| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৫. সঙ্গারৰসুত্তৰণ্ণনা
5. Saṅgāravasuttavaṇṇanā
২৩৬. পঠমঞ্ঞেৰাতি পুরেতরংযেৰ। অসজ্ঝাযকতানং মন্তানং অপ্পটিভানং পগেৰ পঠমংযেৰ সিদ্ধং, তত্থ ৰত্তব্বমেৰ নত্থীতি অধিপ্পাযো। পরিযুট্ঠানং নাম অভিভৰো গহণন্তি আহ – ‘‘কামরাগপরিযুট্ঠিতেনাতি কামরাগগহিতেনা’’তি। ৰিক্খম্ভেতি অপনেতীতি ৰিক্খম্ভনং, পটিপক্খতো নিস্সরতি এতেনাতি নিস্সরণং, ৰিক্খম্ভনঞ্চ তং নিস্সরণঞ্চাতি ৰিক্খম্ভননিস্সরণং। তেনাহ – ‘‘তত্থা’’তিআদি। সেসপদদ্ৰযেপি এসেৰ নযো। অত্তনা অরণিযো পত্তব্বো অত্তত্থো, তথা পরত্থো ৰেদিতব্বো।
236.Paṭhamaññevāti puretaraṃyeva. Asajjhāyakatānaṃ mantānaṃ appaṭibhānaṃ pageva paṭhamaṃyeva siddhaṃ, tattha vattabbameva natthīti adhippāyo. Pariyuṭṭhānaṃ nāma abhibhavo gahaṇanti āha – ‘‘kāmarāgapariyuṭṭhitenāti kāmarāgagahitenā’’ti. Vikkhambheti apanetīti vikkhambhanaṃ, paṭipakkhato nissarati etenāti nissaraṇaṃ, vikkhambhanañca taṃ nissaraṇañcāti vikkhambhananissaraṇaṃ. Tenāha – ‘‘tatthā’’tiādi. Sesapadadvayepi eseva nayo. Attanā araṇiyo pattabbo attattho, tathā parattho veditabbo.
‘‘অনিচ্চতো অনুপস্সন্তো নিচ্চসঞ্ঞং পজহতী’’তিআদীসু ব্যাপাদাদীনং অনাগতত্তা অব্যাপাদৰারে তদঙ্গনিস্সরণং ন গহিতং। কিঞ্চাপি ন গহিতং, পটিসঙ্খানৰসেন পন তস্স ৰিনোদেতব্বতায তদঙ্গনিস্সরণম্পি লব্ভতেৰাতি সক্কা ৰিঞ্ঞাতুং। আলোকসঞ্ঞা উপচারপ্পত্তা, অপ্পনাপ্পত্তা ৰা, যো কোচি কসিণজ্ঝানাদিভেদো সমথো। ধম্মৰৰত্থানং উপচারপ্পনাপ্পত্তৰসেন গহেতব্বং।
‘‘Aniccato anupassanto niccasaññaṃ pajahatī’’tiādīsu byāpādādīnaṃ anāgatattā abyāpādavāre tadaṅganissaraṇaṃ na gahitaṃ. Kiñcāpi na gahitaṃ, paṭisaṅkhānavasena pana tassa vinodetabbatāya tadaṅganissaraṇampi labbhatevāti sakkā viññātuṃ. Ālokasaññā upacārappattā, appanāppattā vā, yo koci kasiṇajjhānādibhedo samatho. Dhammavavatthānaṃ upacārappanāppattavasena gahetabbaṃ.
কুথিতোতি তত্তো। উস্মুদকজাতোতি তস্সেৰ কুথিতভাৰস্স উস্মুদকতং অচ্চুণ্হতং পত্তো। তেনাহ ‘‘উসুমজাতো’’তি। তিলবীজকাদিভেদেনাতি তিলবীজককণ্ণিককেসরাদিভেদেন। সেৰালেন…পে॰… পণকেনাতি উদকপিচ্ছিলেন। অপ্পসন্নো আকুলতায। অসন্নিসিন্নো কললুপ্পত্তিযা। অনালোকট্ঠানেতি আলোকরহিতে ঠানে।
Kuthitoti tatto. Usmudakajātoti tasseva kuthitabhāvassa usmudakataṃ accuṇhataṃ patto. Tenāha ‘‘usumajāto’’ti. Tilabījakādibhedenāti tilabījakakaṇṇikakesarādibhedena. Sevālena…pe… paṇakenāti udakapicchilena. Appasanno ākulatāya. Asannisinno kalaluppattiyā. Anālokaṭṭhāneti ālokarahite ṭhāne.
সঙ্গারৰসুত্তৰণ্ণনা নিট্ঠিতা।
Saṅgāravasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৫. সঙ্গারৰসুত্তং • 5. Saṅgāravasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. সঙ্গারৰসুত্তৰণ্ণনা • 5. Saṅgāravasuttavaṇṇanā
