| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. ஸங்கா³ரவஸுத்தவண்ணனா
3. Saṅgāravasuttavaṇṇanā
193. ததியே பகே³வாதி பட²மஞ்ஞேவ. காமராக³பரியுட்டி²தேனாதி காமராக³க்³க³ஹிதேன. காமராக³பரேதேனாதி காமராகா³னுக³தேன. நிஸ்ஸரணந்தி திவித⁴ங் காமராக³ஸ்ஸ நிஸ்ஸரணங் விக்க²ம்ப⁴னநிஸ்ஸரணங், தத³ங்க³னிஸ்ஸரணங், ஸமுச்சே²த³னிஸ்ஸரணந்தி. தத்த² அஸுபே⁴ பட²மஜ்ஜா²னங் விக்க²ம்ப⁴னநிஸ்ஸரணங் நாம, விபஸ்ஸனா தத³ங்க³னிஸ்ஸரணங் நாம, அரஹத்தமக்³கோ³ ஸமுச்சே²த³னிஸ்ஸரணங் நாம. தங் திவித⁴ம்பி நப்பஜானாதீதி அத்தோ². அத்தத்த²ம்பீதிஆதீ³ஸு அரஹத்தஸங்கா²தோ அத்தனோ அத்தோ² அத்தத்தோ² நாம, பச்சயதா³யகானங் அத்தோ² பரத்தோ² நாம, ஸ்வேவ து³விதோ⁴ உப⁴யத்தோ² நாம. இமினா நயேன ஸப்³ப³வாரேஸு அத்தோ² வேதி³தப்³போ³.
193. Tatiye pagevāti paṭhamaññeva. Kāmarāgapariyuṭṭhitenāti kāmarāgaggahitena. Kāmarāgaparetenāti kāmarāgānugatena. Nissaraṇanti tividhaṃ kāmarāgassa nissaraṇaṃ vikkhambhananissaraṇaṃ, tadaṅganissaraṇaṃ, samucchedanissaraṇanti. Tattha asubhe paṭhamajjhānaṃ vikkhambhananissaraṇaṃ nāma, vipassanā tadaṅganissaraṇaṃ nāma, arahattamaggo samucchedanissaraṇaṃ nāma. Taṃ tividhampi nappajānātīti attho. Attatthampītiādīsu arahattasaṅkhāto attano attho attattho nāma, paccayadāyakānaṃ attho parattho nāma, sveva duvidho ubhayattho nāma. Iminā nayena sabbavāresu attho veditabbo.
அயங் பன விஸேஸோ – ப்³யாபாத³ஸ்ஸ நிஸ்ஸரணந்திஆதீ³ஸு ஹி த்³வேவ நிஸ்ஸரணானி விக்க²ம்ப⁴னநிஸ்ஸரணஞ்ச ஸமுச்சே²த³னிஸ்ஸரணஞ்ச. தத்த² ப்³யாபாத³ஸ்ஸ தாவ மெத்தாய பட²மஜ்ஜா²னங் விக்க²ம்ப⁴னநிஸ்ஸரணங் நாம, அனாகா³மிமக்³கோ³ ஸமுச்சே²த³னிஸ்ஸரணங், தி²னமித்³த⁴ஸ்ஸ ஆலோகஸஞ்ஞா விக்க²ம்ப⁴னநிஸ்ஸரணங் , அரஹத்தமக்³கோ³ ஸமுச்சே²த³னிஸ்ஸரணங். உத்³த⁴ச்சகுக்குச்சஸ்ஸ யோ கோசி ஸமதோ² விக்க²ம்ப⁴னநிஸ்ஸரணங், உத்³த⁴ச்சஸ்ஸ பனெத்த² அரஹத்தமக்³கோ³, குக்குச்சஸ்ஸ அனாகா³மிமக்³கோ³ ஸமுச்சே²த³னிஸ்ஸரணங். விசிகிச்சா²ய த⁴ம்மவவத்தா²னங் விக்க²ம்ப⁴னநிஸ்ஸரணங், பட²மமக்³கோ³ ஸமுச்சே²த³னிஸ்ஸரணங்.
Ayaṃ pana viseso – byāpādassa nissaraṇantiādīsu hi dveva nissaraṇāni vikkhambhananissaraṇañca samucchedanissaraṇañca. Tattha byāpādassa tāva mettāya paṭhamajjhānaṃ vikkhambhananissaraṇaṃ nāma, anāgāmimaggo samucchedanissaraṇaṃ, thinamiddhassa ālokasaññā vikkhambhananissaraṇaṃ , arahattamaggo samucchedanissaraṇaṃ. Uddhaccakukkuccassa yo koci samatho vikkhambhananissaraṇaṃ, uddhaccassa panettha arahattamaggo, kukkuccassa anāgāmimaggo samucchedanissaraṇaṃ. Vicikicchāya dhammavavatthānaṃ vikkhambhananissaraṇaṃ, paṭhamamaggo samucchedanissaraṇaṃ.
யா பனெத்த² ஸெய்யதா²பி, ப்³ராஹ்மண, உத³பத்தோ ஸங்ஸட்டோ² லாகா²ய வாதிஆதி³கா உபமா வுத்தா, தாஸு உத³பத்தோதி உத³கப⁴ரிதா பாதி. ஸங்ஸட்டோ²தி வண்ணபே⁴த³கரணவஸேன ஸங்ஸட்டோ². உக்குதி⁴தோதி குதி⁴தோ. உஸ்ஸத³கஜாதோதி உஸுமகஜாதோ. ஸேவாலபணகபரியோனத்³தோ⁴தி திலபீ³ஜகாதி³பே⁴தே³ன ஸேவாலேன வா நீலமண்டூ³கபிட்டி²வண்ணேன வா உத³கபிட்டி²ங் சா²தெ³த்வா நிப்³ப³த்தேன பணகேன பரியோனத்³தோ⁴. வாதேரிதோதி வாதேன ஏரிதோ கம்பிதோ. ஆவிலோதி அப்பஸன்னோ. லுளிதோதி அஸன்னிஸின்னோ. கலலீபூ⁴தோதி கத்³த³மீபூ⁴தோ. அந்த⁴காரே நிக்கி²த்தோதி கொட்ட²கந்தராதி³பே⁴தே³ அனாலோகட்டா²னே ட²பிதோ. இமஸ்மிங் ஸுத்தே ப⁴க³வா தீஹி ப⁴வேஹி தே³ஸனங் நிவட்டெத்வா அரஹத்தனிகூடேன நிட்ட²பேஸி, ப்³ராஹ்மணோ பன ஸரணமத்தே பதிட்டி²தோதி.
Yā panettha seyyathāpi, brāhmaṇa, udapatto saṃsaṭṭho lākhāya vātiādikā upamā vuttā, tāsu udapattoti udakabharitā pāti. Saṃsaṭṭhoti vaṇṇabhedakaraṇavasena saṃsaṭṭho. Ukkudhitoti kudhito. Ussadakajātoti usumakajāto. Sevālapaṇakapariyonaddhoti tilabījakādibhedena sevālena vā nīlamaṇḍūkapiṭṭhivaṇṇena vā udakapiṭṭhiṃ chādetvā nibbattena paṇakena pariyonaddho. Vāteritoti vātena erito kampito. Āviloti appasanno. Luḷitoti asannisinno. Kalalībhūtoti kaddamībhūto. Andhakāre nikkhittoti koṭṭhakantarādibhede anālokaṭṭhāne ṭhapito. Imasmiṃ sutte bhagavā tīhi bhavehi desanaṃ nivaṭṭetvā arahattanikūṭena niṭṭhapesi, brāhmaṇo pana saraṇamatte patiṭṭhitoti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. ஸங்கா³ரவஸுத்தங் • 3. Saṅgāravasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3. ஸங்கா³ரவஸுத்தவண்ணனா • 3. Saṅgāravasuttavaṇṇanā
