, ko paccayo yenekadā dīgharattaṃ asajjhāyakatāpi mantā paṭibhanti, pageva sajjhāyakatā’’ti?
‘‘যস্মিং খো, ব্রাহ্মণ, সমযে কামরাগপরিযুট্ঠিতেন চেতসা ৰিহরতি কামরাগপরেতেন, উপ্পন্নস্স চ কামরাগস্স নিস্সরণং যথাভূতং নপ্পজানাতি, অত্তত্থম্পি তস্মিং সমযে যথাভূতং ন জানাতি ন পস্সতি, পরত্থম্পি তস্মিং সমযে যথাভূতং ন জানাতি ন পস্সতি, উভযত্থম্পি তস্মিং সমযে যথাভূতং ন জানাতি ন পস্সতি; দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা।
‘‘Yasmiṃ kho, brāhmaṇa, samaye kāmarāgapariyuṭṭhitena cetasā viharati kāmarāgaparetena, uppannassa ca kāmarāgassa nissaraṇaṃ yathābhūtaṃ nappajānāti, attatthampi tasmiṃ samaye yathābhūtaṃ na jānāti na passati, paratthampi tasmiṃ samaye yathābhūtaṃ na jānāti na passati, ubhayatthampi tasmiṃ samaye yathābhūtaṃ na jānāti na passati; dīgharattaṃ sajjhāyakatāpi mantā nappaṭibhanti, pageva asajjhāyakatā.
‘‘সেয্যথাপি, ব্রাহ্মণ, উদপত্তো সংসট্ঠো লাখায ৰা হলিদ্দিযা ৰা নীলিযা ৰা মঞ্জিট্ঠায ৰা। তত্থ চক্খুমা পুরিসো সকং মুখনিমিত্তং পচ্চৰেক্খমানো যথাভূতং ন জানেয্য ন পস্সেয্য। এৰমেৰ খো, ব্রাহ্মণ, যস্মিং সমযে কামরাগপরিযুট্ঠিতেন চেতসা ৰিহরতি কামরাগপরেতেন, উপ্পন্নস্স চ কামরাগস্স নিস্সরণং যথাভূতং নপ্পজানাতি, অত্তত্থম্পি তস্মিং সমযে যথাভূতং ন জানাতি ন পস্সতি, পরত্থম্পি…পে॰… উভযত্থম্পি তস্মিং সমযে যথাভূতং ন জানাতি ন পস্সতি; দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা।
‘‘Seyyathāpi, brāhmaṇa, udapatto saṃsaṭṭho lākhāya vā haliddiyā vā nīliyā vā mañjiṭṭhāya vā. Tattha cakkhumā puriso sakaṃ mukhanimittaṃ paccavekkhamāno yathābhūtaṃ na jāneyya na passeyya. Evameva kho, brāhmaṇa, yasmiṃ samaye kāmarāgapariyuṭṭhitena cetasā viharati kāmarāgaparetena, uppannassa ca kāmarāgassa nissaraṇaṃ yathābhūtaṃ nappajānāti, attatthampi tasmiṃ samaye yathābhūtaṃ na jānāti na passati, paratthampi…pe… ubhayatthampi tasmiṃ samaye yathābhūtaṃ na jānāti na passati; dīgharattaṃ sajjhāyakatāpi mantā nappaṭibhanti, pageva asajjhāyakatā.
‘‘পুন চপরং, ব্রাহ্মণ, যস্মিং সমযে ব্যাপাদপরিযুট্ঠিতেন চেতসা ৰিহরতি ব্যাপাদপরেতেন, উপ্পন্নস্স চ ব্যাপাদস্স নিস্সরণং যথাভূতং নপ্পজানাতি, অত্তত্থম্পি তস্মিং সমযে যথাভূতং ন জানাতি ন পস্সতি, পরত্থম্পি…পে॰… উভযত্থম্পি তস্মিং সমযে যথাভূতং ন জানাতি ন পস্সতি; দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা।
‘‘Puna caparaṃ, brāhmaṇa, yasmiṃ samaye byāpādapariyuṭṭhitena cetasā viharati byāpādaparetena, uppannassa ca byāpādassa nissaraṇaṃ yathābhūtaṃ nappajānāti, attatthampi tasmiṃ samaye yathābhūtaṃ na jānāti na passati, paratthampi…pe… ubhayatthampi tasmiṃ samaye yathābhūtaṃ na jānāti na passati; dīgharattaṃ sajjhāyakatāpi mantā nappaṭibhanti, pageva asajjhāyakatā.
