| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
10. ஸங்கா³ரவஸுத்தவண்ணனா
10. Saṅgāravasuttavaṇṇanā
61. த³ஸமே ஜிண்ணானங் ஹத்தி²ஸாலாதீ³னங் படிஸங்க²ரணங் புன பாகதிககரணங் ஜிண்ணபடிஸங்க²ரணங் , தஸ்ஸ காரகோ ஜிண்ணபடிஸங்க²ரணகாரகோ. பா³ஹிரஸமயேதி ஸத்து²ஸாஸனதோ பா³ஹிரே அஞ்ஞதித்தி²யஸமயே. ஸப்³ப³சதுக்கேனாதிஆதீ³ஸு ஸப்³பே³ஸு த்³விபத³சதுப்பதா³தி³பே⁴தே³ஸு பாணேஸு ஏகேகஸ்மிங் சத்தாரோ சத்தாரோ பாணே வதி⁴த்வா யஜிதப்³ப³ங் யஞ்ஞங் ஸப்³ப³சதுக்கங் நாம. ஸேஸேஸுபி இமினா நயேன அத்தோ² வேதி³தப்³போ³. யஸ்ஸ வா தஸ்ஸ வாதி நிஸ்ஸக்கே ஸாமிவசனந்தி ஆஹ ‘‘யஸ்மா வா தஸ்மா வா’’தி. ஏவமஸ்ஸாயந்தி எத்த² அஸ்ஸூதி நிபாதமத்தந்தி ஆஹ ‘‘ஏவங் ஸந்தேபி அய’’ந்தி.
61. Dasame jiṇṇānaṃ hatthisālādīnaṃ paṭisaṅkharaṇaṃ puna pākatikakaraṇaṃ jiṇṇapaṭisaṅkharaṇaṃ , tassa kārako jiṇṇapaṭisaṅkharaṇakārako. Bāhirasamayeti satthusāsanato bāhire aññatitthiyasamaye. Sabbacatukkenātiādīsu sabbesu dvipadacatuppadādibhedesu pāṇesu ekekasmiṃ cattāro cattāro pāṇe vadhitvā yajitabbaṃ yaññaṃ sabbacatukkaṃ nāma. Sesesupi iminā nayena attho veditabbo. Yassa vā tassa vāti nissakke sāmivacananti āha ‘‘yasmā vā tasmā vā’’ti. Evamassāyanti ettha assūti nipātamattanti āha ‘‘evaṃ santepi aya’’nti.
வட்³டெ⁴ந்தோதி பட்ட²பெந்தோ. மக்³க³ப்³ரஹ்மசரியஸ்ஸ ஓக³த⁴ங் மூலங் பதிட்டா²பூ⁴தங் ப்³ரஹ்மசரியோக³த⁴ங். தேனாஹ ‘‘அரஹத்தமக்³க³ஸங்கா²தஸ்ஸா’’திஆதி³. உக்கட்ட²னித்³தே³ஸேன செத்த² அரஹத்தமக்³க³ஸ்ஸேவ க³ஹணங் கதந்தி த³ட்ட²ப்³ப³ங். உத்தமங் பதிட்டா²பூ⁴தங் ஆரம்மணூபனிஸ்ஸயபா⁴வேன.
Vaḍḍhentoti paṭṭhapento. Maggabrahmacariyassa ogadhaṃ mūlaṃ patiṭṭhābhūtaṃ brahmacariyogadhaṃ. Tenāha ‘‘arahattamaggasaṅkhātassā’’tiādi. Ukkaṭṭhaniddesena cettha arahattamaggasseva gahaṇaṃ katanti daṭṭhabbaṃ. Uttamaṃ patiṭṭhābhūtaṃ ārammaṇūpanissayabhāvena.
அப்பேஹி வெய்யாவச்சகராதீ³ஹி அத்தோ² ஏதிஸ்ஸாதி அப்பட்டா² த்த²-காரஸ்ஸ ட்ட²-காரங் கத்வா. தேனாஹ ‘‘யத்த² ப³ஹூ’’திஆதி³. யத்தா²தி யஸ்ஸங் படிபதா³யங் . அப்போ ஸமாரம்போ⁴ ஏதஸ்ஸாதி அப்பஸமாரம்போ⁴. பாஸங்ஸாதி பஸங்ஸாரஹா. ஏதங் யேவ கதா²பெஸ்ஸாமீதி ஏதேனேவ ப்³ராஹ்மணேன கதா²பெஸ்ஸாமி.
