| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
සඞ්‌ඝභත්‌තාදිඅනුජානනකථා
Saṅghabhattādianujānanakathā
325. ‘‘සඞ්‌ඝස්‌ස භත්‌ත’’න්‌ති ඉමිනා සඞ්‌ඝභත්‌තන්‌ති පදස්‌ස ඡට්‌ඨීසමාසං දස්‌සෙති. සඞ්‌ඝස්‌ස අත්‌ථාය ආභතං භත්‌තං කාතුං න සක්‌කොන්‌තීති යොජනා. උද්‌දෙසභත්‌තන්‌තිආදීසු එවමත්‌ථො වෙදිතබ්‌බොති යොජනා. ‘‘උද්‌දෙසෙන ලද්‌ධභික්‌ඛූනං භත්‌තං කාතු’’න්‌ති ඉමිනා උද්‌දෙසෙන ලද්‌ධභික්‌ඛූනං කාතබ්‌බං භත්‌තං උද්‌දෙසභත්‌තන්‌ති වචනත්‌ථං දස්‌සෙති. තථෙවාති යථා සඞ්‌ඝතො උද්‌දිසිත්‌වා ලද්‌ධභික්‌ඛූ, තථෙව. පරිච්‌ඡින්‌දිත්‌වාති ‘‘එකං වා’’තිආදිනා පරිච්‌ඡින්‌දිත්‌වා. තෙසන්‌ති ලද්‌ධභික්‌ඛූනං. ඉමිනා නිමන්‌තෙත්‌වා ලද්‌ධභික්‌ඛූනං කාතබ්‌බං භත්‌තං නිමන්‌තනභත්‌තන්‌ති වචනත්‌ථං දස්‌සෙති. ‘‘සලාකායො ඡින්‌දිත්‌වා’’ති ඉමිනා සලාකායො ඡින්‌දිත්‌වා කාතබ්‌බං භත්‌තං සලාකභත්‌තන්‌ති වචනත්‌ථං දස්‌සෙති. පක්‌ඛිකන්‌ති උපොසථිකන්‌ති පාටිපදිකන්‌ති එවං නියාමෙත්‌වාති යොජනා. පඤ්‌චමීආදීසු පක්‌ඛෙසු කාතබ්‌බං පක්‌ඛිකං. උපොසථෙ කාතබ්‌බං උපොසථිකං. පාටිපදෙ කාතබ්‌බං පාටිපදිකං, තමෙව භත්‌තං පාටිපදිකභත්‌තං. උද්‌දෙසභත්‌තං නිමන්‌තනන්‌ති එත්‌ථ ඉතිසද්‌දො ආද්‍යත්‌ථො, උද්‌දෙසභත්‌තං නිමන්‌තනන්‌තිආදිං ඉමං වොහාරං පත්‌තානීති හි අත්‌ථො. උද්‌දෙසභත්‌තාදීනියෙව අනුජානනමකත්‌වා කස්‌මා සඞ්‌ඝභත්‌තම්‌පි අනුජානාතීති ආහ ‘‘යස්‌මා පනා’’තිආදි. තත්‌ථ යස්‌මා සක්‌ඛිස්‌සන්‌තීති සම්‌බන්‌ධො. තෙති මනුස්‌සා. තම්‌පීති සඞ්‌ඝභත්‌තම්‌පි. පිසද්‌දෙන උද්‌දෙසභත්‌තාදීනි අපෙක්‌ඛති.
