| Library / Tipiṭaka / ཏིཔིཊཀ • Tipiṭaka / མཧཱཝིབྷངྒ • Mahāvibhaṅga |
༡༠. སངྒྷབྷེདསིཀྑཱཔདཾ
10. Saṅghabhedasikkhāpadaṃ
༤༠༩. 1 ཏེན སམཡེན བུདྡྷོ བྷགཝཱ རཱཛགཧེ ཝིཧརཏི ཝེལུ༹ཝནེ ཀལནྡཀནིཝཱཔེ། ཨཐ ཁོ དེཝདཏྟོ ཡེན ཀོཀཱལིཀོ ཀཊམོདཀཏིསྶཀོ 2 ཁཎྜདེཝིཡཱ པུཏྟོ སམུདྡདཏྟོ ཏེནུཔསངྐམི; ཨུཔསངྐམིཏྭཱ ཀོཀཱལིཀཾ ཀཊམོདཀཏིསྶཀཾ ཁཎྜདེཝིཡཱ པུཏྟཾ སམུདྡདཏྟཾ ཨེཏདཝོཙ – ‘‘ཨེཐ མཡཾ, ཨཱཝུསོ, སམཎསྶ གོཏམསྶ སངྒྷབྷེདཾ ཀརིསྶཱམ ཙཀྐབྷེད’’ནྟི། ཨེཝཾ ཝུཏྟེ ཀོཀཱལིཀོ དེཝདཏྟཾ ཨེཏདཝོཙ – ‘‘སམཎོ ཁོ, ཨཱཝུསོ, གོཏམོ མཧིདྡྷིཀོ མཧཱནུབྷཱཝོ། ཀཐཾ མཡཾ སམཎསྶ གོཏམསྶ སངྒྷབྷེདཾ ཀརིསྶཱམ ཙཀྐབྷེད’’ནྟི? ‘‘ཨེཐ མཡཾ, ཨཱཝུསོ, སམཎཾ གོཏམཾ ཨུཔསངྐམིཏྭཱ པཉྩ ཝཏྠཱུནི ཡཱཙིསྶཱམ – ‘བྷགཝཱ, བྷནྟེ, ཨནེཀཔརིཡཱཡེན ཨཔྤིཙྪསྶ སནྟུཊྛསྶ སལླེཁསྶ དྷུཏསྶ པཱསཱདིཀསྶ ཨཔཙཡསྶ ཝཱིརིཡཱརམྦྷསྶ 3 ཝཎྞཝཱདཱི། ཨིམཱནི, བྷནྟེ, པཉྩ ཝཏྠཱུནི ཨནེཀཔརིཡཱཡེན ཨཔྤིཙྪཏཱཡ སནྟུཊྛིཡཱ སལླེཁཱཡ དྷུཏཏཱཡ པཱསཱདིཀཏཱཡ ཨཔཙཡཱཡ ཝཱིརིཡཱརམྦྷཱཡ སཾཝཏྟནྟི། སཱདྷུ, བྷནྟེ, བྷིཀྑཱུ ཡཱཝཛཱིཝཾ ཨཱརཉྙིཀཱ ཨསྶུ; ཡོ གཱམནྟཾ ཨོསརེཡྻ, ཝཛྫཾ ནཾ ཕུསེཡྻ། ཡཱཝཛཱིཝཾ པིཎྜཔཱཏིཀཱ ཨསྶུ; ཡོ ནིམནྟནཾ སཱདིཡེཡྻ, ཝཛྫཾ ནཾ ཕུསེཡྻ། ཡཱཝཛཱིཝཾ པཾསུཀཱུལིཀཱ ཨསྶུ; ཡོ གཧཔཏིཙཱིཝརཾ སཱདིཡེཡྻ, ཝཛྫཾ ནཾ ཕུསེཡྻ། ཡཱཝཛཱིཝཾ རུཀྑམཱུལིཀཱ ཨསྶུ; ཡོ ཚནྣཾ ཨུཔགཙྪེཡྻ, ཝཛྫཾ ནཾ ཕུསེཡྻ། ཡཱཝཛཱིཝཾ མཙྪམཾསཾ ན ཁཱདེཡྻུཾ; ཡོ མཙྪམཾསཾ ཁཱདེཡྻ, ཝཛྫཾ ནཾ ཕུསེཡྻཱ’ཏི། ཨིམཱནི སམཎོ གོཏམོ ནཱནུཛཱནིསྶཏི། ཏེ མཡཾ ཨིམེཧི པཉྩཧི ཝཏྠཱུཧི ཛནཾ སཉྙཱཔེསྶཱམཱཏི། སཀྐཱ ཁོ, ཨཱཝུསོ, ཨིམེཧི པཉྩཧི ཝཏྠཱུཧི སམཎསྶ གོཏམསྶ སངྒྷབྷེདོ ཀཱཏུཾ ཙཀྐབྷེདོ། ལཱུཁཔསནྣཱ ཧི, ཨཱཝུསོ, མནུསྶཱ’’ཏི།
409.4 Tena samayena buddho bhagavā rājagahe viharati veḷuvane kalandakanivāpe. Atha kho devadatto yena kokāliko kaṭamodakatissako 5 khaṇḍadeviyā putto samuddadatto tenupasaṅkami; upasaṅkamitvā kokālikaṃ kaṭamodakatissakaṃ khaṇḍadeviyā puttaṃ samuddadattaṃ etadavoca – ‘‘etha mayaṃ, āvuso, samaṇassa gotamassa saṅghabhedaṃ karissāma cakkabheda’’nti. Evaṃ vutte kokāliko devadattaṃ etadavoca – ‘‘samaṇo kho, āvuso, gotamo mahiddhiko mahānubhāvo. Kathaṃ mayaṃ samaṇassa gotamassa saṅghabhedaṃ karissāma cakkabheda’’nti? ‘‘Etha mayaṃ, āvuso, samaṇaṃ gotamaṃ upasaṅkamitvā pañca vatthūni yācissāma – ‘bhagavā, bhante, anekapariyāyena appicchassa santuṭṭhassa sallekhassa dhutassa pāsādikassa apacayassa vīriyārambhassa 6 vaṇṇavādī. Imāni, bhante, pañca vatthūni anekapariyāyena appicchatāya santuṭṭhiyā sallekhāya dhutatāya pāsādikatāya apacayāya vīriyārambhāya saṃvattanti. Sādhu, bhante, bhikkhū yāvajīvaṃ āraññikā assu; yo gāmantaṃ osareyya, vajjaṃ naṃ phuseyya. Yāvajīvaṃ piṇḍapātikā assu; yo nimantanaṃ sādiyeyya, vajjaṃ naṃ phuseyya. Yāvajīvaṃ paṃsukūlikā assu; yo gahapaticīvaraṃ sādiyeyya, vajjaṃ naṃ phuseyya. Yāvajīvaṃ rukkhamūlikā assu; yo channaṃ upagaccheyya, vajjaṃ naṃ phuseyya. Yāvajīvaṃ macchamaṃsaṃ na khādeyyuṃ; yo macchamaṃsaṃ khādeyya, vajjaṃ naṃ phuseyyā’ti. Imāni samaṇo gotamo nānujānissati. Te mayaṃ imehi pañcahi vatthūhi janaṃ saññāpessāmāti. Sakkā kho, āvuso, imehi pañcahi vatthūhi samaṇassa gotamassa saṅghabhedo kātuṃ cakkabhedo. Lūkhapasannā hi, āvuso, manussā’’ti.
ཨཐ ཁོ དེཝདཏྟོ སཔརིསོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ དེཝདཏྟོ བྷགཝནྟཾ ཨེཏདཝོཙ – ‘‘བྷགཝཱ, བྷནྟེ, ཨནེཀཔརིཡཱཡེན ཨཔྤིཙྪསྶ…པེ॰… ཝཱིརིཡཱརམྦྷསྶ ཝཎྞཝཱདཱི། ཨིམཱནི, བྷནྟེ, པཉྩ ཝཏྠཱུནི ཨནེཀཔརིཡཱཡེན ཨཔྤིཙྪཏཱཡ…པེ॰… ཝཱིརིཡཱརམྦྷཱཡ སཾཝཏྟནྟི། སཱདྷུ, བྷནྟེ, བྷིཀྑཱུ ཡཱཝཛཱིཝཾ ཨཱརཉྙིཀཱ ཨསྶུ; ཡོ གཱམནྟཾ ཨོསརེཡྻ ཝཛྫཾ ནཾ ཕུསེཡྻ…པེ॰… ཡཱཝཛཱིཝཾ མཙྪམཾསཾ ན ཁཱདེཡྻུཾ, ཡོ མཙྪམཾསཾ ཁཱདེཡྻ ཝཛྫཾ ནཾ ཕུསེཡྻཱ’’ཏི། ‘‘ཨལཾ, དེཝདཏྟ, ཡོ ཨིཙྪཏི ཨཱརཉྙིཀོ ཧོཏུ, ཡོ ཨིཙྪཏི གཱམནྟེ ཝིཧརཏུ; ཡོ ཨིཙྪཏི པིཎྜཔཱཏིཀོ ཧོཏུ, ཡོ ཨིཙྪཏི ནིམནྟནཾ སཱདིཡཏུ; ཡོ ཨིཙྪཏི པཾསུཀཱུལིཀོ ཧོཏུ, ཡོ ཨིཙྪཏི གཧཔཏིཙཱིཝརཾ སཱདིཡཏུ། ཨཊྛམཱསེ ཁོ མཡཱ, དེཝདཏྟ, རུཀྑམཱུལསེནཱསནཾ ཨནུཉྙཱཏཾ, ཏིཀོཊིཔརིསུདྡྷཾ མཙྪམཾསཾ – ཨདིཊྛཾ ཨསུཏཾ ཨཔརིསངྐིཏ’’ནྟི། ཨཐ ཁོ དེཝདཏྟོ – ‘‘ན བྷགཝཱ ཨིམཱནི པཉྩ ཝཏྠཱུནི ཨནུཛཱནཱཏཱི’’ཏི ཧཊྛོ ཨུདགྒོ སཔརིསོ ཨུཊྛཱཡཱསནཱ བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ པཀྐཱམི།
