| Library / Tipiṭaka / တိပိဋက • Tipiṭaka / မဟာဝိဘင္ဂ • Mahāvibhaṅga |
၁၀. သင္ဃဘေဒသိက္ခာပဒံ
10. Saṅghabhedasikkhāpadaṃ
၄၀၉. 1 တေန သမယေန ဗုဒ္ဓော ဘဂဝာ ရာဇဂဟေ ဝိဟရတိ ဝေဠုဝနေ ကလန္ဒကနိဝာပေ။ အထ ခော ဒေဝဒတ္တော ယေန ကောကာလိကော ကဋမောဒကတိသ္သကော 2 ခဏ္ဍဒေဝိယာ ပုတ္တော သမုဒ္ဒဒတ္တော တေနုပသင္ကမိ; ဥပသင္ကမိတ္ဝာ ကောကာလိကံ ကဋမောဒကတိသ္သကံ ခဏ္ဍဒေဝိယာ ပုတ္တံ သမုဒ္ဒဒတ္တံ ဧတဒဝောစ – ‘‘ဧထ မယံ, အာဝုသော, သမဏသ္သ ဂောတမသ္သ သင္ဃဘေဒံ ကရိသ္သာမ စက္ကဘေဒ’’န္တိ။ ဧဝံ ဝုတ္တေ ကောကာလိကော ဒေဝဒတ္တံ ဧတဒဝောစ – ‘‘သမဏော ခော, အာဝုသော, ဂောတမော မဟိဒ္ဓိကော မဟာနုဘာဝော။ ကထံ မယံ သမဏသ္သ ဂောတမသ္သ သင္ဃဘေဒံ ကရိသ္သာမ စက္ကဘေဒ’’န္တိ? ‘‘ဧထ မယံ, အာဝုသော, သမဏံ ဂောတမံ ဥပသင္ကမိတ္ဝာ ပဉ္စ ဝတ္ထူနိ ယာစိသ္သာမ – ‘ဘဂဝာ, ဘန္တေ, အနေကပရိယာယေန အပ္ပိစ္ဆသ္သ သန္တုဋ္ဌသ္သ သလ္လေခသ္သ ဓုတသ္သ ပာသာဒိကသ္သ အပစယသ္သ ဝီရိယာရမ္ဘသ္သ 3 ဝဏ္ဏဝာဒီ။ ဣမာနိ, ဘန္တေ, ပဉ္စ ဝတ္ထူနိ အနေကပရိယာယေန အပ္ပိစ္ဆတာယ သန္တုဋ္ဌိယာ သလ္လေခာယ ဓုတတာယ ပာသာဒိကတာယ အပစယာယ ဝီရိယာရမ္ဘာယ သံဝတ္တန္တိ။ သာဓု, ဘန္တေ, ဘိက္ခူ ယာဝဇီဝံ အာရညိကာ အသ္သု; ယော ဂာမန္တံ ဩသရေယ္ယ, ဝဇ္ဇံ နံ ဖုသေယ္ယ။ ယာဝဇီဝံ ပိဏ္ဍပာတိကာ အသ္သု; ယော နိမန္တနံ သာဒိယေယ္ယ, ဝဇ္ဇံ နံ ဖုသေယ္ယ။ ယာဝဇီဝံ ပံသုကူလိကာ အသ္သု; ယော ဂဟပတိစီဝရံ သာဒိယေယ္ယ, ဝဇ္ဇံ နံ ဖုသေယ္ယ။ ယာဝဇီဝံ ရုက္ခမူလိကာ အသ္သု; ယော ဆန္နံ ဥပဂစ္ဆေယ္ယ, ဝဇ္ဇံ နံ ဖုသေယ္ယ။ ယာဝဇီဝံ မစ္ဆမံသံ န ခာဒေယ္ယုံ; ယော မစ္ဆမံသံ ခာဒေယ္ယ, ဝဇ္ဇံ နံ ဖုသေယ္ယာ’တိ။ ဣမာနိ သမဏော ဂောတမော နာနုဇာနိသ္သတိ။ တေ မယံ ဣမေဟိ ပဉ္စဟိ ဝတ္ထူဟိ ဇနံ သညာပေသ္သာမာတိ။ သက္ကာ ခော, အာဝုသော, ဣမေဟိ ပဉ္စဟိ ဝတ္ထူဟိ သမဏသ္သ ဂောတမသ္သ သင္ဃဘေဒော ကာတုံ စက္ကဘေဒော။ လူခပသန္နာ ဟိ, အာဝုသော, မနုသ္သာ’’တိ။
409.4 Tena samayena buddho bhagavā rājagahe viharati veḷuvane kalandakanivāpe. Atha kho devadatto yena kokāliko kaṭamodakatissako 5 khaṇḍadeviyā putto samuddadatto tenupasaṅkami; upasaṅkamitvā kokālikaṃ kaṭamodakatissakaṃ khaṇḍadeviyā puttaṃ samuddadattaṃ etadavoca – ‘‘etha mayaṃ, āvuso, samaṇassa gotamassa saṅghabhedaṃ karissāma cakkabheda’’nti. Evaṃ vutte kokāliko devadattaṃ etadavoca – ‘‘samaṇo kho, āvuso, gotamo mahiddhiko mahānubhāvo. Kathaṃ mayaṃ samaṇassa gotamassa saṅghabhedaṃ karissāma cakkabheda’’nti? ‘‘Etha mayaṃ, āvuso, samaṇaṃ gotamaṃ upasaṅkamitvā pañca vatthūni yācissāma – ‘bhagavā, bhante, anekapariyāyena appicchassa santuṭṭhassa sallekhassa dhutassa pāsādikassa apacayassa vīriyārambhassa 6 vaṇṇavādī. Imāni, bhante, pañca vatthūni anekapariyāyena appicchatāya santuṭṭhiyā sallekhāya dhutatāya pāsādikatāya apacayāya vīriyārambhāya saṃvattanti. Sādhu, bhante, bhikkhū yāvajīvaṃ āraññikā assu; yo gāmantaṃ osareyya, vajjaṃ naṃ phuseyya. Yāvajīvaṃ piṇḍapātikā assu; yo nimantanaṃ sādiyeyya, vajjaṃ naṃ phuseyya. Yāvajīvaṃ paṃsukūlikā assu; yo gahapaticīvaraṃ sādiyeyya, vajjaṃ naṃ phuseyya. Yāvajīvaṃ rukkhamūlikā assu; yo channaṃ upagaccheyya, vajjaṃ naṃ phuseyya. Yāvajīvaṃ macchamaṃsaṃ na khādeyyuṃ; yo macchamaṃsaṃ khādeyya, vajjaṃ naṃ phuseyyā’ti. Imāni samaṇo gotamo nānujānissati. Te mayaṃ imehi pañcahi vatthūhi janaṃ saññāpessāmāti. Sakkā kho, āvuso, imehi pañcahi vatthūhi samaṇassa gotamassa saṅghabhedo kātuṃ cakkabhedo. Lūkhapasannā hi, āvuso, manussā’’ti.
အထ ခော ဒေဝဒတ္တော သပရိသော ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နော ခော ဒေဝဒတ္တော ဘဂဝန္တံ ဧတဒဝောစ – ‘‘ဘဂဝာ, ဘန္တေ, အနေကပရိယာယေန အပ္ပိစ္ဆသ္သ။ပေ.။ ဝီရိယာရမ္ဘသ္သ ဝဏ္ဏဝာဒီ။ ဣမာနိ, ဘန္တေ, ပဉ္စ ဝတ္ထူနိ အနေကပရိယာယေန အပ္ပိစ္ဆတာယ။ပေ.။ ဝီရိယာရမ္ဘာယ သံဝတ္တန္တိ။ သာဓု, ဘန္တေ, ဘိက္ခူ ယာဝဇီဝံ အာရညိကာ အသ္သု; ယော ဂာမန္တံ ဩသရေယ္ယ ဝဇ္ဇံ နံ ဖုသေယ္ယ။ပေ.။ ယာဝဇီဝံ မစ္ဆမံသံ န ခာဒေယ္ယုံ, ယော မစ္ဆမံသံ ခာဒေယ္ယ ဝဇ္ဇံ နံ ဖုသေယ္ယာ’’တိ။ ‘‘အလံ, ဒေဝဒတ္တ, ယော ဣစ္ဆတိ အာရညိကော ဟောတု, ယော ဣစ္ဆတိ ဂာမန္တေ ဝိဟရတု; ယော ဣစ္ဆတိ ပိဏ္ဍပာတိကော ဟောတု, ယော ဣစ္ဆတိ နိမန္တနံ သာဒိယတု; ယော ဣစ္ဆတိ ပံသုကူလိကော ဟောတု, ယော ဣစ္ဆတိ ဂဟပတိစီဝရံ သာဒိယတု။ အဋ္ဌမာသေ ခော မယာ, ဒေဝဒတ္တ, ရုက္ခမူလသေနာသနံ အနုညာတံ, တိကောဋိပရိသုဒ္ဓံ မစ္ဆမံသံ – အဒိဋ္ဌံ အသုတံ အပရိသင္ကိတ’’န္တိ။ အထ ခော ဒေဝဒတ္တော – ‘‘န ဘဂဝာ ဣမာနိ ပဉ္စ ဝတ္ထူနိ အနုဇာနာတီ’’တိ ဟဋ္ဌော ဥဒဂ္ဂော သပရိသော ဥဋ္ဌာယာသနာ ဘဂဝန္တံ အဘိဝာဒေတ္ဝာ ပဒက္ခိဏံ ကတ္ဝာ ပက္ကာမိ။
