| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੫. ਸਙ੍ਗਾਰવਸੁਤ੍ਤવਣ੍ਣਨਾ
5. Saṅgāravasuttavaṇṇanā
੨੩੬. ਪਞ੍ਚਮੇ ਪਗੇવਾਤਿ ਪਠਮਞ੍ਞੇવ। ਕਾਮਰਾਗਪਰਿਯੁਟ੍ਠਿਤੇਨਾਤਿ ਕਾਮਰਾਗਗਹਿਤੇਨ। ਕਾਮਰਾਗਪਰੇਤੇਨਾਤਿ ਕਾਮਰਾਗਾਨੁਗਤੇਨ। ਨਿਸ੍ਸਰਣਨ੍ਤਿ ਤਿવਿਧਂ ਕਾਮਰਾਗਸ੍ਸ ਨਿਸ੍ਸਰਣਂ વਿਕ੍ਖਮ੍ਭਨਨਿਸ੍ਸਰਣਂ ਤਦਙ੍ਗਨਿਸ੍ਸਰਣਂ ਸਮੁਚ੍ਛੇਦਨਿਸ੍ਸਰਣਨ੍ਤਿ । ਤਤ੍ਥ ਅਸੁਭੇ ਪਠਮਜ੍ਝਾਨਂ વਿਕ੍ਖਮ੍ਭਨਨਿਸ੍ਸਰਣਂ ਨਾਮ, વਿਪਸ੍ਸਨਾ ਤਦਙ੍ਗਨਿਸ੍ਸਰਣਂ ਨਾਮ, ਅਰਹਤ੍ਤਮਗ੍ਗੋ ਸਮੁਚ੍ਛੇਦਨਿਸ੍ਸਰਣਂ ਨਾਮ। ਤਂ ਤਿવਿਧਮ੍ਪਿ ਨਪ੍ਪਜਾਨਾਤੀਤਿ ਅਤ੍ਥੋ। ਅਤ੍ਤਤ੍ਥਮ੍ਪੀਤਿਆਦੀਸੁ ਅਰਹਤ੍ਤਸਙ੍ਖਾਤੋ ਅਤ੍ਤਨੋ ਅਤ੍ਥੋ ਅਤ੍ਤਤ੍ਥੋ ਨਾਮ, ਪਚ੍ਚਯਦਾਯਕਾਨਂ ਅਤ੍ਥੋ ਪਰਤ੍ਥੋ ਨਾਮ, ਸ੍વੇવ ਦੁવਿਧੋਪਿ ਉਭਯਤ੍ਥੋ ਨਾਮ। ਇਮਿਨਾ ਨਯੇਨ ਸਬ੍ਬવਾਰੇਸੁ ਅਤ੍ਥੋ વੇਦਿਤਬ੍ਬੋ।
236. Pañcame pagevāti paṭhamaññeva. Kāmarāgapariyuṭṭhitenāti kāmarāgagahitena. Kāmarāgaparetenāti kāmarāgānugatena. Nissaraṇanti tividhaṃ kāmarāgassa nissaraṇaṃ vikkhambhananissaraṇaṃ tadaṅganissaraṇaṃ samucchedanissaraṇanti . Tattha asubhe paṭhamajjhānaṃ vikkhambhananissaraṇaṃ nāma, vipassanā tadaṅganissaraṇaṃ nāma, arahattamaggo samucchedanissaraṇaṃ nāma. Taṃ tividhampi nappajānātīti attho. Attatthampītiādīsu arahattasaṅkhāto attano attho attattho nāma, paccayadāyakānaṃ attho parattho nāma, sveva duvidhopi ubhayattho nāma. Iminā nayena sabbavāresu attho veditabbo.
ਅਯਂ ਪਨ વਿਸੇਸੋ – ਬ੍ਯਾਪਾਦਸ੍ਸ ਨਿਸ੍ਸਰਣਨ੍ਤਿਆਦੀਸੁ ਹਿ ਦ੍વੇવ ਨਿਸ੍ਸਰਣਾਨਿ વਿਕ੍ਖਮ੍ਭਨਨਿਸ੍ਸਰਣਞ੍ਚ ਸਮੁਚ੍ਛੇਦਨਿਸ੍ਸਰਣਞ੍ਚ। ਤਤ੍ਥ ਬ੍ਯਾਪਾਦਸ੍ਸ ਤਾવ ਮੇਤ੍ਤਾਯ ਪਠਮਜ੍ਝਾਨਂ વਿਕ੍ਖਮ੍ਭਨਨਿਸ੍ਸਰਣਂ, ਅਨਾਗਾਮਿਮਗ੍ਗੋ ਸਮੁਚ੍ਛੇਦਨਿਸ੍ਸਰਣਂ। ਥਿਨਮਿਦ੍ਧਸ੍ਸ ਆਲੋਕਸਞ੍ਞਾ વਿਕ੍ਖਮ੍ਭਨਨਿਸ੍ਸਰਣਂ, ਅਰਹਤ੍ਤਮਗ੍ਗੋ ਸਮੁਚ੍ਛੇਦਨਿਸ੍ਸਰਣਂ। ਉਦ੍ਧਚ੍ਚਕੁਕ੍ਕੁਚ੍ਚਸ੍ਸ ਯੋ ਕੋਚਿ ਸਮਥੋ વਿਕ੍ਖਮ੍ਭਨਨਿਸ੍ਸਰਣਂ, ਉਦ੍ਧਚ੍ਚਸ੍ਸ ਪਨੇਤ੍ਥ ਅਰਹਤ੍ਤਮਗ੍ਗੋ, ਕੁਕ੍ਕੁਚ੍ਚਸ੍ਸ ਅਨਾਗਾਮਿਮਗ੍ਗੋ ਸਮੁਚ੍ਛੇਦਨਿਸ੍ਸਰਣਂ। વਿਚਿਕਿਚ੍ਛਾਯ ਧਮ੍ਮવવਤ੍ਥਾਨਂ વਿਕ੍ਖਮ੍ਭਨਨਿਸ੍ਸਰਣਂ, ਪਠਮਮਗ੍ਗੋ ਸਮੁਚ੍ਛੇਦਨਿਸ੍ਸਰਣਂ।
Ayaṃ pana viseso – byāpādassa nissaraṇantiādīsu hi dveva nissaraṇāni vikkhambhananissaraṇañca samucchedanissaraṇañca. Tattha byāpādassa tāva mettāya paṭhamajjhānaṃ vikkhambhananissaraṇaṃ, anāgāmimaggo samucchedanissaraṇaṃ. Thinamiddhassa ālokasaññā vikkhambhananissaraṇaṃ, arahattamaggo samucchedanissaraṇaṃ. Uddhaccakukkuccassa yo koci samatho vikkhambhananissaraṇaṃ, uddhaccassa panettha arahattamaggo, kukkuccassa anāgāmimaggo samucchedanissaraṇaṃ. Vicikicchāya dhammavavatthānaṃ vikkhambhananissaraṇaṃ, paṭhamamaggo samucchedanissaraṇaṃ.