‘‘সেয্যথাপি, ব্রাহ্মণ, উদপত্তো অগ্গিনা সন্তত্তো পক্কুথিতো 1 উস্মুদকজাতো 2। তত্থ চক্খুমা পুরিসো সকং মুখনিমিত্তং পচ্চৰেক্খমানো যথাভূতং ন জানেয্য ন পস্সেয্য। এৰমেৰ খো, ব্রাহ্মণ, যস্মিং সমযে ব্যাপাদপরিযুট্ঠিতেন চেতসা ৰিহরতি ব্যাপাদপরেতেন, উপ্পন্নস্স চ ব্যাপাদস্স নিস্সরণং যথাভূতং নপ্পজানাতি, অত্তত্থম্পি তস্মিং সমযে যথাভূতং ন জানাতি ন পস্সতি, পরত্থম্পি তস্মিং সমযে…পে॰… উভযত্থম্পি তস্মিং সমযে যথাভূতং ন জানাতি ন পস্সতি; দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা।
‘‘Seyyathāpi, brāhmaṇa, udapatto agginā santatto pakkuthito 3 usmudakajāto 4. Tattha cakkhumā puriso sakaṃ mukhanimittaṃ paccavekkhamāno yathābhūtaṃ na jāneyya na passeyya. Evameva kho, brāhmaṇa, yasmiṃ samaye byāpādapariyuṭṭhitena cetasā viharati byāpādaparetena, uppannassa ca byāpādassa nissaraṇaṃ yathābhūtaṃ nappajānāti, attatthampi tasmiṃ samaye yathābhūtaṃ na jānāti na passati, paratthampi tasmiṃ samaye…pe… ubhayatthampi tasmiṃ samaye yathābhūtaṃ na jānāti na passati; dīgharattaṃ sajjhāyakatāpi mantā nappaṭibhanti, pageva asajjhāyakatā.
‘‘পুন চপরং, ব্রাহ্মণ, যস্মিং সমযে থিনমিদ্ধপরিযুট্ঠিতেন চেতসা ৰিহরতি থিনমিদ্ধপরেতেন, উপ্পন্নস্স চ থিনমিদ্ধস্স নিস্সরণং যথাভূতং নপ্পজানাতি, অত্তত্থম্পি তস্মিং সমযে যথাভূতং ন জানাতি ন পস্সতি, পরত্থম্পি…পে॰… উভযত্থম্পি তস্মিং সমযে যথাভূতং ন জানাতি ন পস্সতি; দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা।
‘‘Puna caparaṃ, brāhmaṇa, yasmiṃ samaye thinamiddhapariyuṭṭhitena cetasā viharati thinamiddhaparetena, uppannassa ca thinamiddhassa nissaraṇaṃ yathābhūtaṃ nappajānāti, attatthampi tasmiṃ samaye yathābhūtaṃ na jānāti na passati, paratthampi…pe… ubhayatthampi tasmiṃ samaye yathābhūtaṃ na jānāti na passati; dīgharattaṃ sajjhāyakatāpi mantā nappaṭibhanti, pageva asajjhāyakatā.
