| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
(၂၅) ၅. အာပတ္တိဘယဝဂ္ဂော
(25) 5. Āpattibhayavaggo
၁. သင္ဃဘေဒကသုတ္တဝဏ္ဏနာ
1. Saṅghabhedakasuttavaṇṇanā
၂၄၃. ပဉ္စမသ္သ ပဌမေ အပိ နု တံ, အာနန္ဒ, အဓိကရဏန္တိ ဝိဝာဒာဓိကရဏာဒီသု အညတရံ အဓိကရဏံ ဘိက္ခုသင္ဃသ္သ ဥပ္ပဇ္ဇိ, သတ္ထာ တသ္သ ဝူပသန္တဘာဝံ ပုစ္ဆန္တော ဧဝမာဟ။ ကုတော တံ, ဘန္တေတိ, ဘန္တေ, ကုတော ကိန္တိ ကေန ကာရဏေန တံ အဓိကရဏံ ဝူပသမိသ္သတီတိ ဝဒတိ။ ကေဝလကပ္ပန္တိ သကလံ သမန္တတော။ သင္ဃဘေဒာယ ဌိတောတိ သင္ဃေန သဒ္ဓိံ ဝာဒတ္ထာယ ကထိတံ ပဋိကထေန္တောဝ ဌိတော။ တတ္ရာယသ္မာတိ တသ္မိံ ဧဝံ ဌိတေ အာယသ္မာ အနုရုဒ္ဓော။ န ဧကဝာစိကမ္ပိ ဘဏိတဗ္ဗံ မညတီတိ ‘‘မာ, အာဝုသော, သင္ဃေန သဒ္ဓိံ ဧဝံ အဝစာ’’တိ ဧကဝစနမ္ပိ ဝတ္တဗ္ဗံ န မညတိ။ ဝောယုဉ္ဇတီတိ အနုယုဉ္ဇတိ အနုယောဂံ အာပဇ္ဇတိ။ အတ္ထဝသေတိ ကာရဏဝသေ။ နာသေသ္သန္တီတိ ဥပောသထပ္ပဝာရဏံ ဥပဂန္တုံ အဒတ္ဝာ နိက္ကဍ္ဎိသ္သန္တိ။ သေသံ ပာဠိဝသေနေဝ ဝေဒိတဗ္ဗံ။
243. Pañcamassa paṭhame api nu taṃ, ānanda, adhikaraṇanti vivādādhikaraṇādīsu aññataraṃ adhikaraṇaṃ bhikkhusaṅghassa uppajji, satthā tassa vūpasantabhāvaṃ pucchanto evamāha. Kuto taṃ, bhanteti, bhante, kuto kinti kena kāraṇena taṃ adhikaraṇaṃ vūpasamissatīti vadati. Kevalakappanti sakalaṃ samantato. Saṅghabhedāya ṭhitoti saṅghena saddhiṃ vādatthāya kathitaṃ paṭikathentova ṭhito. Tatrāyasmāti tasmiṃ evaṃ ṭhite āyasmā anuruddho. Na ekavācikampi bhaṇitabbaṃ maññatīti ‘‘mā, āvuso, saṅghena saddhiṃ evaṃ avacā’’ti ekavacanampi vattabbaṃ na maññati. Voyuñjatīti anuyuñjati anuyogaṃ āpajjati. Atthavaseti kāraṇavase. Nāsessantīti uposathappavāraṇaṃ upagantuṃ adatvā nikkaḍḍhissanti. Sesaṃ pāḷivaseneva veditabbaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁. သင္ဃဘေဒကသုတ္တံ • 1. Saṅghabhedakasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁. သင္ဃဘေဒကသုတ္တဝဏ္ဏနာ • 1. Saṅghabhedakasuttavaṇṇanā
