| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
সঙ্ঘভেদকথা
Saṅghabhedakathā
৩৪৪. সোতি দেৰদত্তো, গতো কিরাতি সম্বন্ধো। তত্থেৰাতি ৰিহারসীমাযমেৰ। আৰেণিকন্তি ভিক্খুসঙ্ঘতো আৰেণিকং।
344.Soti devadatto, gato kirāti sambandho. Tatthevāti vihārasīmāyameva. Āveṇikanti bhikkhusaṅghato āveṇikaṃ.
৩৪৫. আগিলাযতীতি এত্থ আত্যূপসগ্গো অভিভৰনত্থো, গিলেধাতু বাধনত্থোতি আহ ‘‘ৰেদনাভিভূতা বাধতী’’তি। তন্তি পিট্ঠিং। পরস্স চিত্তং আদিসিত্ৰা দেসযতি এতাযাতি আদেসনা, সা এৰ পাটিহারিযং আদেসনাপাটিহারিযং। অনুসাসতি এতাযাতি অনুসাসনী, ইমমেৰত্থং দস্সেন্তো আহ ‘‘এৰম্পি তে’’তিআদি।
345.Āgilāyatīti ettha ātyūpasaggo abhibhavanattho, giledhātu bādhanatthoti āha ‘‘vedanābhibhūtā bādhatī’’ti. Tanti piṭṭhiṃ. Parassa cittaṃ ādisitvā desayati etāyāti ādesanā, sā eva pāṭihāriyaṃ ādesanāpāṭihāriyaṃ. Anusāsati etāyāti anusāsanī, imamevatthaṃ dassento āha ‘‘evampi te’’tiādi.
৩৪৬. মমানুক্রুব্বন্তি এত্থ অনুত্যূপসগ্গো অনুকিরিযত্থো করধাতু অন্তপচ্চযো গচ্ছন্তাদিগণোতি দস্সেন্তো আহ ‘‘মমানুকিরিযং কুরুমানো’’তি। ‘‘দুক্খিতো’’তি ইমিনা কপণোতি এত্থ কপধাতু হিংসনত্থোতি দস্সেতি। মহাৰরাহস্সাতি ৰরাহসদ্দস্স সূকরত্থং পটিক্খিপন্তো আহ ‘‘মহানাগস্সা’’তি। ‘‘পথৰি’’ন্তি ইমিনা মহিং ৰিকুব্বতোতি এত্থ মহীসদ্দস্স এৰংনামকং মহানদিং পটিক্খিপতি। ‘‘পদালেন্তস্সা’’তি ইমিনা করধাতুযা ৰিত্যূপসগ্গৰসেন পদালনত্থং দস্সেতি। ভিসং ঘসমানস্সাতি এত্থ মানসদ্দো কত্ৰত্থোতি আহ ‘‘ভিসং ঘসন্তস্সা’’তি। ঘসন্তস্সাতি ভক্খন্তস্স। নদীনামকং তং পোক্খরণিন্তি যোজনা। ইমিনা নদীসু জগ্গতোতি এত্থ নদী নাম পোক্খরণীতি দস্সেতি। জগ্গতোতি হত্থিযূথং পালেন্তস্স।
346.Mamānukrubbanti ettha anutyūpasaggo anukiriyattho karadhātu antapaccayo gacchantādigaṇoti dassento āha ‘‘mamānukiriyaṃ kurumāno’’ti. ‘‘Dukkhito’’ti iminā kapaṇoti ettha kapadhātu hiṃsanatthoti dasseti. Mahāvarāhassāti varāhasaddassa sūkaratthaṃ paṭikkhipanto āha ‘‘mahānāgassā’’ti. ‘‘Pathavi’’nti iminā mahiṃ vikubbatoti ettha mahīsaddassa evaṃnāmakaṃ mahānadiṃ paṭikkhipati. ‘‘Padālentassā’’ti iminā karadhātuyā vityūpasaggavasena padālanatthaṃ dasseti. Bhisaṃghasamānassāti ettha mānasaddo katvatthoti āha ‘‘bhisaṃ ghasantassā’’ti. Ghasantassāti bhakkhantassa. Nadīnāmakaṃ taṃ pokkharaṇinti yojanā. Iminā nadīsu jaggatoti ettha nadī nāma pokkharaṇīti dasseti. Jaggatoti hatthiyūthaṃ pālentassa.