‘‘সেয্যথাপি, ব্রাহ্মণ, উদপত্তো সেৰালপণকপরিযোনদ্ধো। তত্থ চক্খুমা পুরিসো সকং মুখনিমিত্তং পচ্চৰেক্খমানো যথাভূতং ন জানেয্য ন পস্সেয্য। এৰমেৰ খো, ব্রাহ্মণ, যস্মিং সমযে থিনমিদ্ধপরিযুট্ঠিতেন চেতসা ৰিহরতি থিনমিদ্ধপরেতেন, উপ্পন্নস্স চ থিনমিদ্ধস্স নিস্সরণং যথাভূতং নপ্পজানাতি, অত্তত্থম্পি তস্মিং সমযে যথাভূতং ন জানাতি ন পস্সতি, পরত্থম্পি…পে॰… উভযত্থম্পি তস্মিং সমযে যথাভূতং ন জানাতি ন পস্সতি; দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা।
‘‘Seyyathāpi, brāhmaṇa, udapatto sevālapaṇakapariyonaddho. Tattha cakkhumā puriso sakaṃ mukhanimittaṃ paccavekkhamāno yathābhūtaṃ na jāneyya na passeyya. Evameva kho, brāhmaṇa, yasmiṃ samaye thinamiddhapariyuṭṭhitena cetasā viharati thinamiddhaparetena, uppannassa ca thinamiddhassa nissaraṇaṃ yathābhūtaṃ nappajānāti, attatthampi tasmiṃ samaye yathābhūtaṃ na jānāti na passati, paratthampi…pe… ubhayatthampi tasmiṃ samaye yathābhūtaṃ na jānāti na passati; dīgharattaṃ sajjhāyakatāpi mantā nappaṭibhanti, pageva asajjhāyakatā.
‘‘পুন চপরং, ব্রাহ্মণ, যস্মিং সমযে উদ্ধচ্চকুক্কুচ্চপরিযুট্ঠিতেন চেতসা ৰিহরতি উদ্ধচ্চকুক্কুচ্চপরেতেন, উপ্পন্নস্স চ উদ্ধচ্চকুক্কুচ্চস্স নিস্সরণং যথাভূতং নপ্পজানাতি, অত্তত্থম্পি তস্মিং সমযে যথাভূতং ন জানাতি ন পস্সতি, পরত্থম্পি…পে॰… উভযত্থম্পি তস্মিং সমযে যথাভূতং ন জানাতি ন পস্সতি; দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা।
‘‘Puna caparaṃ, brāhmaṇa, yasmiṃ samaye uddhaccakukkuccapariyuṭṭhitena cetasā viharati uddhaccakukkuccaparetena, uppannassa ca uddhaccakukkuccassa nissaraṇaṃ yathābhūtaṃ nappajānāti, attatthampi tasmiṃ samaye yathābhūtaṃ na jānāti na passati, paratthampi…pe… ubhayatthampi tasmiṃ samaye yathābhūtaṃ na jānāti na passati; dīgharattaṃ sajjhāyakatāpi mantā nappaṭibhanti, pageva asajjhāyakatā.
‘‘সেয্যথাপি, ব্রাহ্মণ, উদপত্তো ৰাতেরিতো চলিতো ভন্তো ঊমিজাতো। তত্থ চক্খুমা পুরিসো সকং মুখনিমিত্তং পচ্চৰেক্খমানো যথাভূতং ন জানেয্য ন পস্সেয্য। এৰমেৰ খো, ব্রাহ্মণ, যস্মিং সমযে উদ্ধচ্চকুক্কুচ্চপরিযুট্ঠিতেন চেতসা ৰিহরতি উদ্ধচ্চকুক্কুচ্চপরেতেন, উপ্পন্নস্স চ উদ্ধচ্চকুক্কুচ্চস্স নিস্সরণং যথাভূতং নপ্পজানাতি, অত্তত্থম্পি তস্মিং সমযে যথাভূতং ন জানাতি ন পস্সতি, পরত্থম্পি…পে॰… উভযত্থম্পি তস্মিং সমযে যথাভূতং ন জানাতি ন পস্সতি; দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা।
‘‘Seyyathāpi, brāhmaṇa, udapatto vāterito calito bhanto ūmijāto. Tattha cakkhumā puriso sakaṃ mukhanimittaṃ paccavekkhamāno yathābhūtaṃ na jāneyya na passeyya. Evameva kho, brāhmaṇa, yasmiṃ samaye uddhaccakukkuccapariyuṭṭhitena cetasā viharati uddhaccakukkuccaparetena, uppannassa ca uddhaccakukkuccassa nissaraṇaṃ yathābhūtaṃ nappajānāti, attatthampi tasmiṃ samaye yathābhūtaṃ na jānāti na passati, paratthampi…pe… ubhayatthampi tasmiṃ samaye yathābhūtaṃ na jānāti na passati; dīgharattaṃ sajjhāyakatāpi mantā nappaṭibhanti, pageva asajjhāyakatā.
‘‘পুন চপরং, ব্রাহ্মণ, যস্মিং সমযে ৰিচিকিচ্ছাপরিযুট্ঠিতেন চেতসা ৰিহরতি ৰিচিকিচ্ছাপরেতেন, উপ্পন্নায চ ৰিচিকিচ্ছায নিস্সরণং যথাভূতং নপ্পজানাতি, অত্তত্থম্পি তস্মিং সমযে যথাভূতং ন জানাতি ন পস্সতি, পরত্থম্পি…পে॰… উভযত্থম্পি… দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা।
‘‘Puna caparaṃ, brāhmaṇa, yasmiṃ samaye vicikicchāpariyuṭṭhitena cetasā viharati vicikicchāparetena, uppannāya ca vicikicchāya nissaraṇaṃ yathābhūtaṃ nappajānāti, attatthampi tasmiṃ samaye yathābhūtaṃ na jānāti na passati, paratthampi…pe… ubhayatthampi… dīgharattaṃ sajjhāyakatāpi mantā nappaṭibhanti, pageva asajjhāyakatā.
‘‘সেয্যথাপি, ব্রাহ্মণ, উদপত্তো আৰিলো লুল়িতো কললীভূতো অন্ধকারে নিক্খিত্তো। তত্থ চক্খুমা পুরিসো সকং মুখনিমিত্তং পচ্চৰেক্খমানো যথাভূতং ন জানেয্য ন পস্সেয্য। এৰমেৰ খো, ব্রাহ্মণ, যস্মিং সমযে ৰিচিকিচ্ছাপরিযুট্ঠিতেন চেতসা ৰিহরতি ৰিচিকিচ্ছাপরেতেন, উপ্পন্নায চ ৰিচিকিচ্ছায নিস্সরণং যথাভূতং নপ্পজানাতি, অত্তত্থম্পি তস্মিং সমযে যথাভূতং ন জানাতি ন পস্সতি, পরত্থম্পি তস্মিং সমযে যথাভূতং ন জানাতি ন পস্সতি, উভযত্থম্পি তস্মিং সমযে যথাভূতং ন জানাতি ন পস্সতি; দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা। অযং খো, ব্রাহ্মণ, হেতু অযং পচ্চযো যেনেকদা দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা।
‘‘Seyyathāpi, brāhmaṇa, udapatto āvilo luḷito kalalībhūto andhakāre nikkhitto. Tattha cakkhumā puriso sakaṃ mukhanimittaṃ paccavekkhamāno yathābhūtaṃ na jāneyya na passeyya. Evameva kho, brāhmaṇa, yasmiṃ samaye vicikicchāpariyuṭṭhitena cetasā viharati vicikicchāparetena, uppannāya ca vicikicchāya nissaraṇaṃ yathābhūtaṃ nappajānāti, attatthampi tasmiṃ samaye yathābhūtaṃ na jānāti na passati, paratthampi tasmiṃ samaye yathābhūtaṃ na jānāti na passati, ubhayatthampi tasmiṃ samaye yathābhūtaṃ na jānāti na passati; dīgharattaṃ sajjhāyakatāpi mantā nappaṭibhanti, pageva asajjhāyakatā. Ayaṃ kho, brāhmaṇa, hetu ayaṃ paccayo yenekadā dīgharattaṃ sajjhāyakatāpi mantā nappaṭibhanti, pageva asajjhāyakatā.
