| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒཔཱལི༹ • Cūḷavaggapāḷi |
༣. ཏཏིཡབྷཱཎཝཱརོ
3. Tatiyabhāṇavāro
སངྒྷབྷེདཀཐཱ
Saṅghabhedakathā
༣༤༤. ཨཐ ཁོ དེཝདཏྟོ ཏདཧུཔོསཐེ ཨུཊྛཱཡཱསནཱ སལཱཀཾ གཱཧེསི – ‘‘མཡཾ, ཨཱཝུསོ, སམཎཾ གོཏམཾ ཨུཔསངྐམིཏྭཱ པཉྩ ཝཏྠཱུནི ཡཱཙིམྷཱ – ‘བྷགཝཱ, བྷནྟེ, ཨནེཀཔརིཡཱཡེན ཨཔྤིཙྪསྶ…པེ॰… ཝཱིརིཡཱརམྦྷསྶ ཝཎྞཝཱདཱི། ཨིམཱནི, བྷནྟེ, པཉྩ ཝཏྠཱུནི ཨནེཀཔརིཡཱཡེན ཨཔྤིཙྪཏཱཡ…པེ॰… ཝཱིརིཡཱརམྦྷཱཡ སཾཝཏྟནྟི། སཱདྷུ, བྷནྟེ, བྷིཀྑཱུ ཡཱཝཛཱིཝཾ ཨཱརཉྙིཀཱ ཨསྶུ; ཡོ གཱམནྟཾ ཨོསརེཡྻ, ཝཛྫཾ ནཾ ཕུསེཡྻ…པེ॰… ཡཱཝཛཱིཝཾ མཙྪམཾསཾ ན ཁཱདེཡྻུཾ; ཡོ མཙྪམཾསཾ ཁཱདེཡྻ, ཝཛྫཾ ནཾ ཕུསེཡྻཱ’ཏི། ཨིམཱནི པཉྩ ཝཏྠཱུནི སམཎོ གོཏམོ ནཱནུཛཱནཱཏི། ཏེ མཡཾ ཨིམེཧི པཉྩཧི ཝཏྠཱུཧི སམཱདཱཡ ཝཏྟཱམ། ཡསྶཱཡསྨཏོ ཨིམཱནི པཉྩ ཝཏྠཱུནི ཁམནྟི, སོ སལཱཀཾ གཎྷཱཏཱུ’’ཏི།
344. Atha kho devadatto tadahuposathe uṭṭhāyāsanā salākaṃ gāhesi – ‘‘mayaṃ, āvuso, samaṇaṃ gotamaṃ upasaṅkamitvā pañca vatthūni yācimhā – ‘bhagavā, bhante, anekapariyāyena appicchassa…pe… vīriyārambhassa vaṇṇavādī. Imāni, bhante, pañca vatthūni anekapariyāyena appicchatāya…pe… vīriyārambhāya saṃvattanti. Sādhu, bhante, bhikkhū yāvajīvaṃ āraññikā assu; yo gāmantaṃ osareyya, vajjaṃ naṃ phuseyya…pe… yāvajīvaṃ macchamaṃsaṃ na khādeyyuṃ; yo macchamaṃsaṃ khādeyya, vajjaṃ naṃ phuseyyā’ti. Imāni pañca vatthūni samaṇo gotamo nānujānāti. Te mayaṃ imehi pañcahi vatthūhi samādāya vattāma. Yassāyasmato imāni pañca vatthūni khamanti, so salākaṃ gaṇhātū’’ti.
ཏེན ཁོ པན སམཡེན ཝེསཱལིཀཱ ཝཛྫིཔུཏྟཀཱ པཉྩམཏྟཱནི བྷིཀྑུསཏཱནི ནཝཀཱ ཙེཝ ཧོནྟི ཨཔྤཀཏཉྙུནོ ཙ། ཏེ – ‘ཨཡཾ དྷམྨོ , ཨཡཾ ཝིནཡོ, ཨིདཾ སཏྠུསཱསན’ནྟི – སལཱཀཾ གཎྷིཾསུ། ཨཐ ཁོ དེཝདཏྟོ སངྒྷཾ བྷིནྡིཏྭཱ པཉྩམཏྟཱནི བྷིཀྑུསཏཱནི ཨཱདཱཡ ཡེན གཡཱསཱིསཾ ཏེན པཀྐཱམི། ཨཐ ཁོ སཱརིཔུཏྟམོགྒལླཱནཱ ཡེན བྷགཝཱ ཏེནུཔསངྐམིཾསུ, ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདིཾསུ། ཨེཀམནྟཾ ནིསིནྣོ ཁོ ཨཱཡསྨཱ སཱརིཔུཏྟོ བྷགཝནྟཾ ཨེཏདཝོཙ – ‘‘དེཝདཏྟོ, བྷནྟེ, སངྒྷཾ བྷིནྡིཏྭཱ པཉྩམཏྟཱནི བྷིཀྑུསཏཱནི ཨཱདཱཡ ཡེན གཡཱསཱིསཾ ཏེན པཀྐནྟོ’’ཏི། ‘‘ན ཧི ནཱམ ཏུམྷཱཀཾ, སཱརིཔུཏྟཱ, ཏེསུ ནཝཀེསུ བྷིཀྑཱུསུ ཀཱརུཉྙམྤི བྷཝིསྶཏི? གཙྪཐ ཏུམྷེ, སཱརིཔུཏྟཱ, པུརཱ ཏེ བྷིཀྑཱུ ཨནཡབྱསནཾ ཨཱཔཛྫནྟཱི’’ཏི། ‘‘ཨེཝཾ བྷནྟེ’’ཏི ཁོ སཱརིཔུཏྟམོགྒལླཱནཱ བྷགཝཏོ པཊིསྶུཏྭཱ ཨུཊྛཱཡཱསནཱ བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ ཡེན གཡཱསཱིསཾ ཏེནུཔསངྐམིཾསུ།
Tena kho pana samayena vesālikā vajjiputtakā pañcamattāni bhikkhusatāni navakā ceva honti appakataññuno ca. Te – ‘ayaṃ dhammo , ayaṃ vinayo, idaṃ satthusāsana’nti – salākaṃ gaṇhiṃsu. Atha kho devadatto saṅghaṃ bhinditvā pañcamattāni bhikkhusatāni ādāya yena gayāsīsaṃ tena pakkāmi. Atha kho sāriputtamoggallānā yena bhagavā tenupasaṅkamiṃsu, upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinno kho āyasmā sāriputto bhagavantaṃ etadavoca – ‘‘devadatto, bhante, saṅghaṃ bhinditvā pañcamattāni bhikkhusatāni ādāya yena gayāsīsaṃ tena pakkanto’’ti. ‘‘Na hi nāma tumhākaṃ, sāriputtā, tesu navakesu bhikkhūsu kāruññampi bhavissati? Gacchatha tumhe, sāriputtā, purā te bhikkhū anayabyasanaṃ āpajjantī’’ti. ‘‘Evaṃ bhante’’ti kho sāriputtamoggallānā bhagavato paṭissutvā uṭṭhāyāsanā bhagavantaṃ abhivādetvā padakkhiṇaṃ katvā yena gayāsīsaṃ tenupasaṅkamiṃsu.
