| Library / Tipiṭaka / তিপিটক • Tipiṭaka / চূল়ৰগ্গ-অট্ঠকথা • Cūḷavagga-aṭṭhakathā |
সঙ্ঘভেদককথা
Saṅghabhedakakathā
৩৪৪. অথ খো দেৰদত্তো সঙ্ঘং ভিন্দিত্ৰাতি সো কির এৰং সলাকং গাহেত্ৰা তত্থেৰ আৰেণিকং উপোসথং কত্ৰা গতো, তেনেতং ৰুত্তং।
344.Atha kho devadatto saṅghaṃ bhinditvāti so kira evaṃ salākaṃ gāhetvā tattheva āveṇikaṃ uposathaṃ katvā gato, tenetaṃ vuttaṃ.
৩৪৫. পিট্ঠি মে আগিলাযতীতি চিরনিসজ্জায ৰেদনাভিভূতা বাধতি। তমহং আযমিস্সামীতি তং অহং পসারেস্সামি। আদেসনাপাটিহারিযানুসাসনী নাম ‘‘এৰম্পি তে মনো, তথাপি তে মনো’’তি এৰং পরস্স চিত্তং জানিত্ৰা তদনুরূপা ধম্মদেসনা।
345.Piṭṭhime āgilāyatīti ciranisajjāya vedanābhibhūtā bādhati. Tamahaṃ āyamissāmīti taṃ ahaṃ pasāressāmi. Ādesanāpāṭihāriyānusāsanī nāma ‘‘evampi te mano, tathāpi te mano’’ti evaṃ parassa cittaṃ jānitvā tadanurūpā dhammadesanā.
৩৪৬. মমানুকুব্বন্তি মমানুকিরিযং কুরুমানো। কপণোতি দুক্খিতো। মহাৰরাহস্সাতি মহানাগস্স। মহিং ৰিকুব্বতোতি পথৰিং পদালেন্তস্স। ভিসং ঘসমানস্সাতি ভিসং খাদন্তস্স। নদীসু জগ্গতোতি এত্থ সো কির হত্থিনাগো সাযন্হসমযং তং নদিনামকং পোক্খরণিং ওগাহেত্ৰা কিলন্তো সব্বরত্তিং ৰীতিনামেসি, জালিকং করোতি, তেন ৰুত্তং ‘‘নদীসু জগ্গতো’’তি।
346.Mamānukubbanti mamānukiriyaṃ kurumāno. Kapaṇoti dukkhito. Mahāvarāhassāti mahānāgassa. Mahiṃ vikubbatoti pathaviṃ padālentassa. Bhisaṃ ghasamānassāti bhisaṃ khādantassa. Nadīsu jaggatoti ettha so kira hatthināgo sāyanhasamayaṃ taṃ nadināmakaṃ pokkharaṇiṃ ogāhetvā kilanto sabbarattiṃ vītināmesi, jālikaṃ karoti, tena vuttaṃ ‘‘nadīsu jaggato’’ti.
৩৪৭. সুতাতি সোতা। অসন্দিদ্ধো চ অক্খাতীতি নিস্সন্দেহো হুত্ৰা অক্খাতি অনুসন্ধিৰসেন যোজেত্ৰা যোজেত্ৰা।
347.Sutāti sotā. Asandiddho ca akkhātīti nissandeho hutvā akkhāti anusandhivasena yojetvā yojetvā.
৩৫০. অপাযে নিব্বত্তিস্সতীতি আপাযিকো। এৰং নেরযিকো। কপ্পং ঠস্সতীতি কপ্পট্ঠো। ইদানি বুদ্ধসহস্সেনাপি তিকিচ্ছিতুং ন সক্কাতি অতেকিচ্ছো।
350. Apāye nibbattissatīti āpāyiko. Evaṃ nerayiko. Kappaṃ ṭhassatīti kappaṭṭho. Idāni buddhasahassenāpi tikicchituṃ na sakkāti atekiccho.
মা জাতু কোচি লোকস্মিন্তি মা কদাচিপি কোচি সত্তো লোকস্মিং। উদপজ্জথাতি উপপজ্জথ । জলংৰ যসসা অট্ঠাতি যসসা জলন্তো ৰিয ঠিতো। দেৰদত্তোতি মে সুতন্তি ‘‘ঈদিসো দেৰদত্তো’’তি ভগৰতা সুতম্পি অত্থি, তদেৰ গহেত্ৰা ইদং ৰুত্তং। সো পমাদমনুচিণ্ণোতি এত্থ পমাদং অনুচিনাতীতি অনুচিণ্ণো, পমাদো অপ্পহীনোতি অত্থো। আসজ্জ নন্তি পাপকেন চিত্তেন পত্ৰা, ৰিসোসেত্ৰাতি ৰা অত্থো। অৰীচিনিরযং পত্তোতি ইদং পন আসীসাযং অতীতৰচনং। ভেস্মাতি ভযানকো।
Mā jātu koci lokasminti mā kadācipi koci satto lokasmiṃ. Udapajjathāti upapajjatha . Jalaṃva yasasā aṭṭhāti yasasā jalanto viya ṭhito. Devadattoti me sutanti ‘‘īdiso devadatto’’ti bhagavatā sutampi atthi, tadeva gahetvā idaṃ vuttaṃ. So pamādamanuciṇṇoti ettha pamādaṃ anucinātīti anuciṇṇo, pamādo appahīnoti attho. Āsajja nanti pāpakena cittena patvā, visosetvāti vā attho. Avīcinirayaṃ pattoti idaṃ pana āsīsāyaṃ atītavacanaṃ. Bhesmāti bhayānako.
সঙ্ঘভেদককথা নিট্ঠিতা।
Saṅghabhedakakathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / সঙ্ঘভেদকথা • Saṅghabhedakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / সঙ্ঘভেদকথাৰণ্ণনা • Saṅghabhedakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ছসক্যপব্বজ্জাকথাৰণ্ণনা • Chasakyapabbajjākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / সঙ্ঘভেদককথাৰণ্ণনা • Saṅghabhedakakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / সঙ্ঘভেদকথা • Saṅghabhedakathā
