| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
১৪-১৭. সঙ্ঘভেদকাদিসিক্খাপদৰণ্ণনা
14-17. Saṅghabhedakādisikkhāpadavaṇṇanā
ভিক্খুনী সঙ্ঘং ন ভিন্দতীতি কম্মং, উদ্দেসো চাতি দ্ৰীহি ভেদো, সো তায সদ্ধিং নত্থীতি ভিক্খুনী সঙ্ঘং ন ভিন্দতি। ন কেৰলং পরিৰাসাভাৰোযেৰাতি আহ ‘‘ছাদনপচ্চযাপী’’তিআদি। এত্থ চ ‘‘ছাদনপচ্চযাপি ন দুক্কটং আপজ্জতী’’তি পাঠো দট্ঠব্বো, ছাদনপচ্চযাপি দুক্কটং ন আপজ্জতীতি অত্থো। এৰঞ্চ কত্ৰা –
Bhikkhunī saṅghaṃ na bhindatīti kammaṃ, uddeso cāti dvīhi bhedo, so tāya saddhiṃ natthīti bhikkhunī saṅghaṃ na bhindati. Na kevalaṃ parivāsābhāvoyevāti āha ‘‘chādanapaccayāpī’’tiādi. Ettha ca ‘‘chādanapaccayāpi na dukkaṭaṃ āpajjatī’’ti pāṭho daṭṭhabbo, chādanapaccayāpi dukkaṭaṃ na āpajjatīti attho. Evañca katvā –
‘‘আপজ্জতি গরুকং সাৰসেসং।
‘‘Āpajjati garukaṃ sāvasesaṃ;
ছাদেতি অনাদরিযং পটিচ্চ।
Chādeti anādariyaṃ paṭicca;
ন ভিক্খুনী নো চ ফুসেয্য ৰজ্জং।
Na bhikkhunī no ca phuseyya vajjaṃ;
পঞ্হামেসা কুসলেহি চিন্তিতা’’তি॥ (পরি॰ ৪৮১) –
Pañhāmesā kusalehi cintitā’’ti. (pari. 481) –
এত্থ ভিক্খুনিনিসেধো উপপন্নো হোতি। যেসু পন পোত্থকেসু ‘‘ছাদনপচ্চযা পন দুক্কটং আপজ্জতী’’তি ৰিনা ন-কারং পাঠো দিস্সতি, সো পমাদলেখোতি দট্ঠব্বং। তস্মাতি যস্মা পরিৰাসো নাম নত্থি, তস্মা। অত্তনো সীমং সোধেত্ৰা ৰিহারসীমায ৰাতি ৰিহারে বদ্ধসীমমেৰ সন্ধায ৰুত্তং। সোধেতুং অসক্কোন্তীহীতি ৰিহারসীমং সোধেতুং অসক্কোন্তীহি।
Ettha bhikkhuninisedho upapanno hoti. Yesu pana potthakesu ‘‘chādanapaccayā pana dukkaṭaṃ āpajjatī’’ti vinā na-kāraṃ pāṭho dissati, so pamādalekhoti daṭṭhabbaṃ. Tasmāti yasmā parivāso nāma natthi, tasmā. Attano sīmaṃ sodhetvā vihārasīmāya vāti vihāre baddhasīmameva sandhāya vuttaṃ. Sodhetuṃ asakkontīhīti vihārasīmaṃ sodhetuṃ asakkontīhi.
