| Library / Tipiṭaka / তিপিটক • Tipiṭaka / চূল়ৰগ্গপাল়ি • Cūḷavaggapāḷi |
৩. ততিযভাণৰারো
3. Tatiyabhāṇavāro
সঙ্ঘভেদকথা
Saṅghabhedakathā
৩৪৪. অথ খো দেৰদত্তো তদহুপোসথে উট্ঠাযাসনা সলাকং গাহেসি – ‘‘মযং, আৰুসো, সমণং গোতমং উপসঙ্কমিত্ৰা পঞ্চ ৰত্থূনি যাচিম্হা – ‘ভগৰা, ভন্তে, অনেকপরিযাযেন অপ্পিচ্ছস্স…পে॰… ৰীরিযারম্ভস্স ৰণ্ণৰাদী। ইমানি, ভন্তে, পঞ্চ ৰত্থূনি অনেকপরিযাযেন অপ্পিচ্ছতায…পে॰… ৰীরিযারম্ভায সংৰত্তন্তি। সাধু, ভন্তে, ভিক্খূ যাৰজীৰং আরঞ্ঞিকা অস্সু; যো গামন্তং ওসরেয্য, ৰজ্জং নং ফুসেয্য…পে॰… যাৰজীৰং মচ্ছমংসং ন খাদেয্যুং; যো মচ্ছমংসং খাদেয্য, ৰজ্জং নং ফুসেয্যা’তি। ইমানি পঞ্চ ৰত্থূনি সমণো গোতমো নানুজানাতি। তে মযং ইমেহি পঞ্চহি ৰত্থূহি সমাদায ৰত্তাম। যস্সাযস্মতো ইমানি পঞ্চ ৰত্থূনি খমন্তি, সো সলাকং গণ্হাতূ’’তি।
344. Atha kho devadatto tadahuposathe uṭṭhāyāsanā salākaṃ gāhesi – ‘‘mayaṃ, āvuso, samaṇaṃ gotamaṃ upasaṅkamitvā pañca vatthūni yācimhā – ‘bhagavā, bhante, anekapariyāyena appicchassa…pe… vīriyārambhassa vaṇṇavādī. Imāni, bhante, pañca vatthūni anekapariyāyena appicchatāya…pe… vīriyārambhāya saṃvattanti. Sādhu, bhante, bhikkhū yāvajīvaṃ āraññikā assu; yo gāmantaṃ osareyya, vajjaṃ naṃ phuseyya…pe… yāvajīvaṃ macchamaṃsaṃ na khādeyyuṃ; yo macchamaṃsaṃ khādeyya, vajjaṃ naṃ phuseyyā’ti. Imāni pañca vatthūni samaṇo gotamo nānujānāti. Te mayaṃ imehi pañcahi vatthūhi samādāya vattāma. Yassāyasmato imāni pañca vatthūni khamanti, so salākaṃ gaṇhātū’’ti.
তেন খো পন সমযেন ৰেসালিকা ৰজ্জিপুত্তকা পঞ্চমত্তানি ভিক্খুসতানি নৰকা চেৰ হোন্তি অপ্পকতঞ্ঞুনো চ। তে – ‘অযং ধম্মো , অযং ৰিনযো, ইদং সত্থুসাসন’ন্তি – সলাকং গণ্হিংসু। অথ খো দেৰদত্তো সঙ্ঘং ভিন্দিত্ৰা পঞ্চমত্তানি ভিক্খুসতানি আদায যেন গযাসীসং তেন পক্কামি। অথ খো সারিপুত্তমোগ্গল্লানা যেন ভগৰা তেনুপসঙ্কমিংসু, উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু। একমন্তং নিসিন্নো খো আযস্মা সারিপুত্তো ভগৰন্তং এতদৰোচ – ‘‘দেৰদত্তো, ভন্তে, সঙ্ঘং ভিন্দিত্ৰা পঞ্চমত্তানি ভিক্খুসতানি আদায যেন গযাসীসং তেন পক্কন্তো’’তি। ‘‘ন হি নাম তুম্হাকং, সারিপুত্তা, তেসু নৰকেসু ভিক্খূসু কারুঞ্ঞম্পি ভৰিস্সতি? গচ্ছথ তুম্হে, সারিপুত্তা, পুরা তে ভিক্খূ অনযব্যসনং আপজ্জন্তী’’তি। ‘‘এৰং ভন্তে’’তি খো সারিপুত্তমোগ্গল্লানা ভগৰতো পটিস্সুত্ৰা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা যেন গযাসীসং তেনুপসঙ্কমিংসু।
Tena kho pana samayena vesālikā vajjiputtakā pañcamattāni bhikkhusatāni navakā ceva honti appakataññuno ca. Te – ‘ayaṃ dhammo , ayaṃ vinayo, idaṃ satthusāsana’nti – salākaṃ gaṇhiṃsu. Atha kho devadatto saṅghaṃ bhinditvā pañcamattāni bhikkhusatāni ādāya yena gayāsīsaṃ tena pakkāmi. Atha kho sāriputtamoggallānā yena bhagavā tenupasaṅkamiṃsu, upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinno kho āyasmā sāriputto bhagavantaṃ etadavoca – ‘‘devadatto, bhante, saṅghaṃ bhinditvā pañcamattāni bhikkhusatāni ādāya yena gayāsīsaṃ tena pakkanto’’ti. ‘‘Na hi nāma tumhākaṃ, sāriputtā, tesu navakesu bhikkhūsu kāruññampi bhavissati? Gacchatha tumhe, sāriputtā, purā te bhikkhū anayabyasanaṃ āpajjantī’’ti. ‘‘Evaṃ bhante’’ti kho sāriputtamoggallānā bhagavato paṭissutvā uṭṭhāyāsanā bhagavantaṃ abhivādetvā padakkhiṇaṃ katvā yena gayāsīsaṃ tenupasaṅkamiṃsu.