ཏེན ཁོ པན སམཡེན ཨཉྙཏརོ བྷིཀྑུ བྷགཝཏོ ཨཝིདཱུརེ རོདམཱནོ ཋིཏོ ཧོཏི། ཨཐ ཁོ བྷགཝཱ ཏཾ བྷིཀྑུཾ ཨེཏདཝོཙ – ‘‘ཀིསྶ ཏྭཾ, བྷིཀྑུ, རོདསཱི’’ཏི? ‘‘ཡེཔི ཏེ, བྷནྟེ, བྷགཝཏོ ཨགྒསཱཝཀཱ སཱརིཔུཏྟམོགྒལླཱནཱ ཏེཔི དེཝདཏྟསྶ སནྟིཀེ གཙྪནྟི དེཝདཏྟསྶ དྷམྨཾ རོཙེནྟཱ’’ཏི། ‘‘ཨཊྛཱནམེཏཾ, བྷིཀྑུ, ཨནཝཀཱསོ, ཡཾ སཱརིཔུཏྟམོགྒལླཱནཱ དེཝདཏྟསྶ དྷམྨཾ རོཙེཡྻུཾ, ཨཔི ཙ ཏེ གཏཱ བྷིཀྑཱུནཾ སཉྙཏྟིཡཱ’’ཏི 1།
Tena kho pana samayena aññataro bhikkhu bhagavato avidūre rodamāno ṭhito hoti. Atha kho bhagavā taṃ bhikkhuṃ etadavoca – ‘‘kissa tvaṃ, bhikkhu, rodasī’’ti? ‘‘Yepi te, bhante, bhagavato aggasāvakā sāriputtamoggallānā tepi devadattassa santike gacchanti devadattassa dhammaṃ rocentā’’ti. ‘‘Aṭṭhānametaṃ, bhikkhu, anavakāso, yaṃ sāriputtamoggallānā devadattassa dhammaṃ roceyyuṃ, api ca te gatā bhikkhūnaṃ saññattiyā’’ti 2.
༣༤༥. ཏེན ཁོ པན སམཡེན དེཝདཏྟོ མཧཏིཡཱ པརིསཱཡ པརིཝུཏྟོ དྷམྨཾ དེསེནྟོ ནིསིནྣོ ཧོཏི། ཨདྡསཱ ཁོ དེཝདཏྟོ སཱརིཔུཏྟམོགྒལླཱནེ དཱུརཏོཝ ཨཱགཙྪནྟེ། དིསྭཱན བྷིཀྑཱུ ཨཱམནྟེསི – ‘‘པསྶཐ, བྷིཀྑཝེ, ཡཱཝ སྭཱཀྑཱཏོ མཡཱ དྷམྨོ, ཡེཔི ཏེ སམཎསྶ གོཏམསྶ ཨགྒསཱཝཀཱ སཱརིཔུཏྟམོགྒལླཱནཱ ཏེཔི མམ སནྟིཀེ ཨཱགཙྪནྟི། མམ དྷམྨཾ རོཙེནྟཱ’’ཏི། ཨེཝཾ ཝུཏྟེ ཀོཀཱལིཀོ དེཝདཏྟཾ ཨེཏདཝོཙ – ‘‘མཱ, ཨཱཝུསོ དེཝདཏྟ, སཱརིཔུཏྟམོགྒལླཱནེ ཝིསྶསི ། པཱཔིཙྪཱ སཱརིཔུཏྟམོགྒལླཱནཱ , པཱཔིཀཱནཾ ཨིཙྪཱནཾ ཝསཾ གཏཱ’’ཏི། ‘‘ཨལཾ, ཨཱཝུསོ། སྭཱགཏཾ ཏེསཾ ཡཏོ མེ དྷམྨཾ རོཙེནྟཱི’’ཏི།
345. Tena kho pana samayena devadatto mahatiyā parisāya parivutto dhammaṃ desento nisinno hoti. Addasā kho devadatto sāriputtamoggallāne dūratova āgacchante. Disvāna bhikkhū āmantesi – ‘‘passatha, bhikkhave, yāva svākkhāto mayā dhammo, yepi te samaṇassa gotamassa aggasāvakā sāriputtamoggallānā tepi mama santike āgacchanti. Mama dhammaṃ rocentā’’ti. Evaṃ vutte kokāliko devadattaṃ etadavoca – ‘‘mā, āvuso devadatta, sāriputtamoggallāne vissasi . Pāpicchā sāriputtamoggallānā , pāpikānaṃ icchānaṃ vasaṃ gatā’’ti. ‘‘Alaṃ, āvuso. Svāgataṃ tesaṃ yato me dhammaṃ rocentī’’ti.