Appehi veyyāvaccakarādīhi attho etissāti appaṭṭhā ttha-kārassa ṭṭha-kāraṃ katvā. Tenāha ‘‘yattha bahū’’tiādi. Yatthāti yassaṃ paṭipadāyaṃ . Appo samārambho etassāti appasamārambho. Pāsaṃsāti pasaṃsārahā. Etaṃ yeva kathāpessāmīti eteneva brāhmaṇena kathāpessāmi.
ஸொப்பேனாதி நித்³தா³ய. பமாதே³னாதி ஜாக³ரியாதீ³ஸு அனநுயுஞ்ஜனதோ ஸதிவிப்பவாஸலக்க²ணேன பமாதே³ன. பச்சனீகபடிஹரணவஸேனாதி படிபக்கா²பனயனவஸேன. ததா² ஹி ப⁴க³வதோ ச ஸாஸனஸ்ஸ ச படிபக்கா² தித்தி²யா, தேஸங் ஹரணதோ படிஹாரியங். தே ஹி தி³ட்டி²ஹரணவஸேன தி³ட்டி²ப்பகாஸனே அஸமத்த²பா⁴வேன ச இத்³தி⁴ஆதே³ஸனானுஸாஸனீஹி ஹரிதா அபனீதா ஹொந்தீதி. ‘‘படீ’’தி வா அயங் ஸத்³தோ³ ‘‘பச்சா²’’தி ஏதஸ்ஸ அத்த²ங் போ³தே⁴தி ‘‘தஸ்மிங் படிபவிட்ட²ஸ்மிங், அஞ்ஞோ ஆக³ஞ்சி² ப்³ராஹ்மணோ’’திஆதீ³ஸு (ஸு॰ நி॰ 985; சூளனி॰ வத்து²கா³தா² 4) விய, தஸ்மா ஸமாஹிதே சித்தே விக³தூபக்கிலேஸே கதகிச்சேன பச்சா² ஹரிதப்³ப³ங் பவத்தேதப்³ப³ந்தி படிஹாரியங், அத்தனோ வா உபக்கிலேஸேஸு சதுத்த²ஜ்ஜா²னமக்³கே³ஹி ஹரிதேஸு பச்சா²ஹரணங் படிஹாரியங், இத்³தி⁴ஆதே³ஸனானுஸாஸனியோ ச விக³தூபக்கிலேஸேன கதகிச்சேன ச ஸத்தஹிதத்த²ங் புன பவத்தேதப்³பா³, ஹரிதேஸு ச அத்தனோ உபக்கிலேஸேஸு பரஸத்தானங் உபக்கிலேஸஹரணானி ஹொந்தீதி படிஹாரியானி ப⁴வந்தி, படிஹாரியமேவ பாடிஹாரியங். படிஹாரியே வா இத்³தி⁴ஆதே³ஸனானுஸாஸனிஸமுதா³யே ப⁴வங் ஏகேகங் பாடிஹாரியந்தி வுச்சதி. படிஹாரியங் வா சதுத்த²ஜ்ஜா²னங் மக்³கோ³ ச படிபக்க²ஹரணதோ, தத்த² ஜாதங் நிமித்தபூ⁴தே, ததோ வா ஆக³தந்தி பாடிஹாரியங்.