তেন খো পন সমযেন অঞ্ঞতরো ভিক্খু ভগৰতো অৰিদূরে রোদমানো ঠিতো হোতি। অথ খো ভগৰা তং ভিক্খুং এতদৰোচ – ‘‘কিস্স ত্ৰং, ভিক্খু, রোদসী’’তি? ‘‘যেপি তে, ভন্তে, ভগৰতো অগ্গসাৰকা সারিপুত্তমোগ্গল্লানা তেপি দেৰদত্তস্স সন্তিকে গচ্ছন্তি দেৰদত্তস্স ধম্মং রোচেন্তা’’তি। ‘‘অট্ঠানমেতং, ভিক্খু, অনৰকাসো, যং সারিপুত্তমোগ্গল্লানা দেৰদত্তস্স ধম্মং রোচেয্যুং, অপি চ তে গতা ভিক্খূনং সঞ্ঞত্তিযা’’তি 1।
Tena kho pana samayena aññataro bhikkhu bhagavato avidūre rodamāno ṭhito hoti. Atha kho bhagavā taṃ bhikkhuṃ etadavoca – ‘‘kissa tvaṃ, bhikkhu, rodasī’’ti? ‘‘Yepi te, bhante, bhagavato aggasāvakā sāriputtamoggallānā tepi devadattassa santike gacchanti devadattassa dhammaṃ rocentā’’ti. ‘‘Aṭṭhānametaṃ, bhikkhu, anavakāso, yaṃ sāriputtamoggallānā devadattassa dhammaṃ roceyyuṃ, api ca te gatā bhikkhūnaṃ saññattiyā’’ti 2.
৩৪৫. তেন খো পন সমযেন দেৰদত্তো মহতিযা পরিসায পরিৰুত্তো ধম্মং দেসেন্তো নিসিন্নো হোতি। অদ্দসা খো দেৰদত্তো সারিপুত্তমোগ্গল্লানে দূরতোৰ আগচ্ছন্তে। দিস্ৰান ভিক্খূ আমন্তেসি – ‘‘পস্সথ, ভিক্খৰে, যাৰ স্ৰাক্খাতো মযা ধম্মো, যেপি তে সমণস্স গোতমস্স অগ্গসাৰকা সারিপুত্তমোগ্গল্লানা তেপি মম সন্তিকে আগচ্ছন্তি। মম ধম্মং রোচেন্তা’’তি। এৰং ৰুত্তে কোকালিকো দেৰদত্তং এতদৰোচ – ‘‘মা, আৰুসো দেৰদত্ত, সারিপুত্তমোগ্গল্লানে ৰিস্সসি । পাপিচ্ছা সারিপুত্তমোগ্গল্লানা , পাপিকানং ইচ্ছানং ৰসং গতা’’তি। ‘‘অলং, আৰুসো। স্ৰাগতং তেসং যতো মে ধম্মং রোচেন্তী’’তি।
345. Tena kho pana samayena devadatto mahatiyā parisāya parivutto dhammaṃ desento nisinno hoti. Addasā kho devadatto sāriputtamoggallāne dūratova āgacchante. Disvāna bhikkhū āmantesi – ‘‘passatha, bhikkhave, yāva svākkhāto mayā dhammo, yepi te samaṇassa gotamassa aggasāvakā sāriputtamoggallānā tepi mama santike āgacchanti. Mama dhammaṃ rocentā’’ti. Evaṃ vutte kokāliko devadattaṃ etadavoca – ‘‘mā, āvuso devadatta, sāriputtamoggallāne vissasi . Pāpicchā sāriputtamoggallānā , pāpikānaṃ icchānaṃ vasaṃ gatā’’ti. ‘‘Alaṃ, āvuso. Svāgataṃ tesaṃ yato me dhammaṃ rocentī’’ti.
