| Library / Tipiṭaka / තිපිටක • Tipiṭaka / චූළවග්‌ග-අට්‌ඨකථා • Cūḷavagga-aṭṭhakathā |
සඞ්‌ඝභෙදකකථා
Saṅghabhedakakathā
344. අථ ඛො දෙවදත්‌තො සඞ්‌ඝං භින්‌දිත්‌වාති සො කිර එවං සලාකං ගාහෙත්‌වා තත්‌ථෙව ආවෙණිකං උපොසථං කත්‌වා ගතො, තෙනෙතං වුත්‌තං.
344.Atha kho devadatto saṅghaṃ bhinditvāti so kira evaṃ salākaṃ gāhetvā tattheva āveṇikaṃ uposathaṃ katvā gato, tenetaṃ vuttaṃ.
345. පිට්‌ඨි මෙ ආගිලායතීති චිරනිසජ්‌ජාය වෙදනාභිභූතා බාධති. තමහං ආයමිස්‌සාමීති තං අහං පසාරෙස්‌සාමි. ආදෙසනාපාටිහාරියානුසාසනී නාම ‘‘එවම්‌පි තෙ මනො, තථාපි තෙ මනො’’ති එවං පරස්‌ස චිත්‌තං ජානිත්‌වා තදනුරූපා ධම්‌මදෙසනා.
345.Piṭṭhime āgilāyatīti ciranisajjāya vedanābhibhūtā bādhati. Tamahaṃ āyamissāmīti taṃ ahaṃ pasāressāmi. Ādesanāpāṭihāriyānusāsanī nāma ‘‘evampi te mano, tathāpi te mano’’ti evaṃ parassa cittaṃ jānitvā tadanurūpā dhammadesanā.
346. මමානුකුබ්‌බන්‌ති මමානුකිරියං කුරුමානො. කපණොති දුක්‌ඛිතො. මහාවරාහස්‌සාති මහානාගස්‌ස. මහිං විකුබ්‌බතොති පථවිං පදාලෙන්‌තස්‌ස. භිසං ඝසමානස්‌සාති භිසං ඛාදන්‌තස්‌ස. නදීසු ජග්‌ගතොති එත්‌ථ සො කිර හත්‌ථිනාගො සායන්‌හසමයං තං නදිනාමකං පොක්‌ඛරණිං ඔගාහෙත්‌වා කිලන්‌තො සබ්‌බරත්‌තිං වීතිනාමෙසි, ජාලිකං කරොති, තෙන වුත්‌තං ‘‘නදීසු ජග්‌ගතො’’ති.
346.Mamānukubbanti mamānukiriyaṃ kurumāno. Kapaṇoti dukkhito. Mahāvarāhassāti mahānāgassa. Mahiṃ vikubbatoti pathaviṃ padālentassa. Bhisaṃ ghasamānassāti bhisaṃ khādantassa. Nadīsu jaggatoti ettha so kira hatthināgo sāyanhasamayaṃ taṃ nadināmakaṃ pokkharaṇiṃ ogāhetvā kilanto sabbarattiṃ vītināmesi, jālikaṃ karoti, tena vuttaṃ ‘‘nadīsu jaggato’’ti.
347. සුතාති සොතා. අසන්‌දිද්‌ධො ච අක්‌ඛාතීති නිස්‌සන්‌දෙහො හුත්‌වා අක්‌ඛාති අනුසන්‌ධිවසෙන යොජෙත්‌වා යොජෙත්‌වා.
347.Sutāti sotā. Asandiddho ca akkhātīti nissandeho hutvā akkhāti anusandhivasena yojetvā yojetvā.
350. අපායෙ නිබ්‌බත්‌තිස්‌සතීති ආපායිකො. එවං නෙරයිකො. කප්‌පං ඨස්‌සතීති කප්‌පට්‌ඨො. ඉදානි බුද්‌ධසහස්‌සෙනාපි තිකිච්‌ඡිතුං න සක්‌කාති අතෙකිච්‌ඡො.
350. Apāye nibbattissatīti āpāyiko. Evaṃ nerayiko. Kappaṃ ṭhassatīti kappaṭṭho. Idāni buddhasahassenāpi tikicchituṃ na sakkāti atekiccho.
මා ජාතු කොචි ලොකස්‌මින්‌ති මා කදාචිපි කොචි සත්‌තො ලොකස්‌මිං. උදපජ්‌ජථාති උපපජ්‌ජථ . ජලංව යසසා අට්‌ඨාති යසසා ජලන්‌තො විය ඨිතො. දෙවදත්‌තොති මෙ සුතන්‌ති ‘‘ඊදිසො දෙවදත්‌තො’’ති භගවතා සුතම්‌පි අත්‌ථි, තදෙව ගහෙත්‌වා ඉදං වුත්‌තං. සො පමාදමනුචිණ්‌ණොති එත්‌ථ පමාදං අනුචිනාතීති අනුචිණ්‌ණො, පමාදො අප්‌පහීනොති අත්‌ථො. ආසජ්‌ජ නන්‌ති පාපකෙන චිත්‌තෙන පත්‌වා, විසොසෙත්‌වාති වා අත්‌ථො. අවීචිනිරයං පත්‌තොති ඉදං පන ආසීසායං අතීතවචනං. භෙස්‌මාති භයානකො.
Mā jātu koci lokasminti mā kadācipi koci satto lokasmiṃ. Udapajjathāti upapajjatha . Jalaṃva yasasā aṭṭhāti yasasā jalanto viya ṭhito. Devadattoti me sutanti ‘‘īdiso devadatto’’ti bhagavatā sutampi atthi, tadeva gahetvā idaṃ vuttaṃ. So pamādamanuciṇṇoti ettha pamādaṃ anucinātīti anuciṇṇo, pamādo appahīnoti attho. Āsajja nanti pāpakena cittena patvā, visosetvāti vā attho. Avīcinirayaṃ pattoti idaṃ pana āsīsāyaṃ atītavacanaṃ. Bhesmāti bhayānako.
සඞ්‌ඝභෙදකකථා නිට්‌ඨිතා.
Saṅghabhedakakathā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / චූළවග්‌ගපාළි • Cūḷavaggapāḷi / සඞ්‌ඝභෙදකථා • Saṅghabhedakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / සඞ්‌ඝභෙදකථාවණ්‌ණනා • Saṅghabhedakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / ඡසක්‍යපබ්‌බජ්‌ජාකථාවණ්‌ණනා • Chasakyapabbajjākathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / සඞ්‌ඝභෙදකකථාවණ්‌ණනා • Saṅghabhedakakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / සඞ්‌ඝභෙදකථා • Saṅghabhedakathā