‘‘যস্মিঞ্চ খো, ব্রাহ্মণ, সমযে ন কামরাগপরিযুট্ঠিতেন চেতসা ৰিহরতি ন কামরাগপরেতেন, উপ্পন্নস্স চ কামরাগস্স নিস্সরণং যথাভূতং পজানাতি, অত্তত্থম্পি তস্মিং সমযে যথাভূতং জানাতি পস্সতি, পরত্থম্পি তস্মিং সমযে যথাভূতং জানাতি পস্সতি, উভযত্থম্পি তস্মিং সমযে যথাভূতং জানাতি পস্সতি; দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা।
‘‘Yasmiñca kho, brāhmaṇa, samaye na kāmarāgapariyuṭṭhitena cetasā viharati na kāmarāgaparetena, uppannassa ca kāmarāgassa nissaraṇaṃ yathābhūtaṃ pajānāti, attatthampi tasmiṃ samaye yathābhūtaṃ jānāti passati, paratthampi tasmiṃ samaye yathābhūtaṃ jānāti passati, ubhayatthampi tasmiṃ samaye yathābhūtaṃ jānāti passati; dīgharattaṃ asajjhāyakatāpi mantā paṭibhanti, pageva sajjhāyakatā.
‘‘সেয্যথাপি , ব্রাহ্মণ, উদপত্তো অসংসট্ঠো লাখায ৰা হলিদ্দিযা ৰা নীলিযা ৰা মঞ্জিট্ঠায ৰা। তত্থ চক্খুমা পুরিসো সকং মুখনিমিত্তং পচ্চৰেক্খমানো যথাভূতং জানেয্য পস্সেয্য। এৰমেৰ খো, ব্রাহ্মণ, যস্মিং সমযে ন কামরাগপরিযুট্ঠিতেন চেতসা ৰিহরতি ন কামরাগপরেতেন, উপ্পন্নস্স চ কামরাগস্স নিস্সরণং যথাভূতং পজানাতি…পে॰…।
‘‘Seyyathāpi , brāhmaṇa, udapatto asaṃsaṭṭho lākhāya vā haliddiyā vā nīliyā vā mañjiṭṭhāya vā. Tattha cakkhumā puriso sakaṃ mukhanimittaṃ paccavekkhamāno yathābhūtaṃ jāneyya passeyya. Evameva kho, brāhmaṇa, yasmiṃ samaye na kāmarāgapariyuṭṭhitena cetasā viharati na kāmarāgaparetena, uppannassa ca kāmarāgassa nissaraṇaṃ yathābhūtaṃ pajānāti…pe….
‘‘পুন চপরং, ব্রাহ্মণ, যস্মিং সমযে ন ব্যাপাদপরিযুট্ঠিতেন চেতসা ৰিহরতি ন ব্যাপাদপরেতেন, উপ্পন্নস্স চ ব্যাপাদস্স নিস্সরণং যথাভূতং পজানাতি, অত্তত্থম্পি তস্মিং সমযে যথাভূতং জানাতি পস্সতি, পরত্থম্পি…পে॰… উভযত্থম্পি… দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা।
‘‘Puna caparaṃ, brāhmaṇa, yasmiṃ samaye na byāpādapariyuṭṭhitena cetasā viharati na byāpādaparetena, uppannassa ca byāpādassa nissaraṇaṃ yathābhūtaṃ pajānāti, attatthampi tasmiṃ samaye yathābhūtaṃ jānāti passati, paratthampi…pe… ubhayatthampi… dīgharattaṃ asajjhāyakatāpi mantā paṭibhanti, pageva sajjhāyakatā.
‘‘সেয্যথাপি, ব্রাহ্মণ, উদপত্তো ন অগ্গিনা সন্তত্তো ন পক্কুথিতো ন উস্মুদকজাতো, তত্থ চক্খুমা পুরিসো সকং মুখনিমিত্তং পচ্চৰেক্খমানো যথাভূতং জানেয্য পস্সেয্য । এৰমেৰ খো, ব্রাহ্মণ, যস্মিং সমযে ন ব্যাপাদপরিযুট্ঠিতেন চেতসা ৰিহরতি ন ব্যাপাদপরেতেন, উপ্পন্নস্স চ ব্যাপাদস্স নিস্সরণং যথাভূতং পজানাতি, অত্তত্থম্পি তস্মিং সমযে যথাভূতং জানাতি পস্সতি, পরত্থম্পি…পে॰… উভযত্থম্পি… দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা।
‘‘Seyyathāpi, brāhmaṇa, udapatto na agginā santatto na pakkuthito na usmudakajāto, tattha cakkhumā puriso sakaṃ mukhanimittaṃ paccavekkhamāno yathābhūtaṃ jāneyya passeyya . Evameva kho, brāhmaṇa, yasmiṃ samaye na byāpādapariyuṭṭhitena cetasā viharati na byāpādaparetena, uppannassa ca byāpādassa nissaraṇaṃ yathābhūtaṃ pajānāti, attatthampi tasmiṃ samaye yathābhūtaṃ jānāti passati, paratthampi…pe… ubhayatthampi… dīgharattaṃ asajjhāyakatāpi mantā paṭibhanti, pageva sajjhāyakatā.
