| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
ಸಙ್ಘಭತ್ತಾದಿಅನುಜಾನನಕಥಾ
Saṅghabhattādianujānanakathā
೩೨೫. ‘‘ಸಙ್ಘಸ್ಸ ಭತ್ತ’’ನ್ತಿ ಇಮಿನಾ ಸಙ್ಘಭತ್ತನ್ತಿ ಪದಸ್ಸ ಛಟ್ಠೀಸಮಾಸಂ ದಸ್ಸೇತಿ। ಸಙ್ಘಸ್ಸ ಅತ್ಥಾಯ ಆಭತಂ ಭತ್ತಂ ಕಾತುಂ ನ ಸಕ್ಕೋನ್ತೀತಿ ಯೋಜನಾ। ಉದ್ದೇಸಭತ್ತನ್ತಿಆದೀಸು ಏವಮತ್ಥೋ ವೇದಿತಬ್ಬೋತಿ ಯೋಜನಾ। ‘‘ಉದ್ದೇಸೇನ ಲದ್ಧಭಿಕ್ಖೂನಂ ಭತ್ತಂ ಕಾತು’’ನ್ತಿ ಇಮಿನಾ ಉದ್ದೇಸೇನ ಲದ್ಧಭಿಕ್ಖೂನಂ ಕಾತಬ್ಬಂ ಭತ್ತಂ ಉದ್ದೇಸಭತ್ತನ್ತಿ ವಚನತ್ಥಂ ದಸ್ಸೇತಿ। ತಥೇವಾತಿ ಯಥಾ ಸಙ್ಘತೋ ಉದ್ದಿಸಿತ್ವಾ ಲದ್ಧಭಿಕ್ಖೂ, ತಥೇವ। ಪರಿಚ್ಛಿನ್ದಿತ್ವಾತಿ ‘‘ಏಕಂ ವಾ’’ತಿಆದಿನಾ ಪರಿಚ್ಛಿನ್ದಿತ್ವಾ। ತೇಸನ್ತಿ ಲದ್ಧಭಿಕ್ಖೂನಂ। ಇಮಿನಾ ನಿಮನ್ತೇತ್ವಾ ಲದ್ಧಭಿಕ್ಖೂನಂ ಕಾತಬ್ಬಂ ಭತ್ತಂ ನಿಮನ್ತನಭತ್ತನ್ತಿ ವಚನತ್ಥಂ ದಸ್ಸೇತಿ। ‘‘ಸಲಾಕಾಯೋ ಛಿನ್ದಿತ್ವಾ’’ತಿ ಇಮಿನಾ ಸಲಾಕಾಯೋ ಛಿನ್ದಿತ್ವಾ ಕಾತಬ್ಬಂ ಭತ್ತಂ ಸಲಾಕಭತ್ತನ್ತಿ ವಚನತ್ಥಂ ದಸ್ಸೇತಿ। ಪಕ್ಖಿಕನ್ತಿ ಉಪೋಸಥಿಕನ್ತಿ ಪಾಟಿಪದಿಕನ್ತಿ ಏವಂ ನಿಯಾಮೇತ್ವಾತಿ ಯೋಜನಾ। ಪಞ್ಚಮೀಆದೀಸು ಪಕ್ಖೇಸು ಕಾತಬ್ಬಂ ಪಕ್ಖಿಕಂ। ಉಪೋಸಥೇ ಕಾತಬ್ಬಂ ಉಪೋಸಥಿಕಂ। ಪಾಟಿಪದೇ ಕಾತಬ್ಬಂ ಪಾಟಿಪದಿಕಂ, ತಮೇವ ಭತ್ತಂ ಪಾಟಿಪದಿಕಭತ್ತಂ। ಉದ್ದೇಸಭತ್ತಂ ನಿಮನ್ತನನ್ತಿ ಏತ್ಥ ಇತಿಸದ್ದೋ ಆದ್ಯತ್ಥೋ, ಉದ್ದೇಸಭತ್ತಂ ನಿಮನ್ತನನ್ತಿಆದಿಂ ಇಮಂ ವೋಹಾರಂ ಪತ್ತಾನೀತಿ ಹಿ ಅತ್ಥೋ। ಉದ್ದೇಸಭತ್ತಾದೀನಿಯೇವ ಅನುಜಾನನಮಕತ್ವಾ ಕಸ್ಮಾ ಸಙ್ಘಭತ್ತಮ್ಪಿ ಅನುಜಾನಾತೀತಿ ಆಹ ‘‘ಯಸ್ಮಾ ಪನಾ’’ತಿಆದಿ। ತತ್ಥ ಯಸ್ಮಾ ಸಕ್ಖಿಸ್ಸನ್ತೀತಿ ಸಮ್ಬನ್ಧೋ। ತೇತಿ ಮನುಸ್ಸಾ। ತಮ್ಪೀತಿ ಸಙ್ಘಭತ್ತಮ್ಪಿ। ಪಿಸದ್ದೇನ ಉದ್ದೇಸಭತ್ತಾದೀನಿ ಅಪೇಕ್ಖತಿ।
325. ‘‘Saṅghassa bhatta’’nti iminā saṅghabhattanti padassa chaṭṭhīsamāsaṃ dasseti. Saṅghassa atthāya ābhataṃ bhattaṃ kātuṃ na sakkontīti yojanā. Uddesabhattantiādīsu evamattho veditabboti yojanā. ‘‘Uddesena laddhabhikkhūnaṃ bhattaṃ kātu’’nti iminā uddesena laddhabhikkhūnaṃ kātabbaṃ bhattaṃ uddesabhattanti vacanatthaṃ dasseti. Tathevāti yathā saṅghato uddisitvā laddhabhikkhū, tatheva. Paricchinditvāti ‘‘ekaṃ vā’’tiādinā paricchinditvā. Tesanti laddhabhikkhūnaṃ. Iminā nimantetvā laddhabhikkhūnaṃ kātabbaṃ bhattaṃ nimantanabhattanti vacanatthaṃ dasseti. ‘‘Salākāyo chinditvā’’ti iminā salākāyo chinditvā