Atha kho devadatto sapariso yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho devadatto bhagavantaṃ etadavoca – ‘‘bhagavā, bhante, anekapariyāyena appicchassa…pe… vīriyārambhassa vaṇṇavādī. Imāni, bhante, pañca vatthūni anekapariyāyena appicchatāya…pe… vīriyārambhāya saṃvattanti. Sādhu, bhante, bhikkhū yāvajīvaṃ āraññikā assu; yo gāmantaṃ osareyya vajjaṃ naṃ phuseyya…pe… yāvajīvaṃ macchamaṃsaṃ na khādeyyuṃ, yo macchamaṃsaṃ khādeyya vajjaṃ naṃ phuseyyā’’ti. ‘‘Alaṃ, devadatta, yo icchati āraññiko hotu, yo icchati gāmante viharatu; yo icchati piṇḍapātiko hotu, yo icchati nimantanaṃ sādiyatu; yo icchati paṃsukūliko hotu, yo icchati gahapaticīvaraṃ sādiyatu. Aṭṭhamāse kho mayā, devadatta, rukkhamūlasenāsanaṃ anuññātaṃ, tikoṭiparisuddhaṃ macchamaṃsaṃ – adiṭṭhaṃ asutaṃ aparisaṅkita’’nti. Atha kho devadatto – ‘‘na bhagavā imāni pañca vatthūni anujānātī’’ti haṭṭho udaggo sapariso uṭṭhāyāsanā bhagavantaṃ abhivādetvā padakkhiṇaṃ katvā pakkāmi.
၄၁၀. အထ ခော ဒေဝဒတ္တော သပရိသော ရာဇဂဟံ ပဝိသိတ္ဝာ ပဉ္စဟိ ဝတ္ထူဟိ ဇနံ သညာပေသိ – ‘‘မယံ, အာဝုသော, သမဏံ ဂောတမံ ဥပသင္ကမိတ္ဝာ ပဉ္စ ဝတ္ထူနိ ယာစိမ္ဟာ – ‘ဘဂဝာ, ဘန္တေ, အနေကပရိယာယေန အပ္ပိစ္ဆသ္သ သန္တုဋ္ဌသ္သ သလ္လေခသ္သ ဓုတသ္သ ပာသာဒိကသ္သ အပစယသ္သ ဝီရိယာရမ္ဘသ္သ ဝဏ္ဏဝာဒီ။ ဣမာနိ, ဘန္တေ, ပဉ္စ ဝတ္ထူနိ အနေကပရိယာယေန အပ္ပိစ္ဆတာယ သန္တုဋ္ဌိယာ သလ္လေခာယ ဓုတတာယ ပာသာဒိကတာယ အပစယာယ ဝီရိယာရမ္ဘာယ သံဝတ္တန္တိ။ သာဓု, ဘန္တေ, ဘိက္ခူ ယာဝဇီဝံ အာရညိကာ အသ္သု; ယော ဂာမန္တံ ဩသရေယ္ယ, ဝဇ္ဇံ နံ ဖုသေယ္ယ။ ယာဝဇီဝံ ပိဏ္ဍပာတိကာ အသ္သု; ယော နိမန္တနံ သာဒိယေယ္ယ, ဝဇ္ဇံ နံ ဖုသေယ္ယ။ ယာဝဇီဝံ ပံသုကူလိကာ အသ္သု; ယော ဂဟပတိစီဝရံ သာဒိယေယ္ယ, ဝဇ္ဇံ နံ ဖုသေယ္ယ။ ယာဝဇီဝံ ရုက္ခမူလိကာ အသ္သု; ယော ဆန္နံ ဥပဂစ္ဆေယ္ယ, ဝဇ္ဇံ နံ ဖုသေယ္ယ။ ယာဝဇီဝံ မစ္ဆမံသံ န ခာဒေယ္ယုံ; ယော မစ္ဆမံသံ ခာဒေယ္ယ, ဝဇ္ဇံ နံ ဖုသေယ္ယာ’တိ။ ဣမာနိ သမဏော ဂောတမော နာနုဇာနာတိ ။ တေ မယံ ဣမေဟိ ပဉ္စဟိ ဝတ္ထူဟိ သမာဒာယ ဝတ္တာမာ’’တိ။ တတ္ထ ယေ တေ မနုသ္သာ အသ္သဒ္ဓာ အပ္ပသန္နာ ဒုဗ္ဗုဒ္ဓိနော တေ ဧဝမာဟံသု – ‘‘ဣမေ ခော သမဏာ သက္ယပုတ္တိယာ ဓုတာ သလ္လေခဝုတ္တိနော, သမဏော ပန ဂောတမော ဗာဟုလ္လိကော ဗာဟုလ္လာယ စေတေတီ’’တိ။ ယေ ပန တေ မနုသ္သာ သဒ္ဓာ ပသန္နာ ပဏ္ဍိတာ ဗ္ယတ္တာ ဗုဒ္ဓိမန္တော တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဒေဝဒတ္တော ဘဂဝတော သင္ဃဘေဒာယ ပရက္ကမိသ္သတိ စက္ကဘေဒာယာ’’တိ! အသ္သောသုံ ခော ဘိက္ခူ တေသံ မနုသ္သာနံ ဥဇ္ဈာယန္တာနံ ခိယ္ယန္တာနံ ဝိပာစေန္တာနံ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဒေဝဒတ္တော