| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
২. সঙ্ঘাদিসেসকণ্ডাদি
2. Saṅghādisesakaṇḍādi
১৯২. যং তেন ভগৰতা জানতা পস্সতা অরহতা সম্মাসম্বুদ্ধেন উপক্কমিত্ৰাঅসুচিং মোচনপচ্চযা সঙ্ঘাদিসেসো কত্থ পঞ্ঞত্তো, কং আরব্ভ, কিস্মিং ৰত্থুস্মিং…পে॰… কেনাভতন্তি?
192. Yaṃ tena bhagavatā jānatā passatā arahatā sammāsambuddhena upakkamitvāasuciṃ mocanapaccayā saṅghādiseso kattha paññatto, kaṃ ārabbha, kismiṃ vatthusmiṃ…pe… kenābhatanti?
যং তেন ভগৰতা জানতা পস্সতা অরহতা সম্মাসম্বুদ্ধেন উপক্কমিত্ৰা অসুচিং মোচনপচ্চযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো। কং আরব্ভাতি? আযস্মন্তং সেয্যসকং আরব্ভ। কিস্মিং ৰত্থুস্মিন্তি? আযস্মা সেয্যসকো উপক্কমিত্ৰা অসুচিং মোচেসি, তস্মিং ৰত্থুস্মিং। অত্থি তত্থ পঞ্ঞত্তি, অনুপঞ্ঞত্তি, অনুপ্পন্নপঞ্ঞত্তীতি? একা পঞ্ঞত্তি, একা অনুপঞ্ঞত্তি। অনুপ্পন্নপঞ্ঞত্তি তস্মিং নত্থি। সব্বত্থপঞ্ঞত্তি, পদেসপঞ্ঞত্তীতি? সব্বত্থপঞ্ঞত্তি। সাধারণপঞ্ঞত্তি, অসাধারণপঞ্ঞত্তীতি? অসাধারণপঞ্ঞত্তি। একতোপঞ্ঞত্তি, উভতোপঞ্ঞত্তীতি? একতোপঞ্ঞত্তি। পঞ্চন্নং পাতিমোক্খুদ্দেসানং কত্থোগধং কত্থ পরিযাপন্নন্তি? নিদানোগধং নিদানপরিযাপন্নং। কতমেন উদ্দেসেন উদ্দেসং আগচ্ছতীতি? ততিযেন উদ্দেসেন উদ্দেসং আগচ্ছতি। চতুন্নং ৰিপত্তীনং কতমা ৰিপত্তীতি? সীলৰিপত্তি। সত্তন্নং আপত্তিক্খন্ধানং কতমো আপত্তিক্খন্ধোতি? সঙ্ঘাদিসেসাপত্তিক্খন্ধো। ছন্নং আপত্তিসমুট্ঠানানং কতিহি সমুট্ঠানেহি সমুট্ঠাতীতি? একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো…পে॰… কেনাভতন্তি? পরম্পরাভতং –
Yaṃ tena bhagavatā jānatā passatā arahatā sammāsambuddhena upakkamitvā asuciṃ mocanapaccayā saṅghādiseso kattha paññattoti? Sāvatthiyaṃ paññatto. Kaṃ ārabbhāti? Āyasmantaṃ seyyasakaṃ ārabbha. Kismiṃ vatthusminti? Āyasmā seyyasako upakkamitvā asuciṃ mocesi, tasmiṃ vatthusmiṃ. Atthi tattha paññatti, anupaññatti, anuppannapaññattīti? Ekā paññatti, ekā anupaññatti. Anuppannapaññatti tasmiṃ natthi. Sabbatthapaññatti, padesapaññattīti? Sabbatthapaññatti. Sādhāraṇapaññatti, asādhāraṇapaññattīti? Asādhāraṇapaññatti. Ekatopaññatti, ubhatopaññattīti? Ekatopaññatti. Pañcannaṃ pātimokkhuddesānaṃ katthogadhaṃ kattha pariyāpannanti? Nidānogadhaṃ nidānapariyāpannaṃ. Katamena uddesena uddesaṃ āgacchatīti? Tatiyena uddesena uddesaṃ āgacchati. Catunnaṃ vipattīnaṃ katamā vipattīti? Sīlavipatti. Sattannaṃ āpattikkhandhānaṃ katamo āpattikkhandhoti? Saṅghādisesāpattikkhandho. Channaṃ āpattisamuṭṭhānānaṃ katihi samuṭṭhānehi samuṭṭhātīti? Ekena samuṭṭhānena samuṭṭhāti – kāyato ca cittato ca samuṭṭhāti, na vācato…pe… kenābhatanti? Paramparābhataṃ –
উপালি দাসকো চেৰ, সোণকো সিগ্গৰো তথা।
Upāli dāsako ceva, soṇako siggavo tathā;
মোগ্গলিপুত্তেন পঞ্চমা, এতে জম্বুসিরিৰ্হযে॥ …পে॰…।
Moggaliputtena pañcamā, ete jambusirivhaye. …pe…;
এতে নাগা মহাপঞ্ঞা, ৰিনযঞ্ঞূ মগ্গকোৰিদা।
Ete nāgā mahāpaññā, vinayaññū maggakovidā;
ৰিনযং দীপে পকাসেসুং, পিটকং তম্বপণ্ণিযাতি॥
Vinayaṃ dīpe pakāsesuṃ, piṭakaṃ tambapaṇṇiyāti.
মাতুগামেন সদ্ধিং কাযসংসগ্গং সমাপজ্জনপচ্চযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো। কং আরব্ভাতি? আযস্মন্তং উদাযিং আরব্ভ। কিস্মিং ৰত্থুস্মিন্তি? আযস্মা উদাযী মাতুগামেন সদ্ধিং কাযসংসগ্গং সমাপজ্জি, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো…পে॰…।
Mātugāmena saddhiṃ kāyasaṃsaggaṃ samāpajjanapaccayā saṅghādiseso kattha paññattoti? Sāvatthiyaṃ paññatto. Kaṃ ārabbhāti? Āyasmantaṃ udāyiṃ ārabbha. Kismiṃ vatthusminti? Āyasmā udāyī mātugāmena saddhiṃ kāyasaṃsaggaṃ samāpajji, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca cittato ca samuṭṭhāti, na vācato…pe….
মাতুগামং দুট্ঠুল্লাহি ৰাচাহি ওভাসনপচ্চযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো। কং আরব্ভাতি? আযস্মন্তং উদাযিং আরব্ভ। কিস্মিং ৰত্থুস্মিন্তি? আযস্মা উদাযী মাতুগামং দুট্ঠুল্লাহি ৰাচাহি ওভাসি, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি – সিযা কাযতো চ চিত্ততো চ সমুট্ঠাতি, ন ৰাচতো; সিযা ৰাচতো চ চিত্ততো চ সমুট্ঠাতি, ন কাযতো; সিযা কাযতো চ ৰাচতো চ চিত্ততো চ সমুট্ঠাতি…পে॰…।
Mātugāmaṃ duṭṭhullāhi vācāhi obhāsanapaccayā saṅghādiseso kattha paññattoti? Sāvatthiyaṃ paññatto. Kaṃ ārabbhāti? Āyasmantaṃ udāyiṃ ārabbha. Kismiṃ vatthusminti? Āyasmā udāyī mātugāmaṃ duṭṭhullāhi vācāhi obhāsi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti – siyā kāyato ca cittato ca samuṭṭhāti, na vācato; siyā vācato ca cittato ca samuṭṭhāti, na kāyato; siyā kāyato ca vācato ca cittato ca samuṭṭhāti…pe….
মাতুগামস্স সন্তিকে অত্তকামপারিচরিযায ৰণ্ণং ভাসনপচ্চযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো। কং আরব্ভাতি? আযস্মন্তং উদাযিং আরব্ভ। কিস্মিং ৰত্থুস্মিন্তি? আযস্মা উদাযী মাতুগামস্স সন্তিকে অত্তকামপারিচরিযায ৰণ্ণং ভাসি, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে॰…।
Mātugāmassa santike attakāmapāricariyāya vaṇṇaṃ bhāsanapaccayā saṅghādiseso kattha paññattoti? Sāvatthiyaṃ paññatto. Kaṃ ārabbhāti? Āyasmantaṃ udāyiṃ ārabbha. Kismiṃ vatthusminti? Āyasmā udāyī mātugāmassa santike attakāmapāricariyāya vaṇṇaṃ bhāsi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
সঞ্চরিত্তং সমাপজ্জনপচ্চযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো। কং আরব্ভাতি? আযস্মন্তং উদাযিং আরব্ভ। কিস্মিং ৰত্থুস্মিন্তি? আযস্মা উদাযী সঞ্চরিত্তং সমাপজ্জি, তস্মিং ৰত্থুস্মিং। একা পঞ্ঞত্তি, একা অনুপঞ্ঞত্তি। ছন্নং আপত্তিসমুট্ঠানানং ছহি সমুট্ঠানেহি সমুট্ঠাতি – সিযা কাযতো সমুট্ঠাতি, ন ৰাচতো ন চিত্ততো; সিযা ৰাচতো সমুট্ঠাতি, ন কাযতো ন চিত্ততো; সিযা কাযতো চ ৰাচতো চ সমুট্ঠাতি, ন চিত্ততো; সিযা কাযতো চ চিত্ততো চ সমুট্ঠাতি, ন ৰাচতো; সিযা ৰাচতো চ চিত্ততো চ সমুট্ঠাতি, ন কাযতো; সিযা কাযতো চ ৰাচতো চ চিত্ততো চ সমুট্ঠাতি…পে॰…।
Sañcarittaṃ samāpajjanapaccayā saṅghādiseso kattha paññattoti? Sāvatthiyaṃ paññatto. Kaṃ ārabbhāti? Āyasmantaṃ udāyiṃ ārabbha. Kismiṃ vatthusminti? Āyasmā udāyī sañcarittaṃ samāpajji, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ chahi samuṭṭhānehi samuṭṭhāti – siyā kāyato samuṭṭhāti, na vācato na cittato; siyā vācato samuṭṭhāti, na kāyato na cittato; siyā kāyato ca vācato ca samuṭṭhāti, na cittato; siyā kāyato ca cittato ca samuṭṭhāti, na vācato; siyā vācato ca cittato ca samuṭṭhāti, na kāyato; siyā kāyato ca vācato ca cittato ca samuṭṭhāti…pe….
সঞ্ঞাচিকায কুটিং কারাপনপচ্চযা সঙ্ঘাদিসেসো কত্থ পঞ্ঞত্তোতি ? আল়ৰিযং পঞ্ঞত্তো। কং আরব্ভাতি? আল়ৰকে ভিক্খূ আরব্ভ। কিস্মিং ৰত্থুস্মিন্তি? আল়ৰকা ভিক্খূ সঞ্ঞাচিকায কুটিযো কারাপেসুং, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং ছহি সমুট্ঠানেহি সমুট্ঠাতি…পে॰…।
Saññācikāya kuṭiṃ kārāpanapaccayā saṅghādiseso kattha paññattoti ? Āḷaviyaṃ paññatto. Kaṃ ārabbhāti? Āḷavake bhikkhū ārabbha. Kismiṃ vatthusminti? Āḷavakā bhikkhū saññācikāya kuṭiyo kārāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
মহল্লকং ৰিহারং কারাপনপচ্চযা সঙ্ঘাদিসেসো কত্থ পঞ্ঞত্তোতি? কোসম্বিযং পঞ্ঞত্তো। কং আরব্ভাতি? আযস্মন্তং ছন্নং আরব্ভ। কিস্মিং ৰত্থুস্মিন্তি? আযস্মা ছন্নো ৰিহারৰত্থুং সোধেন্তো অঞ্ঞতরং চেতিযরুক্খং ছেদাপেসি, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং ছহি সমুট্ঠানেহি সমুট্ঠাতি…পে॰…।
Mahallakaṃ vihāraṃ kārāpanapaccayā saṅghādiseso kattha paññattoti? Kosambiyaṃ paññatto. Kaṃ ārabbhāti? Āyasmantaṃ channaṃ ārabbha. Kismiṃ vatthusminti? Āyasmā channo vihāravatthuṃ sodhento aññataraṃ cetiyarukkhaṃ chedāpesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
ভিক্খুং অমূলকেন পারাজিকেন ধম্মেন অনুদ্ধংসনপচ্চযা সঙ্ঘাদিসেসো কত্থ পঞ্ঞত্তোতি? রাজগহে পঞ্ঞত্তো। কং আরব্ভাতি? মেত্তিযভূমজকে ভিক্খূ আরব্ভ। কিস্মিং ৰত্থুস্মিন্তি? মেত্তিযভূমজকা ভিক্খূ আযস্মন্তং দব্বং মল্লপুত্তং অমূলকেন পারাজিকেন ধম্মেন অনুদ্ধংসেসুং, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে॰…।
Bhikkhuṃ amūlakena pārājikena dhammena anuddhaṃsanapaccayā saṅghādiseso kattha paññattoti? Rājagahe paññatto. Kaṃ ārabbhāti? Mettiyabhūmajake bhikkhū ārabbha. Kismiṃ vatthusminti? Mettiyabhūmajakā bhikkhū āyasmantaṃ dabbaṃ mallaputtaṃ amūlakena pārājikena dhammena anuddhaṃsesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
ভিক্খুং অঞ্ঞভাগিযস্স অধিকরণস্স কিঞ্চিদেসং লেসমত্তং উপাদায পারাজিকেন ধম্মেন অনুদ্ধংসনপচ্চযা সঙ্ঘাদিসেসো কত্থ পঞ্ঞত্তোতি? রাজগহে পঞ্ঞত্তো। কং আরব্ভাতি? মেত্তিযভূমজকে ভিক্খূ আরব্ভ। কিস্মিং ৰত্থুস্মিন্তি? মেত্তিযভূমজকা ভিক্খূ আযস্মন্তং দব্বং মল্লপুত্তং অঞ্ঞভাগিযস্স অধিকরণস্স কিঞ্চি দেসং লেসমত্তং উপাদায পারাজিকেন ধম্মেন অনুদ্ধংসেসুং, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে॰…।
Bhikkhuṃ aññabhāgiyassa adhikaraṇassa kiñcidesaṃ lesamattaṃ upādāya pārājikena dhammena anuddhaṃsanapaccayā saṅghādiseso kattha paññattoti? Rājagahe paññatto. Kaṃ ārabbhāti? Mettiyabhūmajake bhikkhū ārabbha. Kismiṃ vatthusminti? Mettiyabhūmajakā bhikkhū āyasmantaṃ dabbaṃ mallaputtaṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
সঙ্ঘভেদকস্স ভিক্খুনো যাৰততিযং সমনুভাসনায ন পটিনিস্সজ্জনপচ্চযা সঙ্ঘাদিসেসো কত্থ পঞ্ঞত্তোতি? রাজগহে পঞ্ঞত্তো। কং আরব্ভাতি? দেৰদত্তং আরব্ভ। কিস্মিং ৰত্থুস্মিন্তি? দেৰদত্তো সমগ্গস্স সঙ্ঘস্স ভেদায পরক্কমি, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ ৰাচতো চ চিত্ততো চ সমুট্ঠাতি…পে॰…।
Saṅghabhedakassa bhikkhuno yāvatatiyaṃ samanubhāsanāya na paṭinissajjanapaccayā saṅghādiseso kattha paññattoti? Rājagahe paññatto. Kaṃ ārabbhāti? Devadattaṃ ārabbha. Kismiṃ vatthusminti? Devadatto samaggassa saṅghassa bhedāya parakkami, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca vācato ca cittato ca samuṭṭhāti…pe….
ভেদকানুৰত্তকানং ভিক্খূনং যাৰততিযং সমনুভাসনায ন পটিনিস্সজ্জনপচ্চযা সঙ্ঘাদিসেসো কত্থ পঞ্ঞত্তোতি? রাজগহে পঞ্ঞত্তো। কং আরব্ভাতি? সম্বহুলে ভিক্খূ আরব্ভ। কিস্মিং ৰত্থুস্মিন্তি? সম্বহুলা ভিক্খূ দেৰদত্তস্স সঙ্ঘভেদায পরক্কমন্তস্স অনুৰত্তকা অহেসুং ৰগ্গৰাদকা, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং একে সমুট্ঠানেন সমুট্ঠাতি – কাযতো চ ৰাচতো চ চিত্ততো চ সমুট্ঠাতি…পে॰…।
Bhedakānuvattakānaṃ bhikkhūnaṃ yāvatatiyaṃ samanubhāsanāya na paṭinissajjanapaccayā saṅghādiseso kattha paññattoti? Rājagahe paññatto. Kaṃ ārabbhāti? Sambahule bhikkhū ārabbha. Kismiṃ vatthusminti? Sambahulā bhikkhū devadattassa saṅghabhedāya parakkamantassa anuvattakā ahesuṃ vaggavādakā, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ eke samuṭṭhānena samuṭṭhāti – kāyato ca vācato ca cittato ca samuṭṭhāti…pe….
দুব্বচস্স ভিক্খুনো যাৰততিযং সমনুভাসনায ন পটিনিস্সজ্জনপচ্চযা সঙ্ঘাদিসেসো কত্থ পঞ্ঞত্তোতি? কোসম্বিযং পঞ্ঞত্তো। কং আরব্ভাতি? আযস্মন্তং ছন্নং আরব্ভ। কিস্মিং ৰত্থুস্মিন্তি? আযস্মা ছন্নো ভিক্খূহি সহধম্মিকং ৰুচ্চমানো অত্তানং অৰচনীযং অকাসি, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ ৰাচতো চ চিত্ততো চ সমুট্ঠাতি…পে॰…।
Dubbacassa bhikkhuno yāvatatiyaṃ samanubhāsanāya na paṭinissajjanapaccayā saṅghādiseso kattha paññattoti? Kosambiyaṃ paññatto. Kaṃ ārabbhāti? Āyasmantaṃ channaṃ ārabbha. Kismiṃ vatthusminti? Āyasmā channo bhikkhūhi sahadhammikaṃ vuccamāno attānaṃ avacanīyaṃ akāsi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca vācato ca cittato ca samuṭṭhāti…pe….
কুলদূসকস্স ভিক্খুনো যাৰততিযং সমনুভাসনায ন পটিনিস্সজ্জনপচ্চযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো। কং আরব্ভাতি? অস্সজিপুনব্বসুকে ভিক্খূ আরব্ভ। কিস্মিং ৰত্থুস্মিন্তি? অস্সজিপুনব্বসুকা ভিক্খূ সঙ্ঘেন পব্বাজনীযকম্মকতা ভিক্খূ ছন্দগামিতা দোসগামিতা মোহগামিতা ভযগামিতা পাপেসুং, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ ৰাচতো চ চিত্ততো চ সমুট্ঠাতি…পে॰…।
Kuladūsakassa bhikkhuno yāvatatiyaṃ samanubhāsanāya na paṭinissajjanapaccayā saṅghādiseso kattha paññattoti? Sāvatthiyaṃ paññatto. Kaṃ ārabbhāti? Assajipunabbasuke bhikkhū ārabbha. Kismiṃ vatthusminti? Assajipunabbasukā bhikkhū saṅghena pabbājanīyakammakatā bhikkhū chandagāmitā dosagāmitā mohagāmitā bhayagāmitā pāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca vācato ca cittato ca samuṭṭhāti…pe….
অনাদরিযং পটিচ্চ উদকে উচ্চারং ৰা পস্সাৰং ৰা খেল়ং ৰা করণপচ্চযা দুক্কটং কত্থ পঞ্ঞত্তন্তি? সাৰত্থিযং পঞ্ঞত্তং। কং আরব্ভাতি? ছব্বগ্গিযে ভিক্খূ আরব্ভ। কিস্মিং ৰত্থুস্মিন্তি? ছব্বগ্গিযা ভিক্খূ উদকে উচ্চারম্পি পস্সাৰম্পি খেল়ম্পি অকংসু, তস্মিং ৰত্থুস্মিং। একা পঞ্ঞত্তি, একা অনুপঞ্ঞত্তি। ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো…পে॰…।
Anādariyaṃ paṭicca udake uccāraṃ vā passāvaṃ vā kheḷaṃ vā karaṇapaccayā dukkaṭaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū udake uccārampi passāvampi kheḷampi akaṃsu, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca cittato ca samuṭṭhāti, na vācato…pe….
কত্থপঞ্ঞত্তিৰারো নিট্ঠিতো পঠমো।
Katthapaññattivāro niṭṭhito paṭhamo.