ཨཐ ཁོ དེཝདཏྟོ ཨཱཡསྨནྟཾ སཱརིཔུཏྟཾ ཨུཔཌྜྷཱསནེན ནིམནྟེསི – ‘‘ཨེཧཱཝུསོ སཱརིཔུཏྟ, ཨིདྷ ནིསཱིདཱཧཱི’’ཏི། ‘‘ཨལཾ ཨཱཝུསོ’’ཏི ཁོ ཨཱཡསྨཱ སཱརིཔུཏྟོ ཨཉྙཏརཾ ཨཱསནཾ གཧེཏྭཱ ཨེཀམནྟཾ ནིསཱིདི། ཨཱཡསྨཱཔི ཁོ མཧཱམོགྒལླཱནོ ཨཉྙཏརཾ ཨཱསནཾ གཧེཏྭཱ ཨེཀམནྟཾ ནིསཱིདི། ཨཐ ཁོ དེཝདཏྟོ བཧུདེཝ རཏྟིཾ བྷིཀྑཱུ དྷམྨིཡཱ ཀཐཱཡ སནྡསྶེཏྭཱ སམཱདཔེཏྭཱ སམུཏྟེཛེཏྭཱ སམྤཧཾསེཏྭཱ ཨཱཡསྨནྟཾ སཱརིཔུཏྟཾ ཨཛ྄ཛྷེསི – ‘‘ཝིགཏཐིནམིདྡྷོ ཁོ, ཨཱཝུསོ སཱརིཔུཏྟ, བྷིཀྑུསངྒྷོ། པཊིབྷཱཏུ ཏཾ, ཨཱཝུསོ སཱརིཔུཏྟ, བྷིཀྑཱུནཾ དྷམྨཱི ཀཐཱ, པིཊྛི མེ ཨཱགིལཱཡཏི, ཏམཧཾ ཨཱཡམིསྶཱམཱི’’ཏི། ‘‘ཨེཝམཱཝུསོ’’ཏི ཁོ ཨཱཡསྨཱ སཱརིཔུཏྟོ དེཝདཏྟསྶ པཙྩསྶོསི། ཨཐ ཁོ དེཝདཏྟོ ཙཏུགྒུཎཾ སངྒྷཱཊིཾ པཉྙཱཔེཏྭཱ དཀྑིཎེན པསྶེན སེཡྻཾ ཀཔྤེསི། ཏསྶ ཀིལམནྟསྶ མུཊྛསྶཏིསྶ ཨསམྤཛཱནསྶ མུཧུཏྟཀེནེཝ ནིདྡཱ ཨོཀྐམི།
Atha kho devadatto āyasmantaṃ sāriputtaṃ upaḍḍhāsanena nimantesi – ‘‘ehāvuso sāriputta, idha nisīdāhī’’ti. ‘‘Alaṃ āvuso’’ti kho āyasmā sāriputto aññataraṃ āsanaṃ gahetvā ekamantaṃ nisīdi. Āyasmāpi kho mahāmoggallāno aññataraṃ āsanaṃ gahetvā ekamantaṃ nisīdi. Atha kho devadatto bahudeva rattiṃ bhikkhū dhammiyā kathāya sandassetvā samādapetvā samuttejetvā sampahaṃsetvā āyasmantaṃ sāriputtaṃ ajjhesi – ‘‘vigatathinamiddho kho, āvuso sāriputta, bhikkhusaṅgho. Paṭibhātu taṃ, āvuso sāriputta, bhikkhūnaṃ dhammī kathā, piṭṭhi me āgilāyati, tamahaṃ āyamissāmī’’ti. ‘‘Evamāvuso’’ti kho āyasmā sāriputto devadattassa paccassosi. Atha kho devadatto catugguṇaṃ saṅghāṭiṃ paññāpetvā dakkhiṇena passena seyyaṃ kappesi. Tassa kilamantassa muṭṭhassatissa asampajānassa muhuttakeneva niddā okkami.
ཨཐ ཁོ ཨཱཡསྨཱ སཱརིཔུཏྟོ ཨཱདེསནཱཔཱཊིཧཱརིཡཱནུསཱསནིཡཱ བྷིཀྑཱུ དྷམྨིཡཱ ཀཐཱཡ ཨོཝདི ཨནུསཱསི། ཨཱཡསྨཱ མཧཱམོགྒལླཱནོ ཨིདྡྷིཔཱཊིཧཱརིཡཱནུསཱསནིཡཱ བྷིཀྑཱུ དྷམྨིཡཱ ཀཐཱཡ ཨོཝདི ཨནུསཱསི། ཨཐ ཁོ ཏེསཾ བྷིཀྑཱུནཾ ཨཱཡསྨཏཱ སཱརིཔུཏྟེན ཨཱདེསནཱཔཱཊིཧཱརིཡཱནུསཱསནིཡཱ ཨཱཡསྨཏཱ ཙ མཧཱམོགྒལླཱནེན ཨིདྡྷིཔཱཊིཧཱརིཡཱནུསཱསནིཡཱ ཨོཝདིཡམཱནཱནཾ ཨནུསཱསིཡམཱནཱནཾ ཝིརཛཾ ཝཱིཏམལཾ དྷམྨཙཀྑུཾ ཨུདཔཱདི – ཡཾ ཀིཉྩི སམུདཡདྷམྨཾ, སབྦཾ ཏཾ ནིརོདྷདྷམྨནྟི།
Atha kho āyasmā sāriputto ādesanāpāṭihāriyānusāsaniyā bhikkhū dhammiyā kathāya ovadi anusāsi. Āyasmā mahāmoggallāno iddhipāṭihāriyānusāsaniyā bhikkhū dhammiyā kathāya ovadi anusāsi. Atha kho tesaṃ bhikkhūnaṃ āyasmatā sāriputtena ādesanāpāṭihāriyānusāsaniyā āyasmatā ca mahāmoggallānena iddhipāṭihāriyānusāsaniyā ovadiyamānānaṃ anusāsiyamānānaṃ virajaṃ vītamalaṃ dhammacakkhuṃ udapādi – yaṃ kiñci samudayadhammaṃ, sabbaṃ taṃ nirodhadhammanti.