သင္ဃဘေဒာယ ပရက္ကမိသ္သတိ စက္ကဘေဒာယာ’’တိ! အထ ခော တေ ဘိက္ခူ ဒေဝဒတ္တံ အနေကပရိယာယေန ဝိဂရဟိတ္ဝာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ တ္ဝံ, ဒေဝဒတ္တ, သင္ဃဘေဒာယ ပရက္ကမသိ စက္ကဘေဒာယာ’’တိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ‘‘ကထဉ္ဟိ နာမ တ္ဝံ, မောဃပုရိသ, သင္ဃဘေဒာယ ပရက္ကမိသ္သသိ စက္ကဘေဒာယ! နေတံ, မောဃပုရိသ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –
410. Atha kho devadatto sapariso rājagahaṃ pavisitvā pañcahi vatthūhi janaṃ saññāpesi – ‘‘mayaṃ, āvuso, samaṇaṃ gotamaṃ upasaṅkamitvā pañca vatthūni yācimhā – ‘bhagavā, bhante, anekapariyāyena appicchassa santuṭṭhassa sallekhassa dhutassa pāsādikassa apacayassa vīriyārambhassa vaṇṇavādī. Imāni, bhante, pañca vatthūni anekapariyāyena appicchatāya santuṭṭhiyā sallekhāya dhutatāya pāsādikatāya apacayāya vīriyārambhāya saṃvattanti. Sādhu, bhante, bhikkhū yāvajīvaṃ āraññikā assu; yo gāmantaṃ osareyya, vajjaṃ naṃ phuseyya. Yāvajīvaṃ piṇḍapātikā assu; yo nimantanaṃ sādiyeyya, vajjaṃ naṃ phuseyya. Yāvajīvaṃ paṃsukūlikā assu; yo gahapaticīvaraṃ sādiyeyya, vajjaṃ naṃ phuseyya. Yāvajīvaṃ rukkhamūlikā assu; yo channaṃ upagaccheyya, vajjaṃ naṃ phuseyya. Yāvajīvaṃ macchamaṃsaṃ na khādeyyuṃ; yo macchamaṃsaṃ khādeyya, vajjaṃ naṃ phuseyyā’ti. Imāni samaṇo gotamo nānujānāti . Te mayaṃ imehi pañcahi vatthūhi samādāya vattāmā’’ti. Tattha ye te manussā assaddhā appasannā dubbuddhino te evamāhaṃsu – ‘‘ime kho samaṇā sakyaputtiyā dhutā sallekhavuttino, samaṇo pana gotamo bāhulliko bāhullāya cetetī’’ti. Ye pana te manussā saddhā pasannā paṇḍitā byattā buddhimanto te ujjhāyanti khiyyanti vipācenti – ‘‘kathañhi nāma devadatto bhagavato saṅghabhedāya parakkamissati cakkabhedāyā’’ti! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma devadatto saṅghabhedāya parakkamissati cakkabhedāyā’’ti! Atha kho te bhikkhū devadattaṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, devadatta, saṅghabhedāya parakkamasi cakkabhedāyā’’ti? ‘‘Saccaṃ, bhagavā’’ti. Vigarahi buddho bhagavā…pe… ‘‘kathañhi nāma tvaṃ, moghapurisa, saṅghabhedāya parakkamissasi cakkabhedāya! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
၄၁၁. ‘‘ယော ပန ဘိက္ခု သမဂ္ဂသ္သ သင္ဃသ္သ ဘေဒာယ ပရက္ကမေယ္ယ, ဘေဒနသံဝတ္တနိကံ ဝာ အဓိကရဏံ သမာဒာယ ပဂ္ဂယ္ဟ တိဋ္ဌေယ္ယ, သော ဘိက္ခု ဘိက္ခူဟိ ဧဝမသ္သ ဝစနီယော – ‘မာယသ္မာ သမဂ္ဂသ္သ သင္ဃသ္သ ဘေဒာယ ပရက္ကမိ, ဘေဒနသံဝတ္တနိကံ ဝာ အဓိကရဏံ သမာဒာယ ပဂ္ဂယ္ဟ အဋ္ဌာသိ။ သမေတာယသ္မာ သင္ဃေန။ သမဂ္ဂော ဟိ သင္ဃော သမ္မောဒမာနော အဝိဝဒမာနော ဧကုဒ္ဒေသော ဖာသု ဝိဟရတီ’တိ။ ဧဝဉ္စ သော ဘိက္ခု ဘိက္ခူဟိ ဝုစ္စမာနော တထေဝ ပဂ္ဂဏ္ဟေယ္ယ , သော ဘိက္ခု ဘိက္ခူဟိ ယာဝတတိယံ သမနုဘာသိတဗ္ဗော တသ္သ ပဋိနိသ္သဂ္ဂာယ။ ယာဝတတိယဉ္စေ သမနုဘာသိယမာနော တံ ပဋိနိသ္သဇ္ဇေယ္ယ, ဣစ္စေတံ ကုသလံ; နော စေ ပဋိနိသ္သဇ္ဇေယ္ယ, သင္ဃာဒိသေသော’’တိ။
411.‘‘Yo pana bhikkhu samaggassa saṅghassa bhedāya parakkameyya, bhedanasaṃvattanikaṃ vā adhikaraṇaṃ samādāya paggayha tiṭṭheyya, so bhikkhu bhikkhūhi evamassa vacanīyo – ‘māyasmā samaggassa saṅghassa bhedāya parakkami, bhedanasaṃvattanikaṃ vā adhikaraṇaṃ samādāya paggayha aṭṭhāsi. Sametāyasmā saṅghena. Samaggo hi saṅgho sammodamāno avivadamāno ekuddeso phāsu viharatī’ti. Evañca so bhikkhu bhikkhūhi vuccamāno tatheva paggaṇheyya, so bhikkhu bhikkhūhi yāvatatiyaṃ samanubhāsitabbo tassa paṭinissaggāya. Yāvatatiyañce samanubhāsiyamāno taṃ paṭinissajjeyya, iccetaṃ kusalaṃ; no ce paṭinissajjeyya, saṅghādiseso’’ti.
၄၁၂. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။
412.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
သမဂ္ဂော နာမ သင္ဃော သမာနသံဝာသကော သမာနသီမာယံ ဌိတော။
Samaggo nāma saṅgho samānasaṃvāsako samānasīmāyaṃ ṭhito.
ဘေဒာယ ပရက္ကမေယ္ယာတိ – ‘‘ကထံ ဣမေ နာနာ အသ္သု, ဝိနာ အသ္သု, ဝဂ္ဂာ အသ္သူ’’တိ ပက္ခံ ပရိယေသတိ, ဂဏံ ဗန္ဓတိ။
Bhedāya parakkameyyāti – ‘‘kathaṃ ime nānā assu, vinā assu, vaggā assū’’ti pakkhaṃ pariyesati, gaṇaṃ bandhati.
ဘေဒနသံဝတ္တနိကံ ဝာ အဓိကရဏန္တိ အဋ္ဌာရသဘေဒကရဝတ္ထူနိ။
Bhedanasaṃvattanikaṃ vā adhikaraṇanti aṭṭhārasabhedakaravatthūni.
သမာဒာယာတိ အာဒာယ။
Samādāyāti ādāya.
ပဂ္ဂယ္ဟာတိ ဒီပေယ္ယ။
Paggayhāti dīpeyya.
တိဋ္ဌေယ္ယာတိ န ပဋိနိသ္သဇ္ဇေယ္ယ။
Tiṭṭheyyāti na paṭinissajjeyya.
သော ဘိက္ခူတိ ယော သော သင္ဃဘေဒကော ဘိက္ခု။
So bhikkhūti yo so saṅghabhedako bhikkhu.
ဘိက္ခူဟီတိ အညေဟိ ဘိက္ခူဟိ။
Bhikkhūhīti aññehi bhikkhūhi.
ယေ ပသ္သန္တိ, ယေ သုဏန္တိ, တေဟိ ဝတ္တဗ္ဗော – ‘‘မာယသ္မာ သမဂ္ဂသ္သ သင္ဃသ္သ ဘေဒာယ ပရက္ကမိ, ဘေဒနသံဝတ္တနိကံ ဝာ အဓိကရဏံ သမာဒာယ ပဂ္ဂယ္ဟ အဋ္ဌာသိ။ သမေတာယသ္မာ သင္ဃေန။ သမဂ္ဂော ဟိ သင္ဃော သမ္မောဒမာနော အဝိဝဒမာနော ဧကုဒ္ဒေသော ဖာသု ဝိဟရတီ’’တိ။ ဒုတိယမ္ပိ ဝတ္တဗ္ဗော။ တတိယမ္ပိ ဝတ္တဗ္ဗော။ သစေ ပဋိနိသ္သဇ္ဇတိ, ဣစ္စေတံ ကုသလံ; နော စေ ပဋိနိသ္သဇ္ဇတိ, အာပတ္တိ ဒုက္ကဋသ္သ။ သုတ္ဝာ န ဝဒန္တိ , အာပတ္တိ ဒုက္ကဋသ္သ။ သော ဘိက္ခု သင္ဃမဇ္ဈမ္ပိ အာကဍ္ဎိတ္ဝာ ဝတ္တဗ္ဗော – ‘‘မာယသ္မာ သမဂ္ဂသ္သ သင္ဃသ္သ ဘေဒာယ ပရက္ကမိ, ဘေဒနသံဝတ္တနိကံ ဝာ အဓိကရဏံ သမာဒာယ ပဂ္ဂယ္ဟ အဋ္ဌာသိ။ သမေတာယသ္မာ သင္ဃေန။ သမဂ္ဂော ဟိ သင္ဃော သမ္မောဒမာနော အဝိဝဒမာနော ဧကုဒ္ဒေသော ဖာသု ဝိဟရတီ’’တိ။ ဒုတိယမ္ပိ ဝတ္တဗ္ဗော။ တတိယမ္ပိ ဝတ္တဗ္ဗော။ သစေ ပဋိနိသ္သဇ္ဇတိ, ဣစ္စေတံ ကုသလံ; နော စေ ပဋိနိသ္သဇ္ဇတိ, အာပတ္တိ ဒုက္ကဋသ္သ။ သော ဘိက္ခု သမနုဘာသိတဗ္ဗော – ‘‘ဧဝဉ္စ ပန, ဘိက္ခဝေ, သမနုဘာသိတဗ္ဗော။ ဗ္ယတ္တေန ဘိက္ခုနာ ပဋိဗလေန သင္ဃော ဉာပေတဗ္ဗော –
Ye passanti, ye suṇanti, tehi vattabbo – ‘‘māyasmā samaggassa saṅghassa bhedāya parakkami, bhedanasaṃvattanikaṃ vā adhikaraṇaṃ samādāya paggayha aṭṭhāsi. Sametāyasmā saṅghena. Samaggo hi saṅgho sammodamāno avivadamāno ekuddeso phāsu viharatī’’ti. Dutiyampi vattabbo. Tatiyampi vattabbo. Sace paṭinissajjati, iccetaṃ kusalaṃ; no ce paṭinissajjati, āpatti dukkaṭassa. Sutvā na vadanti , āpatti dukkaṭassa. So bhikkhu saṅghamajjhampi ākaḍḍhitvā vattabbo – ‘‘māyasmā samaggassa saṅghassa bhedāya parakkami, bhedanasaṃvattanikaṃ vā adhikaraṇaṃ samādāya paggayha aṭṭhāsi. Sametāyasmā saṅghena. Samaggo hi saṅgho sammodamāno avivadamāno ekuddeso phāsu viharatī’’ti. Dutiyampi vattabbo. Tatiyampi vattabbo. Sace paṭinissajjati, iccetaṃ kusalaṃ; no ce paṭinissajjati, āpatti dukkaṭassa. So bhikkhu samanubhāsitabbo – ‘‘evañca pana, bhikkhave, samanubhāsitabbo. Byattena bhikkhunā paṭibalena saṅgho ñāpetabbo –
၄၁၃. ‘‘သုဏာတု မေ, ဘန္တေ, သင္ဃော။ အယံ ဣတ္ထန္နာမော ဘိက္ခု သမဂ္ဂသ္သ သင္ဃသ္သ ဘေဒာယ ပရက္ကမတိ။ သော တံ ဝတ္ထုံ န ပဋိနိသ္သဇ္ဇတိ။ ယဒိ သင္ဃသ္သ ပတ္တကလ္လံ, သင္ဃော ဣတ္ထန္နာမံ ဘိက္ခုံ သမနုဘာသေယ္ယ တသ္သ ဝတ္ထုသ္သ ပဋိနိသ္သဂ္ဂာယ။ ဧသာ ဉတ္တိ။
413. ‘‘Suṇātu me, bhante, saṅgho. Ayaṃ itthannāmo bhikkhu samaggassa saṅghassa bhedāya parakkamati. So taṃ vatthuṃ na paṭinissajjati. Yadi saṅghassa pattakallaṃ, saṅgho itthannāmaṃ bhikkhuṃ samanubhāseyya tassa vatthussa paṭinissaggāya. Esā ñatti.