৩৪৭. ‘‘সুতাতি সোতা’’তি ইমিনা পাল়িযা দ্ৰিধাভাৰং দস্সেতি। ‘‘নিস্সন্দেহো’’তি ইমিনা অসন্দিদ্ধোতি এত্থ দিহধাতুং দস্সেতি, দিসধাতুং নিৰত্তেতি।
347. ‘‘Sutāti sotā’’ti iminā pāḷiyā dvidhābhāvaṃ dasseti. ‘‘Nissandeho’’ti iminā asandiddhoti ettha dihadhātuṃ dasseti, disadhātuṃ nivatteti.
৩৫০. বুদ্ধসহস্সেনপীতি পিসদ্দো গরহত্থো, পগেৰ একেন বুদ্ধেনাতি দস্সেতি।
350.Buddhasahassenapīti pisaddo garahattho, pageva ekena buddhenāti dasseti.
‘‘সত্তো’’তি ইমিনা কোচিসদ্দস্স পধানপদং দস্সেতি। অট্ঠাতি আখ্যাতপদস্স অত্থং দস্সেন্তো আহ ‘‘ঠিতো’’তি। দেৰদত্তোতি মে সুতন্তি এত্থ ‘‘মে’’তি পদং ভগৰন্তং সন্ধায ৰুত্তন্তি আহ ‘‘ভগৰতা’’তি। তদেৰাতি সুতমেৰ। ইদন্তি ‘‘দেৰদত্তোতি মে সুত’’ন্তি ৰচনং। অনুচিনাতীতি অনুৰড্ঢেতি। ‘‘পত্ৰা’’তি ইমিনা আসজ্জনন্তি এত্থ সদধাতুযা গত্যত্থং, কিরিযাৰিসেসনঞ্চ দস্সেতি। অৰীচিনিরযং পত্তোতি এত্থ ইদানি ন দেৰদত্তো অৰীচিনিরযং পত্তো হোতি, আযতিং পন অৰীচিনিরযে অৰস্সম্ভাৰিযত্তা ‘‘অৰীচিনিরযং পত্তো’’তি ৰুত্তন্তি আহ ‘‘আসংসাযং অতীতৰচন’’ন্তি। আসংসাযন্তি অৰস্সম্ভাৰিযত্থে। ভেস্মা হি উদধী মহাতি এত্থ ভেস্মাসদ্দো ভযানকপরিযাযোতি আহ ‘‘ভযানকো’’তি।
‘‘Satto’’ti iminā kocisaddassa padhānapadaṃ dasseti. Aṭṭhāti ākhyātapadassa atthaṃ dassento āha ‘‘ṭhito’’ti. Devadattoti me sutanti ettha ‘‘me’’ti padaṃ bhagavantaṃ sandhāya vuttanti āha ‘‘bhagavatā’’ti. Tadevāti sutameva. Idanti ‘‘devadattoti me suta’’nti vacanaṃ. Anucinātīti anuvaḍḍheti. ‘‘Patvā’’ti iminā āsajjananti ettha sadadhātuyā gatyatthaṃ, kiriyāvisesanañca dasseti. Avīcinirayaṃ pattoti ettha idāni na devadatto avīcinirayaṃ patto hoti, āyatiṃ pana avīciniraye avassambhāviyattā ‘‘avīcinirayaṃ patto’’ti vuttanti āha ‘‘āsaṃsāyaṃ atītavacana’’nti. Āsaṃsāyanti avassambhāviyatthe. Bhesmā hi udadhī mahāti ettha bhesmāsaddo bhayānakapariyāyoti āha ‘‘bhayānako’’ti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / সঙ্ঘভেদকথা • Saṅghabhedakathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / সঙ্ঘভেদককথা • Saṅghabhedakakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / সঙ্ঘভেদকথাৰণ্ণনা • Saṅghabhedakathāvaṇṇanā