Atha kho devadatto sapariso yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho devadatto bhagavantaṃ etadavoca – ‘‘bhagavā, bhante, anekapariyāyena appicchassa…pe… vīriyārambhassa vaṇṇavādī. Imāni, bhante, pañca vatthūni anekapariyāyena appicchatāya…pe… vīriyārambhāya saṃvattanti. Sādhu, bhante, bhikkhū yāvajīvaṃ āraññikā assu; yo gāmantaṃ osareyya vajjaṃ naṃ phuseyya…pe… yāvajīvaṃ macchamaṃsaṃ na khādeyyuṃ, yo macchamaṃsaṃ khādeyya vajjaṃ naṃ phuseyyā’’ti. ‘‘Alaṃ, devadatta, yo icchati āraññiko hotu, yo icchati gāmante viharatu; yo icchati piṇḍapātiko hotu, yo icchati nimantanaṃ sādiyatu; yo icchati paṃsukūliko hotu, yo icchati gahapaticīvaraṃ sādiyatu. Aṭṭhamāse kho mayā, devadatta, rukkhamūlasenāsanaṃ anuññātaṃ, tikoṭiparisuddhaṃ macchamaṃsaṃ – adiṭṭhaṃ asutaṃ aparisaṅkita’’nti. Atha kho devadatto – ‘‘na bhagavā imāni pañca vatthūni anujānātī’’ti haṭṭho udaggo sapariso uṭṭhāyāsanā bhagavantaṃ abhivādetvā padakkhiṇaṃ katvā pakkāmi.
༤༡༠. ཨཐ ཁོ དེཝདཏྟོ སཔརིསོ རཱཛགཧཾ པཝིསིཏྭཱ པཉྩཧི ཝཏྠཱུཧི ཛནཾ སཉྙཱཔེསི – ‘‘མཡཾ, ཨཱཝུསོ, སམཎཾ གོཏམཾ ཨུཔསངྐམིཏྭཱ པཉྩ ཝཏྠཱུནི ཡཱཙིམྷཱ – ‘བྷགཝཱ, བྷནྟེ, ཨནེཀཔརིཡཱཡེན ཨཔྤིཙྪསྶ སནྟུཊྛསྶ སལླེཁསྶ དྷུཏསྶ པཱསཱདིཀསྶ ཨཔཙཡསྶ ཝཱིརིཡཱརམྦྷསྶ ཝཎྞཝཱདཱི། ཨིམཱནི, བྷནྟེ, པཉྩ ཝཏྠཱུནི ཨནེཀཔརིཡཱཡེན ཨཔྤིཙྪཏཱཡ སནྟུཊྛིཡཱ སལླེཁཱཡ དྷུཏཏཱཡ པཱསཱདིཀཏཱཡ ཨཔཙཡཱཡ ཝཱིརིཡཱརམྦྷཱཡ སཾཝཏྟནྟི། སཱདྷུ, བྷནྟེ, བྷིཀྑཱུ ཡཱཝཛཱིཝཾ ཨཱརཉྙིཀཱ ཨསྶུ; ཡོ གཱམནྟཾ ཨོསརེཡྻ, ཝཛྫཾ ནཾ ཕུསེཡྻ། ཡཱཝཛཱིཝཾ པིཎྜཔཱཏིཀཱ ཨསྶུ; ཡོ ནིམནྟནཾ སཱདིཡེཡྻ, ཝཛྫཾ ནཾ ཕུསེཡྻ། ཡཱཝཛཱིཝཾ པཾསུཀཱུལིཀཱ ཨསྶུ; ཡོ གཧཔཏིཙཱིཝརཾ སཱདིཡེཡྻ, ཝཛྫཾ ནཾ ཕུསེཡྻ། ཡཱཝཛཱིཝཾ རུཀྑམཱུལིཀཱ ཨསྶུ; ཡོ ཚནྣཾ ཨུཔགཙྪེཡྻ, ཝཛྫཾ ནཾ ཕུསེཡྻ། ཡཱཝཛཱིཝཾ མཙྪམཾསཾ ན ཁཱདེཡྻུཾ; ཡོ མཙྪམཾསཾ ཁཱདེཡྻ, ཝཛྫཾ ནཾ ཕུསེཡྻཱ’ཏི། ཨིམཱནི སམཎོ གོཏམོ ནཱནུཛཱནཱཏི ། ཏེ མཡཾ ཨིམེཧི པཉྩཧི ཝཏྠཱུཧི སམཱདཱཡ ཝཏྟཱམཱ’’ཏི། ཏཏྠ ཡེ ཏེ མནུསྶཱ ཨསྶདྡྷཱ ཨཔྤསནྣཱ དུབྦུདྡྷིནོ ཏེ ཨེཝམཱཧཾསུ – ‘‘ཨིམེ ཁོ སམཎཱ སཀྱཔུཏྟིཡཱ དྷུཏཱ སལླེཁཝུཏྟིནོ, སམཎོ པན གོཏམོ བཱཧུལླིཀོ བཱཧུལླཱཡ ཙེཏེཏཱི’’ཏི། ཡེ པན ཏེ མནུསྶཱ སདྡྷཱ པསནྣཱ པཎྜིཏཱ བྱཏྟཱ བུདྡྷིམནྟོ ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ དེཝདཏྟོ བྷགཝཏོ སངྒྷབྷེདཱཡ པརཀྐམིསྶཏི ཙཀྐབྷེདཱཡཱ’’ཏི! ཨསྶོསུཾ ཁོ བྷིཀྑཱུ ཏེསཾ མནུསྶཱནཾ ཨུཛ྄ཛྷཱཡནྟཱནཾ ཁིཡྻནྟཱནཾ ཝིཔཱཙེནྟཱནཾ། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ དེཝདཏྟོ སངྒྷབྷེདཱཡ པརཀྐམིསྶཏི ཙཀྐབྷེདཱཡཱ’’ཏི! ཨཐ ཁོ ཏེ བྷིཀྑཱུ དེཝདཏྟཾ ཨནེཀཔརིཡཱཡེན ཝིགརཧིཏྭཱ བྷགཝཏོ ཨེཏམཏྠཾ ཨཱརོཙེསུཾ…པེ॰… ‘‘སཙྩཾ ཀིར ཏྭཾ, དེཝདཏྟ, སངྒྷབྷེདཱཡ པརཀྐམསི ཙཀྐབྷེདཱཡཱ’’ཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ‘‘ཀཐཉྷི ནཱམ ཏྭཾ, མོགྷཔུརིས, སངྒྷབྷེདཱཡ པརཀྐམིསྶསི ཙཀྐབྷེདཱཡ! ནེཏཾ, མོགྷཔུརིས, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
410. Atha kho devadatto sapariso rājagahaṃ pavisitvā pañcahi vatthūhi janaṃ saññāpesi – ‘‘mayaṃ, āvuso, samaṇaṃ gotamaṃ upasaṅkamitvā pañca vatthūni yācimhā – ‘bhagavā, bhante, anekapariyāyena appicchassa santuṭṭhassa sallekhassa dhutassa pāsādikassa apacayassa vīriyārambhassa vaṇṇavādī. Imāni, bhante, pañca vatthūni anekapariyāyena appicchatāya santuṭṭhiyā sallekhāya dhutatāya pāsādikatāya apacayāya vīriyārambhāya saṃvattanti. Sādhu, bhante, bhikkhū yāvajīvaṃ āraññikā assu; yo gāmantaṃ osareyya, vajjaṃ naṃ phuseyya. Yāvajīvaṃ piṇḍapātikā assu; yo nimantanaṃ sādiyeyya, vajjaṃ naṃ phuseyya. Yāvajīvaṃ paṃsukūlikā assu; yo gahapaticīvaraṃ sādiyeyya, vajjaṃ naṃ phuseyya. Yāvajīvaṃ rukkhamūlikā assu; yo channaṃ upagaccheyya, vajjaṃ naṃ phuseyya. Yāvajīvaṃ macchamaṃsaṃ na khādeyyuṃ; yo macchamaṃsaṃ khādeyya, vajjaṃ naṃ phuseyyā’ti. Imāni samaṇo gotamo nānujānāti . Te mayaṃ imehi pañcahi vatthūhi samādāya vattāmā’’ti. Tattha ye te manussā assaddhā appasannā dubbuddhino te evamāhaṃsu – ‘‘ime kho samaṇā sakyaputtiyā dhutā sallekhavuttino, samaṇo pana gotamo bāhulliko bāhullāya cetetī’’ti. Ye pana te manussā saddhā pasannā paṇḍitā byattā buddhimanto te ujjhāyanti khiyyanti vipācenti – ‘‘kathañhi nāma devadatto bhagavato saṅghabhedāya parakkamissati cakkabhedāyā’’ti! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma devadatto saṅghabhedāya parakkamissati cakkabhedāyā’’ti! Atha kho te bhikkhū devadattaṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, devadatta, saṅghabhedāya parakkamasi cakkabhedāyā’’ti? ‘‘Saccaṃ, bhagavā’’ti. Vigarahi buddho bhagavā…pe… ‘‘kathañhi nāma tvaṃ, moghapurisa, saṅghabhedāya parakkamissasi cakkabhedāya! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༤༡༡. ‘‘ཡོ པན བྷིཀྑུ སམགྒསྶ སངྒྷསྶ བྷེདཱཡ པརཀྐམེཡྻ, བྷེདནསཾཝཏྟནིཀཾ ཝཱ ཨདྷིཀརཎཾ སམཱདཱཡ པགྒཡ྄ཧ ཏིཊྛེཡྻ, སོ བྷིཀྑུ བྷིཀྑཱུཧི ཨེཝམསྶ ཝཙནཱིཡོ – ‘མཱཡསྨཱ སམགྒསྶ སངྒྷསྶ བྷེདཱཡ པརཀྐམི, བྷེདནསཾཝཏྟནིཀཾ ཝཱ ཨདྷིཀརཎཾ སམཱདཱཡ པགྒཡ྄ཧ ཨཊྛཱསི། སམེཏཱཡསྨཱ སངྒྷེན། སམགྒོ ཧི སངྒྷོ སམྨོདམཱནོ ཨཝིཝདམཱནོ ཨེཀུདྡེསོ ཕཱསུ ཝིཧརཏཱི’ཏི། ཨེཝཉྩ སོ བྷིཀྑུ བྷིཀྑཱུཧི ཝུཙྩམཱནོ ཏཐེཝ པགྒཎྷེཡྻ , སོ བྷིཀྑུ བྷིཀྑཱུཧི ཡཱཝཏཏིཡཾ སམནུབྷཱསིཏབྦོ ཏསྶ པཊིནིསྶགྒཱཡ། ཡཱཝཏཏིཡཉྩེ སམནུབྷཱསིཡམཱནོ ཏཾ པཊིནིསྶཛྫེཡྻ, ཨིཙྩེཏཾ ཀུསལཾ; ནོ ཙེ པཊིནིསྶཛྫེཡྻ, སངྒྷཱདིསེསོ’’ཏི།
411.‘‘Yo pana bhikkhu samaggassa saṅghassa bhedāya parakkameyya, bhedanasaṃvattanikaṃ vā adhikaraṇaṃ samādāya paggayha tiṭṭheyya, so bhikkhu bhikkhūhi evamassa vacanīyo – ‘māyasmā samaggassa saṅghassa bhedāya parakkami, bhedanasaṃvattanikaṃ vā adhikaraṇaṃ samādāya paggayha aṭṭhāsi. Sametāyasmā saṅghena. Samaggo hi saṅgho sammodamāno avivadamāno ekuddeso phāsu viharatī’ti. Evañca so bhikkhu bhikkhūhi vuccamāno tatheva paggaṇheyya, so bhikkhu bhikkhūhi yāvatatiyaṃ samanubhāsitabbo tassa paṭinissaggāya. Yāvatatiyañce samanubhāsiyamāno taṃ paṭinissajjeyya, iccetaṃ kusalaṃ; no ce paṭinissajjeyya, saṅghādiseso’’ti.
༤༡༢. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
412.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
སམགྒོ ནཱམ སངྒྷོ སམཱནསཾཝཱསཀོ སམཱནསཱིམཱཡཾ ཋིཏོ།
Samaggo nāma saṅgho samānasaṃvāsako samānasīmāyaṃ ṭhito.
བྷེདཱཡ པརཀྐམེཡྻཱཏི – ‘‘ཀཐཾ ཨིམེ ནཱནཱ ཨསྶུ, ཝིནཱ ཨསྶུ, ཝགྒཱ ཨསྶཱུ’’ཏི པཀྑཾ པརིཡེསཏི, གཎཾ བནྡྷཏི།
Bhedāya parakkameyyāti – ‘‘kathaṃ ime nānā assu, vinā assu, vaggā assū’’ti pakkhaṃ pariyesati, gaṇaṃ bandhati.
