| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
សង្ឃភេទកកថាវណ្ណនា
Saṅghabhedakakathāvaṇṇanā
៣៤៥. បរស្ស ចិត្តំ ញត្វា កថនំ អាទេសនាបាដិហារិយំ។ កេវលំ ធម្មទេសនា អនុសាសនីបាដិហារិយំ។ តទុភយម្បិ ធម្មី កថា នាម។ តាយ ថេរោ ឱវទិ។ ឥទ្ធិវិធំ ឥទ្ធិបាដិហារិយំ នាម។ តេន សហិតា អនុសាសនី ឯវ ធម្មី កថា។ តាយ ថេរោ ឱវទិ។
345. Parassa cittaṃ ñatvā kathanaṃ ādesanāpāṭihāriyaṃ. Kevalaṃ dhammadesanā anusāsanīpāṭihāriyaṃ. Tadubhayampi dhammī kathā nāma. Tāya thero ovadi. Iddhividhaṃ iddhipāṭihāriyaṃ nāma. Tena sahitā anusāsanī eva dhammī kathā. Tāya thero ovadi.
‘‘ថុល្លច្ចយំ ទេសាបេហី’’តិ ឥទំ ភេទបុរេក្ខារស្ស ឧបោសថាទិករណេ ថុល្លច្ចយស្ស ឧបោសថក្ខន្ធកាទីសុ បឋមមេវ បញ្ញត្តត្តា វុត្តំ, ឥតរថា ឯតេសំ អាទិកម្មិកត្តា អនាបត្តិយេវ សិយា។
‘‘Thullaccayaṃ desāpehī’’ti idaṃ bhedapurekkhārassa uposathādikaraṇe thullaccayassa uposathakkhandhakādīsu paṭhamameva paññattattā vuttaṃ, itarathā etesaṃ ādikammikattā anāpattiyeva siyā.
៣៤៦. សរសីតិ សរោ។ មហិំ វិក្រុព្ពតោតិ មហិំ ទន្តេហិ វិលិខន្តស្ស។ ឥទញ្ច ហត្ថីនំ សភាវទស្សនំ។ នទីសូតិ សរេសុ។ ភិសំ ឃសមានស្សាតិ យោជនា។ ជគ្គតោតិ យូថំ បាលេន្តស្ស។
346.Sarasīti saro. Mahiṃ vikrubbatoti mahiṃ dantehi vilikhantassa. Idañca hatthīnaṃ sabhāvadassanaṃ. Nadīsūti saresu. Bhisaṃ ghasamānassāti yojanā. Jaggatoti yūthaṃ pālentassa.
៣៤៧. ទូតេយ្យំ គន្តុន្តិ ទូតកម្មំ បត្តុំ, ទូតកម្មំ កាតុន្តិ អត្ថោ។ សហិតាសហិតស្សាតិ យុត្តាយុត្តស្ស, យំ វត្តុំ, កាតុញ្ច យុត្តំ, តត្ថ កុសលោ។ អថ វា អធិប្បេតានាធិប្បេតស្ស វចនស្ស កុសលោ, ព្យញ្ជនមត្តេ ន តិដ្ឋតិ, អធិប្បេតត្ថមេវ អារោចេតីតិ អត្ថោ។
347.Dūteyyaṃgantunti dūtakammaṃ pattuṃ, dūtakammaṃ kātunti attho. Sahitāsahitassāti yuttāyuttassa, yaṃ vattuṃ, kātuñca yuttaṃ, tattha kusalo. Atha vā adhippetānādhippetassa vacanassa kusalo, byañjanamatte na tiṭṭhati, adhippetatthameva ārocetīti attho.
៣៥០. គាថាសុ ជាតូតិ ឯកំសេន។ មា ឧទបជ្ជថ មា ហោតូតិ អត្ថោ។ បាបិច្ឆានំ យថាគតីតិ បាបិច្ឆានំ បុគ្គលានំ យាទិសី គតិ អភិសម្បរាយោ។ តំ អត្ថជាតំ។ ឥមិនាបិ ការណេន ជានាថាតិ ទេវទត្តស្ស ‘‘បណ្ឌិតោ’’តិអាទិនា ឧបរិ វក្ខមានាការំ ទស្សេតិ។
350. Gāthāsu jātūti ekaṃsena. Mā udapajjatha mā hotūti attho. Pāpicchānaṃ yathāgatīti pāpicchānaṃ puggalānaṃ yādisī gati abhisamparāyo. Taṃ atthajātaṃ. Imināpi kāraṇena jānāthāti devadattassa ‘‘paṇḍito’’tiādinā upari vakkhamānākāraṃ dasseti.
បមាទំ អនុចិណ្ណោតិ បមាទំ អាបន្នោ។ អាសីសាយន្តិ អវស្សំភាវីអត្ថសិទ្ធិយំ។ សា ហិ ឥធ អាសីសាតិ អធិប្បេតា, ន បត្ថនា។ ឦទិសេ អនាគតត្ថេ អតីតវចនំ សទ្ទវិទូ ឥច្ឆន្តិ។
Pamādaṃ anuciṇṇoti pamādaṃ āpanno. Āsīsāyanti avassaṃbhāvīatthasiddhiyaṃ. Sā hi idha āsīsāti adhippetā, na patthanā. Īdise anāgatatthe atītavacanaṃ saddavidū icchanti.
ទុព្ភេតិ ទុព្ភេយ្យ។ វិសកុម្ភេនាតិ ឯកេន វិសបុណ្ណកុម្ភេន។ សោតិ សោ បុគ្គលោ។ ន បទូសេយ្យ វិសមិស្សំ កាតុំ ន សក្កោតីតិ អត្ថោ។ ភយានកោតិ វិបុលគម្ភីរភាវេន ភយានកោ។ តេនាបិ ទូសេតុំ ន សក្កុណេយ្យតំ ទស្សេតិ។ វាទេនាតិ ទោសកថនេន។ ឧបហិំសតីតិ ពាធតិ។
Dubbheti dubbheyya. Visakumbhenāti ekena visapuṇṇakumbhena. Soti so puggalo. Na padūseyya visamissaṃ kātuṃ na sakkotīti attho. Bhayānakoti vipulagambhīrabhāvena bhayānako. Tenāpi dūsetuṃ na sakkuṇeyyataṃ dasseti. Vādenāti dosakathanena. Upahiṃsatīti bādhati.
សង្ឃភេទកកថាវណ្ណនា និដ្ឋិតា។
Saṅghabhedakakathāvaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / ចូឡវគ្គបាឡិ • Cūḷavaggapāḷi / សង្ឃភេទកថា • Saṅghabhedakathā
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / ចូឡវគ្គ-អដ្ឋកថា • Cūḷavagga-aṭṭhakathā / សង្ឃភេទកកថា • Saṅghabhedakakathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / សង្ឃភេទកថាវណ្ណនា • Saṅghabhedakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ឆសក្យបព្ពជ្ជាកថាវណ្ណនា • Chasakyapabbajjākathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / សង្ឃភេទកថា • Saṅghabhedakathā
