| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၃. သင္ဂာရဝသုတ္တဝဏ္ဏနာ
3. Saṅgāravasuttavaṇṇanā
၁၉၃. တတိယေ (သံ. နိ. ဋီ. ၂.၅.၂၃၆) ပဌမညေဝာတိ ပုရေတရံယေဝ, အသဇ္ဈာယကတာနံ မန္တာနံ အပ္ပဋိဘာနံ ပဂေဝ ပဌမံယေဝ သိဒ္ဓံ, တတ္ထ ဝတ္တဗ္ဗမေဝ နတ္ထီတိ အဓိပ္ပာယော။ ပရိယုဋ္ဌာနံ နာမ အဘိဘဝော ဂဟဏန္တိ အာဟ ‘‘ကာမရာဂပရိယုဋ္ဌိတေနာတိ ကာမရာဂဂ္ဂဟိတေနာ’’တိ။ ဝိက္ခမ္ဘေတိ အပနေတီတိ ဝိက္ခမ္ဘနံ, ပဋိပက္ခတော နိသ္သရတိ ဧတေနာတိ နိသ္သရဏံ။ ဝိက္ခမ္ဘနဉ္စ တံ နိသ္သရဏဉ္စာတိ ဝိက္ခမ္ဘနနိသ္သရဏံ။ တေနာဟ ‘‘တတ္ထာ’’တိအာဒိ။ သေသပဒဒ္ဝယေပိ ဧသေဝ နယော။ အတ္တနာ အရဏီယော ပတ္တဗ္ဗော အတ္ထော အတ္တတ္ထော။ တထာ ပရတ္ထော ဝေဒိတဗ္ဗော။
193. Tatiye (saṃ. ni. ṭī. 2.5.236) paṭhamaññevāti puretaraṃyeva, asajjhāyakatānaṃ mantānaṃ appaṭibhānaṃ pageva paṭhamaṃyeva siddhaṃ, tattha vattabbameva natthīti adhippāyo. Pariyuṭṭhānaṃ nāma abhibhavo gahaṇanti āha ‘‘kāmarāgapariyuṭṭhitenāti kāmarāgaggahitenā’’ti. Vikkhambheti apanetīti vikkhambhanaṃ, paṭipakkhato nissarati etenāti nissaraṇaṃ. Vikkhambhanañca taṃ nissaraṇañcāti vikkhambhananissaraṇaṃ. Tenāha ‘‘tatthā’’tiādi. Sesapadadvayepi eseva nayo. Attanā araṇīyo pattabbo attho attattho. Tathā parattho veditabbo.
‘‘အနိစ္စတော အနုပသ္သန္တော နိစ္စသညံ ပဇဟတီ’’တိအာဒီသု (ပဋိ. မ. ၁.၅၂) ဗ္ယာပာဒာဒီနံ အနာဂတတ္တာ ဗ္ယာပာဒဝာရေ တဒင္ဂနိသ္သရဏံ န ဂဟိတံ။ ကိဉ္စာပိ န ဂဟိတံ, ပဋိသင္ခာနဝသေန တသ္သ ဝိနောဒေတဗ္ဗတာယ တဒင္ဂနိသ္သရဏမ္ပိ လဗ္ဘတေဝာတိ သက္ကာ ဝိညာတုံ။ အာလောကသညာ ဥပစာရပ္ပတ္တာ ဝာ အပ္ပနာပ္ပတ္တာ ဝာ။ ယော ကောစိ ကသိဏဇ္ဈာနာဒိဘေဒော သမထော။ ဓမ္မဝဝတ္ထာနံ ဥပစာရပ္ပနာပ္ပတ္တဝသေန ဂဟေတဗ္ဗံ။
‘‘Aniccato anupassanto niccasaññaṃ pajahatī’’tiādīsu (paṭi. ma. 1.52) byāpādādīnaṃ anāgatattā byāpādavāre tadaṅganissaraṇaṃ na gahitaṃ. Kiñcāpi na gahitaṃ, paṭisaṅkhānavasena tassa vinodetabbatāya tadaṅganissaraṇampi labbhatevāti sakkā viññātuṃ. Ālokasaññā upacārappattā vā appanāppattā vā. Yo koci kasiṇajjhānādibhedo samatho. Dhammavavatthānaṃ upacārappanāppattavasena gahetabbaṃ.
ကုဓိတောတိ တတ္တော။ ဥသ္သူရကဇာတောတိ တသ္သေဝ ကုဓိတဘာဝသ္သ ဥသ္သူရကံ အစ္စုဏ္ဟတံ ပတ္တော။ တေနာဟ ‘‘ဥသုမကဇာတော’’တိ။ တိလဗီဇကာဒိဘေဒေနာတိ တိလဗီဇကဏ္ဏိကကေသရာဒိဘေဒေန သေဝာလေန။ ပဏကေနာတိ ဥဒကပိစ္ဆိလ္လေန။ အပ္ပသန္နော အာကုလတာယ။ အသန္နိသိန္နော ကလလုပ္ပတ္တိယာ။ အနာလောကဋ္ဌာနေတိ အာလောကရဟိတေ ဌာနေ။
Kudhitoti tatto. Ussūrakajātoti tasseva kudhitabhāvassa ussūrakaṃ accuṇhataṃ patto. Tenāha ‘‘usumakajāto’’ti. Tilabījakādibhedenāti tilabījakaṇṇikakesarādibhedena sevālena. Paṇakenāti udakapicchillena. Appasanno ākulatāya. Asannisinno kalaluppattiyā. Anālokaṭṭhāneti ālokarahite ṭhāne.
သင္ဂာရဝသုတ္တဝဏ္ဏနာ နိဋ္ဌိတာ။
Saṅgāravasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၃. သင္ဂာရဝသုတ္တံ • 3. Saṅgāravasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၃. သင္ဂာရဝသုတ္တဝဏ္ဏနာ • 3. Saṅgāravasuttavaṇṇanā