ਯਾ ਪਨੇਤ੍ਥ ਸੇਯ੍ਯਥਾਪਿ ਬ੍ਰਾਹ੍ਮਣ ਉਦਪਤ੍ਤੋ ਸਂਸਟ੍ਠੋ ਲਾਖਾਯ વਾਤਿਆਦਿਕਾ ਉਪਮਾ વੁਤ੍ਤਾ, ਤਾਸੁ ਉਦਪਤ੍ਤੋਤਿ ਉਦਕਭਰਿਤਾ ਪਾਤਿ। ਸਂਸਟ੍ਠੋਤਿ વਣ੍ਣਭੇਦਕਰਣવਸੇਨ ਸਂਸਟ੍ਠੋ। ਪਕ੍ਕੁਥਿਤੋਤਿ ਕੁਥਿਤੋ। ਉਸ੍ਮੁਦਕਜਾਤੋਤਿ ਉਸੁਮਜਾਤੋ। ਸੇવਾਲਪਣਕਪਰਿਯੋਨਦ੍ਧੋਤਿ ਤਿਲਬੀਜਕਾਦਿਭੇਦੇਨ ਸੇવਾਲੇਨ વਾ ਨੀਲਮਣ੍ਡੂਕਪਿਟ੍ਠਿવਣ੍ਣੇਨ વਾ ਉਦਕਪਿਟ੍ਠਿਂ ਛਾਦੇਤ੍વਾ ਨਿਬ੍ਬਤ੍ਤਪਣਕੇਨ ਪਰਿਯੋਨਦ੍ਧੋ। વਾਤੇਰਿਤੋਤਿ વਾਤੇਨ ਏਰਿਤੋ ਕਮ੍ਪਿਤੋ। ਆવਿਲੋਤਿ ਅਪ੍ਪਸਨ੍ਨੋ। ਲੁਲ਼ਿਤੋਤਿ ਅਸਨ੍ਨਿਸਿਨ੍ਨੋ। ਕਲਲੀਭੂਤੋਤਿ ਕਦ੍ਦਮੀਭੂਤੋ। ਅਨ੍ਧਕਾਰੇ ਨਿਕ੍ਖਿਤ੍ਤੋਤਿ ਕੋਟ੍ਠਨ੍ਤਰਾਦਿਭੇਦੇ ਅਨਾਲੋਕਟ੍ਠਾਨੇ ਠਪਿਤੋ। ਇਮਸ੍ਮਿਂ ਸੁਤ੍ਤੇ ਭਗવਾ ਤੀਹਿ ਭવੇਹਿ ਦੇਸਨਂ ਨਿવਤ੍ਤੇਤ੍વਾ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਾਪੇਸਿ, ਬ੍ਰਾਹ੍ਮਣੋ ਪਨ ਸਰਣਮਤ੍ਤੇ ਪਤਿਟ੍ਠਿਤੋ।
Yā panettha seyyathāpi brāhmaṇa udapatto saṃsaṭṭho lākhāya vātiādikā upamā vuttā, tāsu udapattoti udakabharitā pāti. Saṃsaṭṭhoti vaṇṇabhedakaraṇavasena saṃsaṭṭho. Pakkuthitoti kuthito. Usmudakajātoti usumajāto. Sevālapaṇakapariyonaddhoti tilabījakādibhedena sevālena vā nīlamaṇḍūkapiṭṭhivaṇṇena vā udakapiṭṭhiṃ chādetvā nibbattapaṇakena pariyonaddho. Vāteritoti vātena erito kampito. Āviloti appasanno. Luḷitoti asannisinno. Kalalībhūtoti kaddamībhūto. Andhakāre nikkhittoti koṭṭhantarādibhede anālokaṭṭhāne ṭhapito. Imasmiṃ sutte bhagavā tīhi bhavehi desanaṃ nivattetvā arahattanikūṭena desanaṃ niṭṭhāpesi, brāhmaṇo pana saraṇamatte patiṭṭhito.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੫. ਸਙ੍ਗਾਰવਸੁਤ੍ਤਂ • 5. Saṅgāravasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੫. ਸਙ੍ਗਾਰવਸੁਤ੍ਤવਣ੍ਣਨਾ • 5. Saṅgāravasuttavaṇṇanā
