| Library / Tipiṭaka / ติปิฎก • Tipiṭaka / วิมติวิโนทนี-ฎีกา • Vimativinodanī-ṭīkā |
สงฺฆเภทกกถาวณฺณนา
Saṅghabhedakakathāvaṇṇanā
๓๔๕. ปรสฺส จิตฺตํ ญตฺวา กถนํ อาเทสนาปาฎิหาริยํฯ เกวลํ ธมฺมเทสนา อนุสาสนีปาฎิหาริยํฯ ตทุภยมฺปิ ธมฺมี กถา นามฯ ตาย เถโร โอวทิฯ อิทฺธิวิธํ อิทฺธิปาฎิหาริยํ นามฯ เตน สหิตา อนุสาสนี เอว ธมฺมี กถาฯ ตาย เถโร โอวทิฯ
345. Parassa cittaṃ ñatvā kathanaṃ ādesanāpāṭihāriyaṃ. Kevalaṃ dhammadesanā anusāsanīpāṭihāriyaṃ. Tadubhayampi dhammī kathā nāma. Tāya thero ovadi. Iddhividhaṃ iddhipāṭihāriyaṃ nāma. Tena sahitā anusāsanī eva dhammī kathā. Tāya thero ovadi.
‘‘ถุลฺลจฺจยํ เทสาเปหี’’ติ อิทํ เภทปุเรกฺขารสฺส อุโปสถาทิกรเณ ถุลฺลจฺจยสฺส อุโปสถกฺขนฺธกาทีสุ ปฐมเมว ปญฺญตฺตตฺตา วุตฺตํ, อิตรถา เอเตสํ อาทิกมฺมิกตฺตา อนาปตฺติเยว สิยาฯ
‘‘Thullaccayaṃ desāpehī’’ti idaṃ bhedapurekkhārassa uposathādikaraṇe thullaccayassa uposathakkhandhakādīsu paṭhamameva paññattattā vuttaṃ, itarathā etesaṃ ādikammikattā anāpattiyeva siyā.
๓๔๖. สรสีติ สโรฯ มหิํ วิกฺรุพฺพโตติ มหิํ ทเนฺตหิ วิลิขนฺตสฺสฯ อิทญฺจ หตฺถีนํ สภาวทสฺสนํฯ นทีสูติ สเรสุฯ ภิสํ ฆสมานสฺสาติ โยชนาฯ ชคฺคโตติ ยูถํ ปาเลนฺตสฺสฯ
346.Sarasīti saro. Mahiṃ vikrubbatoti mahiṃ dantehi vilikhantassa. Idañca hatthīnaṃ sabhāvadassanaṃ. Nadīsūti saresu. Bhisaṃ ghasamānassāti yojanā. Jaggatoti yūthaṃ pālentassa.
๓๔๗. ทูเตยฺยํ คนฺตุนฺติ ทูตกมฺมํ ปตฺตุํ, ทูตกมฺมํ กาตุนฺติ อโตฺถฯ สหิตาสหิตสฺสาติ ยุตฺตายุตฺตสฺส, ยํ วตฺตุํ, กาตุญฺจ ยุตฺตํ, ตตฺถ กุสโลฯ อถ วา อธิเปฺปตานาธิเปฺปตสฺส วจนสฺส กุสโล, พฺยญฺชนมเตฺต น ติฎฺฐติ, อธิเปฺปตตฺถเมว อาโรเจตีติ อโตฺถฯ
347.Dūteyyaṃgantunti dūtakammaṃ pattuṃ, dūtakammaṃ kātunti attho. Sahitāsahitassāti yuttāyuttassa, yaṃ vattuṃ, kātuñca yuttaṃ, tattha kusalo. Atha vā adhippetānādhippetassa vacanassa kusalo, byañjanamatte na tiṭṭhati, adhippetatthameva ārocetīti attho.
๓๕๐. คาถาสุ ชาตูติ เอกํเสนฯ มา อุทปชฺชถ มา โหตูติ อโตฺถฯ ปาปิจฺฉานํ ยถาคตีติ ปาปิจฺฉานํ ปุคฺคลานํ ยาทิสี คติ อภิสมฺปราโยฯ ตํ อตฺถชาตํฯ อิมินาปิ การเณน ชานาถาติ เทวทตฺตสฺส ‘‘ปณฺฑิโต’’ติอาทินา อุปริ วกฺขมานาการํ ทเสฺสติฯ
350. Gāthāsu jātūti ekaṃsena. Mā udapajjatha mā hotūti attho. Pāpicchānaṃ yathāgatīti pāpicchānaṃ puggalānaṃ yādisī gati abhisamparāyo. Taṃ atthajātaṃ. Imināpi kāraṇena jānāthāti devadattassa ‘‘paṇḍito’’tiādinā upari vakkhamānākāraṃ dasseti.
ปมาทํ อนุจิโณฺณติ ปมาทํ อาปโนฺนฯ อาสีสายนฺติ อวสฺสํภาวีอตฺถสิทฺธิยํฯ สา หิ อิธ อาสีสาติ อธิเปฺปตา, น ปตฺถนาฯ อีทิเส อนาคตเตฺถ อตีตวจนํ สทฺทวิทู อิจฺฉนฺติฯ
Pamādaṃ anuciṇṇoti pamādaṃ āpanno. Āsīsāyanti avassaṃbhāvīatthasiddhiyaṃ. Sā hi idha āsīsāti adhippetā, na patthanā. Īdise anāgatatthe atītavacanaṃ saddavidū icchanti.
ทุเพฺภติ ทุเพฺภยฺยฯ วิสกุเมฺภนาติ เอเกน วิสปุณฺณกุเมฺภนฯ โสติ โส ปุคฺคโลฯ น ปทูเสยฺย วิสมิสฺสํ กาตุํ น สโกฺกตีติ อโตฺถฯ ภยานโกติ วิปุลคมฺภีรภาเวน ภยานโกฯ เตนาปิ ทูเสตุํ น สกฺกุเณยฺยตํ ทเสฺสติฯ วาเทนาติ โทสกถเนนฯ อุปหิํสตีติ พาธติฯ
Dubbheti dubbheyya. Visakumbhenāti ekena visapuṇṇakumbhena. Soti so puggalo. Na padūseyya visamissaṃ kātuṃ na sakkotīti attho. Bhayānakoti vipulagambhīrabhāvena bhayānako. Tenāpi dūsetuṃ na sakkuṇeyyataṃ dasseti. Vādenāti dosakathanena. Upahiṃsatīti bādhati.
สงฺฆเภทกกถาวณฺณนา นิฎฺฐิตาฯ
Saṅghabhedakakathāvaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / จูฬวคฺคปาฬิ • Cūḷavaggapāḷi / สงฺฆเภทกถา • Saṅghabhedakathā
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / จูฬวคฺค-อฎฺฐกถา • Cūḷavagga-aṭṭhakathā / สงฺฆเภทกกถา • Saṅghabhedakakathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / สงฺฆเภทกถาวณฺณนา • Saṅghabhedakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / ฉสกฺยปพฺพชฺชากถาวณฺณนา • Chasakyapabbajjākathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / สงฺฆเภทกถา • Saṅghabhedakathā