བྷེདནསཾཝཏྟནིཀཾ ཝཱ ཨདྷིཀརཎནྟི ཨཊྛཱརསབྷེདཀརཝཏྠཱུནི།
Bhedanasaṃvattanikaṃ vā adhikaraṇanti aṭṭhārasabhedakaravatthūni.
སམཱདཱཡཱཏི ཨཱདཱཡ།
Samādāyāti ādāya.
པགྒཡ྄ཧཱཏི དཱིཔེཡྻ།
Paggayhāti dīpeyya.
ཏིཊྛེཡྻཱཏི ན པཊིནིསྶཛྫེཡྻ།
Tiṭṭheyyāti na paṭinissajjeyya.
སོ བྷིཀྑཱུཏི ཡོ སོ སངྒྷབྷེདཀོ བྷིཀྑུ།
So bhikkhūti yo so saṅghabhedako bhikkhu.
བྷིཀྑཱུཧཱིཏི ཨཉྙེཧི བྷིཀྑཱུཧི།
Bhikkhūhīti aññehi bhikkhūhi.
ཡེ པསྶནྟི, ཡེ སུཎནྟི, ཏེཧི ཝཏྟབྦོ – ‘‘མཱཡསྨཱ སམགྒསྶ སངྒྷསྶ བྷེདཱཡ པརཀྐམི, བྷེདནསཾཝཏྟནིཀཾ ཝཱ ཨདྷིཀརཎཾ སམཱདཱཡ པགྒཡ྄ཧ ཨཊྛཱསི། སམེཏཱཡསྨཱ སངྒྷེན། སམགྒོ ཧི སངྒྷོ སམྨོདམཱནོ ཨཝིཝདམཱནོ ཨེཀུདྡེསོ ཕཱསུ ཝིཧརཏཱི’’ཏི། དུཏིཡམྤི ཝཏྟབྦོ། ཏཏིཡམྤི ཝཏྟབྦོ། སཙེ པཊིནིསྶཛྫཏི, ཨིཙྩེཏཾ ཀུསལཾ; ནོ ཙེ པཊིནིསྶཛྫཏི, ཨཱཔཏྟི དུཀྐཊསྶ། སུཏྭཱ ན ཝདནྟི , ཨཱཔཏྟི དུཀྐཊསྶ། སོ བྷིཀྑུ སངྒྷམཛ྄ཛྷམྤི ཨཱཀཌྜྷིཏྭཱ ཝཏྟབྦོ – ‘‘མཱཡསྨཱ སམགྒསྶ སངྒྷསྶ བྷེདཱཡ པརཀྐམི, བྷེདནསཾཝཏྟནིཀཾ ཝཱ ཨདྷིཀརཎཾ སམཱདཱཡ པགྒཡ྄ཧ ཨཊྛཱསི། སམེཏཱཡསྨཱ སངྒྷེན། སམགྒོ ཧི སངྒྷོ སམྨོདམཱནོ ཨཝིཝདམཱནོ ཨེཀུདྡེསོ ཕཱསུ ཝིཧརཏཱི’’ཏི། དུཏིཡམྤི ཝཏྟབྦོ། ཏཏིཡམྤི ཝཏྟབྦོ། སཙེ པཊིནིསྶཛྫཏི, ཨིཙྩེཏཾ ཀུསལཾ; ནོ ཙེ པཊིནིསྶཛྫཏི, ཨཱཔཏྟི དུཀྐཊསྶ། སོ བྷིཀྑུ སམནུབྷཱསིཏབྦོ – ‘‘ཨེཝཉྩ པན, བྷིཀྑཝེ, སམནུབྷཱསིཏབྦོ། བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ –
Ye passanti, ye suṇanti, tehi vattabbo – ‘‘māyasmā samaggassa saṅghassa bhedāya parakkami, bhedanasaṃvattanikaṃ vā adhikaraṇaṃ samādāya paggayha aṭṭhāsi. Sametāyasmā saṅghena. Samaggo hi saṅgho sammodamāno avivadamāno ekuddeso phāsu viharatī’’ti. Dutiyampi vattabbo. Tatiyampi vattabbo. Sace paṭinissajjati, iccetaṃ kusalaṃ; no ce paṭinissajjati, āpatti dukkaṭassa. Sutvā na vadanti , āpatti dukkaṭassa. So bhikkhu saṅghamajjhampi ākaḍḍhitvā vattabbo – ‘‘māyasmā samaggassa saṅghassa bhedāya parakkami, bhedanasaṃvattanikaṃ vā adhikaraṇaṃ samādāya paggayha aṭṭhāsi. Sametāyasmā saṅghena. Samaggo hi saṅgho sammodamāno avivadamāno ekuddeso phāsu viharatī’’ti. Dutiyampi vattabbo. Tatiyampi vattabbo. Sace paṭinissajjati, iccetaṃ kusalaṃ; no ce paṭinissajjati, āpatti dukkaṭassa. So bhikkhu samanubhāsitabbo – ‘‘evañca pana, bhikkhave, samanubhāsitabbo. Byattena bhikkhunā paṭibalena saṅgho ñāpetabbo –