Soppenāti niddāya. Pamādenāti jāgariyādīsu ananuyuñjanato sativippavāsalakkhaṇena pamādena. Paccanīkapaṭiharaṇavasenāti paṭipakkhāpanayanavasena. Tathā hi bhagavato ca sāsanassa ca paṭipakkhā titthiyā, tesaṃ haraṇato paṭihāriyaṃ. Te hi diṭṭhiharaṇavasena diṭṭhippakāsane asamatthabhāvena ca iddhiādesanānusāsanīhi haritā apanītā hontīti. ‘‘Paṭī’’ti vā ayaṃ saddo ‘‘pacchā’’ti etassa atthaṃ bodheti ‘‘tasmiṃ paṭipaviṭṭhasmiṃ, añño āgañchi brāhmaṇo’’tiādīsu (su. ni. 985; cūḷani. vatthugāthā 4) viya, tasmā samāhite citte vigatūpakkilese katakiccena pacchā haritabbaṃ pavattetabbanti paṭihāriyaṃ, attano vā upakkilesesu catutthajjhānamaggehi haritesu pacchāharaṇaṃ paṭihāriyaṃ, iddhiādesanānusāsaniyo ca vigatūpakkilesena katakiccena ca sattahitatthaṃ puna pavattetabbā, haritesu ca attano upakkilesesu parasattānaṃ upakkilesaharaṇāni hontīti paṭihāriyāni bhavanti, paṭihāriyameva pāṭihāriyaṃ. Paṭihāriye vā iddhiādesanānusāsanisamudāye bhavaṃ ekekaṃ pāṭihāriyanti vuccati. Paṭihāriyaṃ vā catutthajjhānaṃ maggo ca paṭipakkhaharaṇato, tattha jātaṃ nimittabhūte, tato vā āgatanti pāṭihāriyaṃ.
ஆக³தனிமித்தேனாதி ஆக³தாகாரஸல்லக்க²ணவஸேன. ஏஸ நயோ ஸேஸேஸுபி. ஏகோ ராஜாதி த³க்கி²ணமது⁴ராதி⁴பதி ஏகோ பண்டு³ராஜா. ஏவம்பி தே மனோதி இமினா ஆகாரேன தவ மனோ பவத்தோதி அத்தோ². தேன பகாரேன பவத்தோதி ஆஹ ‘‘ஸோமனஸ்ஸிதோ வா’’திஆதி³. ஸாமஞ்ஞஜோதனா விஸேஸே அவதிட்ட²தீதி அதி⁴ப்பாயேனேவங் வுத்தங். ‘‘ஏவங் தவ மனோ’’தி இத³ஞ்ச மனஸோ ஸோமனஸ்ஸிததாதி³மத்தத³ஸ்ஸனங், ந பன யேன ஸோ ஸோமனஸ்ஸிதோ வா தோ³மனஸ்ஸிதோ வா, தங்த³ஸ்ஸனங். ஸோமனஸ்ஸக்³க³ஹணேன செத்த² ததே³கட்டா² ராகா³த³யோ ஸத்³தா⁴த³யோ ச த³ஸ்ஸிதா ஹொந்தி, தோ³மனஸ்ஸக்³க³ஹணேன தோ³ஸாத³யோ. து³தியந்தி ‘‘இத்த²ம்பி தே மனோ’’தி பத³ங். இதிபீதி எத்த² இதி-ஸத்³தோ³ நித³ஸ்ஸனத்தோ² ‘‘அத்தீ²தி கோ², கச்சான, அயமேகோ அந்தோ’’திஆதீ³ஸு (ஸங்॰ நி॰ 2.15; 3.90) விய. தேனாஹ ‘‘இமஞ்ச இமஞ்ச அத்த²ங் சிந்தயமான’’ந்தி. பி-ஸத்³தோ³ வுத்தத்த²ஸம்பிண்ட³னத்தோ².
Āgatanimittenāti āgatākārasallakkhaṇavasena. Esa nayo sesesupi. Eko rājāti dakkhiṇamadhurādhipati eko paṇḍurājā. Evampi te manoti iminā ākārena tava mano pavattoti attho. Tena pakārena pavattoti āha ‘‘somanassito vā’’tiādi. Sāmaññajotanā visese avatiṭṭhatīti adhippāyenevaṃ vuttaṃ. ‘‘Evaṃ tava mano’’ti idañca manaso somanassitatādimattadassanaṃ, na pana yena so somanassito vā domanassito vā, taṃdassanaṃ. Somanassaggahaṇena cettha tadekaṭṭhā rāgādayo saddhādayo ca dassitā honti, domanassaggahaṇena dosādayo. Dutiyanti ‘‘itthampi te mano’’ti padaṃ. Itipīti ettha iti-saddo nidassanattho ‘‘atthīti kho, kaccāna, ayameko anto’’tiādīsu (saṃ. ni. 2.15; 3.90) viya. Tenāha ‘‘imañca imañca atthaṃ cintayamāna’’nti. Pi-saddo vuttatthasampiṇḍanattho.