ཨཐ ཁོ ཨཱཡསྨཱ སཱརིཔུཏྟོ བྷིཀྑཱུ ཨཱམནྟེསི – ‘‘གཙྪཱམ མཡཾ, ཨཱཝུསོ, བྷགཝཏོ སནྟིཀེ། ཡོ ཏསྶ བྷགཝཏོ དྷམྨཾ རོཙེསི སོ ཨཱགཙྪཏཱུ’’ཏི། ཨཐ ཁོ སཱརིཔུཏྟམོགྒལླཱནཱ ཏཱནི པཉྩབྷིཀྑུསཏཱནི ཨཱདཱཡ ཡེན ཝེལུ༹ཝནཾ ཏེནུཔསངྐམིཾསུ། ཨཐ ཁོ ཀོཀཱལིཀོ དེཝདཏྟཾ ཨུཊྛཱཔེསི – ‘‘ཨུཊྛེཧི, ཨཱཝུསོ དེཝདཏྟ, ནཱིཏཱ ཏེ བྷིཀྑཱུ སཱརིཔུཏྟམོགྒལླཱནེཧི། ནནུ ཏྭཾ, ཨཱཝུསོ དེཝདཏྟ, མཡཱ ཝུཏྟོ – ‘མཱ, ཨཱཝུསོ དེཝདཏྟ, སཱརིཔུཏྟམོགྒལླཱནེ ཝིསྶཱསི། པཱཔིཙྪཱ སཱརིཔུཏྟམོགྒལླཱནཱ, པཱཔིཀཱནཾ ཨིཙྪཱནཾ ཝསཾ གཏཱ’’’ཏི? ཨཐ ཁོ དེཝདཏྟསྶ ཏཏྠེཝ ཨུཎྷཾ ལོཧིཏཾ མུཁཏོ ཨུགྒཉྪི།
Atha kho āyasmā sāriputto bhikkhū āmantesi – ‘‘gacchāma mayaṃ, āvuso, bhagavato santike. Yo tassa bhagavato dhammaṃ rocesi so āgacchatū’’ti. Atha kho sāriputtamoggallānā tāni pañcabhikkhusatāni ādāya yena veḷuvanaṃ tenupasaṅkamiṃsu. Atha kho kokāliko devadattaṃ uṭṭhāpesi – ‘‘uṭṭhehi, āvuso devadatta, nītā te bhikkhū sāriputtamoggallānehi. Nanu tvaṃ, āvuso devadatta, mayā vutto – ‘mā, āvuso devadatta, sāriputtamoggallāne vissāsi. Pāpicchā sāriputtamoggallānā, pāpikānaṃ icchānaṃ vasaṃ gatā’’’ti? Atha kho devadattassa tattheva uṇhaṃ lohitaṃ mukhato uggañchi.
ཨཐ ཁོ སཱརིཔུཏྟམོགྒལླཱནཱ ཡེན བྷགཝཱ ཏེནུཔསངྐམིཾསུ, ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདིསུཾ། ཨེཀམནྟཾ ནིསིནྣོ ཁོ ཨཱཡསྨཱ སཱརིཔུཏྟོ བྷགཝནྟཾ ཨེཏདཝོཙ – ‘‘སཱདྷུ, བྷནྟེ , བྷེདཀཱནུཝཏྟཀཱ བྷིཀྑཱུ པུན ཨུཔསམྤཛྫེཡྻུ’’ནྟི། ‘‘ཨལཾ, སཱརིཔུཏྟ། མཱ ཏེ རུཙྩི བྷེདཀཱནུཝཏྟཀཱནཾ བྷིཀྑཱུནཾ པུན ཨུཔསམྤདཱ། ཏེན ཧི ཏྭཾ, སཱརིཔུཏྟ, བྷེདཀཱནུཝཏྟཀེ བྷིཀྑཱུ ཐུལླཙྩཡཾ དེསཱཔེཧི། ཀཐཾ པན ཏེ, སཱརིཔུཏྟ, དེཝདཏྟོ པཊིཔཛྫཱི’’ཏི? ‘‘ཡཐེཝ, བྷནྟེ, བྷགཝཱ བཧུདེཝ རཏྟིཾ བྷིཀྑཱུ དྷམྨིཡཱ ཀཐཱཡ སནྡསྶེཏྭཱ སམཱདཔེཏྭཱ སམུཏྟེཛེཏྭཱ སམྤཧཾསེཏྭཱ མཾ ཨཛ྄ཛྷེསཏི – ‘ཝིགཏཐིནམིདྡྷོ ཁོ , སཱརིཔུཏྟ, བྷིཀྑུསངྒྷོ; པཊིབྷཱཏུ ཏཾ, སཱརིཔུཏྟ, བྷིཀྑཱུནཾ དྷམྨཱི ཀཐཱ, པིཊྛི མེ ཨཱགིལཱཡཏི, ཏམཧཾ ཨཱཡམིསྶཱམཱི’ཏི, ཨེཝམེཝ ཁོ, བྷནྟེ, དེཝདཏྟོ པཊིཔཛྫཱི’’ཏི།
Atha kho sāriputtamoggallānā yena bhagavā tenupasaṅkamiṃsu, upasaṅkamitvā bhagavantaṃ abhivādetvā ekamantaṃ nisīdisuṃ. Ekamantaṃ nisinno kho āyasmā sāriputto bhagavantaṃ etadavoca – ‘‘sādhu, bhante , bhedakānuvattakā bhikkhū puna upasampajjeyyu’’nti. ‘‘Alaṃ, sāriputta. Mā te rucci bhedakānuvattakānaṃ bhikkhūnaṃ puna upasampadā. Tena hi tvaṃ, sāriputta, bhedakānuvattake bhikkhū thullaccayaṃ desāpehi. Kathaṃ pana te, sāriputta, devadatto paṭipajjī’’ti? ‘‘Yatheva, bhante, bhagavā bahudeva rattiṃ bhikkhū dhammiyā kathāya sandassetvā samādapetvā samuttejetvā sampahaṃsetvā maṃ ajjhesati – ‘vigatathinamiddho kho , sāriputta, bhikkhusaṅgho; paṭibhātu taṃ, sāriputta, bhikkhūnaṃ dhammī kathā, piṭṭhi me āgilāyati, tamahaṃ āyamissāmī’ti, evameva kho, bhante, devadatto paṭipajjī’’ti.