মুখমত্তনিদস্সনন্তি পৰেসোপাযমত্তনিদস্সনং। এত্থাহ – অথ কস্মা যথা ভিক্খুমানত্তকথায ‘‘পরিক্খিত্তস্স ৰিহারস্স পরিক্খেপতো, অপরিক্খিত্তস্স ৰিহারস্স পরিক্খেপারহট্ঠানতো দ্ৰে লেড্ডুপাতে অতিক্কম্মা’’তি (কঙ্খা॰ অট্ঠ॰ নিগমনৰণ্ণনা) ৰুত্তং, এৰমৰত্ৰা ‘‘গামূপচারতো চ ভিক্খূনং ৰিহারূপচারতো চ দ্ৰে লেড্ডুপাতে অতিক্কমিত্ৰা’’তি ইধ ৰুত্তন্তি? তত্র চেকে ৰদন্তি ‘‘ভিক্খূনং ৰুত্তপ্পকারং পদেসং অতিক্কমিত্ৰা গামেপি তং কম্মং কাতুং ৰট্টতি, ভিক্খুনীনং পন গামে ন ৰট্টতি, তস্মা এৰং ৰুত্ত’’ন্তি। অপরে পন ভণন্তি ‘‘ভিক্খূনম্পি গামে ন ৰট্টতি, ভিক্খুৰিহারো নাম পুব্বেযেৰ গামূপচারং অতিক্কমিত্ৰা তিট্ঠতি , তস্মা গামং অৰত্ৰা ৰিহারূপচারমেৰ হেট্ঠা ৰুত্তং। ভিক্খুনীনং পন ৰিহারো গামেযেৰ, ন বহি, তস্মা গামূপচারঞ্চ ৰিহারূপচারঞ্চ উভযমেৰেত্থ দস্সিতং। তস্মা উভযত্থাপি অত্থতো নানাত্থং নত্থী’’তি। ৰীমংসিত্ৰা যঞ্চেত্থ যুজ্জতি, তং গহেতব্বং।
Mukhamattanidassananti pavesopāyamattanidassanaṃ. Etthāha – atha kasmā yathā bhikkhumānattakathāya ‘‘parikkhittassa vihārassa parikkhepato, aparikkhittassa vihārassa parikkhepārahaṭṭhānato dve leḍḍupāte atikkammā’’ti (kaṅkhā. aṭṭha. nigamanavaṇṇanā) vuttaṃ, evamavatvā ‘‘gāmūpacārato ca bhikkhūnaṃ vihārūpacārato ca dve leḍḍupāte atikkamitvā’’ti idha vuttanti? Tatra ceke vadanti ‘‘bhikkhūnaṃ vuttappakāraṃ padesaṃ atikkamitvā gāmepi taṃ kammaṃ kātuṃ vaṭṭati, bhikkhunīnaṃ pana gāme na vaṭṭati, tasmā evaṃ vutta’’nti. Apare pana bhaṇanti ‘‘bhikkhūnampi gāme na vaṭṭati, bhikkhuvihāro nāma pubbeyeva gāmūpacāraṃ atikkamitvā tiṭṭhati , tasmā gāmaṃ avatvā vihārūpacārameva heṭṭhā vuttaṃ. Bhikkhunīnaṃ pana vihāro gāmeyeva, na bahi, tasmā gāmūpacārañca vihārūpacārañca ubhayamevettha dassitaṃ. Tasmā ubhayatthāpi atthato nānātthaṃ natthī’’ti. Vīmaṃsitvā yañcettha yujjati, taṃ gahetabbaṃ.
ততো পট্ঠাযাতি আরোচিতকালতো পট্ঠায।
Tato paṭṭhāyāti ārocitakālato paṭṭhāya.
সঙ্ঘভেদকাদিসিক্খাপদৰণ্ণনা নিট্ঠিতা।
Saṅghabhedakādisikkhāpadavaṇṇanā niṭṭhitā.
ইতি কঙ্খাৰিতরণিযা পাতিমোক্খৰণ্ণনায
Iti kaṅkhāvitaraṇiyā pātimokkhavaṇṇanāya
ৰিনযত্থমঞ্জূসাযং লীনত্থপ্পকাসনিযং
Vinayatthamañjūsāyaṃ līnatthappakāsaniyaṃ
ভিক্খুনিপাতিমোক্খে সঙ্ঘাদিসেসৰণ্ণনা নিট্ঠিতা।
Bhikkhunipātimokkhe saṅghādisesavaṇṇanā niṭṭhitā.
