| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
3. සඞ්‌ගාරවසුත්‌තවණ්‌ණනා
3. Saṅgāravasuttavaṇṇanā
193. තතියෙ (සං. නි. ටී. 2.5.236) පඨමඤ්‌ඤෙවාති පුරෙතරංයෙව, අසජ්‌ඣායකතානං මන්‌තානං අප්‌පටිභානං පගෙව පඨමංයෙව සිද්‌ධං, තත්‌ථ වත්‌තබ්‌බමෙව නත්‌ථීති අධිප්‌පායො. පරියුට්‌ඨානං නාම අභිභවො ගහණන්‌ති ආහ ‘‘කාමරාගපරියුට්‌ඨිතෙනාති කාමරාගග්‌ගහිතෙනා’’ති. වික්‌ඛම්‌භෙති අපනෙතීති වික්‌ඛම්‌භනං, පටිපක්‌ඛතො නිස්‌සරති එතෙනාති නිස්‌සරණං. වික්‌ඛම්‌භනඤ්‌ච තං නිස්‌සරණඤ්‌චාති වික්‌ඛම්‌භනනිස්‌සරණං. තෙනාහ ‘‘තත්‌ථා’’තිආදි. සෙසපදද්‌වයෙපි එසෙව නයො. අත්‌තනා අරණීයො පත්‌තබ්‌බො අත්‌ථො අත්‌තත්‌ථො. තථා පරත්‌ථො වෙදිතබ්‌බො.
193. Tatiye (saṃ. ni. ṭī. 2.5.236) paṭhamaññevāti puretaraṃyeva, asajjhāyakatānaṃ mantānaṃ appaṭibhānaṃ pageva paṭhamaṃyeva siddhaṃ, tattha vattabbameva natthīti adhippāyo. Pariyuṭṭhānaṃ nāma abhibhavo gahaṇanti āha ‘‘kāmarāgapariyuṭṭhitenāti kāmarāgaggahitenā’’ti. Vikkhambheti apanetīti vikkhambhanaṃ, paṭipakkhato nissarati etenāti nissaraṇaṃ. Vikkhambhanañca taṃ nissaraṇañcāti vikkhambhananissaraṇaṃ. Tenāha ‘‘tatthā’’tiādi. Sesapadadvayepi eseva nayo. Attanā araṇīyo pattabbo attho attattho. Tathā parattho veditabbo.
‘‘අනිච්‌චතො අනුපස්‌සන්‌තො නිච්‌චසඤ්‌ඤං පජහතී’’තිආදීසු (පටි. ම. 1.52) බ්‍යාපාදාදීනං අනාගතත්‌තා බ්‍යාපාදවාරෙ තදඞ්‌ගනිස්‌සරණං න ගහිතං. කිඤ්‌චාපි න ගහිතං, පටිසඞ්‌ඛානවසෙන තස්‌ස විනොදෙතබ්‌බතාය තදඞ්‌ගනිස්‌සරණම්‌පි ලබ්‌භතෙවාති සක්‌කා විඤ්‌ඤාතුං. ආලොකසඤ්‌ඤා උපචාරප්‌පත්‌තා වා අප්‌පනාප්‌පත්‌තා වා. යො කොචි කසිණජ්‌ඣානාදිභෙදො සමථො. ධම්‌මවවත්‌ථානං උපචාරප්‌පනාප්‌පත්‌තවසෙන ගහෙතබ්‌බං.
‘‘Aniccato anupassanto niccasaññaṃ pajahatī’’tiādīsu (paṭi. ma. 1.52) byāpādādīnaṃ anāgatattā byāpādavāre tadaṅganissaraṇaṃ na gahitaṃ. Kiñcāpi na gahitaṃ, paṭisaṅkhānavasena tassa vinodetabbatāya tadaṅganissaraṇampi labbhatevāti sakkā viññātuṃ. Ālokasaññā upacārappattā vā appanāppattā vā. Yo koci kasiṇajjhānādibhedo samatho. Dhammavavatthānaṃ upacārappanāppattavasena gahetabbaṃ.
කුධිතොති තත්‌තො. උස්‌සූරකජාතොති තස්‌සෙව කුධිතභාවස්‌ස උස්‌සූරකං අච්‌චුණ්‌හතං පත්‌තො. තෙනාහ ‘‘උසුමකජාතො’’ති. තිලබීජකාදිභෙදෙනාති තිලබීජකණ්‌ණිකකෙසරාදිභෙදෙන සෙවාලෙන. පණකෙනාති උදකපිච්‌ඡිල්‌ලෙන. අප්‌පසන්‌නො ආකුලතාය. අසන්‌නිසින්‌නො කලලුප්‌පත්‌තියා. අනාලොකට්‌ඨානෙති ආලොකරහිතෙ ඨානෙ.
Kudhitoti tatto. Ussūrakajātoti tasseva kudhitabhāvassa ussūrakaṃ accuṇhataṃ patto. Tenāha ‘‘usumakajāto’’ti. Tilabījakādibhedenāti tilabījakaṇṇikakesarādibhedena sevālena. Paṇakenāti udakapicchillena. Appasanno ākulatāya. Asannisinno kalaluppattiyā. Anālokaṭṭhāneti ālokarahite ṭhāne.
සඞ්‌ගාරවසුත්‌තවණ්‌ණනා නිට්‌ඨිතා.
Saṅgāravasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 3. සඞ්‌ගාරවසුත්‌තං • 3. Saṅgāravasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 3. සඞ්‌ගාරවසුත්‌තවණ්‌ණනා • 3. Saṅgāravasuttavaṇṇanā