‘‘သုဏာတု မေ, ဘန္တေ, သင္ဃော။ အယံ ဣတ္ထန္နာမော ဘိက္ခု သမဂ္ဂသ္သ သင္ဃသ္သ ဘေဒာယ ပရက္ကမတိ။ သော တံ ဝတ္ထုံ န ပဋိနိသ္သဇ္ဇတိ။ သင္ဃော ဣတ္ထန္နာမံ ဘိက္ခုံ သမနုဘာသတိ တသ္သ ဝတ္ထုသ္သ ပဋိနိသ္သဂ္ဂာယ။ ယသ္သာယသ္မတော ခမတိ ဣတ္ထန္နာမသ္သ ဘိက္ခုနော သမနုဘာသနာ တသ္သ ဝတ္ထုသ္သ ပဋိနိသ္သဂ္ဂာယ, သော တုဏ္ဟသ္သ; ယသ္သ နက္ခမတိ, သော ဘာသေယ္ယ။
‘‘Suṇātu me, bhante, saṅgho. Ayaṃ itthannāmo bhikkhu samaggassa saṅghassa bhedāya parakkamati. So taṃ vatthuṃ na paṭinissajjati. Saṅgho itthannāmaṃ bhikkhuṃ samanubhāsati tassa vatthussa paṭinissaggāya. Yassāyasmato khamati itthannāmassa bhikkhuno samanubhāsanā tassa vatthussa paṭinissaggāya, so tuṇhassa; yassa nakkhamati, so bhāseyya.
‘‘ဒုတိယမ္ပိ ဧတမတ္ထံ ဝဒာမိ။ပေ.။ တတိယမ္ပိ ဧတမတ္ထံ ဝဒာမိ – သုဏာတု မေ, ဘန္တေ, သင္ဃော။ အယံ ဣတ္ထန္နာမော ဘိက္ခု သမဂ္ဂသ္သ သင္ဃသ္သ ဘေဒာယ ပရက္ကမတိ။ သော တံ ဝတ္ထုံ န ပဋိနိသ္သဇ္ဇတိ။ သင္ဃော ဣတ္ထန္နာမံ ဘိက္ခုံ သမနုဘာသတိ တသ္သ ဝတ္ထုသ္သ ပဋိနိသ္သဂ္ဂာယ။ ယသ္သာယသ္မတော ခမတိ ဣတ္ထန္နာမသ္သ ဘိက္ခုနော သမနုဘာသနာ တသ္သ ဝတ္ထုသ္သ ပဋိနိသ္သဂ္ဂာယ, သော တုဏ္ဟသ္သ; ယသ္သ နက္ခမတိ, သော ဘာသေယ္ယ။
‘‘Dutiyampi etamatthaṃ vadāmi…pe… tatiyampi etamatthaṃ vadāmi – suṇātu me, bhante, saṅgho. Ayaṃ itthannāmo bhikkhu samaggassa saṅghassa bhedāya parakkamati. So taṃ vatthuṃ na paṭinissajjati. Saṅgho itthannāmaṃ bhikkhuṃ samanubhāsati tassa vatthussa paṭinissaggāya. Yassāyasmato khamati itthannāmassa bhikkhuno samanubhāsanā tassa vatthussa paṭinissaggāya, so tuṇhassa; yassa nakkhamati, so bhāseyya.