༣༤༦. ཨཐ ཁོ བྷགཝཱ བྷིཀྑཱུ ཨཱམནྟེསི – ‘‘བྷཱུཏཔུབྦཾ, བྷིཀྑཝེ, ཨརཉྙཱཡཏནེ མཧཱསརསཱི། ཏཾ ནཱགཱ ཨུཔནིསྶཱཡ ཝིཧརིཾསུ། ཏེ ཏཾ སརསིཾ ཨོགཱཧེཏྭཱ, སོཎྜཱཡ བྷིསམུལཱ༹ལཾ ཨབྦུཧིཏྭཱ, སུཝིཀྑཱལིཏཾ ཝིཀྑཱལེཏྭཱ, ཨཀདྡམཾ སངྑཱདིཏྭཱ, ཨཛ྄ཛྷོཧརནྟི། ཏེསཾ ཏཾ ཝཎྞཱཡ ཙེཝ ཧོཏི, བལཱཡ ཙ། ན ཙ ཏཏོནིདཱནཾ མརཎཾ ཝཱ ནིགཙྪནྟི, མརཎམཏྟཾ ཝཱ དུཀྑཾ། ཏེསཾཡེཝ ཁོ པན, བྷིཀྑཝེ, མཧཱནཱགཱནཾ ཨནུསིཀྑམཱནཱ ཏརུཎཱ བྷིངྐཙྪཱཔཱ། ཏེ ཏཾ སརསིཾ ཨོགཱཧེཏྭཱ, སོཎྜཱཡ བྷིསམུལཱ༹ལཾ ཨབྦུཧིཏྭཱ, ན སུཝིཀྑཱལིཏཾ ཝིཀྑཱལེཏྭཱ, སཀདྡམཾ སངྑཱདིཏྭཱ, ཨཛ྄ཛྷོཧརནྟི། ཏེསཾ ཏཾ ནེཝ ཝཎྞཱཡ ཧོཏི, ན བལཱཡ། ཏཏོནིདཱནཉྩ མརཎཾ ཝཱ ནིགཙྪནྟི, མརཎམཏྟཾ ཝཱ དུཀྑཾ། ཨེཝམེཝ ཁོ, བྷིཀྑཝེ, དེཝདཏྟོ མམཱནུཀྲུབྦཾ 3 ཀཔཎོ མརིསྶཏཱིཏི།
346. Atha kho bhagavā bhikkhū āmantesi – ‘‘bhūtapubbaṃ, bhikkhave, araññāyatane mahāsarasī. Taṃ nāgā upanissāya vihariṃsu. Te taṃ sarasiṃ ogāhetvā, soṇḍāya bhisamuḷālaṃ abbuhitvā, suvikkhālitaṃ vikkhāletvā, akaddamaṃ saṅkhāditvā, ajjhoharanti. Tesaṃ taṃ vaṇṇāya ceva hoti, balāya ca. Na ca tatonidānaṃ maraṇaṃ vā nigacchanti, maraṇamattaṃ vā dukkhaṃ. Tesaṃyeva kho pana, bhikkhave, mahānāgānaṃ anusikkhamānā taruṇā bhiṅkacchāpā. Te taṃ sarasiṃ ogāhetvā, soṇḍāya bhisamuḷālaṃ abbuhitvā, na suvikkhālitaṃ vikkhāletvā, sakaddamaṃ saṅkhāditvā, ajjhoharanti. Tesaṃ taṃ neva vaṇṇāya hoti, na balāya. Tatonidānañca maraṇaṃ vā nigacchanti, maraṇamattaṃ vā dukkhaṃ. Evameva kho, bhikkhave, devadatto mamānukrubbaṃ 4 kapaṇo marissatīti.
བྷིངྐོཝ པངྐཾ ཨབྷིབྷཀྑཡིཏྭཱ, མམཱནུཀྲུབྦཾ ཀཔཎོ མརིསྶཏཱི’’ཏི༎
Bhiṅkova paṅkaṃ abhibhakkhayitvā, mamānukrubbaṃ kapaṇo marissatī’’ti.