கதெ²ந்தானங் ஸுத்வாதி கதெ²ந்தானங் ஸத்³த³ங் ஸுத்வா. தஸ்ஸ வஸேனாதி தஸ்ஸ விதக்கிதஸ்ஸ வஸேன. அட்டகாரகேனாதி வினிச்ச²யகாரகேன.
Kathentānaṃ sutvāti kathentānaṃ saddaṃ sutvā. Tassa vasenāti tassa vitakkitassa vasena. Aṭṭakārakenāti vinicchayakārakena.
ந அரியானந்தி அரியானங் மக்³க³ப²லசித்தங் ந ஜானாதீதி அத்தோ². தஞ்ஹி தேன அனதி⁴க³தத்தா சேதோபரியஞாணேனபி ந ஸக்கா விஞ்ஞாதுங், அஞ்ஞங் பன சித்தங் ஜானாதியேவ. ஹெட்டி²மோ உபரிமஸ்ஸ சித்தங் ந ஜானாதீதிஆதீ³னிபி மக்³க³ப²லசித்தமேவ ஸந்தா⁴ய வுத்தானீதி வேதி³தப்³பா³னி. ஸோதாபன்னாத³யோபி ஹி அத்தனா அதி⁴க³தமேவ மக்³க³ப²லங் பரேஹி உப்பாதி³தங் ஸம்மா சேதோபரியஞாணேன ஜானிதுங் ஸக்கொந்தி, ந அத்தனா அனதி⁴க³தங். ஸப்³பே³பி அரியா அத்தனோ ப²லங் ஸமாபஜ்ஜந்தி அதி⁴க³தத்தாதி த³ஸ்ஸெந்தோ ‘‘ஏதேஸு சா’’திஆதி³மாஹ. யதி³ அரியா அத்தனா அதி⁴க³தப²லங் ஸமாபஜ்ஜந்தி, உபரிமாபி ஹெட்டி²மங் ப²லங் ஸமாபஜ்ஜந்தி அதி⁴க³தத்தா லோகியஸமாபத்தியோ வியாதி கஸ்ஸசி ஆஸங்கா ஸியா, தன்னிவத்தனத்த²மாஹ ‘‘உபரிமோ ஹெட்டி²மங் ந ஸமாபஜ்ஜதீ’’தி.
Na ariyānanti ariyānaṃ maggaphalacittaṃ na jānātīti attho. Tañhi tena anadhigatattā cetopariyañāṇenapi na sakkā viññātuṃ, aññaṃ pana cittaṃ jānātiyeva. Heṭṭhimo uparimassa cittaṃ na jānātītiādīnipi maggaphalacittameva sandhāya vuttānīti veditabbāni. Sotāpannādayopi hi attanā adhigatameva maggaphalaṃ parehi uppāditaṃ sammā cetopariyañāṇena jānituṃ sakkonti, na attanā anadhigataṃ. Sabbepi ariyā attano phalaṃ samāpajjanti adhigatattāti dassento ‘‘etesu cā’’tiādimāha. Yadi ariyā attanā adhigataphalaṃ samāpajjanti, uparimāpi heṭṭhimaṃ phalaṃ samāpajjanti adhigatattā lokiyasamāpattiyo viyāti kassaci āsaṅkā siyā, tannivattanatthamāha ‘‘uparimo heṭṭhimaṃ na samāpajjatī’’ti.