kātabbaṃ bhattaṃ salākabhattanti vacanatthaṃ dasseti. Pakkhikanti uposathikanti pāṭipadikanti evaṃ niyāmetvāti yojanā. Pañcamīādīsu pakkhesu kātabbaṃ pakkhikaṃ. Uposathe kātabbaṃ uposathikaṃ. Pāṭipade kātabbaṃ pāṭipadikaṃ, tameva bhattaṃ pāṭipadikabhattaṃ. Uddesabhattaṃ nimantananti ettha itisaddo ādyattho, uddesabhattaṃ nimantanantiādiṃ imaṃ vohāraṃ pattānīti hi attho. Uddesabhattādīniyeva anujānanamakatvā kasmā saṅghabhattampi anujānātīti āha ‘‘yasmā panā’’tiādi. Tattha yasmā sakkhissantīti sambandho. Teti manussā. Tampīti saṅghabhattampi. Pisaddena uddesabhattādīni apekkhati.
ಸಙ್ಘಭತ್ತಾದೀನಂ ವಿತ್ಥಾರಂ ದಸ್ಸೇನ್ತೋ ಆಹ ‘‘ತತ್ಥಾ’’ತಿಆದಿ। ತತ್ಥ ತತ್ಥಾತಿ ‘‘ಸಙ್ಘಭತ್ತಂ ಉದ್ದೇಸಭತ್ತ’’ನ್ತಿಆದಿಪಾಠೇ, ಏವಂ ವಿನಿಚ್ಛಯೋ ವೇದಿತಬ್ಬೋತಿ ಯೋಜನಾ, ಸಙ್ಘಭತ್ತಾದೀಸು ವಾ ನಿದ್ಧಾರಣೇ ಭುಮ್ಮಂ, ಭುಞ್ಜನ್ತಾನಂ ಅಮ್ಹಾಕಂ ಅಜ್ಜ ದಸ ದ್ವಾದಸ ದಿವಸಾ ಅಹೇಸುನ್ತಿ ಯೋಜನಾ। ಅಞ್ಞತೋತಿ ಅಞ್ಞಸ್ಮಾ ಠಾನಾ। ತತ್ಥಾತಿ ಸಙ್ಘಭತ್ತೇ। ವತ್ತಬ್ಬಾತಿ ಮನುಸ್ಸಾ ವತ್ತಬ್ಬಾ। ತನ್ತಿ ಸಙ್ಘಭತ್ತಂ, ಧಾತುಕಮ್ಮಂ, ‘‘ಅಮ್ಹಾಕ’’ನ್ತಿ ಕಾರಿತಕಮ್ಮಂ। ತನ್ತಿ ಸಙ್ಘಭತ್ತಂ।
Saṅghabhattādīnaṃ vitthāraṃ dassento āha ‘‘tatthā’’tiādi. Tattha tatthāti ‘‘saṅghabhattaṃ uddesabhatta’’ntiādipāṭhe, evaṃ vinicchayo veditabboti yojanā, saṅghabhattādīsu vā niddhāraṇe bhummaṃ, bhuñjantānaṃ amhākaṃ ajja dasa dvādasa divasā ahesunti yojanā. Aññatoti aññasmā ṭhānā. Tatthāti saṅghabhatte. Vattabbāti manussā vattabbā. Tanti saṅghabhattaṃ, dhātukammaṃ, ‘‘amhāka’’nti kāritakammaṃ. Tanti saṅghabhattaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಚೂಳವಗ್ಗಪಾಳಿ • Cūḷavaggapāḷi / ಸಙ್ಘಭತ್ತಾದಿಅನುಜಾನನಂ • Saṅghabhattādianujānanaṃ
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಚೂಳವಗ್ಗ-ಅಟ್ಠಕಥಾ • Cūḷavagga-aṭṭhakathā / ಸಙ್ಘಭತ್ತಾದಿಅನುಜಾನನಕಥಾ • Saṅghabhattādianujānanakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಸಙ್ಘಭತ್ತಾದಿಅನುಜಾನನಕಥಾವಣ್ಣನಾ • Saṅghabhattādianujānanakathāvaṇṇanā
