| Library / Tipiṭaka / திபிடக • Tipiṭaka / பரிவாரபாளி • Parivārapāḷi |
2. ஸங்கா⁴தி³ஸேஸகண்டா³தி³
2. Saṅghādisesakaṇḍādi
194. உபக்கமித்வா அஸுசிங் மோசனபச்சயா கதி ஆபத்தியோ ஆபஜ்ஜதி? உபக்கமித்வா அஸுசிமோசனபச்சயா திஸ்ஸோ ஆபத்தியோ ஆபஜ்ஜதி – சேதேதி உபக்கமதி முச்சதி, ஆபத்தி ஸங்கா⁴தி³ஸேஸஸ்ஸ; சேதேதி உபக்கமதி ந முச்சதி, ஆபத்தி து²ல்லச்சயஸ்ஸ; பயோகே³ து³க்கடங் – உபக்கமித்வா அஸுசிமோசனபச்சயா இமா திஸ்ஸோ ஆபத்தியோ ஆபஜ்ஜதி.
194. Upakkamitvā asuciṃ mocanapaccayā kati āpattiyo āpajjati? Upakkamitvā asucimocanapaccayā tisso āpattiyo āpajjati – ceteti upakkamati muccati, āpatti saṅghādisesassa; ceteti upakkamati na muccati, āpatti thullaccayassa; payoge dukkaṭaṃ – upakkamitvā asucimocanapaccayā imā tisso āpattiyo āpajjati.
காயஸங்ஸக்³க³ங் ஸமாபஜ்ஜனபச்சயா கதி ஆபத்தியோ ஆபஜ்ஜதி? காயஸங்ஸக்³க³ங் ஸமாபஜ்ஜனபச்சயா பஞ்ச ஆபத்தியோ ஆபஜ்ஜதி – அவஸ்ஸுதா பி⁴க்கு²னீ அவஸ்ஸுதஸ்ஸ புரிஸபுக்³க³லஸ்ஸ அத⁴க்க²கங் உப்³ப⁴ஜாணுமண்ட³லங் க³ஹணங் ஸாதி³யதி, ஆபத்தி பாராஜிகஸ்ஸ; பி⁴க்கு² காயேன காயங் ஆமஸதி, ஆபத்தி ஸங்கா⁴தி³ஸேஸஸ்ஸ; காயேன காயபடிப³த்³த⁴ங் ஆமஸதி, ஆபத்தி து²ல்லச்சயஸ்ஸ; காயபடிப³த்³தே⁴ன காயபடிப³த்³த⁴ங் ஆமஸதி, ஆபத்தி து³க்கடஸ்ஸ; அங்கு³லிபதோத³கே பாசித்தியங் – காயஸங்ஸக்³க³ங் ஸமாபஜ்ஜனபச்சயா இமா பஞ்ச ஆபத்தியோ ஆபஜ்ஜதி.
Kāyasaṃsaggaṃ samāpajjanapaccayā kati āpattiyo āpajjati? Kāyasaṃsaggaṃ samāpajjanapaccayā pañca āpattiyo āpajjati – avassutā bhikkhunī avassutassa purisapuggalassa adhakkhakaṃ ubbhajāṇumaṇḍalaṃ gahaṇaṃ sādiyati, āpatti pārājikassa; bhikkhu kāyena kāyaṃ āmasati, āpatti saṅghādisesassa; kāyena kāyapaṭibaddhaṃ āmasati, āpatti thullaccayassa; kāyapaṭibaddhena kāyapaṭibaddhaṃ āmasati, āpatti dukkaṭassa; aṅgulipatodake pācittiyaṃ – kāyasaṃsaggaṃ samāpajjanapaccayā imā pañca āpattiyo āpajjati.
மாதுகா³மங் து³ட்டு²ல்லாஹி வாசாஹி ஓபா⁴ஸனபச்சயா திஸ்ஸோ ஆபத்தியோ ஆபஜ்ஜதி – வச்சமக்³க³ங் பஸ்ஸாவமக்³க³ங் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி, ஆபத்தி ஸங்கா⁴தி³ஸேஸஸ்ஸ; வச்சமக்³க³ங் பஸ்ஸாவமக்³க³ங் ட²பெத்வா அத⁴க்க²கங் உப்³ப⁴ஜாணுமண்ட³லங் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி, ஆபத்தி து²ல்லச்சயஸ்ஸ; காயபடிப³த்³த⁴ங் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி, ஆபத்தி து³க்கடஸ்ஸ.
Mātugāmaṃ duṭṭhullāhi vācāhi obhāsanapaccayā tisso āpattiyo āpajjati – vaccamaggaṃ passāvamaggaṃ ādissa vaṇṇampi bhaṇati avaṇṇampi bhaṇati, āpatti saṅghādisesassa; vaccamaggaṃ passāvamaggaṃ ṭhapetvā adhakkhakaṃ ubbhajāṇumaṇḍalaṃ ādissa vaṇṇampi bhaṇati avaṇṇampi bhaṇati, āpatti thullaccayassa; kāyapaṭibaddhaṃ ādissa vaṇṇampi bhaṇati avaṇṇampi bhaṇati, āpatti dukkaṭassa.