உபரிமோதி ஸகதா³கா³மிஆதி³அரியபுக்³க³லோ. ஹெட்டி²மந்தி ஸோதாபத்திப²லாதி³ங். ந ஸமாபஜ்ஜதீதி ஸதிபி அதி⁴க³தத்தே ந ஸமாபஜ்ஜதி. கஸ்மாதி சே? காரணமாஹ ‘‘தேஸஞ்ஹீ’’திஆதி³, தேஸங் ஸகதா³கா³மிஆதீ³னங் ஹெட்டி²மா ஹெட்டி²மா ப²லஸமாபத்தி தேஸு தேஸுயேவ ஹெட்டி²மேஸு அரியபுக்³க³லேஸு பவத்ததி, ந உபரிமேஸூதி அத்தோ². இமினா ஹெட்டி²மங் ப²லசித்தங் உபரிமஸ்ஸ ந உப்பஜ்ஜதீதி த³ஸ்ஸேதி. கஸ்மாதி சே? புக்³க³லந்தரபா⁴வூபக³மனேன படிப்பஸ்ஸத்³த⁴த்தா. ஏதேன உபரிமோ அரியோ ஹெட்டி²மங் ப²லஸமாபத்திங் ஸமாபஜ்ஜதி அத்தனா அதி⁴க³தத்தா யதா² தங் லோகியஸமாபத்திந்தி ஏவங் பவத்தோ ஹேது ப்³யபி⁴சாரிதோதி த³ட்ட²ப்³ப³ங். ந ஹி லோகியஜ்ஜா²னேஸு புக்³க³லந்தரபா⁴வூபக³மனங் நாம அத்தி² விஸேஸாபா⁴வதோ, இத⁴ பன அஸமுக்³கா⁴டிதகம்மகிலேஸனிரோத⁴னேன புது²ஜ்ஜனேஹி விய ஸோதாபன்னஸ்ஸ ஸோதாபன்னாதீ³ஹி ஸகதா³கா³மிஆதீ³னங் புக்³க³லந்தரபா⁴வூபக³மனங் அத்தி². யதோ ஹெட்டி²மா ஹெட்டி²மா ப²லத⁴ம்மா உபரூபரிமக்³க³த⁴ம்மேஹி நிவத்திதா படிபக்கே²ஹி விய அபி⁴பூ⁴தா அப்பவத்தித⁴ம்மதங்யேவ ஆபன்னா. தேனேவ வுத்தங் ‘‘படிப்பஸ்ஸத்³த⁴த்தா’’தி.
Uparimoti sakadāgāmiādiariyapuggalo. Heṭṭhimanti sotāpattiphalādiṃ. Na samāpajjatīti satipi adhigatatte na samāpajjati. Kasmāti ce? Kāraṇamāha ‘‘tesañhī’’tiādi, tesaṃ sakadāgāmiādīnaṃ heṭṭhimā heṭṭhimā phalasamāpatti tesu tesuyeva heṭṭhimesu ariyapuggalesu pavattati, na uparimesūti attho. Iminā heṭṭhimaṃ phalacittaṃ uparimassa na uppajjatīti dasseti. Kasmāti ce? Puggalantarabhāvūpagamanena paṭippassaddhattā. Etena uparimo ariyo heṭṭhimaṃ phalasamāpattiṃ samāpajjati attanā adhigatattā yathā taṃ lokiyasamāpattinti evaṃ pavatto hetu byabhicāritoti daṭṭhabbaṃ. Na hi lokiyajjhānesu puggalantarabhāvūpagamanaṃ nāma atthi visesābhāvato, idha pana asamugghāṭitakammakilesanirodhanena puthujjanehi viya sotāpannassa sotāpannādīhi sakadāgāmiādīnaṃ puggalantarabhāvūpagamanaṃ atthi. Yato heṭṭhimā heṭṭhimā phaladhammā uparūparimaggadhammehi nivattitā paṭipakkhehi viya abhibhūtā appavattidhammataṃyeva āpannā. Teneva vuttaṃ ‘‘paṭippassaddhattā’’ti.
