| Library / Tipiṭaka / तिपिटक • Tipiṭaka / चूळवग्ग-अट्ठकथा • Cūḷavagga-aṭṭhakathā |
सङ्घभत्तादिअनुजाननकथा
Saṅghabhattādianujānanakathā
३२५. न सक्कोन्ति सङ्घभत्तं कातुन्ति सकलस्स सङ्घस्स भत्तं कातुं न सक्कोन्ति। उद्देसभत्तन्तिआदीसु ‘‘एकं वा द्वे वा…पे॰… दस वा भिक्खू सङ्घतो उद्दिसित्वा देथा’’ति एवं उद्देसेन लद्धभिक्खूनं भत्तं कातुं इच्छन्ति। अपरे तथेव भिक्खू परिच्छिन्दित्वा निमन्तेत्वा तेसं भत्तं कातुं इच्छन्ति। अपरे सलाकायो छिन्दित्वा, अपरे पक्खिकं उपोसथिकं पाटिपदिकन्ति एवं नियामेत्वा, एकस्स वा द्विन्नं वा…पे॰… दसन्नं वा भिक्खूनं भत्तं कातुं इच्छन्ति। इति एतानि भत्तानि उद्देसभत्तं निमन्तनन्ति इमं वोहारं पत्तानि। यस्मा पन ते सचेपि दुब्भिक्खे न सक्कोन्ति, सुभिक्खे जाते पन पुन सङ्घभत्तं कातुं सक्खिस्सन्ति, तस्मा भगवा तम्पि अन्तो कत्वा ‘‘अनुजानामि, भिक्खवे, सङ्घभत्तं उद्देसभत्त’’न्तिआदिमाह।
325.Nasakkonti saṅghabhattaṃ kātunti sakalassa saṅghassa bhattaṃ kātuṃ na sakkonti. Uddesabhattantiādīsu ‘‘ekaṃ vā dve vā…pe… dasa vā bhikkhū saṅghato uddisitvā dethā’’ti evaṃ uddesena laddhabhikkhūnaṃ bhattaṃ kātuṃ icchanti. Apare tatheva bhikkhū paricchinditvā nimantetvā tesaṃ bhattaṃ kātuṃ icchanti. Apare salākāyo chinditvā, apare pakkhikaṃ uposathikaṃ pāṭipadikanti evaṃ niyāmetvā, ekassa vā dvinnaṃ vā…pe… dasannaṃ vā bhikkhūnaṃ bhattaṃ kātuṃ icchanti. Iti etāni bhattāni uddesabhattaṃ nimantananti imaṃ vohāraṃ pattāni. Yasmā pana te sacepi dubbhikkhe na sakkonti, subhikkhe jāte pana puna saṅghabhattaṃ kātuṃ sakkhissanti, tasmā bhagavā tampi anto katvā ‘‘anujānāmi, bhikkhave, saṅghabhattaṃ uddesabhatta’’ntiādimāha.
तत्थ सङ्घभत्ते ठितिका नाम नत्थि, तस्मा ‘‘अम्हाकं अज्ज दस द्वादस दिवसा भुञ्जन्तानं इदानि अञ्ञतो भिक्खू आनेथा’’ति न एवं तत्थ वत्तब्बं। ‘‘पुरिमदिवसेसु अम्हेहि न लद्धं, इदानि तं अम्हाकं गाहेथा’’ति एवम्पि वत्तुं न लब्भति। तञ्हि आगतागतानं पापुणातियेव।
Tattha saṅghabhatte ṭhitikā nāma natthi, tasmā ‘‘amhākaṃ ajja dasa dvādasa divasā bhuñjantānaṃ idāni aññato bhikkhū ānethā’’ti na evaṃ tattha vattabbaṃ. ‘‘Purimadivasesu amhehi na laddhaṃ, idāni taṃ amhākaṃ gāhethā’’ti evampi vattuṃ na labbhati. Tañhi āgatāgatānaṃ pāpuṇātiyeva.
सङ्घभत्तादिअनुजाननकथा निट्ठिता।
Saṅghabhattādianujānanakathā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / चूळवग्गपाळि • Cūḷavaggapāḷi / सङ्घभत्तादिअनुजाननं • Saṅghabhattādianujānanaṃ
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / सङ्घभत्तादिअनुजाननकथावण्णना • Saṅghabhattādianujānanakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / उद्देसभत्तकथावण्णना • Uddesabhattakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / सङ्घभत्तादिअनुजाननकथावण्णना • Saṅghabhattādianujānanakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / सङ्घभत्तादिअनुजाननकथा • Saṅghabhattādianujānanakathā