অথ খো দেৰদত্তো আযস্মন্তং সারিপুত্তং উপড্ঢাসনেন নিমন্তেসি – ‘‘এহাৰুসো সারিপুত্ত, ইধ নিসীদাহী’’তি। ‘‘অলং আৰুসো’’তি খো আযস্মা সারিপুত্তো অঞ্ঞতরং আসনং গহেত্ৰা একমন্তং নিসীদি। আযস্মাপি খো মহামোগ্গল্লানো অঞ্ঞতরং আসনং গহেত্ৰা একমন্তং নিসীদি। অথ খো দেৰদত্তো বহুদেৰ রত্তিং ভিক্খূ ধম্মিযা কথায সন্দস্সেত্ৰা সমাদপেত্ৰা সমুত্তেজেত্ৰা সম্পহংসেত্ৰা আযস্মন্তং সারিপুত্তং অজ্ঝেসি – ‘‘ৰিগতথিনমিদ্ধো খো, আৰুসো সারিপুত্ত, ভিক্খুসঙ্ঘো। পটিভাতু তং, আৰুসো সারিপুত্ত, ভিক্খূনং ধম্মী কথা, পিট্ঠি মে আগিলাযতি, তমহং আযমিস্সামী’’তি। ‘‘এৰমাৰুসো’’তি খো আযস্মা সারিপুত্তো দেৰদত্তস্স পচ্চস্সোসি। অথ খো দেৰদত্তো চতুগ্গুণং সঙ্ঘাটিং পঞ্ঞাপেত্ৰা দক্খিণেন পস্সেন সেয্যং কপ্পেসি। তস্স কিলমন্তস্স মুট্ঠস্সতিস্স অসম্পজানস্স মুহুত্তকেনেৰ নিদ্দা ওক্কমি।
Atha kho devadatto āyasmantaṃ sāriputtaṃ upaḍḍhāsanena nimantesi – ‘‘ehāvuso sāriputta, idha nisīdāhī’’ti. ‘‘Alaṃ āvuso’’ti kho āyasmā sāriputto aññataraṃ āsanaṃ gahetvā ekamantaṃ nisīdi. Āyasmāpi kho mahāmoggallāno aññataraṃ āsanaṃ gahetvā ekamantaṃ nisīdi. Atha kho devadatto bahudeva rattiṃ bhikkhū dhammiyā kathāya sandassetvā samādapetvā samuttejetvā sampahaṃsetvā āyasmantaṃ sāriputtaṃ ajjhesi – ‘‘vigatathinamiddho kho, āvuso sāriputta, bhikkhusaṅgho. Paṭibhātu taṃ, āvuso sāriputta, bhikkhūnaṃ dhammī kathā, piṭṭhi me āgilāyati, tamahaṃ āyamissāmī’’ti. ‘‘Evamāvuso’’ti kho āyasmā sāriputto devadattassa paccassosi. Atha kho devadatto catugguṇaṃ saṅghāṭiṃ paññāpetvā dakkhiṇena passena seyyaṃ kappesi. Tassa kilamantassa muṭṭhassatissa asampajānassa muhuttakeneva niddā okkami.
অথ খো আযস্মা সারিপুত্তো আদেসনাপাটিহারিযানুসাসনিযা ভিক্খূ ধম্মিযা কথায ওৰদি অনুসাসি। আযস্মা মহামোগ্গল্লানো ইদ্ধিপাটিহারিযানুসাসনিযা ভিক্খূ ধম্মিযা কথায ওৰদি অনুসাসি। অথ খো তেসং ভিক্খূনং আযস্মতা সারিপুত্তেন আদেসনাপাটিহারিযানুসাসনিযা আযস্মতা চ মহামোগ্গল্লানেন ইদ্ধিপাটিহারিযানুসাসনিযা ওৰদিযমানানং অনুসাসিযমানানং ৰিরজং ৰীতমলং ধম্মচক্খুং উদপাদি – যং কিঞ্চি সমুদযধম্মং, সব্বং তং নিরোধধম্মন্তি।
Atha kho āyasmā sāriputto ādesanāpāṭihāriyānusāsaniyā bhikkhū dhammiyā kathāya ovadi anusāsi. Āyasmā mahāmoggallāno iddhipāṭihāriyānusāsaniyā bhikkhū dhammiyā kathāya ovadi anusāsi. Atha kho tesaṃ bhikkhūnaṃ āyasmatā sāriputtena ādesanāpāṭihāriyānusāsaniyā āyasmatā ca mahāmoggallānena iddhipāṭihāriyānusāsaniyā ovadiyamānānaṃ anusāsiyamānānaṃ virajaṃ vītamalaṃ dhammacakkhuṃ udapādi – yaṃ kiñci samudayadhammaṃ, sabbaṃ taṃ nirodhadhammanti.