அத்தகாமபாரிசரியாய வண்ணங் பா⁴ஸனபச்சயா திஸ்ஸோ ஆபத்தியோ ஆபஜ்ஜதி – மாதுகா³மஸ்ஸ ஸந்திகே அத்தகாமபாரிசரியாய வண்ணங் பா⁴ஸதி, ஆபத்தி ஸங்கா⁴தி³ஸேஸஸ்ஸ; பண்ட³கஸ்ஸ ஸந்திகே அத்தகாமபாரிசரியாய வண்ணங் பா⁴ஸதி, ஆபத்தி து²ல்லச்சயஸ்ஸ; திரச்சா²னக³தஸ்ஸ ஸந்திகே அத்தகாமபாரிசரியாய வண்ணங் பா⁴ஸதி, ஆபத்தி து³க்கடஸ்ஸ.
Attakāmapāricariyāya vaṇṇaṃ bhāsanapaccayā tisso āpattiyo āpajjati – mātugāmassa santike attakāmapāricariyāya vaṇṇaṃ bhāsati, āpatti saṅghādisesassa; paṇḍakassa santike attakāmapāricariyāya vaṇṇaṃ bhāsati, āpatti thullaccayassa; tiracchānagatassa santike attakāmapāricariyāya vaṇṇaṃ bhāsati, āpatti dukkaṭassa.
ஸஞ்சரித்தங் ஸமாபஜ்ஜனபச்சயா திஸ்ஸோ ஆபத்தியோ ஆபஜ்ஜதி – படிக்³க³ண்ஹாதி வீமங்ஸதி பச்சாஹரதி, ஆபத்தி ஸங்கா⁴தி³ஸேஸஸ்ஸ; படிக்³க³ண்ஹாதி வீமங்ஸதி ந பச்சாஹரதி, ஆபத்தி து²ல்லச்சயஸ்ஸ; படிக்³க³ண்ஹாதி ந வீமங்ஸதி ந பச்சாஹரதி, ஆபத்தி து³க்கடஸ்ஸ.
Sañcarittaṃ samāpajjanapaccayā tisso āpattiyo āpajjati – paṭiggaṇhāti vīmaṃsati paccāharati, āpatti saṅghādisesassa; paṭiggaṇhāti vīmaṃsati na paccāharati, āpatti thullaccayassa; paṭiggaṇhāti na vīmaṃsati na paccāharati, āpatti dukkaṭassa.
ஸஞ்ஞாசிகாய குடிங் காராபனபச்சயா திஸ்ஸோ ஆபத்தியோ ஆபஜ்ஜதி – காராபேதி, பயோகே³ து³க்கடங்; ஏகங் பிண்ட³ங் 1 அனாக³தே ஆபத்தி து²ல்லச்சயஸ்ஸ; தஸ்மிங் பிண்டே³ ஆக³தே ஆபத்தி ஸங்கா⁴தி³ஸேஸஸ்ஸ.
Saññācikāya kuṭiṃ kārāpanapaccayā tisso āpattiyo āpajjati – kārāpeti, payoge dukkaṭaṃ; ekaṃ piṇḍaṃ 2 anāgate āpatti thullaccayassa; tasmiṃ piṇḍe āgate āpatti saṅghādisesassa.
மஹல்லகங் விஹாரங் காராபனபச்சயா திஸ்ஸோ ஆபத்தியோ ஆபஜ்ஜதி – காராபேதி, பயோகே³ து³க்கடங்; ஏகங் பிண்ட³ங் அனாக³தே, ஆபத்தி து²ல்லச்சயஸ்ஸ; தஸ்மிங் பிண்டே³ ஆக³தே ஆபத்தி ஸங்கா⁴தி³ஸேஸஸ்ஸ.
Mahallakaṃ vihāraṃ kārāpanapaccayā tisso āpattiyo āpajjati – kārāpeti, payoge dukkaṭaṃ; ekaṃ piṇḍaṃ anāgate, āpatti thullaccayassa; tasmiṃ piṇḍe āgate āpatti saṅghādisesassa.
பி⁴க்கு²ங் அமூலகேன பாராஜிகேன த⁴ம்மேன அனுத்³த⁴ங்ஸனபச்சயா திஸ்ஸோ ஆபத்தியோ ஆபஜ்ஜதி – அனோகாஸங் காராபெத்வா சாவனாதி⁴ப்பாயோ வதே³தி, ஆபத்தி ஸங்கா⁴தி³ஸேஸேன து³க்கடஸ்ஸ; ஓகாஸங் காராபெத்வா அக்கோஸாதி⁴ப்பாயோ வதே³தி, ஆபத்தி ஓமஸவாத³ஸ்ஸ.
Bhikkhuṃ amūlakena pārājikena dhammena anuddhaṃsanapaccayā tisso āpattiyo āpajjati – anokāsaṃ kārāpetvā cāvanādhippāyo vadeti, āpatti saṅghādisesena dukkaṭassa; okāsaṃ kārāpetvā akkosādhippāyo vadeti, āpatti omasavādassa.
