| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
සඞ්‌ඝභෙදකකථාවණ්‌ණනා
Saṅghabhedakakathāvaṇṇanā
345. පරස්‌ස චිත්‌තං ඤත්‌වා කථනං ආදෙසනාපාටිහාරියං. කෙවලං ධම්‌මදෙසනා අනුසාසනීපාටිහාරියං. තදුභයම්‌පි ධම්‌මී කථා නාම. තාය ථෙරො ඔවදි. ඉද්‌ධිවිධං ඉද්‌ධිපාටිහාරියං නාම. තෙන සහිතා අනුසාසනී එව ධම්‌මී කථා. තාය ථෙරො ඔවදි.
345. Parassa cittaṃ ñatvā kathanaṃ ādesanāpāṭihāriyaṃ. Kevalaṃ dhammadesanā anusāsanīpāṭihāriyaṃ. Tadubhayampi dhammī kathā nāma. Tāya thero ovadi. Iddhividhaṃ iddhipāṭihāriyaṃ nāma. Tena sahitā anusāsanī eva dhammī kathā. Tāya thero ovadi.
‘‘ථුල්‌ලච්‌චයං දෙසාපෙහී’’ති ඉදං භෙදපුරෙක්‌ඛාරස්‌ස උපොසථාදිකරණෙ ථුල්‌ලච්‌චයස්‌ස උපොසථක්‌ඛන්‌ධකාදීසු පඨමමෙව පඤ්‌ඤත්‌තත්‌තා වුත්‌තං, ඉතරථා එතෙසං ආදිකම්‌මිකත්‌තා අනාපත්‌තියෙව සියා.
‘‘Thullaccayaṃ desāpehī’’ti idaṃ bhedapurekkhārassa uposathādikaraṇe thullaccayassa uposathakkhandhakādīsu paṭhamameva paññattattā vuttaṃ, itarathā etesaṃ ādikammikattā anāpattiyeva siyā.
346. සරසීති සරො. මහිං වික්‍රුබ්‌බතොති මහිං දන්‌තෙහි විලිඛන්‌තස්‌ස. ඉදඤ්‌ච හත්‌ථීනං සභාවදස්‌සනං. නදීසූති සරෙසු. භිසං ඝසමානස්‌සාති යොජනා. ජග්‌ගතොති යූථං පාලෙන්‌තස්‌ස.
346.Sarasīti saro. Mahiṃ vikrubbatoti mahiṃ dantehi vilikhantassa. Idañca hatthīnaṃ sabhāvadassanaṃ. Nadīsūti saresu. Bhisaṃ ghasamānassāti yojanā. Jaggatoti yūthaṃ pālentassa.
347. දූතෙය්‍යං ගන්‌තුන්‌ති දූතකම්‌මං පත්‌තුං, දූතකම්‌මං කාතුන්‌ති අත්‌ථො. සහිතාසහිතස්‌සාති යුත්‌තායුත්‌තස්‌ස, යං වත්‌තුං, කාතුඤ්‌ච යුත්‌තං, තත්‌ථ කුසලො. අථ වා අධිප්‌පෙතානාධිප්‌පෙතස්‌ස වචනස්‌ස කුසලො, බ්‍යඤ්‌ජනමත්‌තෙ න තිට්‌ඨති, අධිප්‌පෙතත්‌ථමෙව ආරොචෙතීති අත්‌ථො.
347.Dūteyyaṃgantunti dūtakammaṃ pattuṃ, dūtakammaṃ kātunti attho. Sahitāsahitassāti yuttāyuttassa, yaṃ vattuṃ, kātuñca yuttaṃ, tattha kusalo. Atha vā adhippetānādhippetassa vacanassa kusalo, byañjanamatte na tiṭṭhati, adhippetatthameva ārocetīti attho.
350. ගාථාසු ජාතූති එකංසෙන. මා උදපජ්‌ජථ මා හොතූති අත්‌ථො. පාපිච්‌ඡානං යථාගතීති පාපිච්‌ඡානං පුග්‌ගලානං යාදිසී ගති අභිසම්‌පරායො. තං අත්‌ථජාතං. ඉමිනාපි කාරණෙන ජානාථාති දෙවදත්‌තස්‌ස ‘‘පණ්‌ඩිතො’’තිආදිනා උපරි වක්‌ඛමානාකාරං දස්‌සෙති.
350. Gāthāsu jātūti ekaṃsena. Mā udapajjatha mā hotūti attho. Pāpicchānaṃ yathāgatīti pāpicchānaṃ puggalānaṃ yādisī gati abhisamparāyo. Taṃ atthajātaṃ. Imināpi kāraṇena jānāthāti devadattassa ‘‘paṇḍito’’tiādinā upari vakkhamānākāraṃ dasseti.
පමාදං අනුචිණ්‌ණොති පමාදං ආපන්‌නො. ආසීසායන්‌ති අවස්‌සංභාවීඅත්‌ථසිද්‌ධියං. සා හි ඉධ ආසීසාති අධිප්‌පෙතා, න පත්‌ථනා. ඊදිසෙ අනාගතත්‌ථෙ අතීතවචනං සද්‌දවිදූ ඉච්‌ඡන්‌ති.
Pamādaṃ anuciṇṇoti pamādaṃ āpanno. Āsīsāyanti avassaṃbhāvīatthasiddhiyaṃ. Sā hi idha āsīsāti adhippetā, na patthanā. Īdise anāgatatthe atītavacanaṃ saddavidū icchanti.
දුබ්‌භෙති දුබ්‌භෙය්‍ය. විසකුම්‌භෙනාති එකෙන විසපුණ්‌ණකුම්‌භෙන. සොති සො පුග්‌ගලො. න පදූසෙය්‍ය විසමිස්‌සං කාතුං න සක්‌කොතීති අත්‌ථො. භයානකොති විපුලගම්‌භීරභාවෙන භයානකො. තෙනාපි දූසෙතුං න සක්‌කුණෙය්‍යතං දස්‌සෙති. වාදෙනාති දොසකථනෙන. උපහිංසතීති බාධති.
Dubbheti dubbheyya. Visakumbhenāti ekena visapuṇṇakumbhena. Soti so puggalo. Na padūseyya visamissaṃ kātuṃ na sakkotīti attho. Bhayānakoti vipulagambhīrabhāvena bhayānako. Tenāpi dūsetuṃ na sakkuṇeyyataṃ dasseti. Vādenāti dosakathanena. Upahiṃsatīti bādhati.
සඞ්‌ඝභෙදකකථාවණ්‌ණනා නිට්‌ඨිතා.
Saṅghabhedakakathāvaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / චූළවග්‌ගපාළි • Cūḷavaggapāḷi / සඞ්‌ඝභෙදකථා • Saṅghabhedakathā
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / චූළවග්‌ග-අට්‌ඨකථා • Cūḷavagga-aṭṭhakathā / සඞ්‌ඝභෙදකකථා • Saṅghabhedakakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / සඞ්‌ඝභෙදකථාවණ්‌ණනා • Saṅghabhedakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / ඡසක්‍යපබ්‌බජ්‌ජාකථාවණ්‌ණනා • Chasakyapabbajjākathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / සඞ්‌ඝභෙදකථා • Saṅghabhedakathā