‘‘পুন চপরং, ব্রাহ্মণ, যস্মিং সমযে ন থিনমিদ্ধপরিযুট্ঠিতেন চেতসা ৰিহরতি ন থিনমিদ্ধপরেতেন, উপ্পন্নস্স চ থিনমিদ্ধস্স নিস্সরণং যথাভূতং পজানাতি, অত্তত্থম্পি তস্মিং সমযে যথাভূতং জানাতি পস্সতি, পরত্থম্পি…পে॰… উভযত্থম্পি … দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা।
‘‘Puna caparaṃ, brāhmaṇa, yasmiṃ samaye na thinamiddhapariyuṭṭhitena cetasā viharati na thinamiddhaparetena, uppannassa ca thinamiddhassa nissaraṇaṃ yathābhūtaṃ pajānāti, attatthampi tasmiṃ samaye yathābhūtaṃ jānāti passati, paratthampi…pe… ubhayatthampi … dīgharattaṃ asajjhāyakatāpi mantā paṭibhanti, pageva sajjhāyakatā.
‘‘সেয্যথাপি, ব্রাহ্মণ, উদপত্তো ন সেৰালপণকপরিযোনদ্ধো। তত্থ চক্খুমা পুরিসো সকং মুখনিমিত্তং পচ্চৰেক্খমানো যথাভূতং জানেয্য পস্সেয্য। এৰমেৰ খো, ব্রাহ্মণ, যস্মিং সমযে ন থিনমিদ্ধপরিযুট্ঠিতেন চেতসা ৰিহরতি ন থিনমিদ্ধপরেতেন, উপ্পন্নস্স চ থিনমিদ্ধস্স নিস্সরণং যথাভূতং পজানাতি, অত্তত্থম্পি তস্মিং সমযে যথাভূতং জানাতি পস্সতি, পরত্থম্পি…পে॰… উভযত্থম্পি… দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা।
‘‘Seyyathāpi, brāhmaṇa, udapatto na sevālapaṇakapariyonaddho. Tattha cakkhumā puriso sakaṃ mukhanimittaṃ paccavekkhamāno yathābhūtaṃ jāneyya passeyya. Evameva kho, brāhmaṇa, yasmiṃ samaye na thinamiddhapariyuṭṭhitena cetasā viharati na thinamiddhaparetena, uppannassa ca thinamiddhassa nissaraṇaṃ yathābhūtaṃ pajānāti, attatthampi tasmiṃ samaye yathābhūtaṃ jānāti passati, paratthampi…pe… ubhayatthampi… dīgharattaṃ asajjhāyakatāpi mantā paṭibhanti, pageva sajjhāyakatā.
‘‘পুন চপরং, ব্রাহ্মণ, যস্মিং সমযে ন উদ্ধচ্চকুক্কুচ্চপরিযুট্ঠিতেন চেতসা ৰিহরতি ন উদ্ধচ্চকুক্কুচ্চপরেতেন, উপ্পন্নস্স চ উদ্ধচ্চকুক্কুচ্চস্স নিস্সরণং যথাভূতং পজানাতি, অত্তত্থম্পি তস্মিং সমযে যথাভূতং জানাতি পস্সতি, পরত্থম্পি…পে॰… উভযত্থম্পি… দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা।
‘‘Puna caparaṃ, brāhmaṇa, yasmiṃ samaye na uddhaccakukkuccapariyuṭṭhitena cetasā viharati na uddhaccakukkuccaparetena, uppannassa ca uddhaccakukkuccassa nissaraṇaṃ yathābhūtaṃ pajānāti, attatthampi tasmiṃ samaye yathābhūtaṃ jānāti passati, paratthampi…pe… ubhayatthampi… dīgharattaṃ asajjhāyakatāpi mantā paṭibhanti, pageva sajjhāyakatā.