பி⁴க்கு²ங் அஞ்ஞபா⁴கி³யஸ்ஸ அதி⁴கரணஸ்ஸ கிஞ்சி தே³ஸங் லேஸமத்தங் உபாதா³ய பாராஜிகேன த⁴ம்மேன அனுத்³த⁴ங்ஸனபச்சயா திஸ்ஸோ ஆபத்தியோ ஆபஜ்ஜதி – அனோகாஸங் காராபெத்வா சாவனாதி⁴ப்பாயோ வதே³தி, ஆபத்தி ஸங்கா⁴தி³ஸேஸேன து³க்கடஸ்ஸ; ஓகாஸங் காராபெத்வா அக்கோஸாதி⁴ப்பாயோ வதே³தி, ஆபத்தி ஓமஸவாத³ஸ்ஸ.
Bhikkhuṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsanapaccayā tisso āpattiyo āpajjati – anokāsaṃ kārāpetvā cāvanādhippāyo vadeti, āpatti saṅghādisesena dukkaṭassa; okāsaṃ kārāpetvā akkosādhippāyo vadeti, āpatti omasavādassa.
ஸங்க⁴பே⁴த³கோ பி⁴க்கு² யாவததியங் ஸமனுபா⁴ஸனாய ந படினிஸ்ஸஜ்ஜனபச்சயா திஸ்ஸோ ஆபத்தியோ ஆபஜ்ஜதி – ஞத்தியா து³க்கடங்; த்³வீஹி கம்மவாசாஹி து²ல்லச்சயா; கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ.
Saṅghabhedako bhikkhu yāvatatiyaṃ samanubhāsanāya na paṭinissajjanapaccayā tisso āpattiyo āpajjati – ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
பே⁴த³கானுவத்தகா பி⁴க்கூ² யாவததியங் ஸமனுபா⁴ஸனாய ந படினிஸ்ஸஜ்ஜனபச்சயா திஸ்ஸோ ஆபத்தியோ ஆபஜ்ஜதி – ஞத்தியா து³க்கடங்; த்³வீஹி கம்மவாசாஹி து²ல்லச்சயா; கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ.
Bhedakānuvattakā bhikkhū yāvatatiyaṃ samanubhāsanāya na paṭinissajjanapaccayā tisso āpattiyo āpajjati – ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
து³ப்³ப³சோ பி⁴க்கு² யாவததியங் ஸமனுபா⁴ஸனாய ந படினிஸ்ஸஜ்ஜனபச்சயா திஸ்ஸோ ஆபத்தியோ ஆபஜ்ஜதி – ஞத்தியா து³க்கடங்; த்³வீஹி கம்மவாசாஹி து²ல்லச்சயா; கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ.
Dubbaco bhikkhu yāvatatiyaṃ samanubhāsanāya na paṭinissajjanapaccayā tisso āpattiyo āpajjati – ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
குலதூ³ஸகோ பி⁴க்கு² யாவததியங் ஸமனுபா⁴ஸனாய ந படினிஸ்ஸஜ்ஜனபச்சயா திஸ்ஸோ ஆபத்தியோ ஆபஜ்ஜதி – ஞத்தியா து³க்கடங்; த்³வீஹி கம்மவாசாஹி து²ல்லச்சயா; கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ…பே॰….
Kuladūsako bhikkhu yāvatatiyaṃ samanubhāsanāya na paṭinissajjanapaccayā tisso āpattiyo āpajjati – ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa…pe….
அனாத³ரியங் படிச்ச உத³கே உச்சாரங் வா பஸ்ஸாவங் வா கே²ளங் வா கரணபச்சயா கதி ஆபத்தியோ ஆபஜ்ஜதி? அனாத³ரியங் படிச்ச உத³கே உச்சாரங் வா பஸ்ஸாவங் வா கே²ளங் வா கரணபச்சயா ஏகங் ஆபத்திங் ஆபஜ்ஜதி. து³க்கடங் – அனாத³ரியங் படிச்ச உத³கே உச்சாரங் வா பஸ்ஸாவங் வா கே²ளங் வா கரணபச்சயா இமங் ஏகங் ஆபத்திங் ஆபஜ்ஜதி.
Anādariyaṃ paṭicca udake uccāraṃ vā passāvaṃ vā kheḷaṃ vā karaṇapaccayā kati āpattiyo āpajjati? Anādariyaṃ paṭicca udake uccāraṃ vā passāvaṃ vā kheḷaṃ vā karaṇapaccayā ekaṃ āpattiṃ āpajjati. Dukkaṭaṃ – anādariyaṃ paṭicca udake uccāraṃ vā passāvaṃ vā kheḷaṃ vā karaṇapaccayā imaṃ ekaṃ āpattiṃ āpajjati.
கதாபத்திவாரோ நிட்டி²தோ து³தியோ.
Katāpattivāro niṭṭhito dutiyo.
Footnotes:
