| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
সঙ্ঘভেদকথাৰণ্ণনা
Saṅghabhedakathāvaṇṇanā
৩৪৫. অথ খো আযস্মা সারিপুত্তো আদেসনাপাটিহারিযানুসাসনিযাতিআদীসু পরস্স চিত্তং ঞত্ৰা কথনং আদেসনাপাটিহারিযং, সাৰকানঞ্চ বুদ্ধানঞ্চ সততং ধম্মদেসনং অনুসাসনীপাটিহারিযং, ইদ্ধিৰিধং ইদ্ধিপাটিহারিযং। তত্থ ইদ্ধিপাটিহারিযেন সদ্ধিং অনুসাসনীপাটিহারিযং মহামোগ্গল্লানত্থেরস্স আচিণ্ণং, আদেসনাপাটিহারিযেন সদ্ধিং অনুসাসনীপাটিহারিযং ধম্মসেনাপতিস্স। তেন ৰুত্তং ‘‘আযস্মা সারিপুত্তো আদেসনাপাটিহারিযানুসাসনিযা ভিক্খূ ধম্মিযা কথায ওৰদী’’তিআদি। তদা হি দ্ৰীসু অগ্গসাৰকেসু ধম্মসেনাপতি তেসং ভিক্খূনং চিত্তচারং ঞত্ৰা ধম্মং দেসেসি, মহামোগ্গল্লানত্থেরো ৰিকুব্বনং দস্সেত্ৰা ধম্মং দেসেসি, পাল়িযঞ্চেত্থ দ্ৰিন্নম্পি থেরানং দেসনায ধম্মচক্খুপটিলাভোৰ দস্সিতো। দীঘভাণকা পন এৰং ৰদন্তি ‘‘ভগৰতা পেসিতেসু দ্ৰীসু অগ্গসাৰকেসু ধম্মসেনাপতি তেসং চিত্তচারং ঞত্ৰা ধম্মং দেসেসি, থেরস্স ধম্মদেসনং সুত্ৰা পঞ্চসতাপি ভিক্খূ সোতাপত্তিফলে পতিট্ঠহিংসু। অথ নেসং মহামোগ্গল্লানত্থেরো ৰিকুব্বনং দস্সেত্ৰা ধম্মং দেসেসি, তং সুত্ৰা সব্বে অরহত্তফলে পতিট্ঠহিংসূ’’তি। দেৰদত্তং উট্ঠাপেসীতি জণ্ণুকেন হদযমজ্ঝে পহরিত্ৰা উট্ঠাপেসি।
345.Atha kho āyasmā sāriputto ādesanāpāṭihāriyānusāsaniyātiādīsu parassa cittaṃ ñatvā kathanaṃ ādesanāpāṭihāriyaṃ, sāvakānañca buddhānañca satataṃ dhammadesanaṃ anusāsanīpāṭihāriyaṃ, iddhividhaṃ iddhipāṭihāriyaṃ. Tattha iddhipāṭihāriyena saddhiṃ anusāsanīpāṭihāriyaṃ mahāmoggallānattherassa āciṇṇaṃ, ādesanāpāṭihāriyena saddhiṃ anusāsanīpāṭihāriyaṃ dhammasenāpatissa. Tena vuttaṃ ‘‘āyasmā sāriputto ādesanāpāṭihāriyānusāsaniyā bhikkhū dhammiyā kathāya ovadī’’tiādi. Tadā hi dvīsu aggasāvakesu dhammasenāpati tesaṃ bhikkhūnaṃ cittacāraṃ ñatvā dhammaṃ desesi, mahāmoggallānatthero vikubbanaṃ dassetvā dhammaṃ desesi, pāḷiyañcettha dvinnampi therānaṃ desanāya dhammacakkhupaṭilābhova dassito. Dīghabhāṇakā pana evaṃ vadanti ‘‘bhagavatā pesitesu dvīsu aggasāvakesu dhammasenāpati tesaṃ cittacāraṃ ñatvā dhammaṃ desesi, therassa dhammadesanaṃ sutvā pañcasatāpi bhikkhū sotāpattiphale patiṭṭhahiṃsu. Atha nesaṃ mahāmoggallānatthero vikubbanaṃ dassetvā dhammaṃ desesi, taṃ sutvā sabbe arahattaphale patiṭṭhahiṃsū’’ti. Devadattaṃ uṭṭhāpesīti jaṇṇukena hadayamajjhe paharitvā uṭṭhāpesi.
৩৪৬. সরসীতি সরো। সুৰিক্খালিতন্তি সুট্ঠু ৰিক্খালিতং, সুৰিসোধিতং কত্ৰাতি অত্থো। সংখাদিত্ৰাতি সুট্ঠু খাদিত্ৰা। মহিং ৰিকুব্বতোতি মহিং দন্তেহি ৰিলিখন্তস্স। নদীসু ভিসং ঘসানস্সাতি যোজেতব্বং। নদীতি চেত্থ মহাসরো অধিপ্পেতো। জগ্গতোতি হত্থিযূথং পালেন্তস্স। ভিঙ্কোৰাতি হত্থিপোতকো ৰিয। মমানুকুব্বন্তি মং অনুকরোন্তো।
346.Sarasīti saro. Suvikkhālitanti suṭṭhu vikkhālitaṃ, suvisodhitaṃ katvāti attho. Saṃkhāditvāti suṭṭhu khāditvā. Mahiṃ vikubbatoti mahiṃ dantehi vilikhantassa. Nadīsu bhisaṃ ghasānassāti yojetabbaṃ. Nadīti cettha mahāsaro adhippeto. Jaggatoti hatthiyūthaṃ pālentassa. Bhiṅkovāti hatthipotako viya. Mamānukubbanti maṃ anukaronto.
৩৪৭. দূতেয্যন্তি দূতকম্মং। গন্তুমরহতীতি দূতেয্যসঙ্খাতং সাসনং হরিতুং ধারেত্ৰা হরিতুং অরহতি। সোতাতি যং অস্স সাসনং দেন্তি, তস্স সোতা। সাৰেতাতি তং উগ্গণ্হিত্ৰা ‘‘ইদং নাম তুম্হেহি ৰুত্ত’’ন্তি পটিসাৰেতা। উগ্গহেতাতি সুউগ্গহিতং কত্ৰা উগ্গহেতা। ধারেতাতি সুধারিতং কত্ৰা ধারেতা। ৰিঞ্ঞাতাতি অত্তনা তস্স অত্থং জানিতা। ৰিঞ্ঞাপেতাতি পরং ৰিজানাপেতা। সহিতাসহিতস্সাতি ‘‘ইদং সহিতং, ইদং অসহিত’’ন্তি এৰং সহিতাসহিতস্স কুসলো উপগতানুপগতেসু ছেকো সাসনং আরোচেন্তো সহিতাসহিতং সল্লক্খেত্ৰা আরোচেতি। ন ব্যথতীতি ন ৰেধতি ন ছম্ভতি। উগ্গৰাদিনিন্তি ফরুসৰচনেন সমন্নাগতং। পুচ্ছিতোতি পটিঞ্ঞত্থায পুচ্ছিতো।
347.Dūteyyanti dūtakammaṃ. Gantumarahatīti dūteyyasaṅkhātaṃ sāsanaṃ harituṃ dhāretvā harituṃ arahati. Sotāti yaṃ assa sāsanaṃ denti, tassa sotā. Sāvetāti taṃ uggaṇhitvā ‘‘idaṃ nāma tumhehi vutta’’nti paṭisāvetā. Uggahetāti suuggahitaṃ katvā uggahetā. Dhāretāti sudhāritaṃ katvā dhāretā. Viññātāti attanā tassa atthaṃ jānitā. Viññāpetāti paraṃ vijānāpetā. Sahitāsahitassāti ‘‘idaṃ sahitaṃ, idaṃ asahita’’nti evaṃ sahitāsahitassa kusalo upagatānupagatesu cheko sāsanaṃ ārocento sahitāsahitaṃ sallakkhetvā āroceti. Na byathatīti na vedhati na chambhati. Uggavādininti pharusavacanena samannāgataṃ. Pucchitoti paṭiññatthāya pucchito.
৩৪৮. অট্ঠহি, ভিক্খৰে, অসদ্ধম্মেহীতিআদীসু অসদ্ধম্মেহীতি (ইতিৰু॰ অট্ঠ॰ ৮৯) অসতং ধম্মেহি, অসন্তেহি ৰা অসোভনেহি ৰা ধম্মেহি। অভিভূতোতি অজ্ঝোত্থটো। পরিযাদিন্নচিত্তোতি খেপিতচিত্তো লাভাদিহেতুকেন ইচ্ছাচারেন মানমদাদিনা চ খযং পাপিতকুসলচিত্তো। অথ ৰা পরিযাদিন্নচিত্তোতি পরিতো আদিন্নচিত্তো, ৰুত্তপ্পকারেন অকুসলকোট্ঠাসেন যথা কুসলচিত্তস্স উপ্পত্তিৰারো ন হোতি, এৰং সমন্ততো গহিতচিত্তসন্তানোতি অত্থো। অপাযে নিব্বত্তনারহতায আপাযিকো। তত্থপি অৰীচিসঙ্খাতে মহানিরযে উপ্পজ্জতীতি নেরযিকো। একং অন্তরকপ্পং পরিপুণ্ণমেৰ কত্ৰা তত্থ তিট্ঠতীতি কপ্পট্ঠো। অতেকিচ্ছোতি বুদ্ধেহিপি অনিৰত্তনীযত্তা অৰীচিনিব্বত্তিযা তিকিচ্ছাভাৰতো অতেকিচ্ছো, অতিকিচ্ছনীযোতি অত্থো। লাভেনাতি লাভেন হেতুভূতেন। অথ ৰা লাভহেতুকেন মানাদিনা। লাভঞ্হি নিস্সায ইধেকচ্চে পুগ্গলা পাপিচ্ছা ইচ্ছাপকতা ইচ্ছাচারে ঠত্ৰা ‘‘লাভং নিব্বত্তেস্সামা’’তি অনেকৰিহিতং অনেসনং অপ্পতিরূপং আপজ্জিত্ৰা ইতো চুতা অপাযেসু নিব্বত্তন্তি। অপরে যথালাভং লভিত্ৰা তংনিমিত্তং মানাতিমানমদমচ্ছরিযাদিৰসেন পমাদং আপজ্জিত্ৰা ইতো চুতা অপাযেসু নিব্বত্তন্তি, অযঞ্চ তাদিসো। তেন ৰুত্তং ‘‘লাভেন, ভিক্খৰে, অভিভূতো পরিযাদিন্নচিত্তো দেৰদত্তো আপাযিকো’’তিআদি। অসক্কারেনাতি হীল়েত্ৰা পরিভৰিত্ৰা পরেহি অত্তনি পৰত্তিতেন অসক্কারেন, অসক্কারহেতুকেন ৰা মানাদিনা। অসন্তগুণসম্ভাৰনাধিপ্পাযেন পৰত্তা পাপা ইচ্ছা এতস্সাতি পাপিচ্ছো, তস্স ভাৰো পাপিচ্ছতা, তায। ‘‘অহং বুদ্ধো ভৰিস্সামি, ভিক্খুসঙ্ঘং পরিহরিস্সামী’’তি হি তস্স ইচ্ছা উপ্পন্না। কোকালিকাদযো পাপা লামকা মিত্তা এতস্সাতি পাপমিত্তো, তস্স ভাৰো পাপমিত্ততা, তায।
348.Aṭṭhahi, bhikkhave, asaddhammehītiādīsu asaddhammehīti (itivu. aṭṭha. 89) asataṃ dhammehi, asantehi vā asobhanehi vā dhammehi. Abhibhūtoti ajjhotthaṭo. Pariyādinnacittoti khepitacitto lābhādihetukena icchācārena mānamadādinā ca khayaṃ pāpitakusalacitto. Atha vā pariyādinnacittoti parito ādinnacitto, vuttappakārena akusalakoṭṭhāsena yathā kusalacittassa uppattivāro na hoti, evaṃ samantato gahitacittasantānoti attho. Apāye nibbattanārahatāya āpāyiko. Tatthapi avīcisaṅkhāte mahāniraye uppajjatīti nerayiko. Ekaṃ antarakappaṃ paripuṇṇameva katvā tattha tiṭṭhatīti kappaṭṭho. Atekicchoti buddhehipi anivattanīyattā avīcinibbattiyā tikicchābhāvato atekiccho, atikicchanīyoti attho. Lābhenāti lābhena hetubhūtena. Atha vā lābhahetukena mānādinā. Lābhañhi nissāya idhekacce puggalā pāpicchā icchāpakatā icchācāre ṭhatvā ‘‘lābhaṃ nibbattessāmā’’ti anekavihitaṃ anesanaṃ appatirūpaṃ āpajjitvā ito cutā apāyesu nibbattanti. Apare yathālābhaṃ labhitvā taṃnimittaṃ mānātimānamadamacchariyādivasena pamādaṃ āpajjitvā ito cutā apāyesu nibbattanti, ayañca tādiso. Tena vuttaṃ ‘‘lābhena, bhikkhave, abhibhūto pariyādinnacitto devadatto āpāyiko’’tiādi. Asakkārenāti hīḷetvā paribhavitvā parehi attani pavattitena asakkārena, asakkārahetukena vā mānādinā. Asantaguṇasambhāvanādhippāyena pavattā pāpā icchā etassāti pāpiccho, tassa bhāvo pāpicchatā, tāya. ‘‘Ahaṃ buddho bhavissāmi, bhikkhusaṅghaṃ pariharissāmī’’ti hi tassa icchā uppannā. Kokālikādayo pāpā lāmakā mittā etassāti pāpamitto, tassa bhāvo pāpamittatā, tāya.
৩৪৯. অভিভুয্যাতি অভিভৰিত্ৰা মদ্দিত্ৰা।
349.Abhibhuyyāti abhibhavitvā madditvā.
৩৫০. তীহি, ভিক্খৰে, অসদ্ধম্মেহীতিআদি ৰুত্তনযমেৰ। ওরমত্তকেন ৰিসেসাধিগমেন অন্তরা ৰোসানং আপাদীতি এত্থ পন অযমত্থো। ওরমত্তকেনাতি অপ্পমত্তকেন ঝানাভিঞ্ঞামত্তেন। ৰিসেসাধিগমেনাতি উত্তরিমনুস্সধম্মাধিগমেন। অন্তরাতি ৰেমজ্ঝে। ৰোসানং আপাদীতি অকতকিচ্চোৰ সমানো ‘‘কতকিচ্চোম্হী’’তি মঞ্ঞমানো সমণধম্মতো ৰিগমং আপজ্জি। ইদং ৰুত্তং হোতি – ঝানাভিঞ্ঞাহি উত্তরিকরণীযে অধিগন্তব্বে মগ্গফলে অনধিগতে সতিযেৰ তং অনধিগন্ত্ৰা সমণধম্মতো ৰিগমং আপজ্জীতি। ইতি ভগৰা ইমিনা সুত্তেন ৰিসেসতো পুথুজ্জনভাৰে আদীনৰং পকাসেতি ‘‘ভারিযো পুথুজ্জনভাৰো, যত্র হি নাম ঝানাভিঞ্ঞাপরিযোসানা সম্পত্তিযো নিব্বত্তেত্ৰাপি অনেকানত্থাৰহং নানাৰিধদুক্খহেতুঅসন্তগুণসম্ভাৰনং অসপ্পুরিসসংসগ্গং আলসিযানুযোগঞ্চ অৰিজহন্তো অৰীচিসংৰত্তনিকং কপ্পট্ঠিযং অতেকিচ্ছং কিব্বিসং পসৰতী’’তি।
350.Tīhi, bhikkhave, asaddhammehītiādi vuttanayameva. Oramattakena visesādhigamena antarā vosānaṃ āpādīti ettha pana ayamattho. Oramattakenāti appamattakena jhānābhiññāmattena. Visesādhigamenāti uttarimanussadhammādhigamena. Antarāti vemajjhe. Vosānaṃ āpādīti akatakiccova samāno ‘‘katakiccomhī’’ti maññamāno samaṇadhammato vigamaṃ āpajji. Idaṃ vuttaṃ hoti – jhānābhiññāhi uttarikaraṇīye adhigantabbe maggaphale anadhigate satiyeva taṃ anadhigantvā samaṇadhammato vigamaṃ āpajjīti. Iti bhagavā iminā suttena visesato puthujjanabhāve ādīnavaṃ pakāseti ‘‘bhāriyo puthujjanabhāvo, yatra hi nāma jhānābhiññāpariyosānā sampattiyo nibbattetvāpi anekānatthāvahaṃ nānāvidhadukkhahetuasantaguṇasambhāvanaṃ asappurisasaṃsaggaṃ ālasiyānuyogañca avijahanto avīcisaṃvattanikaṃ kappaṭṭhiyaṃ atekicchaṃ kibbisaṃ pasavatī’’ti.