அபிச குஸலகிரியப்பவத்தி நாம அஞ்ஞா, விபாகப்பவத்தி ச அஞ்ஞாதி அனந்தரப²லத்தா ச லோகுத்தரகுஸலானங் ஹெட்டி²மதோ உபரிமோ ப⁴வந்தரக³தோ விய ஹோதி. தங்தங்ப²லவஸேனேவ ஹி அரியானங் ஸோதாபன்னாதி³னாமலாபோ⁴. தே ஸசே அஞ்ஞப²லஸமங்கி³னோபி ஹொந்தி, ஸோதாபன்னாதி³னாமம்பி தேஸங் அவவத்தி²தங் ஸியா. தஸ்ஸ தஸ்ஸ வா அரியஸ்ஸ தங் தங் ப²லங் ஸதி³ஸந்தி கத்வா ந உபரிமஸ்ஸ ஹெட்டி²மப²லஸமங்கி³தாய லேஸோபி ஸம்ப⁴வதி, குதோ தஸ்ஸா ஸமாபஜ்ஜனந்தி த³ட்ட²ப்³ப³ங். ஹெட்டி²மா ச ஸோதாபன்னாத³யோ உபரிமங் ஸகதா³கா³மிப²லாதி³ங் ந ஸமாபஜ்ஜந்தி அனதி⁴க³தத்தா. ந ஹி அனதி⁴க³தங் ஸமாபத்திங் ஸமாபஜ்ஜிதுங் ஸக்கா, தஸ்மா ஸப்³பே³பி அரியா அத்தனோயேவ ப²லங் ஸமாபஜ்ஜந்தீதி நிட்ட²மெத்த² க³ந்தப்³ப³ங்.
Apica kusalakiriyappavatti nāma aññā, vipākappavatti ca aññāti anantaraphalattā ca lokuttarakusalānaṃ heṭṭhimato uparimo bhavantaragato viya hoti. Taṃtaṃphalavaseneva hi ariyānaṃ sotāpannādināmalābho. Te sace aññaphalasamaṅginopi honti, sotāpannādināmampi tesaṃ avavatthitaṃ siyā. Tassa tassa vā ariyassa taṃ taṃ phalaṃ sadisanti katvā na uparimassa heṭṭhimaphalasamaṅgitāya lesopi sambhavati, kuto tassā samāpajjananti daṭṭhabbaṃ. Heṭṭhimā ca sotāpannādayo uparimaṃ sakadāgāmiphalādiṃ na samāpajjanti anadhigatattā. Na hi anadhigataṃ samāpattiṃ samāpajjituṃ sakkā, tasmā sabbepi ariyā attanoyeva phalaṃ samāpajjantīti niṭṭhamettha gantabbaṃ.
பவத்தெந்தாதி பவத்தகா ஹுத்வா, பவத்தனவஸேனாதி அத்தோ². ஏவந்தி யதா²னுஸிட்டா²ய அனுஸாஸனியா விதி⁴வஸேன படிஸேத⁴வஸேன ச பவத்திதாகாரபராமஸனங். ஸா ச ஸம்மாவிதக்கா நாம மிச்சா²விதக்கானஞ்ச பவத்திஆகாரத³ஸ்ஸனவஸேன பவத்ததி. தத்த² ஆனிஸங்ஸஸ்ஸ ஆதீ³னவஸ்ஸ ச விபா⁴வனத்த²ங் அனிச்சஸஞ்ஞமேவ, ந நிச்சஸஞ்ஞந்தி அத்தோ². படியோகி³னிவத்தனத்த²ஞ்ஹி ஏவ-காரக்³க³ஹணங். இதா⁴பி ஏவஸத்³த³க்³க³ஹணஸ்ஸ அத்தோ² பயோஜனஞ்ச வுத்தனயேனேவ வேதி³தப்³ப³ங். இத³ங்-க³ஹணேபி ஏஸேவ நயோ. பஞ்சகாமகு³ணராக³ந்தி நித³ஸ்ஸனமத்தங் த³ட்ட²ப்³ப³ங் தத³ஞ்ஞராக³ஸ்ஸ தோ³ஸாதீ³னஞ்ச பஹானஸ்ஸ இச்சி²தத்தா தப்பஹானஸ்ஸ ச தத³ஞ்ஞராகா³தி³கே²பஸ்ஸ உபாயபா⁴வதோ. ததா² வுத்தங் து³ட்ட²லோஹிதவிமோசனஸ்ஸ புப்³ப³து³ட்ட²மங்ஸகே²பனூபாயதா விய. லோகுத்தரத⁴ம்மமேவாதி அவதா⁴ரணங் படிக்கே²பபா⁴வதோ ஸாவஜ்ஜத⁴ம்மனிவத்தனபரங் த³ட்ட²ப்³ப³ங், தஸ்ஸ அதி⁴க³மூபாயானிஸங்ஸபூ⁴தானங் தத³ஞ்ஞேஸங் அனவஜ்ஜத⁴ம்மானங் நானந்தரியபா⁴வதோ.
Pavattentāti pavattakā hutvā, pavattanavasenāti attho. Evanti yathānusiṭṭhāya anusāsaniyā vidhivasena paṭisedhavasena ca pavattitākāraparāmasanaṃ. Sā ca sammāvitakkā nāma micchāvitakkānañca pavattiākāradassanavasena pavattati. Tattha ānisaṃsassa ādīnavassa ca vibhāvanatthaṃ aniccasaññameva, na niccasaññanti attho. Paṭiyoginivattanatthañhi eva-kāraggahaṇaṃ. Idhāpi evasaddaggahaṇassa attho payojanañca vuttanayeneva veditabbaṃ. Idaṃ-gahaṇepi eseva nayo. Pañcakāmaguṇarāganti nidassanamattaṃ daṭṭhabbaṃ tadaññarāgassa dosādīnañca pahānassa icchitattā tappahānassa ca tadaññarāgādikhepassa upāyabhāvato. Tathā vuttaṃ duṭṭhalohitavimocanassa pubbaduṭṭhamaṃsakhepanūpāyatā viya. Lokuttaradhammamevāti avadhāraṇaṃ paṭikkhepabhāvato sāvajjadhammanivattanaparaṃ daṭṭhabbaṃ, tassa adhigamūpāyānisaṃsabhūtānaṃ tadaññesaṃ anavajjadhammānaṃ nānantariyabhāvato.
சிந்தாமணிகவிஜ்ஜாஸரிக்க²கதந்தி இமினா ‘‘சிந்தாமணீ’’தி ஏவங் லத்³த⁴னாமா லோகே ஏகா விஜ்ஜா அத்தி², யாய பரேஸங் சித்தங் விஜானந்தீதி தீ³பேதி. ‘‘தஸ்ஸா கிர விஜ்ஜாய ஸாத⁴கோ புக்³க³லோ தாதி³ஸே தே³ஸகாலே மந்தங் பரிஜப்பித்வா யஸ்ஸ சித்தங் ஜானிதுகாமோ, தஸ்ஸ தி³ட்ட²ஹத்தா²தி³விஸேஸஸஞ்ஜானநமுகே²ன சித்தாசாரங் அனுமினந்தோ கதே²தீ’’தி கேசி. அபரே ‘‘வாசங் நிச்ச²ராபெத்வா தத்த² அக்க²ரஸல்லக்க²ணவஸேனா’’தி வத³ந்தி.
Cintāmaṇikavijjāsarikkhakatanti iminā ‘‘cintāmaṇī’’ti evaṃ laddhanāmā loke ekā vijjā atthi, yāya paresaṃ cittaṃ vijānantīti dīpeti. ‘‘Tassā kira vijjāya sādhako puggalo tādise desakāle mantaṃ parijappitvā yassa cittaṃ jānitukāmo, tassa diṭṭhahatthādivisesasañjānanamukhena cittācāraṃ anuminanto kathetī’’ti keci. Apare ‘‘vācaṃ niccharāpetvā tattha akkharasallakkhaṇavasenā’’ti vadanti.
இத³ஞ்ச பன ஸப்³ப³ந்தி ‘‘ப⁴வங் கோ³தமோ அனேகவிஹிதங் இத்³தி⁴வித⁴ங் பச்சனுபோ⁴தீ’’திஆதி³னயப்பவத்தங் ஸப்³ப³ம்பி.
Idañcapana sabbanti ‘‘bhavaṃ gotamo anekavihitaṃ iddhividhaṃ paccanubhotī’’tiādinayappavattaṃ sabbampi.
ஸங்கா³ரவஸுத்தவண்ணனா நிட்டி²தா.
Saṅgāravasuttavaṇṇanā niṭṭhitā.
ப்³ராஹ்மணவக்³க³வண்ணனா நிட்டி²தா.
Brāhmaṇavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. ஸங்கா³ரவஸுத்தங் • 10. Saṅgāravasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. ஸங்கா³ரவஸுத்தவண்ணனா • 10. Saṅgāravasuttavaṇṇanā
