| Library / Tipiṭaka / तिपिटक • Tipiṭaka / चूळवग्ग-अट्ठकथा • Cūḷavagga-aṭṭhakathā |
सङ्घभेदककथा
Saṅghabhedakakathā
३४४. अथ खो देवदत्तो सङ्घं भिन्दित्वाति सो किर एवं सलाकं गाहेत्वा तत्थेव आवेणिकं उपोसथं कत्वा गतो, तेनेतं वुत्तं।
344.Atha kho devadatto saṅghaṃ bhinditvāti so kira evaṃ salākaṃ gāhetvā tattheva āveṇikaṃ uposathaṃ katvā gato, tenetaṃ vuttaṃ.
३४५. पिट्ठि मे आगिलायतीति चिरनिसज्जाय वेदनाभिभूता बाधति। तमहं आयमिस्सामीति तं अहं पसारेस्सामि। आदेसनापाटिहारियानुसासनी नाम ‘‘एवम्पि ते मनो, तथापि ते मनो’’ति एवं परस्स चित्तं जानित्वा तदनुरूपा धम्मदेसना।
345.Piṭṭhime āgilāyatīti ciranisajjāya vedanābhibhūtā bādhati. Tamahaṃ āyamissāmīti taṃ ahaṃ pasāressāmi. Ādesanāpāṭihāriyānusāsanī nāma ‘‘evampi te mano, tathāpi te mano’’ti evaṃ parassa cittaṃ jānitvā tadanurūpā dhammadesanā.
३४६. ममानुकुब्बन्ति ममानुकिरियं कुरुमानो। कपणोति दुक्खितो। महावराहस्साति महानागस्स। महिं विकुब्बतोति पथविं पदालेन्तस्स। भिसं घसमानस्साति भिसं खादन्तस्स। नदीसु जग्गतोति एत्थ सो किर हत्थिनागो सायन्हसमयं तं नदिनामकं पोक्खरणिं ओगाहेत्वा किलन्तो सब्बरत्तिं वीतिनामेसि, जालिकं करोति, तेन वुत्तं ‘‘नदीसु जग्गतो’’ति।
346.Mamānukubbanti mamānukiriyaṃ kurumāno. Kapaṇoti dukkhito. Mahāvarāhassāti mahānāgassa. Mahiṃ vikubbatoti pathaviṃ padālentassa. Bhisaṃ ghasamānassāti bhisaṃ khādantassa. Nadīsu jaggatoti ettha so kira hatthināgo sāyanhasamayaṃ taṃ nadināmakaṃ pokkharaṇiṃ ogāhetvā kilanto sabbarattiṃ vītināmesi, jālikaṃ karoti, tena vuttaṃ ‘‘nadīsu jaggato’’ti.
३४७. सुताति सोता। असन्दिद्धो च अक्खातीति निस्सन्देहो हुत्वा अक्खाति अनुसन्धिवसेन योजेत्वा योजेत्वा।
347.Sutāti sotā. Asandiddho ca akkhātīti nissandeho hutvā akkhāti anusandhivasena yojetvā yojetvā.
३५०. अपाये निब्बत्तिस्सतीति आपायिको। एवं नेरयिको। कप्पं ठस्सतीति कप्पट्ठो। इदानि बुद्धसहस्सेनापि तिकिच्छितुं न सक्काति अतेकिच्छो।
350. Apāye nibbattissatīti āpāyiko. Evaṃ nerayiko. Kappaṃ ṭhassatīti kappaṭṭho. Idāni buddhasahassenāpi tikicchituṃ na sakkāti atekiccho.
मा जातु कोचि लोकस्मिन्ति मा कदाचिपि कोचि सत्तो लोकस्मिं। उदपज्जथाति उपपज्जथ । जलंव यससा अट्ठाति यससा जलन्तो विय ठितो। देवदत्तोति मे सुतन्ति ‘‘ईदिसो देवदत्तो’’ति भगवता सुतम्पि अत्थि, तदेव गहेत्वा इदं वुत्तं। सो पमादमनुचिण्णोति एत्थ पमादं अनुचिनातीति अनुचिण्णो, पमादो अप्पहीनोति अत्थो। आसज्ज नन्ति पापकेन चित्तेन पत्वा, विसोसेत्वाति वा अत्थो। अवीचिनिरयं पत्तोति इदं पन आसीसायं अतीतवचनं। भेस्माति भयानको।
Mā jātu koci lokasminti mā kadācipi koci satto lokasmiṃ. Udapajjathāti upapajjatha . Jalaṃva yasasā aṭṭhāti yasasā jalanto viya ṭhito. Devadattoti me sutanti ‘‘īdiso devadatto’’ti bhagavatā sutampi atthi, tadeva gahetvā idaṃ vuttaṃ. So pamādamanuciṇṇoti ettha pamādaṃ anucinātīti anuciṇṇo, pamādo appahīnoti attho. Āsajja nanti pāpakena cittena patvā, visosetvāti vā attho. Avīcinirayaṃ pattoti idaṃ pana āsīsāyaṃ atītavacanaṃ. Bhesmāti bhayānako.
सङ्घभेदककथा निट्ठिता।
Saṅghabhedakakathā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / चूळवग्गपाळि • Cūḷavaggapāḷi / सङ्घभेदकथा • Saṅghabhedakathā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / सङ्घभेदकथावण्णना • Saṅghabhedakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / छसक्यपब्बज्जाकथावण्णना • Chasakyapabbajjākathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / सङ्घभेदककथावण्णना • Saṅghabhedakakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / सङ्घभेदकथा • Saṅghabhedakathā
