| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
ஸங்க⁴பே⁴த³ககதா²வண்ணனா
Saṅghabhedakakathāvaṇṇanā
345. பரஸ்ஸ சித்தங் ஞத்வா கத²னங் ஆதே³ஸனாபாடிஹாரியங். கேவலங் த⁴ம்மதே³ஸனா அனுஸாஸனீபாடிஹாரியங். தது³ப⁴யம்பி த⁴ம்மீ கதா² நாம. தாய தே²ரோ ஓவதி³. இத்³தி⁴வித⁴ங் இத்³தி⁴பாடிஹாரியங் நாம. தேன ஸஹிதா அனுஸாஸனீ ஏவ த⁴ம்மீ கதா². தாய தே²ரோ ஓவதி³.
345. Parassa cittaṃ ñatvā kathanaṃ ādesanāpāṭihāriyaṃ. Kevalaṃ dhammadesanā anusāsanīpāṭihāriyaṃ. Tadubhayampi dhammī kathā nāma. Tāya thero ovadi. Iddhividhaṃ iddhipāṭihāriyaṃ nāma. Tena sahitā anusāsanī eva dhammī kathā. Tāya thero ovadi.
‘‘து²ல்லச்சயங் தே³ஸாபேஹீ’’தி இத³ங் பே⁴த³புரெக்கா²ரஸ்ஸ உபோஸதா²தி³கரணே து²ல்லச்சயஸ்ஸ உபோஸத²க்க²ந்த⁴காதீ³ஸு பட²மமேவ பஞ்ஞத்தத்தா வுத்தங், இதரதா² ஏதேஸங் ஆதி³கம்மிகத்தா அனாபத்தியேவ ஸியா.
‘‘Thullaccayaṃ desāpehī’’ti idaṃ bhedapurekkhārassa uposathādikaraṇe thullaccayassa uposathakkhandhakādīsu paṭhamameva paññattattā vuttaṃ, itarathā etesaṃ ādikammikattā anāpattiyeva siyā.
346. ஸரஸீதி ஸரோ. மஹிங் விக்ருப்³ப³தோதி மஹிங் த³ந்தேஹி விலிக²ந்தஸ்ஸ. இத³ஞ்ச ஹத்தீ²னங் ஸபா⁴வத³ஸ்ஸனங். நதீ³ஸூதி ஸரேஸு. பி⁴ஸங் க⁴ஸமானஸ்ஸாதி யோஜனா. ஜக்³க³தோதி யூத²ங் பாலெந்தஸ்ஸ.
346.Sarasīti saro. Mahiṃ vikrubbatoti mahiṃ dantehi vilikhantassa. Idañca hatthīnaṃ sabhāvadassanaṃ. Nadīsūti saresu. Bhisaṃ ghasamānassāti yojanā. Jaggatoti yūthaṃ pālentassa.
347. தூ³தெய்யங் க³ந்துந்தி தூ³தகம்மங் பத்துங், தூ³தகம்மங் காதுந்தி அத்தோ². ஸஹிதாஸஹிதஸ்ஸாதி யுத்தாயுத்தஸ்ஸ, யங் வத்துங், காதுஞ்ச யுத்தங், தத்த² குஸலோ. அத² வா அதி⁴ப்பேதானாதி⁴ப்பேதஸ்ஸ வசனஸ்ஸ குஸலோ, ப்³யஞ்ஜனமத்தே ந திட்ட²தி, அதி⁴ப்பேதத்த²மேவ ஆரோசேதீதி அத்தோ².
347.Dūteyyaṃgantunti dūtakammaṃ pattuṃ, dūtakammaṃ kātunti attho. Sahitāsahitassāti yuttāyuttassa, yaṃ vattuṃ, kātuñca yuttaṃ, tattha kusalo. Atha vā adhippetānādhippetassa vacanassa kusalo, byañjanamatte na tiṭṭhati, adhippetatthameva ārocetīti attho.
350. கா³தா²ஸு ஜாதூதி ஏகங்ஸேன. மா உத³பஜ்ஜத² மா ஹோதூதி அத்தோ². பாபிச்சா²னங் யதா²க³தீதி பாபிச்சா²னங் புக்³க³லானங் யாதி³ஸீ க³தி அபி⁴ஸம்பராயோ. தங் அத்த²ஜாதங். இமினாபி காரணேன ஜானாதா²தி தே³வத³த்தஸ்ஸ ‘‘பண்டி³தோ’’திஆதி³னா உபரி வக்க²மானாகாரங் த³ஸ்ஸேதி.
350. Gāthāsu jātūti ekaṃsena. Mā udapajjatha mā hotūti attho. Pāpicchānaṃ yathāgatīti pāpicchānaṃ puggalānaṃ yādisī gati abhisamparāyo. Taṃ atthajātaṃ. Imināpi kāraṇena jānāthāti devadattassa ‘‘paṇḍito’’tiādinā upari vakkhamānākāraṃ dasseti.
பமாத³ங் அனுசிண்ணோதி பமாத³ங் ஆபன்னோ. ஆஸீஸாயந்தி அவஸ்ஸங்பா⁴வீஅத்த²ஸித்³தி⁴யங். ஸா ஹி இத⁴ ஆஸீஸாதி அதி⁴ப்பேதா, ந பத்த²னா. ஈதி³ஸே அனாக³தத்தே² அதீதவசனங் ஸத்³த³விதூ³ இச்ச²ந்தி.
Pamādaṃ anuciṇṇoti pamādaṃ āpanno. Āsīsāyanti avassaṃbhāvīatthasiddhiyaṃ. Sā hi idha āsīsāti adhippetā, na patthanā. Īdise anāgatatthe atītavacanaṃ saddavidū icchanti.
து³ப்³பே⁴தி து³ப்³பெ⁴ய்ய. விஸகும்பே⁴னாதி ஏகேன விஸபுண்ணகும்பே⁴ன. ஸோதி ஸோ புக்³க³லோ. ந பதூ³ஸெய்ய விஸமிஸ்ஸங் காதுங் ந ஸக்கோதீதி அத்தோ². ப⁴யானகோதி விபுலக³ம்பீ⁴ரபா⁴வேன ப⁴யானகோ. தேனாபி தூ³ஸேதுங் ந ஸக்குணெய்யதங் த³ஸ்ஸேதி. வாதே³னாதி தோ³ஸகத²னேன. உபஹிங்ஸதீதி பா³த⁴தி.
Dubbheti dubbheyya. Visakumbhenāti ekena visapuṇṇakumbhena. Soti so puggalo. Na padūseyya visamissaṃ kātuṃ na sakkotīti attho. Bhayānakoti vipulagambhīrabhāvena bhayānako. Tenāpi dūsetuṃ na sakkuṇeyyataṃ dasseti. Vādenāti dosakathanena. Upahiṃsatīti bādhati.
ஸங்க⁴பே⁴த³ககதா²வண்ணனா நிட்டி²தா.
Saṅghabhedakakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / ஸங்க⁴பே⁴த³கதா² • Saṅghabhedakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / ஸங்க⁴பே⁴த³ககதா² • Saṅghabhedakakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸங்க⁴பே⁴த³கதா²வண்ணனா • Saṅghabhedakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ச²ஸக்யபப்³ப³ஜ்ஜாகதா²வண்ணனா • Chasakyapabbajjākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / ஸங்க⁴பே⁴த³கதா² • Saṅghabhedakathā