༣༤༧. 9 ‘‘ཨཊྛཧི, བྷིཀྑཝེ, ཨངྒེཧི སམནྣཱགཏོ བྷིཀྑུ དཱུཏེཡྻཾ གནྟུམརཧཏི། ཀཏམེཧི ཨཊྛཧི? ཨིདྷ, བྷིཀྑཝེ, བྷིཀྑུ སོཏཱ ཙ ཧོཏི, སཱཝེཏཱ ཙ, ཨུགྒཧེཏཱ ཙ, དྷཱརེཏཱ ཙ, ཝིཉྙཱཏཱ ཙ, ཝིཉྙཱཔེཏཱ ཙ, ཀུསལོ ཙ སཧིཏཱསཧིཏསྶ, ནོ ཙ ཀལཧཀཱརཀོ – ཨིམེཧི ཁོ, བྷིཀྑཝེ, ཨཊྛཧངྒེཧི སམནྣཱགཏོ བྷིཀྑུ དཱུཏེཡྻཾ གནྟུམརཧཏི།
347.10 ‘‘Aṭṭhahi, bhikkhave, aṅgehi samannāgato bhikkhu dūteyyaṃ gantumarahati. Katamehi aṭṭhahi? Idha, bhikkhave, bhikkhu sotā ca hoti, sāvetā ca, uggahetā ca, dhāretā ca, viññātā ca, viññāpetā ca, kusalo ca sahitāsahitassa, no ca kalahakārako – imehi kho, bhikkhave, aṭṭhahaṅgehi samannāgato bhikkhu dūteyyaṃ gantumarahati.
11 ‘‘ཨཊྛཧི , བྷིཀྑཝེ, ཨངྒེཧི སམནྣཱགཏོ སཱརིཔུཏྟོ དཱུཏེཡྻཾ གནྟུམརཧཏི། ཀཏམེཧི ཨཊྛཧི? ཨིདྷ, བྷིཀྑཝེ, སཱརིཔུཏྟོ སོཏཱ ཙ ཧོཏི, སཱཝེཏཱ ཙ, ཨུགྒཧེཏཱ ཙ, དྷཱརེཏཱ ཙ, ཝིཉྙཱཏཱ ཙ, ཝིཉྙཱཔེཏཱ ཙ, ཀུསལོ ཙ སཧིཏཱསཧིཏསྶ, ནོ ཙ ཀལཧཀཱརཀོ – ཨིམེཧི ཁོ, བྷིཀྑཝེ, ཨཊྛཧངྒེཧི སམནྣཱགཏོ སཱརིཔུཏྟོ དཱུཏེཡྻཾ གནྟུམརཧཏཱིཏི།
12 ‘‘Aṭṭhahi , bhikkhave, aṅgehi samannāgato sāriputto dūteyyaṃ gantumarahati. Katamehi aṭṭhahi? Idha, bhikkhave, sāriputto sotā ca hoti, sāvetā ca, uggahetā ca, dhāretā ca, viññātā ca, viññāpetā ca, kusalo ca sahitāsahitassa, no ca kalahakārako – imehi kho, bhikkhave, aṭṭhahaṅgehi samannāgato sāriputto dūteyyaṃ gantumarahatīti.
ན ཙ ཧཱཔེཏི ཝཙནཾ, ན ཙ ཚཱདེཏི སཱསནཾ༎
Na ca hāpeti vacanaṃ, na ca chādeti sāsanaṃ.
ས ཝེ ཏཱདིསཀོ བྷིཀྑུ, དཱུཏེཡྻཾ གནྟུམརཧཏཱི’’ཏི༎
Sa ve tādisako bhikkhu, dūteyyaṃ gantumarahatī’’ti.
༣༤༨. 19 ‘‘ཨཊྛཧི, བྷིཀྑཝེ, ཨསདྡྷམྨེཧི ཨབྷིབྷཱུཏོ པརིཡཱདིནྣཙིཏྟོ དེཝདཏྟོ ཨཱཔཱཡིཀོ ནེརཡིཀོ ཀཔྤཊྛོ ཨཏེཀིཙྪོ། ཀཏམེཧི ཨཊྛཧི ? ལཱབྷེན, བྷིཀྑཝེ, ཨབྷིབྷཱུཏོ པརིཡཱདིནྣཙིཏྟོ དེཝདཏྟོ ཨཱཔཱཡིཀོ ནེརཡིཀོ ཀཔྤཊྛོ ཨཏེཀིཙྪོ; ཨལཱབྷེན, བྷིཀྑཝེ…པེ॰… ཡསེན, བྷིཀྑཝེ…པེ॰… ཨཡསེན, བྷིཀྑཝེ…པེ॰… སཀྐཱརེན, བྷིཀྑཝེ…པེ॰… ཨསཀྐཱརེན, བྷིཀྑཝེ…པེ॰… པཱཔིཙྪཏཱཡ, བྷིཀྑཝེ…པེ॰… པཱཔམིཏྟཏཱཡ བྷིཀྑཝེ, ཨབྷིབྷཱུཏོ པརིཡཱདིནྣཙིཏྟོ དེཝདཏྟོ ཨཱཔཱཡིཀོ ནེརཡིཀོ ཀཔྤཊྛོ ཨཏེཀིཙྪོ – ཨིམེཧི ཁོ, བྷིཀྑཝེ, ཨཊྛཧི ཨསདྡྷམྨེཧི ཨབྷིབྷཱུཏོ པརིཡཱདིནྣཙིཏྟོ དེཝདཏྟོ ཨཱཔཱཡིཀོ ནེརཡིཀོ ཀཔྤཊྛོ ཨཏེཀིཙྪོ།
348.20 ‘‘Aṭṭhahi, bhikkhave, asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho. Katamehi aṭṭhahi ? Lābhena, bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho; alābhena, bhikkhave…pe… yasena, bhikkhave…pe… ayasena, bhikkhave…pe… sakkārena, bhikkhave…pe… asakkārena, bhikkhave…pe… pāpicchatāya, bhikkhave…pe… pāpamittatāya bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho – imehi kho, bhikkhave, aṭṭhahi asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho.