‘‘সেয্যথাপি, ব্রাহ্মণ, উদপত্তো ন ৰাতেরিতো ন চলিতো ন ভন্তো ন ঊমিজাতো। তত্থ চক্খুমা পুরিসো সকং মুখনিমিত্তং পচ্চৰেক্খমানো যথাভূতং জানেয্য পস্সেয্য। এৰমেৰ খো, ব্রাহ্মণ, যস্মিং সমযে ন উদ্ধচ্চকুক্কুচ্চপরিযুট্ঠিতেন চেতসা ৰিহরতি ন উদ্ধচ্চকুক্কুচ্চপরেতেন, উপ্পন্নস্স চ উদ্ধচ্চকুক্কুচ্চস্স নিস্সরণং যথাভূতং পজানাতি, অত্তত্থম্পি তস্মিং সমযে যথাভূতং জানাতি পস্সতি, পরত্থম্পি…পে॰… উভযত্থম্পি… দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা।
‘‘Seyyathāpi, brāhmaṇa, udapatto na vāterito na calito na bhanto na ūmijāto. Tattha cakkhumā puriso sakaṃ mukhanimittaṃ paccavekkhamāno yathābhūtaṃ jāneyya passeyya. Evameva kho, brāhmaṇa, yasmiṃ samaye na uddhaccakukkuccapariyuṭṭhitena cetasā viharati na uddhaccakukkuccaparetena, uppannassa ca uddhaccakukkuccassa nissaraṇaṃ yathābhūtaṃ pajānāti, attatthampi tasmiṃ samaye yathābhūtaṃ jānāti passati, paratthampi…pe… ubhayatthampi… dīgharattaṃ asajjhāyakatāpi mantā paṭibhanti, pageva sajjhāyakatā.
‘‘পুন চপরং, ব্রাহ্মণ, যস্মিং সমযে ন ৰিচিকিচ্ছাপরিযুট্ঠিতেন চেতসা ৰিহরতি ন ৰিচিকিচ্ছাপরেতেন, উপ্পন্নায চ ৰিচিকিচ্ছায নিস্সরণং যথাভূতং পজানাতি 5, অত্তত্থম্পি তস্মিং সমযে যথাভূতং জানাতি পস্সতি, পরত্থম্পি তস্মিং সমযে যথাভূতং জানাতি পস্সতি; উভযত্থম্পি তস্মিং সমযে যথাভূতং জানাতি পস্সতি; দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা।
‘‘Puna caparaṃ, brāhmaṇa, yasmiṃ samaye na vicikicchāpariyuṭṭhitena cetasā viharati na vicikicchāparetena, uppannāya ca vicikicchāya nissaraṇaṃ yathābhūtaṃ pajānāti 6, attatthampi tasmiṃ samaye yathābhūtaṃ jānāti passati, paratthampi tasmiṃ samaye yathābhūtaṃ jānāti passati; ubhayatthampi tasmiṃ samaye yathābhūtaṃ jānāti passati; dīgharattaṃ asajjhāyakatāpi mantā paṭibhanti, pageva sajjhāyakatā.