গাথাসু মাতি পটিসেধে নিপাতো। জাতূতি একংসেন। কোচীতি সব্বসঙ্গাহকৰচনং। লোকস্মিন্তি সত্তলোকে। ইদং ৰুত্তং হোতি – ইমস্মিং সত্তলোকে কোচি পুগ্গলো একংসেন পাপিচ্ছো মা হোতূতি। তদমিনাপি জানাথ, পাপিচ্ছানং যথা গতীতি পাপিচ্ছানং পুগ্গলানং যথাগতি যাদিসী নিব্বত্তি যাদিসো অভিসম্পরাযোতি ইমিনাপি কারণেন জানাথাতি দেৰদত্তং নিদস্সেন্তো এৰমাহ।
Gāthāsu māti paṭisedhe nipāto. Jātūti ekaṃsena. Kocīti sabbasaṅgāhakavacanaṃ. Lokasminti sattaloke. Idaṃ vuttaṃ hoti – imasmiṃ sattaloke koci puggalo ekaṃsena pāpiccho mā hotūti. Tadamināpi jānātha, pāpicchānaṃ yathā gatīti pāpicchānaṃ puggalānaṃ yathāgati yādisī nibbatti yādiso abhisamparāyoti imināpi kāraṇena jānāthāti devadattaṃ nidassento evamāha.
পণ্ডিতোতি সমঞ্ঞাতোতি পরিযত্তিবাহুসচ্চেন পণ্ডিতোতি ঞাতো। ভাৰিতত্তোতি সম্মতোতি ঝানাভিঞ্ঞাহি ভাৰিতচিত্তোতি সম্ভাৰিতো। তথা হি সো ‘‘মহিদ্ধিকো গোধিপুত্তো, মহানুভাৰো গোধিপুত্তো’’তি ধম্মসেনাপতিনাপি পসংসিতো অহোসি। জলংৰ যসসা অট্ঠা, দেৰদত্তোতি ৰিস্সুতোতি অত্তনো কিত্তিযা পরিৰারেন চ জলন্তো ৰিয ওভাসন্তো ৰিয ঠিতো দেৰদত্তোতি এৰং ৰিস্সুতো পাকটো অহোসি। ‘‘মে সুত’’ন্তিপি পাঠো, মযা সুতং সুতমত্তং, কতিপাহেনেৰ অতথাভূতত্তা তস্স তং পণ্ডিচ্চাদিসৰনমত্তমেৰাতি অত্থো।
Paṇḍitoti samaññātoti pariyattibāhusaccena paṇḍitoti ñāto. Bhāvitattoti sammatoti jhānābhiññāhi bhāvitacittoti sambhāvito. Tathā hi so ‘‘mahiddhiko godhiputto, mahānubhāvo godhiputto’’ti dhammasenāpatināpi pasaṃsito ahosi. Jalaṃva yasasā aṭṭhā, devadattoti vissutoti attano kittiyā parivārena ca jalanto viya obhāsanto viya ṭhito devadattoti evaṃ vissuto pākaṭo ahosi. ‘‘Me suta’’ntipi pāṭho, mayā sutaṃ sutamattaṃ, katipāheneva atathābhūtattā tassa taṃ paṇḍiccādisavanamattamevāti attho.
সো পমাদং অনুচিণ্ণো, আসজ্জ নং তথাগতন্তি সো এৰংভূতো দেৰদত্তো ‘‘বুদ্ধোপি সাকিযপুত্তো, অহম্পি সাকিযপুত্তো, বুদ্ধোপি সমণো, অহম্পি সমণো, বুদ্ধোপি ইদ্ধিমা, অহম্পি ইদ্ধিমা, বুদ্ধোপি দিব্বচক্খুকো, দিব্বসোতচেতোপরিযঞাণলাভী, বুদ্ধোপি অতীতানাগতপচ্চুপ্পন্নে ধম্মে জানাতি, অহম্পি তে জানামী’’তি অত্তনো পমাণং অজানিত্ৰা সম্মাসম্বুদ্ধং অত্তনা সমসমট্ঠপনেন পমাদং আপজ্জন্তো ‘‘ইদানাহং বুদ্ধো ভৰিস্সামি, ভিক্খুসঙ্ঘং পরিহরিস্সামী’’তি অভিমারপযোজনাদিনা তথাগতং আসজ্জ আসাদেত্ৰা ৰিহেঠেত্ৰা। ‘‘পমাদমনুজিণ্ণো’’তিপি পঠন্তি। তস্সত্থো – পমাদং ৰুত্তনযেন পমজ্জন্তো পমাদং নিস্সায ভগৰতা সদ্ধিং যুগগ্গাহচিত্তুপ্পাদেন সহেৰ ঝানাভিঞ্ঞাহি অনুজিণ্ণো পরিহীনোতি। অৰীচিনিরযং পত্তো, চতুদ্ৰারং ভযানকন্তি জালানং তত্থ উপ্পন্নসত্তানং ৰা নিরন্তরতায ‘‘অৰীচী’’তি লদ্ধনামং চতূসু পস্সেসু চতুমহাদ্ৰারযোগেন চতুদ্ৰারং অতিভযানকং মহানিরযং পটিসন্ধিগ্গহণৰসেন পত্তো। তথা হি ৰুত্তং –
Sopamādaṃ anuciṇṇo, āsajja naṃ tathāgatanti so evaṃbhūto devadatto ‘‘buddhopi sākiyaputto, ahampi sākiyaputto, buddhopi samaṇo, ahampi samaṇo, buddhopi iddhimā, ahampi iddhimā, buddhopi dibbacakkhuko, dibbasotacetopariyañāṇalābhī, buddhopi atītānāgatapaccuppanne dhamme jānāti, ahampi te jānāmī’’ti attano pamāṇaṃ ajānitvā sammāsambuddhaṃ attanā samasamaṭṭhapanena pamādaṃ āpajjanto ‘‘idānāhaṃ buddho bhavissāmi, bhikkhusaṅghaṃ pariharissāmī’’ti abhimārapayojanādinā tathāgataṃ āsajja āsādetvā viheṭhetvā. ‘‘Pamādamanujiṇṇo’’tipi paṭhanti. Tassattho – pamādaṃ vuttanayena pamajjanto pamādaṃ nissāya bhagavatā saddhiṃ yugaggāhacittuppādena saheva jhānābhiññāhi anujiṇṇo parihīnoti. Avīcinirayaṃ patto, catudvāraṃ bhayānakanti jālānaṃ tattha uppannasattānaṃ vā nirantaratāya ‘‘avīcī’’ti laddhanāmaṃ catūsu passesu catumahādvārayogena catudvāraṃ atibhayānakaṃ mahānirayaṃ paṭisandhiggahaṇavasena patto. Tathā hi vuttaṃ –
‘‘চতুক্কণ্ণো চতুদ্ৰারো, ৰিভত্তো ভাগসো মিতো।
‘‘Catukkaṇṇo catudvāro, vibhatto bhāgaso mito;
অযোপাকারপরিযন্তো, অযসা পটিকুজ্জিতো॥
Ayopākārapariyanto, ayasā paṭikujjito.
‘‘তস্স অযোমযা ভূমি, জলিতা তেজসা যুতা।
‘‘Tassa ayomayā bhūmi, jalitā tejasā yutā;
সমন্তা যোজনসতং, ফরিত্ৰা তিট্ঠতি সব্বদা’’তি॥ (ম॰ নি॰ ৩.২৫০, ২৬৭; অ॰ নি॰ ৩.৩৬)।
Samantā yojanasataṃ, pharitvā tiṭṭhati sabbadā’’ti. (ma. ni. 3.250, 267; a. ni. 3.36);
অদুট্ঠস্সাতি অদুট্ঠচিত্তস্স। দুব্ভেতি দুস্সেয্য। তমেৰ পাপং ফুসতীতি তমেৰ অদুট্ঠদুব্ভিং পাপপুগ্গলং পাপং নিহীনং পাপফলং ফুসতি পাপুণাতি অভিভৰতি। ভেস্মাতি ৰিপুলভাৰেন গম্ভীরভাৰেন চ ভিংসাপনো, ভিংসাপেন্তো ৰিয ৰিপুলগম্ভীরোতি অত্থো। ৰাদেনাতি দোসেন। উপহিংসতীতি বাধতি আসাদেতি। ৰাদো তম্হি ন রূহতীতি তস্মিং তথাগতে পরেন আরোপিযমানো দোসো ন রুহতি ন তিট্ঠতি, ৰিসকুম্ভো ৰিয সমুদ্দস্স ন তস্স ৰিকারং জনেতীতি অত্থো।
Aduṭṭhassāti aduṭṭhacittassa. Dubbheti dusseyya. Tameva pāpaṃ phusatīti tameva aduṭṭhadubbhiṃ pāpapuggalaṃ pāpaṃ nihīnaṃ pāpaphalaṃ phusati pāpuṇāti abhibhavati. Bhesmāti vipulabhāvena gambhīrabhāvena ca bhiṃsāpano, bhiṃsāpento viya vipulagambhīroti attho. Vādenāti dosena. Upahiṃsatīti bādhati āsādeti. Vādo tamhi na rūhatīti tasmiṃ tathāgate parena āropiyamāno doso na ruhati na tiṭṭhati, visakumbho viya samuddassa na tassa vikāraṃ janetīti attho.
এৰং ছহি গাথাহি পাপিচ্ছতাদিসমন্নাগতস্স নিরযূপগভাৰদস্সনেন দুক্খতো অপরিমুত্তিং দস্সেত্ৰা ইদানি তপ্পটিপক্খধম্মসমন্নাগতস্স দুক্খক্খযং দস্সেন্তো ‘‘তাদিসং মিত্ত’’ন্তি ওসানগাথমাহ। তস্সত্থো – যস্স সম্মা পটিপন্নস্স মগ্গানুগো পটিপত্তিমগ্গং অনুগতো সম্মা পটিপন্নো অপ্পিচ্ছতাদিগুণসমন্নাগমেন সকলস্স ৰট্টদুক্খস্স খযং পরিযোসানং পাপুণেয্য, তাদিসং বুদ্ধং বুদ্ধসাৰকং ৰা পণ্ডিতো সপ্পঞ্ঞো অত্তনো মিত্তং কুব্বেথ তেন মেত্তিং করেয্য, তঞ্চ সেৰেথ তমেৰ পযিরুপাসেয্যাতি।
Evaṃ chahi gāthāhi pāpicchatādisamannāgatassa nirayūpagabhāvadassanena dukkhato aparimuttiṃ dassetvā idāni tappaṭipakkhadhammasamannāgatassa dukkhakkhayaṃ dassento ‘‘tādisaṃ mitta’’nti osānagāthamāha. Tassattho – yassa sammā paṭipannassa maggānugo paṭipattimaggaṃ anugato sammā paṭipanno appicchatādiguṇasamannāgamena sakalassa vaṭṭadukkhassa khayaṃ pariyosānaṃ pāpuṇeyya, tādisaṃ buddhaṃ buddhasāvakaṃ vā paṇḍito sappañño attano mittaṃ kubbetha tena mettiṃ kareyya, tañca sevetha tameva payirupāseyyāti.