অথ খো আযস্মা সারিপুত্তো ভিক্খূ আমন্তেসি – ‘‘গচ্ছাম মযং, আৰুসো, ভগৰতো সন্তিকে। যো তস্স ভগৰতো ধম্মং রোচেসি সো আগচ্ছতূ’’তি। অথ খো সারিপুত্তমোগ্গল্লানা তানি পঞ্চভিক্খুসতানি আদায যেন ৰেল়ুৰনং তেনুপসঙ্কমিংসু। অথ খো কোকালিকো দেৰদত্তং উট্ঠাপেসি – ‘‘উট্ঠেহি, আৰুসো দেৰদত্ত, নীতা তে ভিক্খূ সারিপুত্তমোগ্গল্লানেহি। ননু ত্ৰং, আৰুসো দেৰদত্ত, মযা ৰুত্তো – ‘মা, আৰুসো দেৰদত্ত, সারিপুত্তমোগ্গল্লানে ৰিস্সাসি। পাপিচ্ছা সারিপুত্তমোগ্গল্লানা, পাপিকানং ইচ্ছানং ৰসং গতা’’’তি? অথ খো দেৰদত্তস্স তত্থেৰ উণ্হং লোহিতং মুখতো উগ্গঞ্ছি।
Atha kho āyasmā sāriputto bhikkhū āmantesi – ‘‘gacchāma mayaṃ, āvuso, bhagavato santike. Yo tassa bhagavato dhammaṃ rocesi so āgacchatū’’ti. Atha kho sāriputtamoggallānā tāni pañcabhikkhusatāni ādāya yena veḷuvanaṃ tenupasaṅkamiṃsu. Atha kho kokāliko devadattaṃ uṭṭhāpesi – ‘‘uṭṭhehi, āvuso devadatta, nītā te bhikkhū sāriputtamoggallānehi. Nanu tvaṃ, āvuso devadatta, mayā vutto – ‘mā, āvuso devadatta, sāriputtamoggallāne vissāsi. Pāpicchā sāriputtamoggallānā, pāpikānaṃ icchānaṃ vasaṃ gatā’’’ti? Atha kho devadattassa tattheva uṇhaṃ lohitaṃ mukhato uggañchi.
অথ খো সারিপুত্তমোগ্গল্লানা যেন ভগৰা তেনুপসঙ্কমিংসু, উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিসুং। একমন্তং নিসিন্নো খো আযস্মা সারিপুত্তো ভগৰন্তং এতদৰোচ – ‘‘সাধু, ভন্তে , ভেদকানুৰত্তকা ভিক্খূ পুন উপসম্পজ্জেয্যু’’ন্তি। ‘‘অলং, সারিপুত্ত। মা তে রুচ্চি ভেদকানুৰত্তকানং ভিক্খূনং পুন উপসম্পদা। তেন হি ত্ৰং, সারিপুত্ত, ভেদকানুৰত্তকে ভিক্খূ থুল্লচ্চযং দেসাপেহি। কথং পন তে, সারিপুত্ত, দেৰদত্তো পটিপজ্জী’’তি? ‘‘যথেৰ, ভন্তে, ভগৰা বহুদেৰ রত্তিং ভিক্খূ ধম্মিযা কথায সন্দস্সেত্ৰা সমাদপেত্ৰা সমুত্তেজেত্ৰা সম্পহংসেত্ৰা মং অজ্ঝেসতি – ‘ৰিগতথিনমিদ্ধো খো , সারিপুত্ত, ভিক্খুসঙ্ঘো; পটিভাতু তং, সারিপুত্ত, ভিক্খূনং ধম্মী কথা, পিট্ঠি মে আগিলাযতি, তমহং আযমিস্সামী’তি, এৰমেৰ খো, ভন্তে, দেৰদত্তো পটিপজ্জী’’তি।
Atha kho sāriputtamoggallānā yena bhagavā tenupasaṅkamiṃsu, upasaṅkamitvā bhagavantaṃ abhivādetvā ekamantaṃ nisīdisuṃ. Ekamantaṃ nisinno kho āyasmā sāriputto bhagavantaṃ etadavoca – ‘‘sādhu, bhante , bhedakānuvattakā bhikkhū puna upasampajjeyyu’’nti. ‘‘Alaṃ, sāriputta. Mā te rucci bhedakānuvattakānaṃ bhikkhūnaṃ puna upasampadā. Tena hi tvaṃ, sāriputta, bhedakānuvattake bhikkhū thullaccayaṃ desāpehi. Kathaṃ pana te, sāriputta, devadatto paṭipajjī’’ti? ‘‘Yatheva, bhante, bhagavā bahudeva rattiṃ bhikkhū dhammiyā kathāya sandassetvā samādapetvā samuttejetvā sampahaṃsetvā maṃ ajjhesati – ‘vigatathinamiddho kho , sāriputta, bhikkhusaṅgho; paṭibhātu taṃ, sāriputta, bhikkhūnaṃ dhammī kathā, piṭṭhi me āgilāyati, tamahaṃ āyamissāmī’ti, evameva kho, bhante, devadatto paṭipajjī’’ti.