‘‘সেয্যথাপি , ব্রাহ্মণ, উদপত্তো অচ্ছো ৰিপ্পসন্নো অনাৰিলো আলোকে নিক্খিত্তো। তত্থ চক্খুমা পুরিসো সকং মুখনিমিত্তং পচ্চৰেক্খমানো যথাভূতং জানেয্য পস্সেয্য। এৰমেৰ খো, ব্রাহ্মণ, যস্মিং সমযে ন ৰিচিকিচ্ছাপরিযুট্ঠিতেন চেতসা ৰিহরতি ন ৰিচিকিচ্ছাপরেতেন, উপ্পন্নায চ ৰিচিকিচ্ছায নিস্সরণং যথাভূতং পজানাতি, অত্তত্থম্পি তস্মিং সমযে যথাভূতং জানাতি পস্সতি, পরত্থম্পি তস্মিং সমযে যথাভূতং জানাতি পস্সতি, উভযত্থম্পি তস্মিং সমযে যথাভূতং জানাতি পস্সতি; দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা। অযং খো, ব্রাহ্মণ, হেতু অযং পচ্চযো যেনেকদা দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা।
‘‘Seyyathāpi , brāhmaṇa, udapatto accho vippasanno anāvilo āloke nikkhitto. Tattha cakkhumā puriso sakaṃ mukhanimittaṃ paccavekkhamāno yathābhūtaṃ jāneyya passeyya. Evameva kho, brāhmaṇa, yasmiṃ samaye na vicikicchāpariyuṭṭhitena cetasā viharati na vicikicchāparetena, uppannāya ca vicikicchāya nissaraṇaṃ yathābhūtaṃ pajānāti, attatthampi tasmiṃ samaye yathābhūtaṃ jānāti passati, paratthampi tasmiṃ samaye yathābhūtaṃ jānāti passati, ubhayatthampi tasmiṃ samaye yathābhūtaṃ jānāti passati; dīgharattaṃ asajjhāyakatāpi mantā paṭibhanti, pageva sajjhāyakatā. Ayaṃ kho, brāhmaṇa, hetu ayaṃ paccayo yenekadā dīgharattaṃ asajjhāyakatāpi mantā paṭibhanti, pageva sajjhāyakatā.
‘‘সত্তিমে , ব্রাহ্মণ, বোজ্ঝঙ্গা অনাৰরণা অনীৰরণা চেতসো অনুপক্কিলেসা ভাৰিতা বহুলীকতা ৰিজ্জাৰিমুত্তিফলসচ্ছিকিরিযায সংৰত্তন্তি। কতমে সত্ত? সতিসম্বোজ্ঝঙ্গো খো, ব্রাহ্মণ, অনাৰরণো অনীৰরণো চেতসো অনুপক্কিলেসো ভাৰিতো বহুলীকতো ৰিজ্জাৰিমুত্তিফলসচ্ছিকিরিযায সংৰত্ততি…পে॰… উপেক্খাসম্বোজ্ঝঙ্গো খো, ব্রাহ্মণ, অনাৰরণো অনীৰরণো চেতসো অনুপক্কিলেসো ভাৰিতো বহুলীকতো ৰিজ্জাৰিমুত্তিফলসচ্ছিকিরিযায সংৰত্ততি। ইমে খো, ব্রাহ্মণ, সত্ত বোজ্ঝঙ্গা অনাৰরণা অনীৰরণা চেতসো অনুপক্কিলেসা ভাৰিতা বহুলীকতা ৰিজ্জাৰিমুত্তিফলসচ্ছিকিরিযায সংৰত্তন্তী’’তি। এৰং ৰুত্তে সঙ্গারৰো ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম…পে॰… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি। পঞ্চমং।
‘‘Sattime , brāhmaṇa, bojjhaṅgā anāvaraṇā anīvaraṇā cetaso anupakkilesā bhāvitā bahulīkatā vijjāvimuttiphalasacchikiriyāya saṃvattanti. Katame satta? Satisambojjhaṅgo kho, brāhmaṇa, anāvaraṇo anīvaraṇo cetaso anupakkileso bhāvito bahulīkato vijjāvimuttiphalasacchikiriyāya saṃvattati…pe… upekkhāsambojjhaṅgo kho, brāhmaṇa, anāvaraṇo anīvaraṇo cetaso anupakkileso bhāvito bahulīkato vijjāvimuttiphalasacchikiriyāya saṃvattati. Ime kho, brāhmaṇa, satta bojjhaṅgā anāvaraṇā anīvaraṇā cetaso anupakkilesā bhāvitā bahulīkatā vijjāvimuttiphalasacchikiriyāya saṃvattantī’’ti. Evaṃ vutte saṅgāravo brāhmaṇo bhagavantaṃ etadavoca – ‘‘abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti. Pañcamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. সঙ্গারৰসুত্তৰণ্ণনা • 5. Saṅgāravasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫. সঙ্গারৰসুত্তৰণ্ণনা • 5. Saṅgāravasuttavaṇṇanā