༣༤༩. ‘‘སཱདྷུ, བྷིཀྑཝེ, བྷིཀྑུ ཨུཔྤནྣཾ ལཱབྷཾ ཨབྷིབྷུཡྻ ཨབྷིབྷུཡྻ ཝིཧརེཡྻ, ཨུཔྤནྣཾ ཨལཱབྷཾ…པེ॰… ཨུཔྤནྣཾ ཡསཾ… ཨུཔྤནྣཾ ཨཡསཾ… ཨུཔྤནྣཾ སཀྐཱརཾ… ཨུཔྤནྣཾ ཨསཀྐཱརཾ… ཨུཔྤནྣཾ པཱཔིཙྪཏཾ… ཨུཔྤནྣཾ པཱཔམིཏྟཏཾ ཨབྷིབྷུཡྻ ཨབྷིབྷུཡྻ ཝིཧརེཡྻ། ཀཐཉྩ, བྷིཀྑཝེ, བྷིཀྑུ ཨཏྠཝསཾ པཊིཙྩ ཨུཔྤནྣཾ ལཱབྷཾ ཨབྷིབྷུཡྻ ཨབྷིབྷུཡྻ ཝིཧརེཡྻ, ཨུཔྤནྣཾ ཨལཱབྷཾ…པེ॰… ཨུཔྤནྣཾ ཡསཾ… ཨུཔྤནྣཾ ཨཡསཾ… ཨུཔྤནྣཾ སཀྐཱརཾ… ཨུཔྤནྣཾ ཨསཀྐཱརཾ… ཨུཔྤནྣཾ པཱཔིཙྪཏཾ… ཨུཔྤནྣཾ པཱཔམིཏྟཏཾ ཨབྷིབྷུཡྻ ཨབྷིབྷུཡྻ ཝིཧརེཡྻ? ཡཾ ཧིསྶ, བྷིཀྑཝེ, ཨུཔྤནྣཾ ལཱབྷཾ ཨནབྷིབྷུཡྻ ཝིཧརཏོ ཨུཔྤཛྫེཡྻུཾ ཨཱསཝཱ ཝིགྷཱཏཔརིལཱ༹ཧཱ, ཨུཔྤནྣཾ ལཱབྷཾ ཨབྷིབྷུཡྻ ཨབྷིབྷུཡྻ ཝིཧརཏོ ཨེཝཾསཏེ ཨཱསཝཱ ཝིགྷཱཏཔརིལཱ༹ཧཱ ན ཧོནྟི། ཡཾ ཧིསྶ, བྷིཀྑཝེ, ཨུཔྤནྣཾ ཨལཱབྷཾ…པེ॰… ཨུཔྤནྣཾ ཡསཾ… ཨུཔྤནྣཾ ཨཡསཾ… ཨུཔྤནྣཾ སཀྐཱརཾ… ཨུཔྤནྣཾ ཨསཀྐཱརཾ… ཨུཔྤནྣཾ པཱཔིཙྪཏཾ… ཨུཔྤནྣཾ པཱཔམིཏྟཏཾ ཨནབྷིབྷུཡྻ ཝིཧརཏོ ཨུཔྤཛྫེཡྻུཾ ཨཱསཝཱ ཝིགྷཱཏཔརིལཱ༹ཧཱ, ཨུཔྤནྣཾ པཱཔམིཏྟཏཾ ཨབྷིབྷུཡྻ ཨབྷིབྷུཡྻ ཝིཧརཏོ ཨེཝཾསཏེ ཨཱསཝཱ ཝིགྷཱཏཔརིལཱ༹ཧཱ ན ཧོནྟི། ཨིདཾ ཁོ, བྷིཀྑཝེ, ཨཏྠཝསཾ པཊིཙྩ ཨུཔྤནྣཾ ལཱབྷཾ ཨབྷིབྷུཡྻ ཨབྷིབྷུཡྻ ཝིཧརེཡྻ, ཨུཔྤནྣཾ ཨལཱབྷཾ…པེ॰… ཨུཔྤནྣཾ ཡསཾ… ཨུཔྤནྣཾ ཨཡསཾ… ཨུཔྤནྣཾ སཀྐཱརཾ… ཨུཔྤནྣཾ ཨསཀྐཱརཾ… ཨུཔྤནྣཾ པཱཔིཙྪཏཾ… ཨུཔྤནྣཾ པཱཔམིཏྟཏཾ ཨབྷིབྷུཡྻ ཨབྷིབྷུཡྻ ཝིཧརེཡྻ། ཏསྨཱཏིཧ, བྷིཀྑཝེ, ཨུཔྤནྣཾ ལཱབྷཾ ཨབྷིབྷུཡྻ ཨབྷིབྷུཡྻ ཝིཧརིསྶཱམ, ཨུཔྤནྣཾ ཨལཱབྷཾ…པེ॰… ཨུཔྤནྣཾ ཡསཾ… ཨུཔྤནྣཾ ཨཡསཾ… ཨུཔྤནྣཾ སཀྐཱརཾ… ཨུཔྤནྣཾ ཨསཀྐཱརཾ… ཨུཔྤནྣཾ པཱཔིཙྪཏཾ… ཨུཔྤནྣཾ པཱཔམིཏྟཏཾ ཨབྷིབྷུཡྻ ཨབྷིབྷུཡྻ ཝིཧརིསྶཱམཱཏི; ཨེཝཉྷི ཝོ, བྷིཀྑཝེ, སིཀྑིཏབྦནྟི།
349. ‘‘Sādhu, bhikkhave, bhikkhu uppannaṃ lābhaṃ abhibhuyya abhibhuyya vihareyya, uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ abhibhuyya abhibhuyya vihareyya. Kathañca, bhikkhave, bhikkhu atthavasaṃ paṭicca uppannaṃ lābhaṃ abhibhuyya abhibhuyya vihareyya, uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ abhibhuyya abhibhuyya vihareyya? Yaṃ hissa, bhikkhave, uppannaṃ lābhaṃ anabhibhuyya viharato uppajjeyyuṃ āsavā vighātapariḷāhā, uppannaṃ lābhaṃ abhibhuyya abhibhuyya viharato evaṃsate āsavā vighātapariḷāhā na honti. Yaṃ hissa, bhikkhave, uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ anabhibhuyya viharato uppajjeyyuṃ āsavā vighātapariḷāhā, uppannaṃ pāpamittataṃ abhibhuyya abhibhuyya viharato evaṃsate āsavā vighātapariḷāhā na honti. Idaṃ kho, bhikkhave, atthavasaṃ paṭicca uppannaṃ lābhaṃ abhibhuyya abhibhuyya vihareyya, uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ abhibhuyya abhibhuyya vihareyya. Tasmātiha, bhikkhave, uppannaṃ lābhaṃ abhibhuyya abhibhuyya viharissāma, uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ abhibhuyya abhibhuyya viharissāmāti; evañhi vo, bhikkhave, sikkhitabbanti.