‘‘သမနုဘဋ္ဌော သင္ဃေန ဣတ္ထန္နာမော ဘိက္ခု တသ္သ ဝတ္ထုသ္သ ပဋိနိသ္သဂ္ဂာယ။ ခမတိ သင္ဃသ္သ, တသ္မာ တုဏ္ဟီ, ဧဝမေတံ ဓာရယာမီ’’တိ။
‘‘Samanubhaṭṭho saṅghena itthannāmo bhikkhu tassa vatthussa paṭinissaggāya. Khamati saṅghassa, tasmā tuṇhī, evametaṃ dhārayāmī’’ti.
၄၁၄. ဉတ္တိယာ ဒုက္ကဋံ, ဒ္ဝီဟိ ကမ္မဝာစာဟိ ထုလ္လစ္စယာ, ကမ္မဝာစာပရိယောသာနေ အာပတ္တိ သင္ဃာဒိသေသသ္သ။ သင္ဃာဒိသေသံ အဇ္ဈာပဇ္ဇန္တသ္သ ဉတ္တိယာ ဒုက္ကဋံ, ဒ္ဝီဟိ ကမ္မဝာစာဟိ ထုလ္လစ္စယာ ပဋိပ္ပသ္သမ္ဘန္တိ။
414. Ñattiyā dukkaṭaṃ, dvīhi kammavācāhi thullaccayā, kammavācāpariyosāne āpatti saṅghādisesassa. Saṅghādisesaṃ ajjhāpajjantassa ñattiyā dukkaṭaṃ, dvīhi kammavācāhi thullaccayā paṭippassambhanti.
သင္ဃာဒိသေသောတိ။ပေ.။ တေနပိ ဝုစ္စတိ သင္ဃာဒိသေသောတိ။
Saṅghādisesoti…pe… tenapi vuccati saṅghādisesoti.
၄၁၅. ဓမ္မကမ္မေ ဓမ္မကမ္မသညီ န ပဋိနိသ္သဇ္ဇတိ, အာပတ္တိ သင္ဃာဒိသေသသ္သ။
415. Dhammakamme dhammakammasaññī na paṭinissajjati, āpatti saṅghādisesassa.
ဓမ္မကမ္မေ ဝေမတိကော န ပဋိနိသ္သဇ္ဇတိ, အာပတ္တိ သင္ဃာဒိသေသသ္သ။
Dhammakamme vematiko na paṭinissajjati, āpatti saṅghādisesassa.
ဓမ္မကမ္မေ အဓမ္မကမ္မသညီ န ပဋိနိသ္သဇ္ဇတိ, အာပတ္တိ သင္ဃာဒိသေသသ္သ။
Dhammakamme adhammakammasaññī na paṭinissajjati, āpatti saṅghādisesassa.
အဓမ္မကမ္မေ ဓမ္မကမ္မသညီ, အာပတ္တိ ဒုက္ကဋသ္သ။
Adhammakamme dhammakammasaññī, āpatti dukkaṭassa.
အဓမ္မကမ္မေ ဝေမတိကော, အာပတ္တိ ဒုက္ကဋသ္သ။
Adhammakamme vematiko, āpatti dukkaṭassa.
အဓမ္မကမ္မေ အဓမ္မကမ္မသညီ, အာပတ္တိ ဒုက္ကဋသ္သ။
Adhammakamme adhammakammasaññī, āpatti dukkaṭassa.
၄၁၆. အနာပတ္တိ အသမနုဘာသန္တသ္သ, ပဋိနိသ္သဇ္ဇန္တသ္သ, ဥမ္မတ္တကသ္သ, ခိတ္တစိတ္တသ္သ, ဝေဒနာဋ္ဋသ္သ, အာဒိကမ္မိကသ္သာတိ။
416. Anāpatti asamanubhāsantassa, paṭinissajjantassa, ummattakassa, khittacittassa, vedanāṭṭassa, ādikammikassāti.
သင္ဃဘေဒသိက္ခာပဒံ နိဋ္ဌိတံ ဒသမံ။
Saṅghabhedasikkhāpadaṃ niṭṭhitaṃ dasamaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၁၀. ပဌမသင္ဃဘေဒသိက္ခာပဒဝဏ္ဏနာ • 10. Paṭhamasaṅghabhedasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၁၀. ပဌမသင္ဃဘေဒသိက္ခာပဒဝဏ္ဏနာ • 10. Paṭhamasaṅghabhedasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၁၀. ပဌမသင္ဃဘေဒသိက္ခာပဒဝဏ္ဏနာ • 10. Paṭhamasaṅghabhedasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၁၀. ပဌမသင္ဃဘေဒသိက္ခာပဒဝဏ္ဏနာ • 10. Paṭhamasaṅghabhedasikkhāpadavaṇṇanā
