| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
5. සඞ්‌ගාරවසුත්‌තවණ්‌ණනා
5. Saṅgāravasuttavaṇṇanā
236. පඨමඤ්‌ඤෙවාති පුරෙතරංයෙව. අසජ්‌ඣායකතානං මන්‌තානං අප්‌පටිභානං පගෙව පඨමංයෙව සිද්‌ධං, තත්‌ථ වත්‌තබ්‌බමෙව නත්‌ථීති අධිප්‌පායො. පරියුට්‌ඨානං නාම අභිභවො ගහණන්‌ති ආහ – ‘‘කාමරාගපරියුට්‌ඨිතෙනාති කාමරාගගහිතෙනා’’ති. වික්‌ඛම්‌භෙති අපනෙතීති වික්‌ඛම්‌භනං, පටිපක්‌ඛතො නිස්‌සරති එතෙනාති නිස්‌සරණං, වික්‌ඛම්‌භනඤ්‌ච තං නිස්‌සරණඤ්‌චාති වික්‌ඛම්‌භනනිස්‌සරණං. තෙනාහ – ‘‘තත්‌ථා’’තිආදි. සෙසපදද්‌වයෙපි එසෙව නයො. අත්‌තනා අරණියො පත්‌තබ්‌බො අත්‌තත්‌ථො, තථා පරත්‌ථො වෙදිතබ්‌බො.
236.Paṭhamaññevāti puretaraṃyeva. Asajjhāyakatānaṃ mantānaṃ appaṭibhānaṃ pageva paṭhamaṃyeva siddhaṃ, tattha vattabbameva natthīti adhippāyo. Pariyuṭṭhānaṃ nāma abhibhavo gahaṇanti āha – ‘‘kāmarāgapariyuṭṭhitenāti kāmarāgagahitenā’’ti. Vikkhambheti apanetīti vikkhambhanaṃ, paṭipakkhato nissarati etenāti nissaraṇaṃ, vikkhambhanañca taṃ nissaraṇañcāti vikkhambhananissaraṇaṃ. Tenāha – ‘‘tatthā’’tiādi. Sesapadadvayepi eseva nayo. Attanā araṇiyo pattabbo attattho, tathā parattho veditabbo.
‘‘අනිච්‌චතො අනුපස්‌සන්‌තො නිච්‌චසඤ්‌ඤං පජහතී’’තිආදීසු බ්‍යාපාදාදීනං අනාගතත්‌තා අබ්‍යාපාදවාරෙ තදඞ්‌ගනිස්‌සරණං න ගහිතං. කිඤ්‌චාපි න ගහිතං, පටිසඞ්‌ඛානවසෙන පන තස්‌ස විනොදෙතබ්‌බතාය තදඞ්‌ගනිස්‌සරණම්‌පි ලබ්‌භතෙවාති සක්‌කා විඤ්‌ඤාතුං. ආලොකසඤ්‌ඤා උපචාරප්‌පත්‌තා, අප්‌පනාප්‌පත්‌තා වා, යො කොචි කසිණජ්‌ඣානාදිභෙදො සමථො. ධම්‌මවවත්‌ථානං උපචාරප්‌පනාප්‌පත්‌තවසෙන ගහෙතබ්‌බං.
‘‘Aniccato anupassanto niccasaññaṃ pajahatī’’tiādīsu byāpādādīnaṃ anāgatattā abyāpādavāre tadaṅganissaraṇaṃ na gahitaṃ. Kiñcāpi na gahitaṃ, paṭisaṅkhānavasena pana tassa vinodetabbatāya tadaṅganissaraṇampi labbhatevāti sakkā viññātuṃ. Ālokasaññā upacārappattā, appanāppattā vā, yo koci kasiṇajjhānādibhedo samatho. Dhammavavatthānaṃ upacārappanāppattavasena gahetabbaṃ.
කුථිතොති තත්‌තො. උස්‌මුදකජාතොති තස්‌සෙව කුථිතභාවස්‌ස උස්‌මුදකතං අච්‌චුණ්‌හතං පත්‌තො. තෙනාහ ‘‘උසුමජාතො’’ති. තිලබීජකාදිභෙදෙනාති තිලබීජකකණ්‌ණිකකෙසරාදිභෙදෙන. සෙවාලෙන…පෙ.… පණකෙනාති උදකපිච්‌ඡිලෙන. අප්‌පසන්‌නො ආකුලතාය. අසන්‌නිසින්‌නො කලලුප්‌පත්‌තියා. අනාලොකට්‌ඨානෙති ආලොකරහිතෙ ඨානෙ.
Kuthitoti tatto. Usmudakajātoti tasseva kuthitabhāvassa usmudakataṃ accuṇhataṃ patto. Tenāha ‘‘usumajāto’’ti. Tilabījakādibhedenāti tilabījakakaṇṇikakesarādibhedena. Sevālena…pe… paṇakenāti udakapicchilena. Appasanno ākulatāya. Asannisinno kalaluppattiyā. Anālokaṭṭhāneti ālokarahite ṭhāne.
සඞ්‌ගාරවසුත්‌තවණ්‌ණනා නිට්‌ඨිතා.
Saṅgāravasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 5. සඞ්‌ගාරවසුත්‌තං • 5. Saṅgāravasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 5. සඞ්‌ගාරවසුත්‌තවණ්‌ණනා • 5. Saṅgāravasuttavaṇṇanā