325. ‘‘Saṅghassa bhatta’’nti iminā saṅghabhattanti padassa chaṭṭhīsamāsaṃ dasseti. Saṅghassa atthāya ābhataṃ bhattaṃ kātuṃ na sakkontīti yojanā. Uddesabhattantiādīsu evamattho veditabboti yojanā. ‘‘Uddesena laddhabhikkhūnaṃ bhattaṃ kātu’’nti iminā uddesena laddhabhikkhūnaṃ kātabbaṃ bhattaṃ uddesabhattanti vacanatthaṃ dasseti. Tathevāti yathā saṅghato uddisitvā laddhabhikkhū, tatheva. Paricchinditvāti ‘‘ekaṃ vā’’tiādinā paricchinditvā. Tesanti laddhabhikkhūnaṃ. Iminā nimantetvā laddhabhikkhūnaṃ kātabbaṃ bhattaṃ nimantanabhattanti vacanatthaṃ dasseti. ‘‘Salākāyo chinditvā’’ti iminā salākāyo chinditvā kātabbaṃ bhattaṃ salākabhattanti vacanatthaṃ dasseti. Pakkhikanti uposathikanti pāṭipadikanti evaṃ niyāmetvāti yojanā. Pañcamīādīsu pakkhesu kātabbaṃ pakkhikaṃ. Uposathe kātabbaṃ uposathikaṃ. Pāṭipade kātabbaṃ pāṭipadikaṃ, tameva bhattaṃ pāṭipadikabhattaṃ. Uddesabhattaṃ nimantananti ettha itisaddo ādyattho, uddesabhattaṃ nimantanantiādiṃ imaṃ vohāraṃ pattānīti hi attho. Uddesabhattādīniyeva anujānanamakatvā kasmā saṅghabhattampi anujānātīti āha ‘‘yasmā panā’’tiādi. Tattha yasmā sakkhissantīti sambandho. Teti manussā. Tampīti saṅghabhattampi. Pisaddena uddesabhattādīni apekkhati.
සඞ්‌ඝභත්‌තාදීනං විත්‌ථාරං දස්‌සෙන්‌තො ආහ ‘‘තත්‌ථා’’තිආදි. තත්‌ථ තත්‌ථාති ‘‘සඞ්‌ඝභත්‌තං උද්‌දෙසභත්‌ත’’න්‌තිආදිපාඨෙ, එවං විනිච්‌ඡයො වෙදිතබ්‌බොති යොජනා, සඞ්‌ඝභත්‌තාදීසු වා නිද්‌ධාරණෙ භුම්‌මං, භුඤ්‌ජන්‌තානං අම්‌හාකං අජ්‌ජ දස ද්‌වාදස දිවසා අහෙසුන්‌ති යොජනා. අඤ්‌ඤතොති අඤ්‌ඤස්‌මා ඨානා. තත්‌ථාති සඞ්‌ඝභත්‌තෙ. වත්‌තබ්‌බාති මනුස්‌සා වත්‌තබ්‌බා. තන්‌ති සඞ්‌ඝභත්‌තං, ධාතුකම්‌මං, ‘‘අම්‌හාක’’න්‌ති කාරිතකම්‌මං. තන්‌ති සඞ්‌ඝභත්‌තං.
Saṅghabhattādīnaṃ vitthāraṃ dassento āha ‘‘tatthā’’tiādi. Tattha tatthāti ‘‘saṅghabhattaṃ uddesabhatta’’ntiādipāṭhe, evaṃ vinicchayo veditabboti yojanā, saṅghabhattādīsu vā niddhāraṇe bhummaṃ, bhuñjantānaṃ amhākaṃ ajja dasa dvādasa divasā ahesunti yojanā. Aññatoti aññasmā ṭhānā. Tatthāti saṅghabhatte. Vattabbāti manussā vattabbā. Tanti saṅghabhattaṃ, dhātukammaṃ, ‘‘amhāka’’nti kāritakammaṃ. Tanti saṅghabhattaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / චූළවග්‌ගපාළි • Cūḷavaggapāḷi / සඞ්‌ඝභත්‌තාදිඅනුජානනං • Saṅghabhattādianujānanaṃ
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / චූළවග්‌ග-අට්‌ඨකථා • Cūḷavagga-aṭṭhakathā / සඞ්‌ඝභත්‌තාදිඅනුජානනකථා • Saṅghabhattādianujānanakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / සඞ්‌ඝභත්‌තාදිඅනුජානනකථාවණ්‌ණනා • Saṅghabhattādianujānanakathāvaṇṇanā