কিং পনেতং সুত্তং দেৰদত্তস্স নিরযূপপত্তিতো পুব্বে ভাসিতং, উদাহু পচ্ছাতি? ইতিৰুত্তকট্ঠকথাযং (ইতিৰু॰ অট্ঠ॰ ৮৯) তাৰ –
Kiṃ panetaṃ suttaṃ devadattassa nirayūpapattito pubbe bhāsitaṃ, udāhu pacchāti? Itivuttakaṭṭhakathāyaṃ (itivu. aṭṭha. 89) tāva –
‘‘দেৰদত্তে হি অৰীচিমহানিরযং পৰিট্ঠে দেৰদত্তপক্খিকা অঞ্ঞতিত্থিযা ‘সমণেন গোতমেন অভিসপিতো দেৰদত্তো পথৰিং পৰিট্ঠো’তি অব্ভাচিক্খিংসু। তং সুত্ৰা সাসনে অনভিপ্পসন্না মনুস্সা ‘সিযা নু খো এতদেৰং, যথা ইমে ভণন্তী’তি আসঙ্কং উপ্পাদেসুং। তং পৰত্তিং ভিক্খূ ভগৰতো আরোচেসুং। অথ খো ভগৰা ‘ন, ভিক্খৰে, তথাগতা কস্সচি অভিসপং দেন্তি, তস্মা ন দেৰদত্তো মযা অভিসপিতো, অত্তনো কম্মেনেৰ নিরযং পৰিট্ঠো’তি ৰত্ৰা তেসং মিচ্ছাগাহং পটিসেধেন্তো ইমায অট্ঠুপ্পত্তিযা ইদং সুত্তং অভাসী’’তি –
‘‘Devadatte hi avīcimahānirayaṃ paviṭṭhe devadattapakkhikā aññatitthiyā ‘samaṇena gotamena abhisapito devadatto pathaviṃ paviṭṭho’ti abbhācikkhiṃsu. Taṃ sutvā sāsane anabhippasannā manussā ‘siyā nu kho etadevaṃ, yathā ime bhaṇantī’ti āsaṅkaṃ uppādesuṃ. Taṃ pavattiṃ bhikkhū bhagavato ārocesuṃ. Atha kho bhagavā ‘na, bhikkhave, tathāgatā kassaci abhisapaṃ denti, tasmā na devadatto mayā abhisapito, attano kammeneva nirayaṃ paviṭṭho’ti vatvā tesaṃ micchāgāhaṃ paṭisedhento imāya aṭṭhuppattiyā idaṃ suttaṃ abhāsī’’ti –
ৰুত্তং, তস্মা তেসং মতেন তস্স নিরযূপপত্তিতো পচ্ছাপি ভগৰা ইদং সুত্তমভাসীতি ৰেদিতব্বং। ইধ পন তস্স নিরযূপপত্তিতো পঠমমেৰ উপ্পন্নে ৰত্থুম্হি ভাসিতং পাল়িআরুল়্হন্তি দট্ঠব্বং। তেনেৰ ‘‘অৰীচিনিরযং পত্তো’’তি ইদং পন আসংসাযং অতীতৰচনন্তি ৰুত্তং, আসংসাতি চেত্থ অৰস্সম্ভাৰিনী অত্থসিদ্ধি অধিপ্পেতা। অৰস্সম্ভাৰিনিঞ্হি অত্থসিদ্ধিমপেক্খিত্ৰা অনাগতম্পি ভূতং ৰিয ৰোহরন্তি, তঞ্চ সদ্দলক্খণানুসারেন ৰেদিতব্বং।
Vuttaṃ, tasmā tesaṃ matena tassa nirayūpapattito pacchāpi bhagavā idaṃ suttamabhāsīti veditabbaṃ. Idha pana tassa nirayūpapattito paṭhamameva uppanne vatthumhi bhāsitaṃ pāḷiāruḷhanti daṭṭhabbaṃ. Teneva ‘‘avīcinirayaṃ patto’’ti idaṃ pana āsaṃsāyaṃ atītavacananti vuttaṃ, āsaṃsāti cettha avassambhāvinī atthasiddhi adhippetā. Avassambhāviniñhi atthasiddhimapekkhitvā anāgatampi bhūtaṃ viya voharanti, tañca saddalakkhaṇānusārena veditabbaṃ.
সঙ্ঘভেদকথাৰণ্ণনা নিট্ঠিতা।
Saṅghabhedakathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / সঙ্ঘভেদকথা • Saṅghabhedakathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / সঙ্ঘভেদককথা • Saṅghabhedakakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ছসক্যপব্বজ্জাকথাৰণ্ণনা • Chasakyapabbajjākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / সঙ্ঘভেদককথাৰণ্ণনা • Saṅghabhedakakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / সঙ্ঘভেদকথা • Saṅghabhedakathā
