| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
(២៥) ៥. អាបត្តិភយវគ្គោ
(25) 5. Āpattibhayavaggo
១. សង្ឃភេទកសុត្តវណ្ណនា
1. Saṅghabhedakasuttavaṇṇanā
២៤៣. បញ្ចមស្ស បឋមេ អបិ នុ តំ, អានន្ទ, អធិករណន្តិ វិវាទាធិករណាទីសុ អញ្ញតរំ អធិករណំ ភិក្ខុសង្ឃស្ស ឧប្បជ្ជិ, សត្ថា តស្ស វូបសន្តភាវំ បុច្ឆន្តោ ឯវមាហ។ កុតោ តំ, ភន្តេតិ, ភន្តេ, កុតោ កិន្តិ កេន ការណេន តំ អធិករណំ វូបសមិស្សតីតិ វទតិ។ កេវលកប្បន្តិ សកលំ សមន្តតោ។ សង្ឃភេទាយ ឋិតោតិ សង្ឃេន សទ្ធិំ វាទត្ថាយ កថិតំ បដិកថេន្តោវ ឋិតោ។ តត្រាយស្មាតិ តស្មិំ ឯវំ ឋិតេ អាយស្មា អនុរុទ្ធោ។ ន ឯកវាចិកម្បិ ភណិតព្ពំ មញ្ញតីតិ ‘‘មា, អាវុសោ, សង្ឃេន សទ្ធិំ ឯវំ អវចា’’តិ ឯកវចនម្បិ វត្តព្ពំ ន មញ្ញតិ។ វោយុញ្ជតីតិ អនុយុញ្ជតិ អនុយោគំ អាបជ្ជតិ។ អត្ថវសេតិ ការណវសេ។ នាសេស្សន្តីតិ ឧបោសថប្បវារណំ ឧបគន្តុំ អទត្វា និក្កឌ្ឍិស្សន្តិ។ សេសំ បាឡិវសេនេវ វេទិតព្ពំ។
243. Pañcamassa paṭhame api nu taṃ, ānanda, adhikaraṇanti vivādādhikaraṇādīsu aññataraṃ adhikaraṇaṃ bhikkhusaṅghassa uppajji, satthā tassa vūpasantabhāvaṃ pucchanto evamāha. Kuto taṃ, bhanteti, bhante, kuto kinti kena kāraṇena taṃ adhikaraṇaṃ vūpasamissatīti vadati. Kevalakappanti sakalaṃ samantato. Saṅghabhedāya ṭhitoti saṅghena saddhiṃ vādatthāya kathitaṃ paṭikathentova ṭhito. Tatrāyasmāti tasmiṃ evaṃ ṭhite āyasmā anuruddho. Na ekavācikampi bhaṇitabbaṃ maññatīti ‘‘mā, āvuso, saṅghena saddhiṃ evaṃ avacā’’ti ekavacanampi vattabbaṃ na maññati. Voyuñjatīti anuyuñjati anuyogaṃ āpajjati. Atthavaseti kāraṇavase. Nāsessantīti uposathappavāraṇaṃ upagantuṃ adatvā nikkaḍḍhissanti. Sesaṃ pāḷivaseneva veditabbaṃ.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ១. សង្ឃភេទកសុត្តំ • 1. Saṅghabhedakasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១. សង្ឃភេទកសុត្តវណ្ណនា • 1. Saṅghabhedakasuttavaṇṇanā