৩৪৬. অথ খো ভগৰা ভিক্খূ আমন্তেসি – ‘‘ভূতপুব্বং, ভিক্খৰে, অরঞ্ঞাযতনে মহাসরসী। তং নাগা উপনিস্সায ৰিহরিংসু। তে তং সরসিং ওগাহেত্ৰা, সোণ্ডায ভিসমুল়ালং অব্বুহিত্ৰা, সুৰিক্খালিতং ৰিক্খালেত্ৰা, অকদ্দমং সঙ্খাদিত্ৰা, অজ্ঝোহরন্তি। তেসং তং ৰণ্ণায চেৰ হোতি, বলায চ। ন চ ততোনিদানং মরণং ৰা নিগচ্ছন্তি, মরণমত্তং ৰা দুক্খং। তেসংযেৰ খো পন, ভিক্খৰে, মহানাগানং অনুসিক্খমানা তরুণা ভিঙ্কচ্ছাপা। তে তং সরসিং ওগাহেত্ৰা, সোণ্ডায ভিসমুল়ালং অব্বুহিত্ৰা, ন সুৰিক্খালিতং ৰিক্খালেত্ৰা, সকদ্দমং সঙ্খাদিত্ৰা, অজ্ঝোহরন্তি। তেসং তং নেৰ ৰণ্ণায হোতি, ন বলায। ততোনিদানঞ্চ মরণং ৰা নিগচ্ছন্তি, মরণমত্তং ৰা দুক্খং। এৰমেৰ খো, ভিক্খৰে, দেৰদত্তো মমানুক্রুব্বং 3 কপণো মরিস্সতীতি।
346. Atha kho bhagavā bhikkhū āmantesi – ‘‘bhūtapubbaṃ, bhikkhave, araññāyatane mahāsarasī. Taṃ nāgā upanissāya vihariṃsu. Te taṃ sarasiṃ ogāhetvā, soṇḍāya bhisamuḷālaṃ abbuhitvā, suvikkhālitaṃ vikkhāletvā, akaddamaṃ saṅkhāditvā, ajjhoharanti. Tesaṃ taṃ vaṇṇāya ceva hoti, balāya ca. Na ca tatonidānaṃ maraṇaṃ vā nigacchanti, maraṇamattaṃ vā dukkhaṃ. Tesaṃyeva kho pana, bhikkhave, mahānāgānaṃ anusikkhamānā taruṇā bhiṅkacchāpā. Te taṃ sarasiṃ ogāhetvā, soṇḍāya bhisamuḷālaṃ abbuhitvā, na suvikkhālitaṃ vikkhāletvā, sakaddamaṃ saṅkhāditvā, ajjhoharanti. Tesaṃ taṃ neva vaṇṇāya hoti, na balāya. Tatonidānañca maraṇaṃ vā nigacchanti, maraṇamattaṃ vā dukkhaṃ. Evameva kho, bhikkhave, devadatto mamānukrubbaṃ 4 kapaṇo marissatīti.
ভিঙ্কোৰ পঙ্কং অভিভক্খযিত্ৰা, মমানুক্রুব্বং কপণো মরিস্সতী’’তি॥
Bhiṅkova paṅkaṃ abhibhakkhayitvā, mamānukrubbaṃ kapaṇo marissatī’’ti.
