| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៥. សង្គារវសុត្តវណ្ណនា
5. Saṅgāravasuttavaṇṇanā
២៣៦. បឋមញ្ញេវាតិ បុរេតរំយេវ។ អសជ្ឈាយកតានំ មន្តានំ អប្បដិភានំ បគេវ បឋមំយេវ សិទ្ធំ, តត្ថ វត្តព្ពមេវ នត្ថីតិ អធិប្បាយោ។ បរិយុដ្ឋានំ នាម អភិភវោ គហណន្តិ អាហ – ‘‘កាមរាគបរិយុដ្ឋិតេនាតិ កាមរាគគហិតេនា’’តិ។ វិក្ខម្ភេតិ អបនេតីតិ វិក្ខម្ភនំ, បដិបក្ខតោ និស្សរតិ ឯតេនាតិ និស្សរណំ, វិក្ខម្ភនញ្ច តំ និស្សរណញ្ចាតិ វិក្ខម្ភននិស្សរណំ។ តេនាហ – ‘‘តត្ថា’’តិអាទិ។ សេសបទទ្វយេបិ ឯសេវ នយោ។ អត្តនា អរណិយោ បត្តព្ពោ អត្តត្ថោ, តថា បរត្ថោ វេទិតព្ពោ។
236.Paṭhamaññevāti puretaraṃyeva. Asajjhāyakatānaṃ mantānaṃ appaṭibhānaṃ pageva paṭhamaṃyeva siddhaṃ, tattha vattabbameva natthīti adhippāyo. Pariyuṭṭhānaṃ nāma abhibhavo gahaṇanti āha – ‘‘kāmarāgapariyuṭṭhitenāti kāmarāgagahitenā’’ti. Vikkhambheti apanetīti vikkhambhanaṃ, paṭipakkhato nissarati etenāti nissaraṇaṃ, vikkhambhanañca taṃ nissaraṇañcāti vikkhambhananissaraṇaṃ. Tenāha – ‘‘tatthā’’tiādi. Sesapadadvayepi eseva nayo. Attanā araṇiyo pattabbo attattho, tathā parattho veditabbo.
‘‘អនិច្ចតោ អនុបស្សន្តោ និច្ចសញ្ញំ បជហតី’’តិអាទីសុ ព្យាបាទាទីនំ អនាគតត្តា អព្យាបាទវារេ តទង្គនិស្សរណំ ន គហិតំ។ កិញ្ចាបិ ន គហិតំ, បដិសង្ខានវសេន បន តស្ស វិនោទេតព្ពតាយ តទង្គនិស្សរណម្បិ លព្ភតេវាតិ សក្កា វិញ្ញាតុំ។ អាលោកសញ្ញា ឧបចារប្បត្តា, អប្បនាប្បត្តា វា, យោ កោចិ កសិណជ្ឈានាទិភេទោ សមថោ។ ធម្មវវត្ថានំ ឧបចារប្បនាប្បត្តវសេន គហេតព្ពំ។
‘‘Aniccato anupassanto niccasaññaṃ pajahatī’’tiādīsu byāpādādīnaṃ anāgatattā abyāpādavāre tadaṅganissaraṇaṃ na gahitaṃ. Kiñcāpi na gahitaṃ, paṭisaṅkhānavasena pana tassa vinodetabbatāya tadaṅganissaraṇampi labbhatevāti sakkā viññātuṃ. Ālokasaññā upacārappattā, appanāppattā vā, yo koci kasiṇajjhānādibhedo samatho. Dhammavavatthānaṃ upacārappanāppattavasena gahetabbaṃ.
កុថិតោតិ តត្តោ។ ឧស្មុទកជាតោតិ តស្សេវ កុថិតភាវស្ស ឧស្មុទកតំ អច្ចុណ្ហតំ បត្តោ។ តេនាហ ‘‘ឧសុមជាតោ’’តិ។ តិលពីជកាទិភេទេនាតិ តិលពីជកកណ្ណិកកេសរាទិភេទេន។ សេវាលេន…បេ.… បណកេនាតិ ឧទកបិច្ឆិលេន។ អប្បសន្នោ អាកុលតាយ។ អសន្និសិន្នោ កលលុប្បត្តិយា។ អនាលោកដ្ឋានេតិ អាលោករហិតេ ឋានេ។
Kuthitoti tatto. Usmudakajātoti tasseva kuthitabhāvassa usmudakataṃ accuṇhataṃ patto. Tenāha ‘‘usumajāto’’ti. Tilabījakādibhedenāti tilabījakakaṇṇikakesarādibhedena. Sevālena…pe… paṇakenāti udakapicchilena. Appasanno ākulatāya. Asannisinno kalaluppattiyā. Anālokaṭṭhāneti ālokarahite ṭhāne.
សង្គារវសុត្តវណ្ណនា និដ្ឋិតា។
Saṅgāravasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៥. សង្គារវសុត្តំ • 5. Saṅgāravasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៥. សង្គារវសុត្តវណ្ណនា • 5. Saṅgāravasuttavaṇṇanā
