| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
11. සඞ්‌ගාරවසුත්‌තං
11. Saṅgāravasuttaṃ
207. සාවත්‌ථිනිදානං. තෙන ඛො පන සමයෙන සඞ්‌ගාරවො නාම බ්‍රාහ්‌මණො සාවත්‌ථියං පටිවසති උදකසුද්‌ධිකො, උදකෙන පරිසුද්‌ධිං පච්‌චෙති, සායං පාතං උදකොරොහනානුයොගමනුයුත්‌තො විහරති. අථ ඛො ආයස්‌මා ආනන්‌දො පුබ්‌බණ්‌හසමයං නිවාසෙත්‌වා පත්‌තචීවරමාදාය සාවත්‌ථිං පිණ්‌ඩාය පාවිසි. සාවත්‌ථියං පිණ්‌ඩාය චරිත්‌වා පච්‌ඡාභත්‌තං පිණ්‌ඩපාතපටික්‌කන්‌තො යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො ආයස්‌මා ආනන්‌දො භගවන්‌තං එතදවොච – ‘‘ඉධ, භන්‌තෙ, සඞ්‌ගාරවො නාම බ්‍රාහ්‌මණො සාවත්‌ථියං පටිවසති උදකසුද්‌ධිකො , උදකෙන සුද්‌ධිං පච්‌චෙති, සායං පාතං උදකොරොහනානුයොගමනුයුත්‌තො විහරති. සාධු, භන්‌තෙ, භගවා යෙන සඞ්‌ගාරවස්‌ස බ්‍රාහ්‌මණස්‌ස නිවෙසනං තෙනුපසඞ්‌කමතු අනුකම්‌පං උපාදායා’’ති. අධිවාසෙසි භගවා තුණ්‌හීභාවෙන.
207. Sāvatthinidānaṃ. Tena kho pana samayena saṅgāravo nāma brāhmaṇo sāvatthiyaṃ paṭivasati udakasuddhiko, udakena parisuddhiṃ pacceti, sāyaṃ pātaṃ udakorohanānuyogamanuyutto viharati. Atha kho āyasmā ānando pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisi. Sāvatthiyaṃ piṇḍāya caritvā pacchābhattaṃ piṇḍapātapaṭikkanto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘idha, bhante, saṅgāravo nāma brāhmaṇo sāvatthiyaṃ paṭivasati udakasuddhiko , udakena suddhiṃ pacceti, sāyaṃ pātaṃ udakorohanānuyogamanuyutto viharati. Sādhu, bhante, bhagavā yena saṅgāravassa brāhmaṇassa nivesanaṃ tenupasaṅkamatu anukampaṃ upādāyā’’ti. Adhivāsesi bhagavā tuṇhībhāvena.
අථ ඛො භගවා පුබ්‌බණ්‌හසමයං නිවාසෙත්‌වා පත්‌තචීවරමාදාය යෙන සඞ්‌ගාරවස්‌ස බ්‍රාහ්‌මණස්‌ස නිවෙසනං තෙනුපසඞ්‌කමි ; උපසඞ්‌කමිත්‌වා පඤ්‌ඤත්‌තෙ ආසනෙ නිසීදි. අථ ඛො සඞ්‌ගාරවො බ්‍රාහ්‌මණො යෙන භගවා තෙනුපසඞ්‌කමි; උපසඞ්‌කමිත්‌වා භගවතා සද්‌ධිං සම්‌මොදි. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදි. එකමන්‌තං නිසින්‌නං ඛො සඞ්‌ගාරවං බ්‍රාහ්‌මණං භගවා එතදවොච – ‘‘සච්‌චං කිර ත්‌වං, බ්‍රාහ්‌මණ, උදකසුද්‌ධිකො, උදකෙන සුද්‌ධිං පච්‌චෙසි, සායං පාතං උදකොරොහනානුයොගමනුයුත්‌තො විහරසී’’ති? ‘‘එවං, භො ගොතම’’. ‘‘කිං පන ත්‌වං, බ්‍රාහ්‌මණ, අත්‌ථවසං සම්‌පස්‌සමානො උදකසුද්‌ධිකො, උදකසුද්‌ධිං පච්‌චෙසි, සායං පාතං උදකොරොහනානුයොගමනුයුත්‌තො විහරසී’’ති? ‘‘ඉධ මෙ, භො ගොතම 1, යං දිවා පාපකම්‌මං කතං හොති, තං සායං න්‌හානෙන 2 පවාහෙමි, යං රත්‌තිං පාපකම්‌මං කතං හොති තං පාතං න්‌හානෙන පවාහෙමි. ඉමං ඛ්‌වාහං, භො ගොතම, අත්‌ථවසං සම්‌පස්‌සමානො උදකසුද්‌ධිකො, උදකෙන සුද්‌ධිං පච්‌චෙමි, සායං පාතං උදකොරොහනානුයොගමනුයුත්‌තො විහරාමී’’ති.
Atha kho bhagavā pubbaṇhasamayaṃ nivāsetvā pattacīvaramādāya yena saṅgāravassa brāhmaṇassa nivesanaṃ tenupasaṅkami ; upasaṅkamitvā paññatte āsane nisīdi. Atha kho saṅgāravo brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinnaṃ kho saṅgāravaṃ brāhmaṇaṃ bhagavā etadavoca – ‘‘saccaṃ kira tvaṃ, brāhmaṇa, udakasuddhiko, udakena suddhiṃ paccesi, sāyaṃ pātaṃ udakorohanānuyogamanuyutto viharasī’’ti? ‘‘Evaṃ, bho gotama’’. ‘‘Kiṃ pana tvaṃ, brāhmaṇa, atthavasaṃ sampassamāno udakasuddhiko, udakasuddhiṃ paccesi, sāyaṃ pātaṃ udakorohanānuyogamanuyutto viharasī’’ti? ‘‘Idha me, bho gotama 3, yaṃ divā pāpakammaṃ kataṃ hoti, taṃ sāyaṃ nhānena 4 pavāhemi, yaṃ rattiṃ pāpakammaṃ kataṃ hoti taṃ pātaṃ nhānena pavāhemi. Imaṃ khvāhaṃ, bho gotama, atthavasaṃ sampassamāno udakasuddhiko, udakena suddhiṃ paccemi, sāyaṃ pātaṃ udakorohanānuyogamanuyutto viharāmī’’ti.
‘‘ධම්‌මො රහදො බ්‍රාහ්‌මණ සීලතිත්‌ථො,
‘‘Dhammo rahado brāhmaṇa sīlatittho,
අනාවිලො සබ්‌භි සතං පසත්‌ථො;
Anāvilo sabbhi sataṃ pasattho;
යත්‌ථ හවෙ වෙදගුනො සිනාතා,
Yattha have vedaguno sinātā,
එවං වුත්‌තෙ, සඞ්‌ගාරවො බ්‍රාහ්‌මණො භගවන්‌තං එතදවොච – ‘‘අභික්‌කන්‌තං, භො ගොතම, අභික්‌කන්‌තං, භො ගොතම…පෙ.… උපාසකං මං භවං ගොතමො ධාරෙතු අජ්‌ජතග්‌ගෙ පාණුපෙතං සරණං ගත’’න්‌ති.
Evaṃ vutte, saṅgāravo brāhmaṇo bhagavantaṃ etadavoca – ‘‘abhikkantaṃ, bho gotama, abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 11. සඞ්‌ගාරවසුත්‌තවණ්‌ණනා • 11. Saṅgāravasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 11. සඞ්‌ගාරවසුත්‌තවණ්‌ණනා • 11. Saṅgāravasuttavaṇṇanā