༤༡༣. ‘‘སུཎཱཏུ མེ, བྷནྟེ, སངྒྷོ། ཨཡཾ ཨིཏྠནྣཱམོ བྷིཀྑུ སམགྒསྶ སངྒྷསྶ བྷེདཱཡ པརཀྐམཏི། སོ ཏཾ ཝཏྠུཾ ན པཊིནིསྶཛྫཏི། ཡདི སངྒྷསྶ པཏྟཀལླཾ, སངྒྷོ ཨིཏྠནྣཱམཾ བྷིཀྑུཾ སམནུབྷཱསེཡྻ ཏསྶ ཝཏྠུསྶ པཊིནིསྶགྒཱཡ། ཨེསཱ ཉཏྟི།
413. ‘‘Suṇātu me, bhante, saṅgho. Ayaṃ itthannāmo bhikkhu samaggassa saṅghassa bhedāya parakkamati. So taṃ vatthuṃ na paṭinissajjati. Yadi saṅghassa pattakallaṃ, saṅgho itthannāmaṃ bhikkhuṃ samanubhāseyya tassa vatthussa paṭinissaggāya. Esā ñatti.
‘‘སུཎཱཏུ མེ, བྷནྟེ, སངྒྷོ། ཨཡཾ ཨིཏྠནྣཱམོ བྷིཀྑུ སམགྒསྶ སངྒྷསྶ བྷེདཱཡ པརཀྐམཏི། སོ ཏཾ ཝཏྠུཾ ན པཊིནིསྶཛྫཏི། སངྒྷོ ཨིཏྠནྣཱམཾ བྷིཀྑུཾ སམནུབྷཱསཏི ཏསྶ ཝཏྠུསྶ པཊིནིསྶགྒཱཡ། ཡསྶཱཡསྨཏོ ཁམཏི ཨིཏྠནྣཱམསྶ བྷིཀྑུནོ སམནུབྷཱསནཱ ཏསྶ ཝཏྠུསྶ པཊིནིསྶགྒཱཡ, སོ ཏུཎྷསྶ; ཡསྶ ནཀྑམཏི, སོ བྷཱསེཡྻ།
‘‘Suṇātu me, bhante, saṅgho. Ayaṃ itthannāmo bhikkhu samaggassa saṅghassa bhedāya parakkamati. So taṃ vatthuṃ na paṭinissajjati. Saṅgho itthannāmaṃ bhikkhuṃ samanubhāsati tassa vatthussa paṭinissaggāya. Yassāyasmato khamati itthannāmassa bhikkhuno samanubhāsanā tassa vatthussa paṭinissaggāya, so tuṇhassa; yassa nakkhamati, so bhāseyya.
‘‘དུཏིཡམྤི ཨེཏམཏྠཾ ཝདཱམི…པེ॰… ཏཏིཡམྤི ཨེཏམཏྠཾ ཝདཱམི – སུཎཱཏུ མེ, བྷནྟེ, སངྒྷོ། ཨཡཾ ཨིཏྠནྣཱམོ བྷིཀྑུ སམགྒསྶ སངྒྷསྶ བྷེདཱཡ པརཀྐམཏི། སོ ཏཾ ཝཏྠུཾ ན པཊིནིསྶཛྫཏི། སངྒྷོ ཨིཏྠནྣཱམཾ བྷིཀྑུཾ སམནུབྷཱསཏི ཏསྶ ཝཏྠུསྶ པཊིནིསྶགྒཱཡ། ཡསྶཱཡསྨཏོ ཁམཏི ཨིཏྠནྣཱམསྶ བྷིཀྑུནོ སམནུབྷཱསནཱ ཏསྶ ཝཏྠུསྶ པཊིནིསྶགྒཱཡ, སོ ཏུཎྷསྶ; ཡསྶ ནཀྑམཏི, སོ བྷཱསེཡྻ།
‘‘Dutiyampi etamatthaṃ vadāmi…pe… tatiyampi etamatthaṃ vadāmi – suṇātu me, bhante, saṅgho. Ayaṃ itthannāmo bhikkhu samaggassa saṅghassa bhedāya parakkamati. So taṃ vatthuṃ na paṭinissajjati. Saṅgho itthannāmaṃ bhikkhuṃ samanubhāsati tassa vatthussa paṭinissaggāya. Yassāyasmato khamati itthannāmassa bhikkhuno samanubhāsanā tassa vatthussa paṭinissaggāya, so tuṇhassa; yassa nakkhamati, so bhāseyya.
‘‘སམནུབྷཊྛོ སངྒྷེན ཨིཏྠནྣཱམོ བྷིཀྑུ ཏསྶ ཝཏྠུསྶ པཊིནིསྶགྒཱཡ། ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི།
‘‘Samanubhaṭṭho saṅghena itthannāmo bhikkhu tassa vatthussa paṭinissaggāya. Khamati saṅghassa, tasmā tuṇhī, evametaṃ dhārayāmī’’ti.
༤༡༤. ཉཏྟིཡཱ དུཀྐཊཾ, དྭཱིཧི ཀམྨཝཱཙཱཧི ཐུལླཙྩཡཱ, ཀམྨཝཱཙཱཔརིཡོསཱནེ ཨཱཔཏྟི སངྒྷཱདིསེསསྶ། སངྒྷཱདིསེསཾ ཨཛ྄ཛྷཱཔཛྫནྟསྶ ཉཏྟིཡཱ དུཀྐཊཾ, དྭཱིཧི ཀམྨཝཱཙཱཧི ཐུལླཙྩཡཱ པཊིཔྤསྶམྦྷནྟི།
414. Ñattiyā dukkaṭaṃ, dvīhi kammavācāhi thullaccayā, kammavācāpariyosāne āpatti saṅghādisesassa. Saṅghādisesaṃ ajjhāpajjantassa ñattiyā dukkaṭaṃ, dvīhi kammavācāhi thullaccayā paṭippassambhanti.
སངྒྷཱདིསེསོཏི…པེ॰… ཏེནཔི ཝུཙྩཏི སངྒྷཱདིསེསོཏི།
Saṅghādisesoti…pe… tenapi vuccati saṅghādisesoti.
༤༡༥. དྷམྨཀམྨེ དྷམྨཀམྨསཉྙཱི ན པཊིནིསྶཛྫཏི, ཨཱཔཏྟི སངྒྷཱདིསེསསྶ།
415. Dhammakamme dhammakammasaññī na paṭinissajjati, āpatti saṅghādisesassa.
དྷམྨཀམྨེ ཝེམཏིཀོ ན པཊིནིསྶཛྫཏི, ཨཱཔཏྟི སངྒྷཱདིསེསསྶ།
Dhammakamme vematiko na paṭinissajjati, āpatti saṅghādisesassa.
དྷམྨཀམྨེ ཨདྷམྨཀམྨསཉྙཱི ན པཊིནིསྶཛྫཏི, ཨཱཔཏྟི སངྒྷཱདིསེསསྶ།
Dhammakamme adhammakammasaññī na paṭinissajjati, āpatti saṅghādisesassa.
ཨདྷམྨཀམྨེ དྷམྨཀམྨསཉྙཱི, ཨཱཔཏྟི དུཀྐཊསྶ།
Adhammakamme dhammakammasaññī, āpatti dukkaṭassa.
ཨདྷམྨཀམྨེ ཝེམཏིཀོ, ཨཱཔཏྟི དུཀྐཊསྶ།
Adhammakamme vematiko, āpatti dukkaṭassa.
ཨདྷམྨཀམྨེ ཨདྷམྨཀམྨསཉྙཱི, ཨཱཔཏྟི དུཀྐཊསྶ།
Adhammakamme adhammakammasaññī, āpatti dukkaṭassa.
༤༡༦. ཨནཱཔཏྟི ཨསམནུབྷཱསནྟསྶ, པཊིནིསྶཛྫནྟསྶ, ཨུམྨཏྟཀསྶ, ཁིཏྟཙིཏྟསྶ, ཝེདནཱཊྚསྶ, ཨཱདིཀམྨིཀསྶཱཏི།
416. Anāpatti asamanubhāsantassa, paṭinissajjantassa, ummattakassa, khittacittassa, vedanāṭṭassa, ādikammikassāti.
སངྒྷབྷེདསིཀྑཱཔདཾ ནིཊྛིཏཾ དསམཾ།
Saṅghabhedasikkhāpadaṃ niṭṭhitaṃ dasamaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༡༠. པཋམསངྒྷབྷེདསིཀྑཱཔདཝཎྞནཱ • 10. Paṭhamasaṅghabhedasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༡༠. པཋམསངྒྷབྷེདསིཀྑཱཔདཝཎྞནཱ • 10. Paṭhamasaṅghabhedasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༡༠. པཋམསངྒྷབྷེདསིཀྑཱཔདཝཎྞནཱ • 10. Paṭhamasaṅghabhedasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༡༠. པཋམསངྒྷབྷེདསིཀྑཱཔདཝཎྞནཱ • 10. Paṭhamasaṅghabhedasikkhāpadavaṇṇanā
