ஸங்க⁴ப⁴த்தாதி³அனுஜானநகதா²

325. ந ஸக்கொந்தி ஸங்க⁴ப⁴த்தங் காதுந்தி ஸகலஸ்ஸ ஸங்க⁴ஸ்ஸ ப⁴த்தங் காதுங் ந ஸக்கொந்தி. உத்³தே³ஸப⁴த்தந்திஆதீ³ஸு ‘‘ஏகங் வா த்³வே வா…பே॰… த³ஸ வா பி⁴க்கூ² ஸங்க⁴தோ உத்³தி³ஸித்வா தே³தா²’’தி ஏவங் உத்³தே³ஸேன லத்³த⁴பி⁴க்கூ²னங் ப⁴த்தங் காதுங் இச்ச²ந்தி. அபரே ததே²வ பி⁴க்கூ² பரிச்சி²ந்தி³த்வா நிமந்தெத்வா தேஸங் ப⁴த்தங் காதுங் இச்ச²ந்தி. அபரே ஸலாகாயோ சி²ந்தி³த்வா, அபரே பக்கி²கங் உபோஸதி²கங் பாடிபதி³கந்தி ஏவங் நியாமெத்வா, ஏகஸ்ஸ வா த்³வின்னங் வா…பே॰… த³ஸன்னங் வா பி⁴க்கூ²னங் ப⁴த்தங் காதுங் இச்ச²ந்தி. இதி ஏதானி ப⁴த்தானி உத்³தே³ஸப⁴த்தங் நிமந்தனந்தி இமங் வோஹாரங் பத்தானி. யஸ்மா பன தே ஸசேபி து³ப்³பி⁴க்கே² ந ஸக்கொந்தி, ஸுபி⁴க்கே² ஜாதே பன புன ஸங்க⁴ப⁴த்தங் காதுங் ஸக்கி²ஸ்ஸந்தி, தஸ்மா ப⁴க³வா தம்பி அந்தோ கத்வா ‘‘அனுஜானாமி, பி⁴க்க²வே, ஸங்க⁴ப⁴த்தங் உத்³தே³ஸப⁴த்த’’ந்திஆதி³மாஹ.

தத்த² ஸங்க⁴ப⁴த்தே டி²திகா நாம நத்தி², தஸ்மா ‘‘அம்ஹாகங் அஜ்ஜ த³ஸ த்³வாத³ஸ தி³வஸா பு⁴ஞ்ஜந்தானங் இதா³னி அஞ்ஞதோ பி⁴க்கூ² ஆனேதா²’’தி ந ஏவங் தத்த² வத்தப்³ப³ங். ‘‘புரிமதி³வஸேஸு அம்ஹேஹி ந லத்³த⁴ங், இதா³னி தங் அம்ஹாகங் கா³ஹேதா²’’தி ஏவம்பி வத்துங் ந லப்³ப⁴தி. தஞ்ஹி ஆக³தாக³தானங் பாபுணாதியேவ.

ஸங்க⁴ப⁴த்தாதி³அனுஜானநகதா² நிட்டி²தா.