৩৪৭. 9 ‘‘অট্ঠহি, ভিক্খৰে, অঙ্গেহি সমন্নাগতো ভিক্খু দূতেয্যং গন্তুমরহতি। কতমেহি অট্ঠহি? ইধ, ভিক্খৰে, ভিক্খু সোতা চ হোতি, সাৰেতা চ, উগ্গহেতা চ, ধারেতা চ, ৰিঞ্ঞাতা চ, ৰিঞ্ঞাপেতা চ, কুসলো চ সহিতাসহিতস্স, নো চ কলহকারকো – ইমেহি খো, ভিক্খৰে, অট্ঠহঙ্গেহি সমন্নাগতো ভিক্খু দূতেয্যং গন্তুমরহতি।
347.10 ‘‘Aṭṭhahi, bhikkhave, aṅgehi samannāgato bhikkhu dūteyyaṃ gantumarahati. Katamehi aṭṭhahi? Idha, bhikkhave, bhikkhu sotā ca hoti, sāvetā ca, uggahetā ca, dhāretā ca, viññātā ca, viññāpetā ca, kusalo ca sahitāsahitassa, no ca kalahakārako – imehi kho, bhikkhave, aṭṭhahaṅgehi samannāgato bhikkhu dūteyyaṃ gantumarahati.
11 ‘‘অট্ঠহি , ভিক্খৰে, অঙ্গেহি সমন্নাগতো সারিপুত্তো দূতেয্যং গন্তুমরহতি। কতমেহি অট্ঠহি? ইধ, ভিক্খৰে, সারিপুত্তো সোতা চ হোতি, সাৰেতা চ, উগ্গহেতা চ, ধারেতা চ, ৰিঞ্ঞাতা চ, ৰিঞ্ঞাপেতা চ, কুসলো চ সহিতাসহিতস্স, নো চ কলহকারকো – ইমেহি খো, ভিক্খৰে, অট্ঠহঙ্গেহি সমন্নাগতো সারিপুত্তো দূতেয্যং গন্তুমরহতীতি।
12 ‘‘Aṭṭhahi , bhikkhave, aṅgehi samannāgato sāriputto dūteyyaṃ gantumarahati. Katamehi aṭṭhahi? Idha, bhikkhave, sāriputto sotā ca hoti, sāvetā ca, uggahetā ca, dhāretā ca, viññātā ca, viññāpetā ca, kusalo ca sahitāsahitassa, no ca kalahakārako – imehi kho, bhikkhave, aṭṭhahaṅgehi samannāgato sāriputto dūteyyaṃ gantumarahatīti.
ন চ হাপেতি ৰচনং, ন চ ছাদেতি সাসনং॥
Na ca hāpeti vacanaṃ, na ca chādeti sāsanaṃ.
‘‘অসন্দিদ্ধো চ অক্খাতি 17, পুচ্ছিতো চ ন কুপ্পতি।
‘‘Asandiddho ca akkhāti 18, pucchito ca na kuppati;
স ৰে তাদিসকো ভিক্খু, দূতেয্যং গন্তুমরহতী’’তি॥
Sa ve tādisako bhikkhu, dūteyyaṃ gantumarahatī’’ti.
৩৪৮. 19 ‘‘অট্ঠহি, ভিক্খৰে, অসদ্ধম্মেহি অভিভূতো পরিযাদিন্নচিত্তো দেৰদত্তো আপাযিকো নেরযিকো কপ্পট্ঠো অতেকিচ্ছো। কতমেহি অট্ঠহি ? লাভেন, ভিক্খৰে, অভিভূতো পরিযাদিন্নচিত্তো দেৰদত্তো আপাযিকো নেরযিকো কপ্পট্ঠো অতেকিচ্ছো; অলাভেন, ভিক্খৰে…পে॰… যসেন, ভিক্খৰে…পে॰… অযসেন, ভিক্খৰে…পে॰… সক্কারেন, ভিক্খৰে…পে॰… অসক্কারেন, ভিক্খৰে…পে॰… পাপিচ্ছতায, ভিক্খৰে…পে॰… পাপমিত্ততায ভিক্খৰে, অভিভূতো পরিযাদিন্নচিত্তো দেৰদত্তো আপাযিকো নেরযিকো কপ্পট্ঠো অতেকিচ্ছো – ইমেহি খো, ভিক্খৰে, অট্ঠহি অসদ্ধম্মেহি অভিভূতো পরিযাদিন্নচিত্তো দেৰদত্তো আপাযিকো নেরযিকো কপ্পট্ঠো অতেকিচ্ছো।
348.20 ‘‘Aṭṭhahi, bhikkhave, asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho. Katamehi aṭṭhahi ? Lābhena, bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho; alābhena, bhikkhave…pe… yasena, bhikkhave…pe… ayasena, bhikkhave…pe… sakkārena, bhikkhave…pe… asakkārena, bhikkhave…pe… pāpicchatāya, bhikkhave…pe… pāpamittatāya bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho – imehi kho, bhikkhave, aṭṭhahi asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho.
