| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
3. ஸங்கா³ரவஸுத்தவண்ணனா
3. Saṅgāravasuttavaṇṇanā
193. ததியே (ஸங்॰ நி॰ டீ॰ 2.5.236) பட²மஞ்ஞேவாதி புரேதரங்யேவ, அஸஜ்ஜா²யகதானங் மந்தானங் அப்படிபா⁴னங் பகே³வ பட²மங்யேவ ஸித்³த⁴ங், தத்த² வத்தப்³ப³மேவ நத்தீ²தி அதி⁴ப்பாயோ. பரியுட்டா²னங் நாம அபி⁴ப⁴வோ க³ஹணந்தி ஆஹ ‘‘காமராக³பரியுட்டி²தேனாதி காமராக³க்³க³ஹிதேனா’’தி. விக்க²ம்பே⁴தி அபனேதீதி விக்க²ம்ப⁴னங், படிபக்க²தோ நிஸ்ஸரதி ஏதேனாதி நிஸ்ஸரணங். விக்க²ம்ப⁴னஞ்ச தங் நிஸ்ஸரணஞ்சாதி விக்க²ம்ப⁴னநிஸ்ஸரணங். தேனாஹ ‘‘தத்தா²’’திஆதி³. ஸேஸபத³த்³வயேபி ஏஸேவ நயோ. அத்தனா அரணீயோ பத்தப்³போ³ அத்தோ² அத்தத்தோ². ததா² பரத்தோ² வேதி³தப்³போ³.
193. Tatiye (saṃ. ni. ṭī. 2.5.236) paṭhamaññevāti puretaraṃyeva, asajjhāyakatānaṃ mantānaṃ appaṭibhānaṃ pageva paṭhamaṃyeva siddhaṃ, tattha vattabbameva natthīti adhippāyo. Pariyuṭṭhānaṃ nāma abhibhavo gahaṇanti āha ‘‘kāmarāgapariyuṭṭhitenāti kāmarāgaggahitenā’’ti. Vikkhambheti apanetīti vikkhambhanaṃ, paṭipakkhato nissarati etenāti nissaraṇaṃ. Vikkhambhanañca taṃ nissaraṇañcāti vikkhambhananissaraṇaṃ. Tenāha ‘‘tatthā’’tiādi. Sesapadadvayepi eseva nayo. Attanā araṇīyo pattabbo attho attattho. Tathā parattho veditabbo.
‘‘அனிச்சதோ அனுபஸ்ஸந்தோ நிச்சஸஞ்ஞங் பஜஹதீ’’திஆதீ³ஸு (படி॰ ம॰ 1.52) ப்³யாபாதா³தீ³னங் அனாக³தத்தா ப்³யாபாத³வாரே தத³ங்க³னிஸ்ஸரணங் ந க³ஹிதங். கிஞ்சாபி ந க³ஹிதங், படிஸங்கா²னவஸேன தஸ்ஸ வினோதே³தப்³ப³தாய தத³ங்க³னிஸ்ஸரணம்பி லப்³ப⁴தேவாதி ஸக்கா விஞ்ஞாதுங். ஆலோகஸஞ்ஞா உபசாரப்பத்தா வா அப்பனாப்பத்தா வா. யோ கோசி கஸிணஜ்ஜா²னாதி³பே⁴தோ³ ஸமதோ². த⁴ம்மவவத்தா²னங் உபசாரப்பனாப்பத்தவஸேன க³ஹேதப்³ப³ங்.
‘‘Aniccato anupassanto niccasaññaṃ pajahatī’’tiādīsu (paṭi. ma. 1.52) byāpādādīnaṃ anāgatattā byāpādavāre tadaṅganissaraṇaṃ na gahitaṃ. Kiñcāpi na gahitaṃ, paṭisaṅkhānavasena tassa vinodetabbatāya tadaṅganissaraṇampi labbhatevāti sakkā viññātuṃ. Ālokasaññā upacārappattā vā appanāppattā vā. Yo koci kasiṇajjhānādibhedo samatho. Dhammavavatthānaṃ upacārappanāppattavasena gahetabbaṃ.
குதி⁴தோதி தத்தோ. உஸ்ஸூரகஜாதோதி தஸ்ஸேவ குதி⁴தபா⁴வஸ்ஸ உஸ்ஸூரகங் அச்சுண்ஹதங் பத்தோ. தேனாஹ ‘‘உஸுமகஜாதோ’’தி. திலபீ³ஜகாதி³பே⁴தே³னாதி திலபீ³ஜகண்ணிககேஸராதி³பே⁴தே³ன ஸேவாலேன. பணகேனாதி உத³கபிச்சி²ல்லேன. அப்பஸன்னோ ஆகுலதாய. அஸன்னிஸின்னோ கலலுப்பத்தியா. அனாலோகட்டா²னேதி ஆலோகரஹிதே டா²னே.
Kudhitoti tatto. Ussūrakajātoti tasseva kudhitabhāvassa ussūrakaṃ accuṇhataṃ patto. Tenāha ‘‘usumakajāto’’ti. Tilabījakādibhedenāti tilabījakaṇṇikakesarādibhedena sevālena. Paṇakenāti udakapicchillena. Appasanno ākulatāya. Asannisinno kalaluppattiyā. Anālokaṭṭhāneti ālokarahite ṭhāne.
ஸங்கா³ரவஸுத்தவண்ணனா நிட்டி²தா.
Saṅgāravasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. ஸங்கா³ரவஸுத்தங் • 3. Saṅgāravasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3. ஸங்கா³ரவஸுத்தவண்ணனா • 3. Saṅgāravasuttavaṇṇanā