༣༥༠. ‘‘ཏཱིཧི, བྷིཀྑཝེ, ཨསདྡྷམྨེཧི ཨབྷིབྷཱུཏོ པརིཡཱདིནྣཙིཏྟོ དེཝདཏྟོ ཨཱཔཱཡིཀོ ནེརཡིཀོ ཀཔྤཊྛོ ཨཏེཀིཙྪོ། ཀཏམེཧི ཏཱིཧི? པཱཔིཙྪཏཱ, པཱཔམིཏྟཏཱ, ཨོརམཏྟཀེན ཝིསེསཱདྷིགམེན ཨནྟརཱ ཝོསཱནཾ ཨཱཔཱདི – ཨིམེཧི ཁོ, བྷིཀྑཝེ, ཏཱིཧི ཨསདྡྷམྨེཧི ཨབྷིབྷཱུཏོ པརིཡཱདིནྣཙིཏྟོ དེཝདཏྟོ ཨཱཔཱཡིཀོ ནེརཡིཀོ ཀཔྤཊྛོ ཨཏེཀིཙྪོཏི།
350. ‘‘Tīhi, bhikkhave, asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho. Katamehi tīhi? Pāpicchatā, pāpamittatā, oramattakena visesādhigamena antarā vosānaṃ āpādi – imehi kho, bhikkhave, tīhi asaddhammehi abhibhūto pariyādinnacitto devadatto āpāyiko nerayiko kappaṭṭho atekicchoti.
‘‘མཱ ཛཱཏུ ཀོཙི ལོཀསྨིཾ, པཱཔིཙྪོ ཨུདཔཛྫཐ།
‘‘Mā jātu koci lokasmiṃ, pāpiccho udapajjatha;
ཏདམིནཱཔི ཛཱནཱཐ, པཱཔིཙྪཱནཾ ཡཐཱགཏི༎
Tadamināpi jānātha, pāpicchānaṃ yathāgati.
‘‘པཎྜིཏོཏི སམཉྙཱཏོ, བྷཱཝིཏཏྟོཏི སམྨཏོ།
‘‘Paṇḍitoti samaññāto, bhāvitattoti sammato;
ཛལཾཝ ཡསསཱ ཨཊྛཱ, དེཝདཏྟོཏི མེ སུཏཾ༎
Jalaṃva yasasā aṭṭhā, devadattoti me sutaṃ.
‘‘སོ པམཱདཾ ཨནུཙིཎྞོ, ཨཱསཛྫ ནཾ ཏཐཱགཏཾ།
‘‘So pamādaṃ anuciṇṇo, āsajja naṃ tathāgataṃ;
ཨཝཱིཙིནིརཡཾ པཏྟོ, ཙཏུདྭཱརཾ བྷཡཱནཀཾ༎
Avīcinirayaṃ patto, catudvāraṃ bhayānakaṃ.
‘‘ཨདུཊྛསྶ ཧི ཡོ དུབྦྷེ, པཱཔཀམྨཾ ཨཀྲུབྦཏོ།
‘‘Aduṭṭhassa hi yo dubbhe, pāpakammaṃ akrubbato;
ཏམེཝ པཱཔཾ ཕུསཏི, དུཊྛཙིཏྟཾ ཨནཱདརཾ༎
Tameva pāpaṃ phusati, duṭṭhacittaṃ anādaraṃ.
ན སོ ཏེན པདཱུསེཡྻ, བྷེསྨཱ ཧི ཨུདདྷཱི མཧཱ༎
Na so tena padūseyya, bhesmā hi udadhī mahā.
‘‘ཨེཝམེཝ ཏཐཱགཏཾ, ཡོ ཝཱདེནུཔཧིཾསཏི།
‘‘Evameva tathāgataṃ, yo vādenupahiṃsati;
ཡསྶ མགྒཱནུགོ བྷིཀྑུ, ཁཡཾ དུཀྑསྶ པཱཔུཎེ’’ཏི༎
Yassa maggānugo bhikkhu, khayaṃ dukkhassa pāpuṇe’’ti.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā / སངྒྷབྷེདཀཀཐཱ • Saṅghabhedakakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / སངྒྷབྷེདཀཐཱཝཎྞནཱ • Saṅghabhedakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཚསཀྱཔབྦཛྫཱཀཐཱཝཎྞནཱ • Chasakyapabbajjākathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / སངྒྷབྷེདཀཀཐཱཝཎྞནཱ • Saṅghabhedakakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / སངྒྷབྷེདཀཐཱ • Saṅghabhedakathā