৩৪৯. ‘‘সাধু, ভিক্খৰে, ভিক্খু উপ্পন্নং লাভং অভিভুয্য অভিভুয্য ৰিহরেয্য, উপ্পন্নং অলাভং…পে॰… উপ্পন্নং যসং… উপ্পন্নং অযসং… উপ্পন্নং সক্কারং… উপ্পন্নং অসক্কারং… উপ্পন্নং পাপিচ্ছতং… উপ্পন্নং পাপমিত্ততং অভিভুয্য অভিভুয্য ৰিহরেয্য। কথঞ্চ, ভিক্খৰে, ভিক্খু অত্থৰসং পটিচ্চ উপ্পন্নং লাভং অভিভুয্য অভিভুয্য ৰিহরেয্য, উপ্পন্নং অলাভং…পে॰… উপ্পন্নং যসং… উপ্পন্নং অযসং… উপ্পন্নং সক্কারং… উপ্পন্নং অসক্কারং… উপ্পন্নং পাপিচ্ছতং… উপ্পন্নং পাপমিত্ততং অভিভুয্য অভিভুয্য ৰিহরেয্য? যং হিস্স, ভিক্খৰে, উপ্পন্নং লাভং অনভিভুয্য ৰিহরতো উপ্পজ্জেয্যুং আসৰা ৰিঘাতপরিল়াহা, উপ্পন্নং লাভং অভিভুয্য অভিভুয্য ৰিহরতো এৰংসতে আসৰা ৰিঘাতপরিল়াহা ন হোন্তি। যং হিস্স, ভিক্খৰে, উপ্পন্নং অলাভং…পে॰… উপ্পন্নং যসং… উপ্পন্নং অযসং… উপ্পন্নং সক্কারং… উপ্পন্নং অসক্কারং… উপ্পন্নং পাপিচ্ছতং… উপ্পন্নং পাপমিত্ততং অনভিভুয্য ৰিহরতো উপ্পজ্জেয্যুং আসৰা ৰিঘাতপরিল়াহা, উপ্পন্নং পাপমিত্ততং অভিভুয্য অভিভুয্য ৰিহরতো এৰংসতে আসৰা ৰিঘাতপরিল়াহা ন হোন্তি। ইদং খো, ভিক্খৰে, অত্থৰসং পটিচ্চ উপ্পন্নং লাভং অভিভুয্য অভিভুয্য ৰিহরেয্য, উপ্পন্নং অলাভং…পে॰… উপ্পন্নং যসং… উপ্পন্নং অযসং… উপ্পন্নং সক্কারং… উপ্পন্নং অসক্কারং… উপ্পন্নং পাপিচ্ছতং… উপ্পন্নং পাপমিত্ততং অভিভুয্য অভিভুয্য ৰিহরেয্য। তস্মাতিহ, ভিক্খৰে, উপ্পন্নং লাভং অভিভুয্য অভিভুয্য ৰিহরিস্সাম, উপ্পন্নং অলাভং…পে॰… উপ্পন্নং যসং… উপ্পন্নং অযসং… উপ্পন্নং সক্কারং… উপ্পন্নং অসক্কারং… উপ্পন্নং পাপিচ্ছতং… উপ্পন্নং পাপমিত্ততং অভিভুয্য অভিভুয্য ৰিহরিস্সামাতি; এৰঞ্হি ৰো, ভিক্খৰে, সিক্খিতব্বন্তি।
349. ‘‘Sādhu, bhikkhave, bhikkhu uppannaṃ lābhaṃ abhibhuyya abhibhuyya vihareyya, uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ abhibhuyya abhibhuyya vihareyya. Kathañca, bhikkhave, bhikkhu atthavasaṃ paṭicca uppannaṃ lābhaṃ abhibhuyya abhibhuyya vihareyya, uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ abhibhuyya abhibhuyya vihareyya? Yaṃ hissa, bhikkhave, uppannaṃ lābhaṃ anabhibhuyya viharato uppajjeyyuṃ āsavā vighātapariḷāhā, uppannaṃ lābhaṃ abhibhuyya abhibhuyya viharato evaṃsate āsavā vighātapariḷāhā na honti. Yaṃ hissa, bhikkhave, uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ anabhibhuyya viharato uppajjeyyuṃ āsavā vighātapariḷāhā, uppannaṃ pāpamittataṃ abhibhuyya abhibhuyya viharato evaṃsate āsavā vighātapariḷāhā na honti. Idaṃ kho, bhikkhave, atthavasaṃ paṭicca uppannaṃ lābhaṃ abhibhuyya abhibhuyya vihareyya, uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ abhibhuyya abhibhuyya vihareyya. Tasmātiha, bhikkhave, uppannaṃ lābhaṃ abhibhuyya abhibhuyya viharissāma, uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ abhibhuyya abhibhuyya viharissāmāti; evañhi vo, bhikkhave, sikkhitabbanti.
৩৫০. ‘‘তীহি, ভিক্খৰে, অসদ্ধম্মেহি অভিভূতো পরিযাদিন্নচিত্তো দেৰদত্তো আপাযিকো নেরযিকো কপ্পট্ঠো অতেকিচ্ছো। কতমেহি তীহি? পাপিচ্ছতা, পাপমিত্ততা, ওরমত্তকেন ৰিসেসাধিগমেন অন্তরা ৰোসানং আপাদি – ইমেহি খো, ভিক্খৰে, তীহি অসদ্ধম্মেহি অভিভূতো পরিযাদিন্নচিত্তো দেৰদত্তো আপাযিকো নেরযিকো কপ্পট্ঠো অতেকিচ্ছোতি।
350. ‘‘Tīhi, bhikkhave, asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho. Katamehi tīhi? Pāpicchatā, pāpamittatā, oramattakena visesādhigamena antarā vosānaṃ āpādi – imehi kho, bhikkhave, tīhi asaddhammehi abhibhūto pariyādinnacitto devadatto āpāyiko nerayiko kappaṭṭho atekicchoti.
‘‘মা জাতু কোচি লোকস্মিং, পাপিচ্ছো উদপজ্জথ।
‘‘Mā jātu koci lokasmiṃ, pāpiccho udapajjatha;
তদমিনাপি জানাথ, পাপিচ্ছানং যথাগতি॥
Tadamināpi jānātha, pāpicchānaṃ yathāgati.
‘‘পণ্ডিতোতি সমঞ্ঞাতো, ভাৰিতত্তোতি সম্মতো।
‘‘Paṇḍitoti samaññāto, bhāvitattoti sammato;
জলংৰ যসসা অট্ঠা, দেৰদত্তোতি মে সুতং॥
Jalaṃva yasasā aṭṭhā, devadattoti me sutaṃ.
‘‘সো পমাদং অনুচিণ্ণো, আসজ্জ নং তথাগতং।
‘‘So pamādaṃ anuciṇṇo, āsajja naṃ tathāgataṃ;
অৰীচিনিরযং পত্তো, চতুদ্ৰারং ভযানকং॥
Avīcinirayaṃ patto, catudvāraṃ bhayānakaṃ.
‘‘অদুট্ঠস্স হি যো দুব্ভে, পাপকম্মং অক্রুব্বতো।
‘‘Aduṭṭhassa hi yo dubbhe, pāpakammaṃ akrubbato;
তমেৰ পাপং ফুসতি, দুট্ঠচিত্তং অনাদরং॥
Tameva pāpaṃ phusati, duṭṭhacittaṃ anādaraṃ.
ন সো তেন পদূসেয্য, ভেস্মা হি উদধী মহা॥
Na so tena padūseyya, bhesmā hi udadhī mahā.
‘‘এৰমেৰ তথাগতং, যো ৰাদেনুপহিংসতি।
‘‘Evameva tathāgataṃ, yo vādenupahiṃsati;
‘‘তাদিসং মিত্তং ক্রুব্বেথ 25, তঞ্চ সেৰেথ পণ্ডিতো।
‘‘Tādisaṃ mittaṃ krubbetha 26, tañca sevetha paṇḍito;
যস্স মগ্গানুগো ভিক্খু, খযং দুক্খস্স পাপুণে’’তি॥
Yassa maggānugo bhikkhu, khayaṃ dukkhassa pāpuṇe’’ti.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / সঙ্ঘভেদককথা • Saṅghabhedakakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / সঙ্ঘভেদকথাৰণ্ণনা • Saṅghabhedakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ছসক্যপব্বজ্জাকথাৰণ্ণনা • Chasakyapabbajjākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / সঙ্ঘভেদককথাৰণ্ণনা • Saṅghabhedakakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / সঙ্ঘভেদকথা • Saṅghabhedakathā
